العاب اون لاين: العاب بلياردو | العاب سيارات | العاب دراجات | العاب طبخ | العاب تلبيس |العاب بنات |العاب توم وجيري | العاب قص الشعر |
للشكاوي والاستفسار واستعادة الرقم السري لعضوية قديمة مراسلة الإدارة مراسلتنا من هنا |
|
|
|
أدوات الموضوع | تقييم الموضوع | انواع عرض الموضوع |
#1
|
||||
|
||||
هل المرأة مهيئة لمثل هذا ؟؟ ….. (تجربتي من الواقع)
أسعد الله (صباحـ/مساء)كم 🌷
أتوقع الموضوع باين من عنوانه 😊 .. صار لي موقف قبل كم يوم خلاني أتساءل هالتساؤل … طبعا بقولكم الموقف اللي صار لي وبعدها بتكلم عن الأفكار والتساؤلات اللي راودتني بعدها … قبل كم يوم (كان يوم خميس) كنت راجعة من موعد ومتجهة لبيت أهلي وكان الوقت (وقت ذروة) يعني وقت خروج الموظفين من دواماتهم تقريبا الساعة 3 وشوي ... وكنت قريبة لبيت أهلي يعني ما بقى تقريبا إلا 3 دقايق ونوصل .. ما دريت إلا سواقنا العليمي جاي يقال له بيتفنن وبيسقط على اللي جنبنا إلا ويصدمه من جنب صدمة خفيفة 😑 حسسسسبي الله ونعم الوكيل 😭 مدري وش أقول مدري وش أسوي 😭 المشكلة الشرطي واقف قدامنا ينظم السير وصار الحادث قدامه يعني شايفه من أوله إلى آخره وعارف إن سواقنا هو الغلطان .. نزل الأخ راعي السيارة الثانية يشوف سيارته وقال له الشرطي يله صور بسرعة وروحوا وقفوا قدام لين يجيكم نجم 😩 (ياربيييييه متى بيجي ذا النجم 😬) وجا الشرطي وفتحت الدريشة وسألني سيارتكم مأمّنه قلت مدري (طبعا هو سأل السواق قبلي بس بما إن السواق جديد ماله إلا شهر جاي وما يدري وين ربي حاطه فيه فما يدري) وحوّل السؤال علي … (في الحقيقة) أنا اللي أعرفه إنه السيارة مأمنه بس كنت شاكه إنها منتهي تأمينها عشان كذا يوم سألني الشرطي قلت مدري😬 .. سألت الشرطي قلت طيب وش الفرق إذا كانت مأمنه والا غير مأمنه وش تفرق فيه يعني … (أحسه وقتها وده يسطرني لأنه زحمه وشمس وعالم داخلين طالعين على بعض وهذي جايه تسأل وش الفرق😊) بس والله ما قصر جاوب بكل احترام قال إذا مأمنه تتصلون على نجم يجيكم وإذا موب مأمنه تتصلون على الدوريات … يا لييييل البلشة مدري وش أسوي الحين 😭😭😭 🔗المشكلة اللي طحت فيها تكمن في عدة نقاط😥: 1- السواق بأسمي وتوه ما بعد طلعنا له رخصة. 2- زوجي بعيد عني وعشان يوصلني بس يبيله ساعتين مع الزحمات والقرف + زائد لو بتصل عليه بيشيل هم ويصج ويلج فـ يمكن أتحمل هالمصيبة اللي أنا فيها لكن ما أتحمل صجته ولجته وتكبيره للموضوع. 3- معزومه في الليل على زواج ولازم أرجع على طول للبيت عشان أرتاح شوي قبل يجي وقت الاستعداد واللبس، والزواج هذا لازم علي وإلا كان كنسلت فكرة الروحة له لكن بتزعل اللي عازمتني. كل هذي الأفكار دارت في ذهني في ثواني …. ياااارب ساعدني صدق مدري وش أسوي 😭😭😭😭 المهم بعد ما صور الرجال راعي السيارة الثانية الحادث قال لنا الشرطي الحقوه ووقفوا قدام عشان ما تعطلون الطريق … ولحقناه زي الشطار😬 ووقفنا على جنب ونزل الرجال يشوف سيارته … الرجال الله يذكره بالخير ......... ...... .. في يده اليمين (الله يهديه ويصلحه) دخان، وفي اليد الثانية ولاعه 😕 (أكيد بتقولون شلون تدققين وأنت بهالموقف .. الجواب: أنا بطبيعتي ملاحظتي قوية "ما شاء الله" يعني بوقتها كنت لاهية ومرتاعة بس بعد ما رجعت صرت أتذكر الشكل وأتذكر التفاصيل كنها قدامي😳) في هالأثناء دارت في راسي مليون فكرة وفكرة وتخيلت بيجون الشرطة وبيغرموني عشان رخصة السواق وبننطق كم ساعة عشان يجون ويخلصونا .. هذا غير قيمة تصليح سيارة الرجال .. يعني بلاوي من كل جهة 😑 المهم نزل السواق من السيارة ثم نزلت أنا (مع إني ما تخيلت إنه بيجي يوم وأوقف كذا في حادث مع رجال لكن أمر الله) قلت للرجال شف بقول لك الصدق .. ترى السيارة الظاهر منتهي تأمينها .. والسواق جديد وما معه رخصة .. قال: بعددد !! قلت إي والله بعد 😬 .. قلت بس تكفا الله يعافيك فكنا من نجم ومن المرور وهذا رقمي صلح سيارتك وعلمني كم كلفتك وأنا والله أدفع قيمتها … قال لا والله يا أختي (القوونوووون لا يحمي الموغفلين أنا من يضمن حووقي) أثر الرجال حساوي 😆 (قلت بقلبي ايه زين كوده يارب حساوي حبيب أخبر أهل الحساء حبيبين وسمحين) قلت: لا تخاف والله أنا أضمنه لك إن شاء الله … قال لا معليش أختي لازم يحضرون الدورية يشوفون عشان يضمنون حقي …. (ياربي لا إلا الشرطة هذا اللي أنا خايفة منه 😩) المهم واتذكر إن معي 500 توني صارفتها عشان أعطيها الكوافيره اللي بتجيني المغرب تسوي شعري .. (ونطت في راسي فكرة) قلت له: وش رايك هذي 500 ريال (وأطلعها لها له) قلت خذها وصلح سيارتك وإذا ما كفت اتصل علي علمني وأزيدك، أما إذا كانت قيمة الإصلاح أقل منها فـ رجع لي الباقي) .. يوم والله إن عيونه بدت تدور وتغيرت علومه يوم شاف الـ 500 🙄 (ما هقيت إن الفلوس تأثر لهالدرجة على الأقل أثقل شوي سو نفسك كنك مااهتميت 😂) قال: امممم اممممم والله ماادري يااختي وش أقول (قلت في قلبي لا تقول شيء خذها وفارق فكنا من شرك 😡) قال طيب علشانك ياأختي (لا ياشيخ عشاني🤣) خلاص باخذها وإذا كلف التصليح أكثر ببلغك أما إذا زادت على قيمة الإصلاح بتواصل معك وأرجع لك الباقي .. المهم وينطق حاتم الطائي اللي بداخلي وقلت: لا والله ما ترجع منها شيء اللي يبقى منها حلال عليك (وأبيه بعد كود يستحي لو ما كفت الفلوس يستحي يطلب زود 😆) قال مشكورة أختي ما قصرت وجزاك الله خير وقام يتشكر ويتكلم بكلام كثير ماانتبهت له … خلاص أنا ما في بالي إلا إني أبغى أروح للبيت أعصابي تلفت أول مره يصير لي هالموقف ووراي مناسبة وشغل … أوووف خلاااص ما أتحمل 😖 ما صدقت أدخل البيت على أمي شوي وأصيح 😭😭😭😭 سبحان الله مهما كبر الواحد إلا إنه في مواطن الضعف مثل الطفل يحتاج أمه (الله لا يخلينا) إذا شافها مدري كذا يحس بالأمان يحس بالحنان شعور كذا لا يوصف ❤❤❤❤ الله لا يحرمنا منهم وبس 🤍🤍🤍🤍 💫 قبل النهاية: أكيد بتستغربون إني عطيته الفلوس وبتحسونها دلاخه مني .. لكن لو فكرتوا شوي هذي أقل شيء ممكن أخسره لأن مخالفة إن مامع السواق رخصة هذي عليها 1000 ريال + زائد قيمة إصلاح سيارة الحساوي صح إنها دقشه بسيطة وسيارته الله يستر علينا وعليها لكن أكيد مسكين حلاله غالي عليه … 💫 النهاية: بعد ما رجعت للبيت وصرت أفكر بالسالفة دار في ذهني تساؤلات كثييييرة أبرزها: النساء اللي يطالبون بمساواة المرأة بالرجل، هل فعلا يستطيعون تحمل المشاق والمواقف الطارئة غير المتوقعة؟ … هل أنا مختلفة عنهم؟ … أم هم يتصنعون القوة والتحمل؟ حقيقة لا أعلم 🙄 لكن أطرح السؤال عليكم للنقاش أتحفونا بآرائكم🌷
|
#2
|
||||
|
||||
رد: هل المرأة مهيئة لمثل هذا ؟؟ ….. (تجربتي من الواقع)
اصلا 500 ريال ماتصلح شيء بالسيارة
- أذا السيارة مافيها تأمين بيشيلون السواق بالدوري ويقطونه بالتوقيف ختى تدفعين للطرف الثاني وغالياً تبدأ المساومات وبتدفعين أكثر - ياشين الأنتظار ودك تدفعين وتمشين لو اكثر من المستحق - المساواة صعبه جداً ًوقاسية على المرأة وبعضهن أدركت أنها ضحية دعوة للمساواة والله زميل عمل معنا أنتقل لشركة أمريكية مشهورة بالسعودية يقول خطوني مشرف على مشغليين بنات سعوديات بكفرول وعلى خطأ الانتاج حالها حال الرجال
|
#3
|
||||
|
||||
رد: هل المرأة مهيئة لمثل هذا ؟؟ ….. (تجربتي من الواقع)
أصلا سيارته ما جاها شي لو بيمسحها بفوطه راحت الحكه 🙄 لكن الواحد أحيانا يشتري راحته والسلامة غنيمة ..
|
#4
|
|||
|
|||
رد: هل المرأة مهيئة لمثل هذا ؟؟ ….. (تجربتي من الواقع)
اولا ليش تمشين بسواق بدون رخصه وتامين منتهي؟؟
اقسم بالله حالفه على عيالي ابن امه يسمح لمخالف اذا غلط عليه … على كيفكم حنا نمشي بالنظام وانتم تتهاونون وتبغوننا نسامح؟؟ معصي بعدين وشي 500 ريال؟؟ صدقه هي!! الان اكثر تهاون ومسخره بالتلاعب الحريم الي ينقص منهن يكملنه بسووايق كمخ… لايمسك سياره الا الرخصه بيده ولاتخطين خطوه الا مامنه سيارتك والا تحملي قلق مرور ونجم وتوقيف وان شاءالله سجن طز 🤣 بعدين دليل ان الحرمه غبيه تحسبين هالتصرف يمشي على الرجال؟ ممكن يصور لوحتكم وسيارتك ويبلغ فيك هروب .. من بيدري انك معطيته ترضيه خمسميه؟؟ العاشر والاساس بالموضوع .. هن مهب قد هالمسؤليه صح قويات لكن فيه غباء وفيه شر وفيه قلة حيا << ما اقصدك انت … الدليل نص تحرش هالوقت تبلي منهن .. يتبلن الشباب يبغن فلوس ويحددن ويسون حركات وسخه … من قال ان الهدف من مطالبة المساواة من صالحهن؟؟ الاغلب الله لايبلانا استغل المساواة بالشر .. وانت غلطانه الف ولو انا مكان هالرجل رميت الفلوس بوجهك واتصلت على اكبر ضابط بالمرور يجي 😂😂😂
|
#5
|
||||
|
||||
رد: هل المرأة مهيئة لمثل هذا ؟؟ ….. (تجربتي من الواقع)
بس أخلص شغلي اللي معي وراجعة لك أرد إن شاء الله 😤
|
#6
|
||||
|
||||
رد: هل المرأة مهيئة لمثل هذا ؟؟ ….. (تجربتي من الواقع)
اول شي لازم تعطينن مكافاه قريت موضوعك كامل رغم طوله
انت شكل سوالفتس ماتخلص 😆 الوكآد. ٥٠٠ ماتعتبر كثيره بعض الحوادث تكلف تصليح السياره بالآلاف. لذالك التامين مهم. والحمدلله ع سلامه عبدُالمَجيدْ معجب بهذا.
|
#7
|
|||||||||||||||||||||||||
|
|||||||||||||||||||||||||
رد: هل المرأة مهيئة لمثل هذا ؟؟ ….. (تجربتي من الواقع)
ماجاها شيء طبعاً تقديرك " تقدير الحريم " شاطفه الجنب كله وماجاها شيء تدرين لو الحكة بزاوية الباب والرفرف هذه تخلي الواحد يكره سيارته
|
#8
|
|||||||||||||||||||||||||
|
|||||||||||||||||||||||||
رد: هل المرأة مهيئة لمثل هذا ؟؟ ….. (تجربتي من الواقع)
سيارة ولدي جديده ومبلغ فوق مب بسيط. وحكته حرمه التقدير قال 11 الف… طبعا لو ملح قالت مسحه وتروح ماتبان😜 استغرب تكرهونها .. جاه هالشعور بس تراجع يعني مهب منطق تكره بسرعه😂😂 بكرا تتزوج تكره حرمتك بسرعه؟؟ خلو الكره لاتعظمت الامور🤣🤣🤣 غريب الماضي معجب بهذا.
|
#9
|
|||||||||||||||||||||||||
|
|||||||||||||||||||||||||
رد: هل المرأة مهيئة لمثل هذا ؟؟ ….. (تجربتي من الواقع)
أول شيء .. الله يعظم أجر هالعيال على كثر هالتعليمات اللي تجيهم مدري في الأخير وش بيطلعون 🙃 ثاني شيء .. تحسبين تطليع الرخصة سهل ترى مواعيده بعيده يعني في الرياض أقرب موعد بعد شهر وإذا جا موعده يبيله فترة يدرس ويختبر يعني يمكن يبيلها شهر ثاني … وبعدين ترى هو عنده رخصة في ديرته ويعرف يسوق ومجربين سواقته هنا زينه وراكده مره لكن ما تعود على هبال حقين الرياض وحرب الشوارع اللي تصير كل يوم بعد الدوامات .. وتراني ما صرت أروح وأجي معه إلا محتده لأن ما فيه أحد يودي ويجيب كلن مشواره في قلعة وادرين يعني أنسي زوجك أو لدك يوديك لدوامك لأنه مرتبط بنفس الوقت بداوم أو دراسة ويبيله ساعتين على بال ما يوديك ويروح لدوامه مع بعد المسافات والزحمات وهذا الشيء موب عملي أبد ومستحيل يكون روتين يومي .. قسم إن يخليني أترك الوظيفة عشان كذا ماكله تبن وساكته 😐 وبعدين ترى السيارة صارت مأمنه لكن لأن السواق ما معه رخصة يصير ما يشملها التأمين … وبالنسبة للرجال لو يبلغ عنا هروب .. أنا قلت له يوم أعطيه الفلوس قلت عاد مو تبلغ عنا هروب أي فلوس ناقصه بلغني هذا رقمي عندك … قال لااا وين أبلغ هروب الله يهديك (يعني لا تتهميني) قلت له طيب أحلف 😬 ( ثم سكتت حسيتني خذت راحتي شوي🤐) ثم قلت له تراني ماشية بالثقة خلك قد الثقة … طبعا أكيد احتمال يقلب علينا ويبلغ لكن هي محاولة مني إن صابت الحمد لله وإن خابت الشكوى لله .. عاد يحلها بعدين زوجي أو أحد أخواني معه أهم شيء أنا الحين أروح للبيت … وبخصوص الفلوس اللي بترمينها بوجهي وتتصلين على أكبر ضابط يجيك على أساس أكبر ضابط فاضي لك أنت ووجهك يجي عشانك يالضفدع 😆 أقول بس عطيني فلوسي وتوكلي على الله 😛
|
#10
|
|||||||||||||||||||||||||
|
|||||||||||||||||||||||||
رد: هل المرأة مهيئة لمثل هذا ؟؟ ….. (تجربتي من الواقع)
وش أسوي القصة طويلة ما قدرت أختصرها 😁 والا لو تلاحظ ترى المقدمة والخاتمة قصيرة مرة ومختصرة … شكلك قريت أول أربع دقايق وبعدها فصل معك السلك 😆 وأنا عارفة إن 500 موب كثيرة لكن هي محاولة ولعلها صابت إن شاء الله ..
|
مواقع النشر (المفضلة) |
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
راديو قصيمي نت | مطبخ قصيمي نت | قصص قصيمي نت | العاب قصيمي نت |