08-11-09, 11:42 PM
|
|
البارحه يوم الخلايق نياما **** بيّحت من كثر البكى كل مكنون
قمت أتوجّد وأنثر الما على ما **** من فوق عيني دمعها كان مخزون
ولي ونة ٍ من سمعَها ما يناما **** كني صويب ٍ بين الأضلاع مطعون
و إلا كما ونة كسير السْلاما **** خلّوه ربعه للمعادين مديون
في ساعة ٍ قل الرجا والمحاما **** فيما يطالع يومهم عنه يقفون
و إلا فونة راعبيّ الحماما **** غاد ٍ ذكرها والقوانيص يرمون
تسمع لها بين الجرايد حطاما **** من نوحها تدع ِ المواليف يبكون
و إلا خلوج ٍ سابة ٍ للهياما **** على حوار ٍ ضايع ٍ في ضحى الكون
و إلا حوار ٍ مشْيِقوا له شماما **** وهي تطالع يوم جرّوه بعيون
يردون مثله والضوامي صياما ****اترزّموا معها وقاموا يحنّون
و إلا رضيع ٍ جرّعوه الفطاما **** أمه غدت قبل أربعينه يتمّون
عليك ياللي شربت كاس المحاما **** صرف ٍ بتقدير ٍ من الله ماذون
جاه القضا من بعد شهر الصياما **** صافي الجبين بثاني العيد مدفون
كسوه من عرض الخرق ثوب خاما **** و قاموا عليه من الترايب يهلّون
راحوا بها حروة صلاة اليِماما **** عند الدفن قاموا لها الله يدعون
برضاه والجنه وحسن الختاما **** ودموع عيني فوق خدي يهلّون
حطّوه في قبر ٍ عساه الهياما **** في مهمة ٍ من عد الأموات مسكون
يا حفرة ٍ يسقي ثراك الغماما **** مزن ٍ من الرحمه عليها يصبّون
جعل البخَتري والنفل والخزامى **** ينبت على قبر ٍ هو فيه مدفون
مرحوم ياللي ما مشى بالملاما **** جيران بيته راح ما منه يشكون
وا وسع عذري وان هجرت المناما **** ورافقت من عقب العقل كل مجنون
أخذت انا ويّاه سبعة عواما **** مع مثلهن في كيفة ٍ ما لها لون
والله كنها يا عرب صرف عاما **** يا عونة الله صرف الأيام وشلون؟
و أكبر همومي من بزور ٍ يتاما **** و إن شفتهم قدام وجهي يبكّون
و ان قلت لا تبكون قالوا علاما؟**** نبكي ويبكي مثلنا كل محزون
قلت السبب تبكون؟ قالوا يتاما **** قلت اليتيم أياي وانتم تسجّون
مع البزور وكل جرح ٍ يلاما **** إلا جروح بخاطري ما يطيبون
جرحي عميق ٍ مثل كسر السلاما **** الى مكَن.. عنه الأطبّا يعجزون
قمت اتشكّى عند ربع ٍ عذاما **** جوني على فرقا خليلي يعزّون
قالوا تجوّز وانس لامه بلاما **** بعض العذارى عن بعضهن يسلّون
قلت انها لي وفّقت بالولاما **** ولو جمعتوا نصفهن ما يسدّون
ما ظنّتي تلقون مثله حراما **** أيضا ولا فيهن على السر مامون
و أخاف انا من غاديات الذماما **** اللي على ضيم الدهر ما يتاقون
أو خبلة ٍ ما عقلها بالتماما **** تضحك وهي تلدغ على الكبد بالهون
توذي عيالي بالنهر والكلاما **** و أنا تجرّعني من المر بصحون
والله يا لولا هالصغار اليتاما **** و أخشى من السكّه عليهم يضيعون
لا أقول كل البيض عقبه حراما **** و أصبر كما يصبر على الحبس مسجون
عليه مني كل يوم ٍ سلاما **** عدّت حجيج البيت واللي يطوفون
وصل على سيّد جميع الأناما على النبي ياللي حضرتوا تصلون
التوقيع
|
بـاقــول مـاقـالـه رشـيــد الــزلامــي
بعض الغـلا يفنـي قلـوب الرجاجيـل
يا للي خذيت الحسن نجدي وشامـي
يامملـكـة روعـــه ويافـتـنـة الـجـيـل
|
|