العاب اون لاين: العاب بلياردو | العاب سيارات | العاب دراجات | العاب طبخ | العاب تلبيس |العاب بنات |العاب توم وجيري | العاب قص الشعر |
للشكاوي والاستفسار واستعادة الرقم السري لعضوية قديمة مراسلة الإدارة مراسلتنا من هنا |
|
|
|
أدوات الموضوع | التقييم: | انواع عرض الموضوع |
#1
|
||||
|
||||
حبيبتي نامت !
صباحكم بردقان .. ومساكم كالعاده توت بالجزر << أموت في الكوكتيل أنا يا جماعه ،،
عنوان الموضوع يقوطر رومانسيه .. وكلّه دلع وخقخقه .. وهذي هي الموضه ومواكبتها .. ولازم الواحد من تالي يتطوّر ويمشي زي العالم .. إلى متى واحنا متجوّخين بين اكياس الشعير وصبايب الحلال . الحُب كلمه عظيمه وكلّها على بعضها ( حرفين ) .. سهلة الكِتابة والنُطق .. بل وحتى الإنتساب لها ! من صغرتي وانا اسمع كلمة ( احبك ) .. بس من تالي حاولت أفكفك أبو حروفها وشفراتها واحاول أني أوصل لمكنونها وحوافرها اللي يمكن تكون خافيه علي . في المدرسة ومن أيام الإبتدائي كان مُدرّسنا ( حامد أبو طبنجه ) .. أجنبي عن البلد .. وكان من يبدى الدرس وهو يفكّر ويخوبص بعلومه وبدل مايقول ( واحد زايد واحد يساوي كمْ ؟ ) كان يقول ( إذا صرت أنا أحبّها .. خبّروني باللهِ كيف الطريق ؟ ) ! حتى مُدير المدرسه ( حسن لبنيه ) كان يحب بشكل خطير .. حتى إن جدارن المدرسه ودورات المياه – الله يكرمكم - كانت تشرشحه وكان يُكتب عليها بالخط العريض الأحمر .. والمتنيّل بسبعين نيله : ( يا شباب .. ترى المُدير حسن يحبّها وحبّه مقطّعن كرشته يوم انه يجي الصباح متأخر ) بل أن الحُب تعدّاهم ووصل للفرّاش اللي كان معلّق على باب المدرسة لوحة صغيره كرتونيّه وكاتب عليها بخطّه اللي رايحن فيها : ( الحُب طريقك للهلاك واكبر دليل شوفو حالتي ) وحاط سهم صغير على باب غرفته ! يعني تفكيري كان ممزوج من صغرتي إلى حد شبابي الآن يوم صرت أفكّر في كلمة ( حُب ) .. واحاول أعرف وش تكون هالكلمه ومن أي ديره ومن أي حموله ووين ساكنه ! يقولون أن الحُب مصّع قلوب البعارين .. بل حتى أنه وصل لدرجة أن البعض صار يرسم ويخطط على جدارن الحواري ولاتهون أبواب الحمّامات - الله يكرمكم – : احبك حب جوعان – يشوف الحطب ( شابوره ) واحبك حب سكران – ينادي العنـز ( يانوره ) وقبل كم يوم كنت ( حاقطن ) أذني على الوالده وهي تكلّم خالتي .. وهذا من زود الفراغ اللي عندي .. يعني لما أشوف نفسي فاضي أسحب نفسي شوي شوي لين أوصل للسماعه وتكون الوالده تكلّم لها وحده من الحريم .. واحاول أسترق السمع والقط من سواليف هالحريم اللي تخليني أموت عليها من الضحك .. كانت الوالده تكلّم خالتي وتقول لها : هاه وش عشاكم اليوم .. قالت خالتي : عشانا اليوم ( مرقه ) .. طقّتها ضحكه الوالده – الله يطوّل بعمرها – وقالت : أجل رجلتس اليوم مهوب فيه << والله السوالف بعد ! بعدها تغيّرت الموجه من الوجبات الغذائية إلى الكلام عن بنت جارتنا ( فاطمه ) وان رجلها ماحبّها .. وانها راحت لبيت اهلها بعد ماجمعت عفشها وشالت اغراضها .. وان رجلها اصلاً مهوب " صريْ " يوم انه يسافر لبرا وتاركن مرته عند بزرها .. حتى الحليب حق بزرها ماشراه لها ! وختمو السالفه بسرعه يوم ان رجل خالتي دخل البيت واختبصت خالتي وقالتي للوالده : يالله رجلنا جا .. سلام .. وسكّرت السماعه في وجه الوالده ! مسكينه ( فاطمه ) رجلها مايعرف من الحُب إلا اسمه .. ولايعرف من طريق الحُب إلا رسمه ! دحيّم يحب سويّر .. وراشد يحب عنزته بالحوش .. وسالم المنزوي مايحب إلا ( جعفر ) راعي المطعم عشان بطنه .. وانا حُبّي غير ! قبل أيام كانت الوالده الغاليه في سفره ليست بالقريبه .. بل بعيده بالنسبه لي .. وحين حضورِها للمنزل بعد عناء سَفَرِهم المُتعِب .. وقعت في فراشِها تعباً من طول السفر .. كُنت أنا خارج المنزل .. حاولت السُرعه في قطع الطريق لأنال منها ( قُبلةً ) على رأسِها الحاني .. ولكن – قدر الله وماشاء فعل – حضرت للمنزل .. وجدتها ( نائمه ) .. حينها قُلت في سِوارِ نفسي ( حبيبتي نامت ) .. وخططت هذه الكلمات والتي هي أقلّ من القليل بشأن من أُحِبُها من كُل قلبي ! أحبتس يالطخما ،، :: مدمن شاهي ::
|
#2
|
|||
|
|||
اللـــــــــــــــــــــــــــــه حركاااات اثرك رومانصي
احسبك بس تتمسخر ..طلعت شي ! الله يخلي لك الوالده يارب .. إلا وش اخبار سويـــــــــر ؟! احسك ودك تسولف عنها .. دام موضوعك عن الحب ..لكن شكلك خجلان وبعدين تعال : ثاني مره لاتقط اذنك على سوالف الحريم اوكي.. تشكـــــــــــــــــــرات كثيرات
|
#3
|
||||
|
||||
ياسلام عليك يامدمن شاهي 000
فيك روح المرح طاغي على اسلوبك وعباراتك روح يامال الفردوس الاعلى00 اللطيفة00
|
#4
|
|||
|
|||
احبك حب جوعان – يشوف الحطب ( شابوره )
واحبك حب سكران – ينادي العنـز ( يانوره ) ههههههه ..اسلوبك رووووعه.. الله يخليلك الوالده ومن تحب.. تحياتي احاسيس
|
#5
|
||||
|
||||
الله يفشل العدو لا عاد تتسمع على سواليف الحريم !! موضوعك جميل جدا تسلم الايادي
|
#6
|
||||
|
||||
حياك الله يامدمن شاهي
شايله التكلفه اسمك متكلف من غير شي الحب احتفظ بهذا الحب مدام ينبض فلن تجد لطهر الحب معنى الا في هذا النبض وفي ذلك القلب وما عاداة حب بالوان اخرى ......................................... بعضها ليس له رائحه والبعض ليس له طعم والبعض منه لا رائحه ولا طعم ....................................... فغتنم وارتوي من هذا الحب فلن تعرف للحب معنى بعده حفظ الله لك الوالدة وادام حبك لها مادعيت لك ان يديم حبها لك لاني اعرف ان حبها نهر لا ينقطع ولكن الابناء هم من يقصرون احيانا وانشاء الله تموت في دبديبها عاد الموضوع هذا هو اللي يستاهل خمس ميت نجمه مو خمس نجوم يعطيك العافيه
|
#7
|
|||
|
|||
والله امتعتنا يالمدمن .
|
#8
|
|||
|
|||
الله يخلي لك الوالدة , ويقدرك على برها ورضاها
تسلم يدينك على هالموضوع الرايق , تكلمت عن موضوع مهم , بأسلوب مررررررره خفيف وحلو. يعطيك العافية.....
|
#9
|
|||||||||||||||||||||||||
|
|||||||||||||||||||||||||
كنت ناوي أجيب طاريها .. لكن تذكّرت أن رجلها جايّن للديره وماتسوى المحارش ! سعيد بمرورك
|
#10
|
|||
|
|||
مبدع كالعادة..... أحسنت يامدمن الشاي
|
مواقع النشر (المفضلة) |
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
راديو قصيمي نت | مطبخ قصيمي نت | قصص قصيمي نت | العاب قصيمي نت |