العاب اون لاين: العاب بلياردو | العاب سيارات | العاب دراجات | العاب طبخ | العاب تلبيس |العاب بنات |العاب توم وجيري | العاب قص الشعر |
للشكاوي والاستفسار واستعادة الرقم السري لعضوية قديمة مراسلة الإدارة مراسلتنا من هنا |
|
|
|
أدوات الموضوع | التقييم: | انواع عرض الموضوع |
#1
|
||||
|
||||
تسيف إنك تغدي آدمي ورجل يعتمد عليك >> أنتبهـ ياحظي
مسآكم / وصبحكم الله بوجهي >> فالك ماقبلنآهـ
ملحوظة : ترى الموضوع رجآلي بحت وبرعآية ( البردة ) للمستلزمآت الرجالية وأي بنت بتدخل تجيب معهآ محرم مثل هذآ >> عزيزي الشآب المحبط هل سئمت من كلمة منتب رجآل يوم تقولهآ لك زوجتك وأنت كآربن عمرك وشآدن حيلك تحسب إنك اعجبتهآ وقضت عليك بهالكلمة .. وهل سئمت من قولة أمك لك : أخوك الصغير أرجل منك وينفعنآ بالبيت وأنت مآغير تبطح بالإسترآحهـ ولجيت نمت ودآيم تقولك مقولتهآ الشهيرة ( جيل هبهب لادين ولا مذهب لقآم رآح ولجاء طآح ) ؟ وهل سئمت من تلقيط وجهك بمجلس الرجآل يوم أبوك يهوشك وأنت تصب القهوهـ ومآسكهآ باليمين وتقهوي الرجآل باليسآر ولا يدق جوالك وترد وتطول صوتك وتضحك مع خويك ويقوم أبوك يكرشك ويغدي وجهك تكل مؤخرة قرد >> وجهـ الشبهـ شوية الحمآر على جروح حب الشباب والفتحة للأسف هي فمك ولو إن ريحة فمك لصحيت من النوم مآودي أحلف إنهآ أشد فتك من تلك الرآئحة اللي تبع القرد .. لذلك نحن شبآب السعودية نعآني من عدة كلمآت تؤثر سلبآ في تكوين شخصيتنآ ومثأل على تلك الكلمآت : يالورع.. يالرخمهـ .. يالوح .. يادرج يالبثر.. يالكمخهـ... يآهيهـ >> تقول للحين ماسموك .. ياإبراهيم ياقزمة ياللي مالكش لزمة >> كنت أدرس بمدرسة اهلية وكآن عندي طالب من الكمخ يقآلهـ إبراهيم والطلاب يعيرونهـ تسذآ ودآيم أتوهق وأمسك معهم خط وأردد بدون مآأنتبهـ.. هذآ غير المعيآرة اللي ملزقينهآ فيك من يومك صغير تحصلهم معيرنك أبو نخآرير وغير الكلمآت المشفرة اللي لو اقولهآ بتصير وحدة من ثنتين .. يآ إنهم يصكوني بآند كبر رآسي ولا إن قصيمي نت بتقفلهـ مدينة الملك عبدالعزيز للعلوم والتقنية >> في قلوبنآ .. ويبي لي بروكسي علشآن أدخل وأرد عليكم .. المهم الكلمآت هذي بمثآبة الرسائل السلبية اللي نتعرض لهآ يوميآ و باليوم كم تسمعهآ مرهـ ? عد واغلط وعلشآن نتفآدى أثر هذهـ الكلمات والإحبآطآت جبت لكم عدة خطوآت تتبعونهآ بحيآتكم وإن شاء الله تشوفون من الله ثم من بعدهآ العآفية وتغدون ريآجيل ينشد بكم الظهر >> طفشنآ من كثر مايقولن البنآت رجآل الحين مايعتمد عليهم مثل أول .. أجل أنتم اللي مثل حريم اول .. حريم أول تولد الوحدهـ ورى عوشزهـ الصباح والعصر رآيحة تحطب يمآل الحطبهـ >> عصب.. ماعليهـ شوي وأرجع لطبيعتي .. المهم مآعلآنآ >> كلمة توحي بالرجولة أحسن من مآعلينآ لذلك لاتنسنون تكتبونهآ .. بسم الله نبدآ بالطرق المؤدية للرجولة : 1 / أغد رجآل البيت حتى لو أخوآنك الكبآر موجودين .. اثبت نفسك يابعدي وحآول إنك تجيب أغرآض أهلك من السوق .. أدري بتتوهق بالبداية لأنهم بيوصونك بحلاوة >> وتجيب حلاو بقر وهم قصدهم حلاوة طحينية وأدري إنهم بيخلونك توديهم السوق .. ودهم ولا تنزلهم وترجع .. ولا تنزلهم وتروح تغآزل تأكد إن ربك بيبلآك يالخبل >>أبوووك يالأسلوب الدعوي.. وينك يالعريفي تستفيد من اسلوبي المقنع خلك مع أهلك يمكن أحد يتعرض لهم بالسوق وذآك الوقت تغدي ذيبن أمعط لو إنك أكبر رخمهـ وإذا طلبت منك وخيتك تجيب طلبآت الحلا لأنهآ بتسويهـ خويآتهآ بيسيرن عليهآ .. أنتبهـ تقول لا .. لأن احتمآل كبير خويآتهآ يسألنهآ مين اللي جاب لك الطلبآت تقول أخوي فلآن .. عآد يمكن نقول يمكن حديهن ينعمي على قلبهآ وتعجب فيك تحسبك رجل 2 / إذا أنت موظف أول شي لا تنسى أهلك من رآتبك ( الأقربون أولى بالمعروف ) لأن كني دآري رآتبك 6606 في أفضل حآلاتك والموآطن القطري العآطل مكأفأتة حول رآتبك مكأفأتة 5000 المهم نقول 1500 قصد للرآجحي آخذن لك ربع وتفرفر بحآرة الوآد يالسربوت و1000 ريآل قطة شهرية لأنك عزوبي أنت و3 معك بشقق مفروشة.. و300 ريآل حقت مغسلة الجبر اللي تحت شقتكم و200 ريآل للهندي اللي يطبخ لكم >> و 50 ريآل للفلفل >> طرآهآ الهندي اللي يطبخ لكم و1000 ريآل فآتورة جوآلك لأنك يالسربوت تغآزل بنصآص الليآلي وتكلم خويتك 3 سآعآت باليوم >> تقول وصفة طبية يآخي عالأقل كلمهآ من ثآبتكم على ثآبتهم من خدمة جود ترآهآ أرخص >> نصيحة للي مابهم طب مغآزلين مغآزلين الله لايعوق بشر و1000 ريآل تروح سلفيآت لأنك مايجي 28 من الشهر إلا الزرق قد قضيت عليهن مابقي معك إلا الخضر >> الخمسينآت و 1000 ريآل مسوي جمعية مع زملاء العمل وأنت دورك الأخير ويبقى لك 1556 الـ 1500 مصروفك الخآص والـ 6 ريآل بريآل ولاعة وبـ 5 بكت دخآن >> ترى التسعيرة هذي أيآم الثآنوية (أيقونة تغمز عينهآ وتقول وش درآك ) لذلك لا تبخل على أهلك ترى الدرآهم ضايعة ضآيعة لكن تجمل بهآ قدآم جماعتك وخويآك وضيعهآ على اهلك أحسن لك لأنك بتسأل عنهآ .. تخيل يوم القيآمة بتسأل عن الـ 1000 ريآل حقت فآتورة الإتصآلآت يوم تكلم خويتك .. وش بتقول أنت ووجهك وقتهآ ؟ علمني بس علشآن أقول مثلك ترى مافيهـ أحد يغششك وقتهآ 3 / لرحت تسآفر مع أخويآك برى .. قصدي برى الديرة مو شرط برى المملكة لأنهـ يمكن تسآفر وأنت مرآهق ماتعدى عمرك الـ20 توك عالجوآز ولو إن البحرين تشكي من أصحآب الهوية الوطنية والروسيآت هجن بسبتكم المهم لسآفرت معهم أوعى شفني أقولك أوعى تقعط عليهم وأصرف مثلهم ولا أكثر منهم بعد مو لجيتوا عند محطة بنزين تقعد تسوي نفسك مضيع محفظتك ماتدري بأي مخبآهـ ولا تسوي إنك عجزت تطلع المحفظهـ الجنز ضيق وحآقطن وآلدهآ بالجنز وصورة الملك عبدالله متلطم بالريآل من الريحة .. أنتبهـ .. هآيط وأدفع خل فلوسك تضيع على خويآك ويقولون كريم.. ولا ترجع للديرة ويفضحونك يالجلدة ولا عآد يآخذونك معهم أبد وتخسر السمعة والسفريآت بعد 4 / خلك ذوق عند أبوك والرجآل بالمجلس ..أول شي لا تخلي أبوك يصب القهوهـ حتى لو مآعندهـ إلا وآحد من أخويآهـ بس تك عندهم منهآ تستفيد علوم رجآل ومنهآ تحجر لأبوك مآتخلية يآخذ رآحتهـ بالسوآلف هو وخوية عالأقل تنقتم لنفسك يوم يسبك ولا تقدر تفتح فمك .. وبعد يمكن يتهور أبوك وتكبر بعينهـ لأنك جلسك وصبيت القوهـ عنهـ .. وإذآ صآرت عندكم عزيمة كبيرة حي بالرجآل موب بس تستقبلهم وأنت مفهي .. حي فيهم وخلك ذرب كنك شفقآن عليهم حتى لو بعضهم تتمنى تسمع بيومهـ بس مآعليهـ أهم شي ضيوفك لا يحسون بشي يضآيقهم منك وإذا قآلك أبوك رح جب العود مهو تجيب عود نآصر وعبدالله بطآش .. عآد والله وقتهآ إن يآخذ أبوك الحزآم الأسود على ظهرك جب الدخون ومر على الرجآل وآحد وآحد وإذا أخلصت خذ فوق تحت وأرجع لهم مرهـ ثأنية وثألتة بعد .. 5 / برضوهـ خلك ذوق مع أصدقاء أخوآنك وإذا سيروآ على أخوك بالبيت مو تحجر لهم وتجلس عندهم .. يآخي هم لهم سوآلف خاصهـ وأنت لك خويآك وسوآلفكم الخآصهـ ..وانتبهـ تقول معيآرة أخوك قدآم أخويآهـ ثم يصير مضحكهـ عندهم ترآهـ مايبآعدك أبد .. على طآري أصدقاء أخوي .. أذكر مرهـ أخوي سير عليهـ خويهـ .. قال لي أخوي تكفى أطلع وصرفة قل لهـ إني طآلع برى البيت وبتأخر .. أنا على نيآتي رحت قلت لهـ والله أخوي ههـ توهـ طلع على موترهـ ماشفتهـ بطريقك وأنت جأي ؟ ترى مالهـ 5 دقايق يقآل لي بحبك التسذبة وأشوف صديق أخوي يضحك حسيت إن الوضع مش مطمن .. يوم التفت ورآي إلا أخوي جآي يمشي ويقول الله يهديك بس .. تصرف الرجآل وأنآ قآيلك خلك عندهـ لين البس ثوبي وأجي.. >> لا ياللوح إي والله عآد أنا مشيتهآ لأخوي .. وش أقولكم أنا من اليوم لازم تصير طيب مع أهلك ولاتقول لأخوك شي >> عآش مصرف خخخخخخخخخ 6 / النظآفة ومآ أدرآك مالنظآفة .. يرحم أمك تنظف ترى ماهنآ أشين من ريحتك صنآنك يالمروح لو تشممهآ لوآحد منصرع فز على طولهـ .. أنا أدري إنك بالإبتدائية لجيت تغيب تنآديك أمك وتقول لك يآآآ فلآآآآن بتدرس ولا أروشك .. ومآيميدهآ تكمل كلمتهآ إلا أنت قد لبست ثوبك وطلعت من البيت كلهـ علشآن ماتروشك .. بينك وبين الماء عدآوة وكرهـ منذ يبآسة أضفآرك .. خلنآ من أيآم الطفولة لكن الحين اهتم بنفسك حآول قدر المستطآع تتسبح يوميآ أدري إني أعذبك كذآ بس كلهـ بمصلحتك خصوصآ بأيآم الصيف تكثر أملاحك عآد أملاح على وصخ الله لايورك لو وآحد يشم دغدغك مآودي احلف إنهـ بتصيبة وفآة دمآغية من قو تركيز الريحة وحآول تشتري مزيل رآئحة العرق ولوشن للإستحمآم وعطر لجسمك .. يآخي خل لك ريحة مميزة فيهـ لو يضيع شمآغك بالبيت بس يشمون ريحتهـ يدرون إنهـ لك مو يبلشون مايدرون شمآغك ولا شمآغ عآملكم حق المزرعة أيضآ اشتر لك بدل حلوهـ واكشخ ... مو بس عميل للخيآطين .. ترى الثوب لهـ وقتهـ وبرضوهـ يجي وقت للملابس بالطلعآت والسفريآت والكشتآت بعد .. ولا نآوي تكشت بثوبك وتلعب كورهـ بثوبك بعد ؟إإ ترآك تسويهآ وتجي وتنآم فيهـ بعد 7 / تعبت وقسم .. تكفي النصآيح هذي وهذي اللي طرآلي ولا لو بحسب الحآجآت اللي يبي فيهآ تعديل لنآ كآن أصبحت وأنا أكتب برآيفت للأعضاء : ياجماعة الخير المنتدى بآرد شوي .. وأدري من الإمتحآنآت .. لكن الحين جت العطلة .. نبي موآضيع منكم من تفكيركم من يوميآتكم من سوآالفكم من أي شي .. إن شاء الله تصلخون علينآ بس حآولوآ قدر الإمكآن تبتعدون عن الموآضيع المنقولهـ .. وأيضآ رجاء خآص ابتعدوآ عن الردود اللي فيهآ شكرآ ولا موضوع روعة ومدري إيش .. حآول تعلق لو على جزئية وحدهـ مومعقولة ماعندك إي تعليق .. مو بس هنآ .. أبي بكل الموآضيع تكون ردودكم مشجعة شوي .. فتكم بعآفية / أخوكم : م.ع.س >> تقل مرسل فآكس على برنآمج فتآوى عالهواء
|
#2
|
||||
|
||||
اخروا عني جيتكم بثبته
يالله انبسط يالبلغاااااااري
|
#3
|
||||
|
||||
^
^ أهبيييييييي أسرع رد بالتآريخ .. بالله شوفوا وقت الموضوع ووقت ردهـآ .ز امش يالقوطي عآد قسم مآكآن عندي نية أثبتهـ ههههههههه
|
#4
|
|||||||||||||||||||||
|
|||||||||||||||||||||
وراااااااك علينا البلغاري خلك دمقراطي ترانا في زمن العولمه وشووله المحرم يالله بقرااااااها بكره لاروقت
|
#5
|
||||
|
||||
تراني شفته بالصدفه قلت ادخل اثبته قبل مااطلع يالله لو سمحت ادفع قيمة التثبيت
|
#6
|
|||||||||||||||||||||
|
|||||||||||||||||||||
مدري ليه تذكرت واحد من اخواني موضوع منتاز يالبلغآري .. وتراي جيت من غير محرم اللون الاخضر مايلعب لي رجعه ان شاالله
|
#7
|
||||
|
||||
..وووهــ ياطول موضوعك بس تطمن قريته كله
ياأني متت ضحك على كلامك مخربها اي الله عندي لي اخو ماغير بس ارسله ويعي علي اظاهر بوريه موضوعك غديه يتأدب ومن ناحيه اذا كلمنا صديقاتنا بتلفون وامهاتنا جن ويقلن لك ساعه تكلمين يالله طبقي اسماعه اسد اتلفون علشان صديقتي ملتسمع تخبرون عن الفشله هع واتسريفات ياكثر ماسرفت بس اشوا ينطوفن واقهوه قبل لايجن الحريم اقول لماما شوفي خلي خواتي اللي اكبر مني يصبن انا ماعرف وانا علي اتوزيع بس <<مريحه نفسه رجل عر رجل هع وعلى طاري الورعان ترا دايم اقوله لبزراننا الله من الدجه بروسهم واما نصيحتك اسابعه اللي عن اروائح ابووووك ياضحك والله ماسكتت تشوف خشتي هالكبر مفتوحه تفقعت من الضحك بس ماني معلقه عله واااي فشله <<قومي اطلعي برا ههههههههههههههههههههههههه ((وكلامك اللي بالون الاخضر صوووح في صوووح حلات الموضوع صاحبه كاتبه)) تحياتي وننتظرجديدك ..
|
#8
|
|||||||||||||||||||||
|
|||||||||||||||||||||
ياااااسلام عليك يا بطل يا رحماااانوف >>>>مادري ليه ذكرت اغنية رحمان يا رحمان عموما ما علينا ... استكمالاً >>> ابووك يا الثقافه وخاصة التنوين استكمالا لموضوع النظافه من جد بعض الشباب او الرجال او السملق ان جاز التعبير ما يدرون ان فيه اختراااااااااع من عام الف واربع مية وكش اسمه الفرشاة والمعجون يجيك مشخص ومزبرق عمرة ومخلص النشا ببيتهم واذا ابتسم او ضحك ودك تتلطم وتلبس نظارة شمسيه لايوجع عيونك صفار سنونه ويحسب المرجله في كاس الشاهي ... وان كانه متطور اكل علك غندور الصبح بزعمه بتروح الريحه والله مثل هذولي لو يغسلون خششهم بفلاش ماراحت الريحه امر اخر : دليل نظافة الرجل >>رجووووووووووووله شف التوافق في الاسم اصلا ليه سموه رجُل >>>بالضمه من الرِجل >>>> بكسر الراء تجيك رجوله متشطبه فيها الف وخمسه وسبعين شطب ولا هي اي شطوب لالالالالالا من الشطوب اللي ممكن توزي فيها 100 ريال مصروفه ريالات اعنبوا ابليسكم يا الشباب تنظفوا تراااكم حومتوا تسبودنا يامال الضرب وشعوركم عااااااااااد هاذي سالفه يبيلها مجلد يحسبون الدعوة طول شعرك وقضينا لالالالالا البنات ينظفونها ويحطون حمامات زيت وصبغات زحركااات يكفي انهنم كل ما تحمموا دخنوها بعود ودخون مهوب مثلكم يدخنونها بشكمان كفراااااااااات >>>> هههههه اعجبتني عموما انا اشكرك رحمانوف علي الموضوع وان شاء الله في موازين اعمالك
|
#9
|
||||
|
||||
لا باك للموضوع << بس بقول الحين الموضوع يقول البلغاري انه رجالي بحت ,, وكل الي ردوا بنات ههههههههههههههههه
لي عوده يالبلغاري ,, بكره ان شاء الله
|
#10
|
|||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||
صدقت يآ رحمآلوف بكل كلمهـ
والموضوع ما يكتبه الا زززكرت
وش قصة هالروسيآت الي كل من جاب طآري للبحرين هرج عنهم < مسوي برآئه
صــآدق والله ليت الجميع يتفآعل ... عوافي رحمالوف يستآهل التثبيت
|
مواقع النشر (المفضلة) |
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
راديو قصيمي نت | مطبخ قصيمي نت | قصص قصيمي نت | العاب قصيمي نت |