العاب اون لاين: العاب بلياردو | العاب سيارات | العاب دراجات | العاب طبخ | العاب تلبيس |العاب بنات |العاب توم وجيري | العاب قص الشعر |
للشكاوي والاستفسار واستعادة الرقم السري لعضوية قديمة مراسلة الإدارة مراسلتنا من هنا |
|
|
|
أدوات الموضوع | التقييم: | انواع عرض الموضوع |
#1
|
||||
|
||||
انا وخواتي واخوي حمودي
السلام عليكم كيفكم اخواني الاعضاء .. ان شاءالله مبسوطين شرايكم نغير جو المنتدى المعروف. ونسولف بمواضيع حلوه شوي قبل كل شي حاب اعرفكم بنفسي انا صالح, واحد من الشباب السعودي الطيبين. أدرس في آخر سنة في جامعة الملك سعود. وكالعادة مغرز بالدراسة لكن الفترة الاخيرة شغلت الدبـل ابي اخلص من الدراسة بأسرع وقت. مليت وابي اتوظف ترتيبي بين اخواني الثاني واصغر من خمسة. عندي اختي سحر اكبر مني بثلاث سنين متزوجة وعندها بزرين ريمـا و زياد ياحبيلهم هم وبجاماتهم اذا تذكرتهم ودي آكلهم الله يحفظهم. أصغر مني اخوي عبدالله في ثاني سنة بالجامعه والولد دافور بس مفهي تجي بعده اختي نجود بأول سنة في الجامعه تدرس انجليزي وطايحه تستعرض علينا هاليومين مسويه انجليش ليدي .. يجي بعدها اختي نوره هاديه وحبوبه تدرس بأول ثانوي ما نحس فيها تستحي بقوه من كل شي يجي بعدها اختي لمياء بأول متوسط انواع اللعب ماكله حق نوره بكل شي ياحبيلها بس كريمه .. يجي عقبهم القعده حمودي بخامس ابتدائي اعتبره مثل ولدي دايم اصفقه بس احبه واشتريله كثير آيسكريم بس بعد ما يهمزني حياتي مثل حياة أي واحد بنفس عمري, اروح لربعي بالاستراحة كل ويكيند (سواليف بلوت طائرة سوني وفلت حجاج) وسط الاسبوع اطلع مع ربعي بالجامعه او ربع الاستراحه نتعشى او نتقهوى جميع, كل يوم خميس فيه اجتماع اسبوعي في بيت خوالي يجون كل خوالي وخالاتي رجال وحريم وبزارين وعندنا اجتماع واحد بالشهر مع اعمامي طبعا العايله كلها تروح .. والحمد لله مبسوط اخر وناسه الله يديمها ولا يغيرها علينا من نعمه المهم قضينا المقدمه بقولكم سالفتي بأحد الايام كان الاربعاء وكنت طالع لم ربعي بالاستراحه. شفت اخوي حمودي الله يصلحه يلعب بالحوش وطبعا يحتري يوم الخميس علشان يروح لخوالي. مثل العادة خليته يمسك حارس وانا اشوت عليه كم بلنتي وبعدها امشي. طلعت ومشيت فكرت بيني وبين نفسي ورجعت للحوش وقلت لحموي ودك تجي معي للاستراحه .. تفاجئت انه على طول نط وقال "ايييييييييييييييييه ياحبيلك تكفى" والله لو فزت بلكزس جديد ما فرحت مثله قلت "طيب رح قل لأمي انك بتجي معي وتعال بسرعه".. المهم ثواني والولد راكب جنبي .. وانا بالطريق دقيت على اربعه من ربعي وقلت لهم يجيبون اخوانهم معهم واحد اعتذر لان اخوه طالع والباقين جابوا اخوانهم .. دخلت الاستراحه وجلست انا وربعي وطلع اخوي اخوانهم مع بعض وحنا مثل عادتنا ما تغير علينا شي جلسنا بالخيمه (سواليف وقهوه وشاهي وبلوت) , حمودي واللي معه جلسو مع بعض لعب كوره وطائرة ويروحون للبقاله وبالاخيـر اشترينا لهم معنا عشاء لما رجعت للبيت اخوي بالطريق كان نصه نوم وما جاب خبري .. بعدها جلس اخوي يترجى فيني اسبوع يبغى يجي معي يوم الاربعاء للاستراحه , ولما وافقت لو تشوفون فرحته لو عطوني لكزس و وظيفه وعروسه معهم ما فرحت مثل فرحته اكون صريح معكم فرحته اثرت فيني بقوه ولو اقولكم غيرت حياتي كلها . وما ابالغ اذا قلت لكم غيرت حياتي وحياة بيتنا بالكامل . ممكن ما تصدقون .. بالليله هذيك ما قدرت انام من التفكيـر وتفكيري ما كان على حمودي بس, كان على باقي اخواني وخواتي جلست افكر بنفسي .كيف بحركه بسيطه ما كانت على بالي قدرت افرح اخوي . بديت افكر بباقي العايله تذكرت قبل شهرين وناسة اختي سحر لما كلمتها وقلتلها "ابتقهوى عندك بعد المغرب" ياناس اخبر كيف كانت مبسوطه اني جيت عندها مع اني اجيها مره بالشهر او الشهرين بعد اليوم هذا قررت اني احاول اسوي شي بسيط بعايلتي اخليهم يفرحون مثل فرحة حمودي والحمد لله قدرت فعلا اتغير ولو اقولكم ان الشي هذا سهل واسهل من شرب الماء. بس ما كنت افكر في اهلي قبل سحر اختي : صرت ازورها بالاسبوع مره واجي ولازم معي حلاوتين لبصابيصها اسماء وزياد ياحبيلهم كلهم يطيرون من الفرحه اذا زرتهم . نجود ونوره ولمياء: صرت كل يوم أربعاء يخلص دوامي بدري في الجامعه .. اروح أمر خواتي من مدارسهم وبعدها نروح نتغدى في احد المطاعم المشهورعند بنات المدارس مثل ابل بيز وفرايديز وغيرها وبرضوا صرت يوم الاثنين اطلع معهم بعد العشاء نروح د.كيف نتقهوى وناخذلنا فرتين بالشوارع ونتعشى ونرجع ... هذي حركات بسيطه . اكتشفت منها ان خواتي محرومات وعلى نياتهن ومن جد ما شافوا دنيا,, ربي يحفظهم ,, وعلى فكره البنت لما تحصل عطف من داخل البيت ,, مستحيل تدور على العاطفه خارج البيت (ربي يحفظ بناتنا وبنات المسلمين) .. من جد تغيرت نفسيات خواتي صارو يفرحون اذا صار اليوم الاثنين او الاربعاء ,, وحنا بدكتور كيف اختي لمياء تقولي من الصبح وانا احتري بس يجي الليل علشان نطلع .. خواتي يسمعون زميلاتهم يتكلمون عن الاشياء الجديده وخواتي ما يدرون وش السالفه كله بسبب اني ناسيهم والحين صرت كل ما ارجع للبيت بالعصر اجيب معي كم حبة آيسكريم او شيبس او دونات او غيرها عاد امي وابوي حقهم فوق راسي صرت احرص على جلسة القهوه معهم واشوف وش ناقصهم واسعى لخدمتهم .. واخوي عبودي المفهي ما تغيرت معاه . لأني بالاساس اجلس معه واجد ياناس اكتشفت اني اناني قبل وما افكر الا في نفسي .. كم حركه بسيطه غيرت حياتي اخواني كلهم. مع ان الاشياء البسيطه هذي ما غيرت روتين حياتي .. جلستي عند ربعي ما تغيرت وطلعاتي ودخلاتني نفسها لكن حياة اهلي تغيرت بدل ما كان عندهم يوم واحد حلو بالاسبوع صار ثلاث ايام وانا معهم صرت افرح والحين صارلي على هالحال سنة كامله والله من جد فرحانين صرت اجلس معهم اكثر ونسولف ونسوي مسابقات اذا سافرت خواتي ينشبون في حلق اخوي يسوي فيهم مثلي. واخوي حمودي صار يجمتع مع اخوان ربعي كل يوم اربعاء. قلت الكئابة عن البيت صار البيت فيه حركه ووناسه نهاية موضوعي ياشباب احرصوا شوي على اهل بيتكم اذا كان الشاب ممكن يغير بلد كامل فما بالكم بيت صغير اهله طيبين ربي يحفظنا ويحفظكم
|
#2
|
||||
|
||||
وعليكم السلام
طيبين يسلمووو سنتريا على الموضوع الرائع و المفيد يعطيك الف عافيه على الطرح ويشرفني ان اكون اول من يرد على موضوعك
|
#3
|
||||
|
||||
وعليكم السلام ورحمة الله وبركاته
موضوع قممممممممة في الروعة الله يخلي لك أخوانك وخواتك ويحفظهم لك << عادي أصير أختكم اسبوع لا لاعاد امزح الله يخلي لي أهلي بصراحة عن جد احيانا نستصغر أشياء تافهه يكون لها دور كبير في التغيير شكرا لك وحياك الله عضو بيننا يثبت لتميزة << يامره وين الشطرطون الحمر
|
#4
|
||||
|
||||
مشكورين على مروركم الرائع
نورتو الموضوع
|
#5
|
|||||||||||||||||||||||||
|
|||||||||||||||||||||||||
انا المفروض اقولك حياك الله معنا .. صارلي اربع سنين مسجل في المنتدى ههههههههـ مشكور على التحيه
|
#6
|
||||
|
||||
سنتريا هلا والله اخوووي
بصراحه موضوعك مرررره حلو والراقي انا بقولك بصراحه صح اني اطلع واتمشى بس المشكله الطرق زحمه تخوف والله اهى السبب في الجلسه والحبسه في البيت وانا اذا قالو اهلي بنطلع نتمشى انا اقعد في البيت احلال البيت حتى اخوي متزوج صار يروح الدوام وهو طفشان يشيل هم الطريق لان الريااااااااض مره زحمهالله يعين بس المهم اشكرك على الموضوع الرااااااقي مثلك
|
#7
|
||||
|
||||
صراااااااااحه روووووووعه
حسيت اني اتابع فلم بس والله معك حق احنا يالبنات مظلومات ومحد فاهمنا ياليت اخواني يحسون مثلك ولا يستكثرون علينا طلعاتنا عند العائله واللي يوصلنا تكون واصله معه وما يصدق ننزل من السياره الا وهو يفحط علينا مومصدق < الله يخليك لاهلك ويخليهم لك ولايحرمكم من بعض>
|
#8
|
||||
|
||||
حلو الموضوع عجبني حيييل ,, إحسآس جميل لمآ تكون علآقة الآخوآن بهآلشكل الله يخليكم لـ بعض
The Only Real Smile ! That Just A Brother Can Draw
|
#9
|
||||
|
||||
،
بصرٍآحهـ ـأخوٍآنـي لآلآلآزٍم يشوٍفوٍن ـآلموٍضوٍع كل مآقلت يآفلآن ودنـي سوٍق حرٍم صديقهـ أهل < -- أيوٍهـ وش كمآنـه ؟ قآل يييوٍه رٍوٍحـي لـ فلآن وأرٍوٍح لفلآن يقوٍل أنـآ موٍ وديتكم ألأسبوٍع إللي رآح \: وأن جينآ نطلع برٍىآ مكهـ ـآلطآيف لآزٍم نخبرٍهم قبلهآ بشهرٍ . وفوق هذآ يصيرٍ تذمرٍ ورٍفع صوٍت وهذآ يرٍمينآ علىآ هذآ وٍفـي ـآلنهآيـهـ دموٍع ـآلفتيآت المحبوسآت خخخخخ ( ترٍىآ صدق أتكلم خخخخخخخ ) وآلله يآخوٍي سنترٍي يآبخت أخوٍآتك بك مو لآنك توديهم وتجيبهم لآنك من طيب خآطرٍٍ وتحسسهم بحنآن وعطف وطرٍيقتك ـأصح من ـآلصح ، يآرب يحفظك ويرٍزٍقك بنت ـآلحلآل وـآلذرٍيـه ـآلصآلحهـ (: ودآمك غيرٍت حيآة أهلك حط بعضاً من هآلتغييرٍ في هنآ ويآرٍب يكوٍن صبآحك فلهـ شمعهـ منوٍرٍهـ وشكرٍاً .
|
#10
|
||||
|
||||
يعطيك العافيه والله يخليهم لك ويخليك لهم ^ـــ^
|
مواقع النشر (المفضلة) |
الذين يشاهدون محتوى الموضوع الآن : 1 ( الأعضاء 0 والزوار 1) | |
أدوات الموضوع | |
انواع عرض الموضوع | تقييم هذا الموضوع |
|
|
راديو قصيمي نت | مطبخ قصيمي نت | قصص قصيمي نت | العاب قصيمي نت |