عندي احد اخواني يبي يتزوج
خريج جامعي وشطور ويحب الحياه .
قلت في نفسي ابي ابحث له عن زوجه بنفس طموحه ومستواه
الدراسي العالي .
فيه احد اصحابي اخته خريجة احد التخصصات العلميه الصعبه
وكل مستوياتها الثقافيه والعلميه قريبه من مستوى اخوي.
قلت ابد غمزت الصناره وجاك الصيد يالعازف وبتكتمل حياة اخوك بمن يحب.
طبعا لسا ماسويت شيء ولا فاتحت حتى اخوي بالموضوع
كنت مع صاحبي اللي هو اخو البنت
وجلس يتكلم عن اخته المتزوجه اللي هي اخت من غمزت صنارتنا عليها.
وقال كنت انا وهيه امس بالمحكمه
قلت خيرر وش فيه
قال ابد رفعت شكوى طلب خلع من زوجها
قلت ياستير شلي صار يابو احمد
قال ابد ماتبي تعيش معاه واكتشفت ان التوافق بينهم زيروو
وماقدرت تتعايش مع حياته وبدائية تعامله.
قلت بينهم عيال قال ولاهمها وظيفتها موجوده والمحكمه بتجبره
على نفقه وسكن .
قلت طيب حاول معاها بالنصيحه
قال لا والله انا كنت مؤيد لمطالبها .
قلت انا وش صاير على الناس وليه صارت موضة الخلع عاده في مجتمعنا.
المهم حمدت ربي ان الموقف حصل قبل لا أورط اخوي
في زواج يمكن مايجني من وراه الا التعب والهم وجرجرة المحاكم..