16-12-11, 10:45 AM
|
|
|
اول شئ بالنسبه للبن اللي يحبون يحمسونه بالبيت
احنا نجيب البن الاخياش ابو خمسه كيلوحسب النوع اللي تحبونه
احنا نجيب الخولاني او الهرري افضل شئ
لما تحمسينه خلاص وتطفين عنه النار رشي عليه حبات المستكه وافضل مستكه
نوع اسمه( المستكه السلطاني)غالي بس يستاهل
انا اتكلم عن كميه لاتقل عن اقل شئ كيلوين يعني كميه كبيره
وحطي ملي كفك هيل ومليها كمان قرنفل وفيه ناس يحبون يحمسون معاه الشيبه
بس اللي يحط الشيبه مايحط المستكه احس كل نوع لوحده افضل
واطحنيهم مع بعض عند الطحان وشوفي الريحه لما تجيبينهم
واحفظيهم بعلبه بالفريزه وكل فتره خذي كميه واحيانا اجيبه جاهز حسب النفسيه
واخذ الحمسه الوسط وان شفتها فاتحه اخذ ربع غامق واخلطهم مع بعض
وممكن تحطين المستكه على القهوه وهي تغلي تعطي ريحه مره حلوه تفوح بالبيت
وممكن ترمين كم حبه بالدله قبل ماتصبين القهوه فيها كذا خيارعندك
انا احطها مع البن وقت الحمس واحيانا وهي تغلي واحط فحم عالنار وابخر الفناجين
بالمستكه واكفيها على وجهها عشان تمسك الريحه وذوقيها كانك تشربين قهوه على حطب
والقهوه انواع
عندنا قهوة الهيل بالخلطه والجنزبيل هذي قهوتنا اليوميه
وللضيوف نفس الشئ ونحب الهيل كثييييييييرشئ نغليه وشئ بالدله
وقهوة النانخه
وقهوة الكزبره الناشفته تعلمتها من وحده بدويه فنانه في القهوه
وقهوة الشعير
وعندنا من اسرار القهوه
الخلطه القصيميه مايحتاج فيها كل ماتحتاجه القهوه
الحليب قلييييل من الحليب بالملعقه حقت السكر الصغيره تحلينه بقليل ماء
وتحطينه عالقهوه وهي تغلي وهذا اقوى سر يخلي القهوه لذيذه لانه يشيل
المرار ومايخلي القهوه تخرب بسرعه ويعطيها شكل وقوام لما تصبينها حلو
واستخدمه بكل انواع القهوه من احنا صغار وجداتي يسوونها وكبرنا واحنا عليها
وانتشرت عندنا شغلة وضع الحليب الكل صار يسويهاواللي مايعرف هالسر
ويذوق قهوتنا يقول كيف تخلون القهوه كذا اش حاطين عليها طبعا الحليب
والخلطه القصيميه افضل شئ عالقهوه
واللي يستغربون اقول قليييييييييل موذاك اللي يبين طعمه براس الملعقه حقت
الحلا بس ان كان مجفف يذوب بقليل ماء او حليب بوني او اي حليب سائل
ينفع بحجم صبة القهوه او اقل كمان حسب الكميه جربوها وبعدين احكموا
طبعا لو كثر بيخرب طعمها
الجنزبيل الاخضر تبشرينه طازه وتحطينه بالدله وتصبين عليه القهوه حرارته اقل
وطعمه الذ واكثر فائده
النانخه والكزبره
للي معدتهم تتعب من الهيل ذقتها من يد حريم كبار وفنانات بالقوه وصرت اسويها
وفيه كمان اضافات كثيره حسب ذوق كل ضيف ناس يحبون المسمار
هذا صديق زوجي عتيبي يحب طريقتي فالقهوه يجي مخصوص يطلب قهوه
واسويها لهم فدلال رسلان على الفحم
وفيه اللي يحبونها بالقرفه هذي انا ماحبيتها بس اذواق
وفيه اللي يحبون الزعفران كثير نجيب الزعفران الايراني افضل شئ
هالحين ماصرت اركز من التعب نكمل فوقت ثاني واذا فيه اي استفسار حطوه
|