02-04-10, 04:31 AM
|
|
الخير من يوم(ن) رحلتي معك سار...))
سهله تناديني عسى حالك بخير=وانت تعرف ما مرني الخير مشوار
الله وامانه ياعدو التفاكير=عامين وانت تشتت بكيفك افكار
عامين وضلوعي حطب للمناشير=الجذع روحي والورق داخل النار
لاتفضح اسرار الورق خله فبير=يشيب راسك لو عرف كل الاسرار
خل نتعاتب قبل لاتنوي السير=لاتسأل سنين البطا عقبه اش صار
سود العوارض لونتها الطباشير=شف كيف عارض صاحبك كله وقار
هو ينشرى وقت(ن) رحل بالدنانير=او قد بقا في عمرنا ربع دينار
تعال نترك للحياة الفواتير=قبل الليالي تكسب المال بغمار
عامين يالجافي وانا سلوتي طير=لاصاح هزت عبرته كل الاشجار
عامين شوفي ما تعدى التصاوير=صار النضر برواز والضلع مسمار
كنت اقطف احلا امنياتي نواوير=حتى اجيب لحضرتك عقد الازهار
طال الغياب وصار عقد الازاهير=باقي رفات(ن) هزه الريح ثم طار
اللي كسبته من غيابك تعابير=كنت اكتبه في موت لكنه اشعار
حتى خذتني في حساب المشاهير=موتي يسبب شهرتي يال الاقدار
واليوم تسألني عسى حالي بخير=الخير من يوم(ن) رحلتي معك سار
التوقيع
|
|
|