المساعد الشخصي الرقمي

مشاهدة النسخة كاملة : # قصــة وقصيـــدة فطــــوم #


النجديه
17-09-06, 01:25 AM
:t006hgf:

كل عام وانتم بخير بمناسبة قرب شهر رمضان المبارك (a21)

يقول الراوي ياساده ياكرام

7
7
7
7

هذا واحد من الشعراء شاعر معاصر له قصائد جميله في الغزل وسوالفه زينة وذربه , وهو راعي سيارة وهذي السيارة

من السيارات الكبار كان يجلب عليها غنم يجيبهن مثلا من جدة يوديهن للدمام يبيع ويشتري ويترزق الله ويوم جا مرة من

المرات ولا هو محمل هالغنم من المينا وما شاء الله عليه ما يكل ولا يمل من طول الخط يمشي على راحته والين تعب وقف

ونام واستراح وصلح غداه وجمع حطب وصلح له شاهي في بريق معدن هاك الشاهي الناقع اللي طعمه يقعد الراس

ريحته وشكله لانه مصلح على حطب (ما ودك الا تذوقه (qq31) ) الحاصل ان هالرجال وسيع صدر الى منه مشي وصار

الخط مستمر والاه يغني في الدرب وهو ماشي بقصيدة عاد هو راعي هوى ويقول ..

ياعيـــن هلــي دمــوعك ياشقاويـــه * * * وابـــــكي على جـــادل بالحب عنانــــي

تعبــــري كــل صبـح وكـل عصريـــه * * * لين الفلك يستديــر وينقضـــي شانــــي

حيل الله اقــوى تكسر عبرتــي فيــه * * * والوصل مقطوع والمـــوت الحمر جانــــي

ياوجد روحــي على المرواح والجيــة * * * واخــاف من واحــــد بالهـــرج يقفانــــي

ميـــلاف والقلب تشعــاه السنافيـــــة * * * شعيـــة قطيع شعـــوهن ركب كرزانــــي

اقفـو عليهن باهـــل تسعين منقيــــة * * * مع مربـــاع ما يجيــــه الذيب سرحانـــي

تقاسمــــوا جلهــن حمايـــة الهيــــــة * * * ومفـــرق ولفهــن تركــــي وسلطانـــــي

على هنوف لها في البيــض ماريـــــة * * * مــــاوقفــت تلتــفــت لفـــلان وافلانــــي

ياعيـــن شيهانـة ماهيـــب وكريـــــة * * * اومــى لها بالعشـــا رجــال ابن ثانـــــي

العنــق عنـق الغزال الحـــذر وادميـــة * * * اقفت مع الصبـــح يم هضــاب بسيانـــي

هذي من قصايده الجميلة الغزلية وراح مستمر في خطه يمشي يوم وصل مع العصر لرجال جايب له الغنم يبي ينزلهن

عنده يوم جا والا له بيتين الرجال ماشاء الله عنده حرمتين وله بني وعيال واجد ..

اقبل و وقف السيارة والى يوم لاقاه راعي البيت ياهلا ياهلا حيالله ابو محسن هو عاد اسمه محمد السليمان الحسين

ويلقبونه الدرم حيالله الدرم ياهلا اقلط اقلط متى وصلت قال هذي وصلتي وهو كريم عاد ويده رطبة جايب معه هدية

لراعي البيت وعطاه اياه في يده وقال اقلط وقلطه وخذاله فنجال والموتر لا يزال يشتغل قال ودي انزل الغنم لانها

محتجرات والقهوة لاحق عليها قال اجل رح رح نزل الغنم ونبي نولم العشاء لين تجي قال مافيه احد من العيال يساعدنا

قال الا كيف والا هاك البنت مصككه اسمها فطوم ناداها ابوها يافطوم روحي وانا ابوك افتحي الشبك وخليه ينزل الغنم

وعاونيه ساعديه قالت ان شاء الله ( جاك يا مهنا ما تمنى:501hhhg9: ) وتجي هكا لبنت العنقاء الي ماشاء الله عليها

ما خلت من الجمال شي لكنها طبعا متبرقعه ولا هيب بيضاء مرة الشمس لا سعتها ومخلية لونها لون برونزي وعليها هاك

الثوب الحمر عضودها حازمها الثوب منا ومنا متعافيه البنت وعراقيبها حمر من الفتوة ما فيها شقوق ولاشي وهي

نشيطة انشط من الرجال , المهم وتروح هناك وتفتح الشبك وهو يوم شاف ان الي تنزل الغنم البنت تلخبطت عدته وغدت

عشره وحدة يعني جاه مثل الرعشة شوي المهم يالربع قاهوا ينزلون الغنم اللي فوق لان فيه طابقين نزلوا الغنم ويوم

نزلوها ويدلي يجدعهن عليها ما شاء الله كل ما جدع عليها طلي صكته بيديها ما عاد يتحرك المهم تخليهن يدخلن في

الشبك على واحد واحد , نزل اللي فوق وبقى اللي تحت حول عاد يبي يفك باب اللوري من ورا , هما هو له باب ثقيل

يفتح من ورا من تحت وقال تعالي يا بنت ساعديني منا لأنه خاف يطيح عليه او يطق ركبته , وهي تجي تبي تساعده

جت تبي تفك السلسلة ما قدرت , قال لا لا لا ما هيب كذا السلسة كذا وتقل ناش يدها وهو يفك السلسة ودلا يرهم قلبه

زيادة يوم ناش يدها ( الله لا يعديها من سلسلة(hjh) ) طبعاَ ما ينلام مسكين بنت جميلة وقام ينزل الغنم ويناولها على

وحدة وحدة الين نزلوا كل الغنم ..

الحاصل قبل ما ترجع للبيت قالت رح رح عاد للمجلس تبي تجيك القهوة قال زين الله يعافيك يافطوم ( والله تو ما جا

يركض(q69) ) وقعد يناظرها وهي مقفية لين راحت والله اعلم وش يناظر على شانه ( ابراء الى الله ما احط في ذمتي شي

(q84) ههههههه ) المهم راح ويوم انه وصل حول البيت وقف الموتر دخل عندهم يتقهوى وقام عاد يمدح البنت قدام ابوها

ما شاء الله فطوم ما قصرت عاونتنا وساعدتنا ( اييه عاد بدينا في التميلح والتمصلح (qq168) ) والله انها عن ثلاثة عيال

وانت صادق والله انها عن ثلاثة عيال واني معتمد على الله الكريم ثم عليها هي اللي تلاحظ الغنم وتواليهم الله يخليها

لي ويرزقها الرجال الصالح والى يوم طرخت اذنه ( هذا هو اللي يبي (qq15) ) قال والله اني مستحي عاد ما يدري وين

يجيه معه وده يحاكيه من سنع الخطبه الحاصل انه بعد ما تعشا من عندهم هاك الليلة وامرح ويوم جا من باكر الصبح

وهو رايح في دربه .

راح وأبطى عنهم قعد له فترة ما جاهم ويوم جا السنة الثانية والاه مار من عندهم رايح لناس ثانين وتطري عليه أمرهم

والا ما أمرهم ( الى الحين ونوشة اليد في قلبه ما نساها(qq77) ) خاف يتولع في فطوم مرة ثانية لأنه الحقيقة بعيد هو

هناك يم القويعية وذولا مثل ما تقول يم جهة الدمام بعيدين قال وش يجيبني لهم والله اني غلطان اخاف احاكيه ويقول ما

يخالف وانشب انا لا لا لا تدري ما يحتاج وهو يعود في سيارته ويغني ويقول ..

انا هالزمان مهـود عن هـــوى فطـــوم = سمح خاطري مابـــي عيــــوني تخاليهــــا

لا ياقلب بنت الناس مالــي بها ملــزوم = ولا هيـــب من نجعــــي ولا مـــن قبايلهـــــا

انا شف بالـي جـــادل جنسها معــــدوم = تنثــــر على حـــــد الردايــــف جدايلهــــــا

مداهيلها نجــد العذيـــة سهل وحــــزوم = هضـــاب المـــدارة كــــل عصـــر تضللهـــــا

طعمها براسـي ما تبي اللي يعبــي نــوم = نظيــــف المــلابس كـــل يــــوم يغسلهــــا

ينام الضحي والليل يسري به الجاثــوم = يشجــــع هـل السمــــرة ويصبــــح مقابلهــــا

وانا فوق وارد بون حالي كما المسقـوم = على رقمــــي النـــــجدة تكلــــم بأناتلهــــــا

الى جيت عند الظابط اللي عليه نجـــوم = تعــذرت منـــــه وهرجتــــه صـــدق يقبلهـــــا

وأودي علوم للنشامــى وأجيب علــــوم = وشنق هضبة الجولان في الحرب واصلهــــا

ولا يا وجودي وجد من جودوه الــروم = سجيـــــن تلــــوت في يدينــــــه صناقلهــــا

ولا يا وجودي وجد من طاح بين القوم = ضـــرب ركبتــه مخباط مفــراص محلولهــــا

قعد والطيور والجايعـة يدرجن الحـــوم = وشهب الذيــابــــه تسحبـــــه في مداحلهــــا

كاتم الونة
17-09-06, 01:33 AM
حجزون

النجديه
17-09-06, 01:42 AM
8
8
حياكون

>>>>>>> على وزنها ههههههههه

كاتم الونة
17-09-06, 01:54 AM
الله الله الله الله الله الله الله الله الله الله الله

الله الله الله الله الله الله الله الله

الله الله الله الله الله الله الله

الله الله الله الله الله

الله الله الله الله

الله الله

الله

يبيض وجهك دنياء وآخرة يالنشمية

قصة وقصايد في غاية الروعة

والاسلوب اسلوب راوية متمكنة تبارك الله

واللهجة تكفي عن قصص ماشاء الله عليك

يسعدني ويشرفني ان اكون اول من صافح هذا الابداع

والتألق..والتمييييييييييز

تحية تليق بمقامك

:)

النجديه
17-09-06, 02:16 AM
واللهجة تكفي عن قصص ماشاء الله عليك7
7
7
اللهجة عاد حدث ولا حرج كأني عجوزن جالسة في مجباب ههههههههههههههههه

تسلم ياخوي على هالمرور الرائع والتعليق الجميل

وبصراحه اقف عاجزه عن الرد على هذا الثناء الجميل

اشكرك ياخوي على هالمدح الرائع واعتبره شهادة وسام يعلق على صدري

يعطيك العافيه يارب

خلي البال
17-09-06, 03:07 AM
كل عام وانتي بخير وصحة وسلامة ..
يعني اليوم ما شاء الله تبارك الله أبدعتِ .. صراحة غير عن كل مرة .. أعجبتني القصة بصورة غير طبيعية .. وكنت مجهز ردود وتعليقات على بعض الجمل بس قهرني نظام الأقتباس ما أدري وش فيه ما هو راضي يضبط معاي .. مدري وين المشكلة فيه ..وبعدين ما تدلين وينه فيه بيت فطوم .. قصدي أبو فطوم .. قلت يا ولد دام أنك في الشرقية وقريب سير على أبو فطوم وتقهو عنده .. معرفة الغانمين ما هي خسارة ..هههههههههههه .. شفتي شلون بنات الشرقية حلوات .. أنا بأعرف يوم انه داخ بهواها .. وتقاطرت سعابيله .. وراه ما يطلبها من أهلها .. شاطر بس يصف الحكي ويقول شعر..قهرني .. خلني أشوفه يطب الشرقية .. وكل شي ولا نوشة اليد .. ياهووووووووووووووووووووه .. لا..لا ..لا هالقصة هالمرة .. مسكتة .. والله عرفتي لنا يالنجدية .. .. .. تحياتي ..

جهام
17-09-06, 04:17 AM
اكتشاف خطير ياراويتنا فات عليتس هالمره عرفت ان الغنم برابر لانه جالبهن من جده0
وبعدين اكيد ان ابو البنت متأثر بمسلسل صح النوم فطوم حيص بيص ( حصتس لوري ) من زود التأثير سمى المحروسه فطوم لا لو تدورينهم شرط مسمي المحروس حسني هههههههههههههههههههههههه
النجدية قصة رائعة احسنت ضبط الصورة كأنها صورة مقروئة ( مقدر اصبر لازم اعلق) تدرين وراتس ضابطتن الصورة
اجزم انتس مركبتن انتل وين الاخت خريجة الكترونيات0
تسلمين على هذه الصيغة المستخدمة المشوقة وبارك الله فيك على جهودك المتميزة
اخوك
جهام

عاشق الحره
17-09-06, 05:36 PM
بارك الله فيك

بصراحه قصه جميله وذكرتني الجلب والخطوط يوم كنت اروح مع الوالد

بس عاد الوالد ما يوديني ناس عندهم بنيات خخخخخخخخخخخخخخخ

لكن بصراحه اجدتي النقل بارك الله فيك

حسن خليل
17-09-06, 09:56 PM
الأخت النجدية:

قصة جميلة وقصيدة رائعة ونقل مميز

ونطمع بالمزيد من هذه الروائع

وبانتظار القادم

تقبلي خالص الشكر والتقدير

حسن خليل

النجديه
19-09-06, 01:37 PM
..وبعدين ما تدلين وينه فيه بيت فطوم .. قصدي أبو فطوم
7
7
لك نظر فيها (qq166) ههههههههههه

شفتي شلون بنات الشرقية حلوات
7
7
ما اسرع نسيت بنات ديرتك ههههههههههههه

أنا بأعرف يوم انه داخ بهواها .. وتقاطرت سعابيله .. وراه ما يطلبها من أهلها

رجال عاقل وحكيم ما حب يضيق صدر ام العيال ويجب لها جاره (q83)

>>>>>>> ياليتكم مثله هههههههههه

وكل شي ولا نوشة اليد .. ياهووووووووووووووووووووه

هههههههههههههههههههههههههه هي اللي قلبت موازين الرجال وهيضت مشاعره (qq122)

مشكووور ياخوي خلي البال على هالمرور الرائع والتعليق الجميل (q62)

يعطيك العافيه يارب

charisma
19-09-06, 01:51 PM
قصة وقصيدة جميلة اختي النجدية
تسلمين والله .

اسلوب المدح عندكـ شي
لو تمدحيني اعرست باكر (qq168)


سنكيو اختي

اخوكـ كاريزما

الغيم المظلم
19-09-06, 02:46 PM
نجديه يمال العافيه قصيده وقصه احلي لكي الشكر والتقدير

النجديه
20-09-06, 03:08 AM
متأثر بمسلسل صح النوم فطوم حيص بيص

>>>>>> طلع غبار ههههههههههههه

والله انك ياجهام تبعث اشياء مدري وين تجيبها معه الله يحلل التلفزيون السعودي عندك :hgfyhg14k

تسلم ياخوي على هالمرور الرائع والتعليق الجميل

يعطيك العافيه يارب

النجديه
20-09-06, 03:15 AM
بارك الله فيك

بصراحه قصه جميله وذكرتني الجلب والخطوط يوم كنت اروح مع الوالد

بس عاد الوالد ما يوديني ناس عندهم بنيات خخخخخخخخخخخخخخخ

لكن بصراحه اجدتي النقل بارك الله فيك

عاشق الوالد كان عارف الله يطول بعمره ان فيه مفاسد راح تترتب على روحتك عند البنات فهو قصرها من الاخر :D

ههههههههههههههههههههههههه

تسلم ياخوي على هالمرور الرائع والتعليق الجميل

يعطيك العافيه وما قصرت

النجديه
20-09-06, 03:51 AM
حسن خليل
*
*
الاروع هو مرورك الرائع

وتشريفك متصفحي المتواضع

مشكووور ياخوي وماقصرت وابشر بسعدك

النجديه
21-09-06, 02:28 AM
كاريزما
*
*
الاروع هو مرورك الطيب ياخوي

مشكوور وما قصرت

النجديه
24-09-06, 04:33 AM
الغيم المظلم
*
*
الله يعافيك ياخوي

ومشكوور على هالمرور الطيب

إبن دواس
26-09-06, 03:49 AM
تسلم يمينك ياالنجديه على هالموضوع

روعه الله يعطيك العافيه

وكل عام وأنتِ بخير

النجديه
27-09-06, 03:28 AM
ابن دواس
*
*
وانت بصحه وسلام

مشكوور يا خوي على هالمرور الرائع

يعطيك العافيه يارب

أسيرها
27-09-06, 11:25 AM
صاحبة السمووووووووو الغااااااااااااااااااالية النجديه يسلمووووووووووا ولا هنت

ودخيلك يا صبية تراني أحب القصة والقصيدة وإذا نزلتِ شيء جديد نبي علينا يا بنت الأجواد

النجديه
28-09-06, 07:04 PM
8
8
أسيرها

مشكوور على هالمرور الرائع

يعطيك العافيه يارب

غضا
07-09-07, 11:15 PM
قـــصــــــــــــــــة وقـــصـــيـــــــــــــدة

راااااااااااااااااااائـعــة ولا أحــــــــــلـى

يابــنــــــت نــــــــــــجــــــــــــــــــــــد

إلاّ .......

وش أنـــت يــابــن شــرهـــــــــــــــــان

http://www.albom.qatarw.com/data/media/44/watq_79.gif

ملاك وعيوني هلاك
14-09-07, 04:49 AM
يعطيكي العافيه نجووووووووووووووده
ملاك

النجديه
16-09-07, 02:28 AM
غضا
*
*
الاروع هو مرورك الرائع والمميز

يعطيك العافيه يارب وماقصرتي

النجديه
16-09-07, 02:30 AM
ملاك وعيوني هلاك
*
*
الله يعافيك يالغلا

وماقصرتي على هالمرور الطيب

أم أديم
14-01-08, 05:41 PM
الله يعطيك العافية

النجديه
14-01-08, 06:55 PM
8
8
ام اديم الله يعافيك

ومشكوره على هالمرور الرائع

*أسيرة الذكرى*
15-01-08, 06:53 PM
الله يعطيكـ العافيهـ

:)

ما هقيت ان البراقع
19-01-08, 05:18 PM
حقيقه شىء جميل تسلم على الدوم

ما هقيت ان البراقع
19-01-08, 05:19 PM
بارك اله فيك على ها لتقديم الرائع

النجديه
19-01-08, 06:40 PM
الله يعطيكـ العافيهـ

:)


الله يعافيك

مشكوره على المرور

النجديه
19-01-08, 06:44 PM
بارك اله فيك على ها لتقديم الرائع


مشكوور ياخوي على هالمرةر الرائع

يعطيك العافيه يارب

الهنـوف
28-01-08, 08:29 PM
بارك الله فيكم ، وجزيتم خيرا ً ،

بإنتظار مشاركاتكم الجديده ..

أختك / الهنوف ..

النجديه
21-02-08, 04:15 PM
8
8
مشكووره على هالمرور الرائع