السلام عليكم ورحمة الله وبركاته
فات العجاج وقلت بالخير متبوع ....... واثر العجاجه مقتفيها عجاجه
يوم السبت الماضى كان موعد عودتى الى الكويت قادما من لندن
فى الصباح اتانا صاحب التاكسى لتوصيلنا الى مطار هثرو للمغادره وكان الجو جميل جدا
الدنيا غيم ورذاذ المطر يتساقط
المهم وصلنا المطار واقلعت فينا الطائره متوجهه للكويت
وبعد ست ساعات وصلنا الى الاجواء الكويتيه واذا بقائد الطائره يقول وصلنا وسوف نهبط بعد قليل
واعلن حالة الطقس فى الكويت
وقال ان الاجواء حاره ودرجة الحراره بالاربعينات والرياح شديده الى متوسطه مثيره للغبار
المهم نزلنا والا بموظفين المطار حاطين كمامات
قلت يالله عسى خير
بعد ما انهينا الاجرائات وخرجنا الى خارج المطار والا الدنيا لونها صاير اصفر غبار وحر
قلت ياسبحان الله قبل ست ساعات كنا فى اجواء بارده وامطار والحين حراره وغبار
عاد قلت حق المدام هالاوربيين الله معطيهم الاجواء الحلوه واحنا حر وغبار
قالت ايه اهم كفار لهم الدنيا واحنا المسلمين لنا الآخره
قلت يرحم والديك اسكتى لا اعطيك بكس
يعنى بس احنا اللى مسلمين بالدنيا
ماالاتراك مسلمين والبوسنه مسلمين وسوريا وخميس مشيط وابها .. كلهم مسلمين واجوائهم حلوه
اشمعنا بس احنا اللى لنا الآخره من دون الدنيا
الزبده طيرت عيونها على وسكت
قلت مالى الا اعزائى اعضاء قصيمى نناقش معاهم الماضوع
يا اخوان
الحين الحراره المرتفعه فى دول الخليج مالها حل... واحنا متقبلين الامر هذا
ولكن
الغبار اللى ذبحنا وش الحل فيه ؟؟؟
معقوله دول مصدره للنفط ودول غنيه ماتستطيع ان تعالج التربه وتقضى على الغبار
الا يوجد حل لمشكلة التصحر ؟؟
مثلا معالجه للتربه والزراعه وانشاء محطات تحليه لماء البحر لهذه الصحراء
انا دائما اسمع ان انقطاع الامطار بسبب الفساد
طيب الفساد موجود بجميع دول العالم ... ماهو بس فى الخليج عشان الله يعاقبنا عليه
مثلا تركيا وسوريا ولبنان كلهم فيهم فساد ولكن اجوائهم مافيه احسن منها
فيه منطقه بسوريا اسمها مشتى حلو
حتى اوربا مو نفس اجوائها ... الغيم يدخل عليك مع الدرايش وامطارهم مستمره طول السنه
ومع هذا المراقص شغاله طول الليل !!
الامر الثانى اللى دائما اسمعه يقولون ان الحاكم له دور بانقطاع الامطار
ويقولون انه فى حكم التابعى عمر بن عبد العزيز والذى اشتهر بعدله بين الناس وزهده
كانت الدنيا ربيع والجو بديع
هل مثل هذا الكلام صحيح ؟؟ وان الحاكم ان كان يحكم بالعدل فان الله يكافئه بالامطار والربيع
واذا كان لايحكم بشرع الله وعدم عدله بين الناس يمسك الله المطر عن النزول ؟
طيب تركيا حولوها الى دوله علمانيه واجوائهم جميله وامطارهم مستمره
وشلون تصير المقارنه ؟
انا بصراحه من وعيت على الدنيا ماعمرى شفت ربيع فى الكويت
فى الشتاء برد قارص وفى الصيف حراره وغبار ... واعتقد ان نجد نفس اجواء الكويت
الربيع والخريف نسمع فيهم بس ماعمرنا شفناهم
السؤال اللى يطرح نفسه
هل فعلا الحاكم له دور فى عدم نزول الغيث بسبب عدم عدله بين الناس ؟
ام ان السبب هو اهمال من الحكومات العفنه بعدم معالجتهم للتصحر ؟؟
وشكرا لكم