العاب اون لاين: العاب بلياردو | العاب سيارات | العاب دراجات | العاب طبخ | العاب تلبيس |العاب بنات |العاب توم وجيري | العاب قص الشعر |
للشكاوي والاستفسار واستعادة الرقم السري لعضوية قديمة مراسلة الإدارة مراسلتنا من هنا |
|
|
|
أدوات الموضوع | تقييم الموضوع | انواع عرض الموضوع |
#1
|
||||
|
||||
TARIQ AL-TAIB a WORLD WONDERS
في عام 1417هـ تحديداً قبل مباراة الديربي السعودي بين الهلال وغريمه التقليدي النصر تقريباً تكون الترتيبات في البيت لمشاهدة هذه المباراه والاستمتاع بها على أتم استعداد وتكون الأجواء في البيت صحية والكل منتظر هذه المباراة من كبيرنا الأب إلى أصغر أخواني ..ففي هذا اليوم تتجهز وتترتب وتتنظف الغرفة اللي فيها التلفاز وفي هذا اليوم توصد الأبواب في وجيه الأطفال الصغار وفي هذا اليوم تمنع الزيارات ..وترتفع لهجة التحدي وتلبس الشعارات الخاصة بكل فريق ..وتجهز الأكلات الخفيفة مع دله القهوة والشاي ..وتنقضى جميع الأشغال قبل موعد المباراة وتتكسر جميع أنواع الحواجز بين الأب والأبناء .. وكان الوالد وأخواني كلهم نصراويين إلا أنا أبتسم لي الحظ بأن أشجع فريق الهلال ..وأمي متعاطفة مره تشجع هذا ومره هذاك لكن مهوب على لعب الفريق لا على حالنا في أوقات سير هذه المباريات .. وكانت هي أكثر وحده تتعب مره تجي يمي وتطبطب على كتفي وتقولي اللحين الهلال بيجيب قوول ومره تروح عند اخوي الصغير وتشاركه الفرحة في خفى عن عيوني وتباركله الفوز .. وفي أثناء مباريات الديربي ومباريات فريق الهلال خاصة كنت أجلس في منتصف الغرفة أقرب للتلفزيون وبمعنى أخر تحت التلفزيون والنصراوين في الجهة عند أبوي ويبدأ التحدي وحرق الأعصاب مع صافرة البداية .. هذا هو جو العائلة قبل مباريات الهلال والنصر .. في عام 1417 هـ أقيم أشهر ديربي عشته في حياتي بين الفريقين وانتهاء 4-4 في مباراة مثيره سجل الهلال اربعه أهداف في الشوط الأول وسجل النصر مثلها في الشوط الثاني زمااااااااااااان يا كوره وزمان يا لعب وزمان يا تشجييييع .. أول أهداف الهلال في وقت مبكر ومن فرحتي بالهدف أعطيت التلفزيون ظهري وقابلت لأبوي وأخواني النصراويه وأحتفل في وجيههم واللي ساكت منهم واللي يقول لسى بدري .. وشوي ويجي الهدف الثاني للهلال ونفس السيناريو احتفلت بالهدف بنفس الطريقة ولا واحد من أخواني يناظر فيني كلهم يناظرون في التلفزيون وأبوي يقول لسى بدري باقي شوط ثاني كامل وتجي هجمه لفريق النصر وصوت ابوي وأخواني صار أعلى من صوت المذيع شوت شوت ويتصدى لها تركي العواد بكل استعراض ويرجع الهدوء إلى الغرفة وما هي إلا لحظات ويسجل الهلال الهدف الثالث وأوقف قدام التلفزيون أرقص وافرح وابتهج بالهدف والتلويح بعلامات النصر وما أسمع إلا أخوي النصراوي يقولي أفرح هناك عن التلفزيون والثاني يقول والله لو ما تبعد عن التلفزيون لا أطبع هالفنجان في جبهتك وأجلس وانا فرحان بالهدف ووسط سكوت وهدوء تام في الجانب النصرواي على أداء فريقهم وقبل ما ينتهي الشوط الأول سجل الهلال الهدف الرابع واخذ نفسي بهذا الهدف واروح للصاله جري وأشقلب وأعبر عن فرحتي وارجع للغرفه وأقول لهم انتم لسى جالسين .. وسط ذهول ابوي واخواني النصراويه من هذه النتيجه وحتى الأمل اللي كان عند ابوي أن فريقه بيعدل النتيجة انتهى وأقولهم انا لو مكانكم معاد أكمل المباراه .. واللي فيهم يشتم المدرب ويسب اللاعبين وانتهى الشوط الأول وأجلس عند اخوي وأقوله هاه كيف الهلال ويقولي لا تفرح تراها بالحظـ ( التعصب أعمى ) وبين الشوطين أجلس أنرفزهم بأهداف ولعب والهلال وهما يعاندون بأن الاهداف كلها جات بالحظ .. ويبدأ الشوط الثاني ويسجل النصر الهدف الأول وأقول لهم معليه افرحوا شويه ترى الهلال راحمكم وهما اللي يردد ويقول يالله يالله اللحين يجي الهدف الثاني وهو معصب ولحظات ويجيب النصر الهدف الثاني ويحتفلون اخواني بالهدف وانا ساكت واللي يوقف منهم ويجلس مع الهجمات واللي يتحسر على ضياع الفرص وبداء اللعب بالأعصاب وأبوي مره مرتكي مره جالس وأقولهم لا تفرحون كثير ما بتفوزون إلى أن سجل النصر الهدف الثالث ويزيد صياح أخواني على الهدف وأنقلب الحال والهلال معاد هو هلال والنصر ضاغط ويدي على راسي وبديت أسحب نفسي شوي شوي من وسط الغرفه الى الزاويه الوضع ما يطمن وعلى كل هجمه للنصر يوقفون أخواني واللي يقول هذه هي .. يالله التعادل .. هااااااااه مرر.. شوت هدف .. هدف.. وانا قلبي بيوقف الى أن جاء هدف التعادل وزاد صياح وزادت فرحتهم ويجي اخوي الصغير وينسدح قدامي يعبر عن فرحة بالتعادل وانا عيوني بس في شاشة التلفزيون لا اسمع ولا ارى وأبوي رمى الشماغ من الفرحه وقربت دمعتي تنزل مع نهاية المباراه والبكيه قريبه مع هجمات النصر الأخيره.. إلى أن انتهت المباراه واخذ نفسي على الغرفه وأدخل تحت البطانيه وبكيت أليين نمت .. وبعد هذه المباراه المجنونه حبيت الهلال أكثر وأكثر.. وبعد هذه المباراة المجنونه صرت مجنون في الهلال وكيف أني أروح للبقاله وأشتري بخاخ بـ 6 ريال وأكتب على الجدار اللي مقابل للملعب عبارة ( العقل السليم في تشجيع الزعيم ) ( ركود ركود الزعيم موجود ) .. لكن في السنوات الاخيره معاد نشوف مثل هذه المباريات لان الغريم التقليدي عارف نفسه من قبل المباراه بأنه خاسر وهالك .. وأقصد هنا النصر .. ومن بعد أعتزال يوسف الثنيان ما شفنا من بعده أي لاعب في أي نادي يمتع المشاهدين بمهاراته وأستعراضه بالكوره أمام الخصوم كل ما جاء لاعب جديد نكتشف مع الأيام أنه من النوع اللي دقها وألحقها .. إلى ان جاء طارق التايب صانع العجايب وعامل العمايل ومنشئ الأنفاق والكباري .. وعادت المتعه وعاد الأستعراض ورجع لنا بعض من مهارات يوسف الثنيان والعيب في يوسف أنه لعب في زمن قديم ما فيه تصوير واضح وما فيه تقنية عالية الجوده يوم كآنت القناة الاولى تنقل المباراه وفي منتصف الشوط يقطعون المباراه ويجي المذيع الساعة تسعة ونص و يقول عزيزي المشاهد حان موعد الاخبار الرئيسية و بأمكانك متابعة المباراه على القناة الثانية إلى أن اعتزل ابو يعقوب تارك وراه ضحايا الكعوب وباص العيون والتسحيب اللي كآن ياخذ الكوره ومن الباب للباب وخمسة لاعبين يجريهم وثلاثه ينبرشون ولا يوقفونه وأن واحد صاد رجله يطيح ويقوم يكمل المباراه مهوب زي لعيبة اليوم الواحد من دون كورة ومن دون أحتكاك يجيه رباط صليبي .. ورجع لنا هذا العهد القديم بوجود طارق التايب يمتع ويستعرض بباص العيون والكعوب والتسحيب ومشاريع الكباري والانديه في أعز توهجها وعطائها أللي من سؤ حظ بعض اللاعبين اللي هم اعمدة المنتخب الاوول أنهم يلعبون في وجود طارق لو كانو مدرسين ولا عسكر لكان أصرف لهم .. وهذه بعض الصور لطارق التايب صانع العجايب جسلت يومين أجمع فيهم حتى اني اظطريت اني اسجل في بعض المواقع علشان تطلع لي الصور .. في الصوره هذه توضح لنا مدى خوف لعيبة الأهلي من الكوبري كل واحد يقول للثاني انت اللي أهجم عليه .. :: أهيي يا طارق .. وربي خميت اللاعب الأتفاقي بباص العيون هذا .. :: بالله عليكم شوفوا حركة رجول الحكم بعد الكوبري من طارق ..! طارق يهيب اي لاعب امامه او حكم بأن يقمط رجوله .. :: طارق والله لعبك ما بعده لعب .. أستعراض ساخر من التايب .. :: :: وش تسوي يا طارق أمانه وش تسوي انت فيهم هذه مهيب كباري هذه انفاق يا طارق .. :: ههههه معاذ خايف من الكوبري والنتيجة تصافقت ارجوله في بعض وحرث أرضية الملعب .. :: أنتبه أمامك طارق يا نايف رقصه وحده يمين ومره يسار .. :: طارق يجعلني ما اشوفك تعتزل ولا اشوفك تلعب لغير الهلال يا لعييب.. لحد ينقله للقسم الرياضي .. ودعتكم الله
التعديل الأخير تم بواسطة رومانيا ; 29-05-09 الساعة 04:52 AM. |
#2
|
||||
|
||||
سلامات ترى انا اول من طبت موضوعك
قبل ادخله قلت اكيد مالين كل الصفحه بس قلت بسجل حظوري همن اجي اقراه الين تعدل دميجتي
|
#3
|
||||
|
||||
دقيقه دقيقه عنوان الموضوع جاي بالعربي وانا ابيه بالأفرنجي ..
Tariq Altaib a world of wonders اي واحد من المشرفين ياليت انه يعدله لي حياك يا شيخة المواضيع الي مالي الصفحه اصبري عليها شوي ترى هذا اعتبريه نواشف بس ..
|
#4
|
||||
|
||||
<<جـآين يركض ركـض يبي يثبت موضوع سـلآمآت قبل آلثآنين
دقيدزه خلـن آع ـدل موضوعك آللي تبيه عنقليزي مير يمكن آن منتدآنآ مـآيقبل آلا بآللغه آلعربيـه <<قم آذلف برآآ يئطع حريشك لـي بـآك آفصفص موضوعك
|
#5
|
||||
|
||||
سلآمـآت
عيآ لآيصير عنقليزي موضوعك ميـر آبرك لك تحطه عـربي درءً للـي يبون يغثونك بآآسآلتهم همن تبلش وتقول وآنت صآدز يآمش مش <<لعنبوه مـآيعرف يحتسي آتحدآك بوه شئ متغيـر وشهوو.. ..؟؟
|
#6
|
|||
|
|||
ياطول موضوعك طولاه ..
بس فهمت من اول سطرين تتكلم انت عن ديربي العاصمه ... ووتتكلم عن طارق التايب .. اهم شي الزبده وصلت... خخخخخخخ رااايق يعطيك العافيه ..
|
#7
|
||||
|
||||
هههههههههههههههههههههههههه
والله توحفه الصراحه سلامات انت تختفي وترجع لنا بمواضيع رائعه في القمه الصراحه تبطحت عليك من الضحك انت وابوك واخوانك من الضحك ليش كل ذا التعصيب المدمر وحالتك حاله تضحك عليهم بالشوط الاول ان ماسمعت من حفر لحفرة لاخيه وقع فيها انت ضحكت عليهم ومستانس بالشوط الاول ثمن انقلب الوضع عليك بانهم يضحكون عليك وهو مستانسين مداخله من نظريتي الافقيه والبعديه انه لعب المباريات الزمن القديم والاول احسن من لعبهم الان وفرق شاسع كبير ايضا عوافي خيو سلامات على هيك مواضيع
|
#8
|
||||
|
||||
مشتآق حآيل يا بعد قليبي والله .. عاد لا صار موضوعي مثبت من اياديك ما بتسعني الأرض من الوناسه الفرحه تعرفون ليش لان اصابع مشتاق حايل اللي كانها أصابع تويكس لآمست موضوعي .. <<مشتاق الثآنين اللحين منقهرين .. والمونتدى يا بعدي يجي بالأفرنجي بس همااااااه انا أركض ركض ابي انزل الموضوع ويومي رحت أترجم نص العنوان نسخت النص اللي بالعربي وحطيته هو العنوان وخليت الترجه اللي بالأفرنجي < والله من الدباشه اللي فيني
|
#9
|
|||||||||||||||||||||||||
|
|||||||||||||||||||||||||
هههههههههههههههه عذر البليد اللي مثلي ومثلك مسح الصبوره يا مشتاق .. يصير وليه ما يصير بس كليك مرتين على عنوان الموضوع وغيره بس من برى مهو من جوه .. وبعدين ترى والله ما بغيته بالعنجليزي الا علشان اسوي يعنني اعرف في الانجليزي وماني بسيط بس الله يخلي لنا جوجل .. وانا يا بعد حيي كلي ثقه فيك وفي أفكارك لو تغير كل ابو الموضوع عارف ما بتغيره الا للمصلحه العامه أو درءاً للمفاسد .. إلا قولي وش غيرت .. يا حبني لك ..
|
#10
|
|||||||||||||||||||||||||
|
|||||||||||||||||||||||||
ههههههههههههه أهم شيء أنه وضحت الرساله اللي ابي اوصلها منول سطرين .. وترى السطرين اللي فوق واللي تحتها اللين الصورهذا كله ما يسمى بالمقدمه للموضوع .. ومع اني ما مخمت عليه كثير وكوبري التايب ليته على حكم سعودي لكان في اليوم الثاني يعتزل التحكيم.. الله يعافيك وعلى الرحب والسسسعة
|
مواقع النشر (المفضلة) |
الذين يشاهدون محتوى الموضوع الآن : 1 ( الأعضاء 0 والزوار 1) | |
أدوات الموضوع | |
انواع عرض الموضوع | تقييم هذا الموضوع |
|
|
راديو قصيمي نت | مطبخ قصيمي نت | قصص قصيمي نت | العاب قصيمي نت |