مسيكم بالخير
الله لايشغلنا بالدنيا بغيت اسوي فيها تاجرة ولافلحت
المهم الله يرزقني سيارة واسجل في اوبر بس شايلة هم الزبون لو طلع رجال
ماقد صارلي الا موقف واحد مع اوبر
مرة من المرات رحنا حديقة نحضر فعالية والأخت مانامت زين واذا مانمت افهي واجيب العيد دايم
وحنا هناك قلت بنطلب البيك واعيش الجو واحط موقع التوصيل ع البيت
وبآخر لحظة الا بنتي جاية (ماما انتي حاطه موقع التوصيل ع البيت)
وارسل له معليش موقع التسليم غلط تعال ع الحديقة الفلانية وهو مكمل مشواره وخلاص قريب
كان يرسلي فويس يهزئني ويوصل الموقع وياليته صح راح حي ثاني ونازل يحط الطلب عند بيت ناس ويتصل علي عشان استلمه واقفل الخط بوجهه لييين مل والله عالم وش سوا بعدين بس خايفة من دعوته الله يسلمني منها
نجي الموقف الثاني مع اوبر
بعد ماخلصنا وخلاص بنرجع البيت طلبت اوبر وهالمرة قالك بأكون منتبهه ولا بأكرر نفس الغلطة
وليتني ماتفلحنت حطيت اللوكيشن نفس الحي اللي بالحديقة وحنا بالطريق كان ينزلنا مكان غريب وحنا مستغربين وشفيه هذا صار لعقله شي واساله اشفيك منزلنا هنا؟ قال انا ماشي ع اللوكيشن وقتها دريت اني جبت العيد للمرة الثانية واعتذر منه واعطيه الموقع الصح وحمدلله طلع متفهم ووصلنا بسلام ولا كان شاتنا من سيارته ع الفهاوة الزايدة