[@ترايستار@]

بسم الله الرحمن الرحيم

والصلاة والسلام على سيد المرسلين .. اما بعد

اعضاء قسم العلاقة الزوجيه ... المحترمي ..

يسرني ويسعدني في هذا الصباح الجميل .. ان اقدم لكم قصة حدثت معي قبل فتره ..
سأذكرها لكم بالتفصيل الذي اتمنى ان لا يكون ممل ..
والهدف من هالقصة .. سيتضح لكم من خلال احداثها ..


نبذه موجزه عن ابطال القصة .. ( منيفه و هويمل ) ( ابو خيط ) ( ترايستار )

منيفه : اسم مستعار لوحده تقرب لي .. ولا تتغطى عني .. دورها في القصة .. زوجة هويمل
طبعا ميفه مو اختي ولا بنتي .. لكنها ما تتغطى عني .. عاد انتم وذكائكم ..

هويمل : كمان اسم مستعار لشخص يقرب لي .. وكمان ما يتغطى عني هههههههههه

ابو خيط : سبب المشكله ..

ترايستار : هذا انا .. جعلني فدوة عيونكم .. دوري في القصة .. صديقهم يعتبروني امين سر و مصلح اجتماعي رفيع

احداث القصة كالتالي :

في يوم من الايام وكان يوم خميس .. .. اتصل بي هويمل وقالي : الحق علي ياعبدالله ..
قلت له سلامات .. عسى ما خلاف
قالي : منيفه عند اهلها ..
قلت له .. طيب قلها اذا بغت شيء لعيالها .. تدق علي انجز امورها .. <<< خابره اذا راح كشته وناوي يبات برا البيت .. يوديها لأهلها .. واذا بغت شيء تكلمني اجيبه لها .. اذا اخوانها مو موجودين ..
قالي .. لا يادب .. المسأله مو كذا
قلت له : اجل .. وش السالفه
قالي : منيفه زعلانه .. علي
قلت له : طموووووووووح ..
قالي ايه طموح ..

سألته بشكل سريع .. وش السالفه
قالي وديتها البارح .. ( يقصد يوم الربوع ) وديتها مسيره على اهلها
ويوم جيت ابي اسري للبيت مريتها .. ولا طاعت تروح معي ..
كان الوقت متأخر .. ولا دقيت عليك ..
والحين ابيك تشوف لي حل ..
وقالي : تراها فهمتني ان اهلها ما يدرون ويحسبونها بايته عندهم لأني كاشت ..

سألته .. ليش هالشيء صار .. قالي والله مو عارف ولاني خابر اني زعلتها ..
اللي اذكره ان اهلي كانوا عندنا يوم الثلاثاء .. ومن يوم راحوا وخاطرها مو زين ..
يقول انا كنت متعب لأني ما نمت عصر الثلوث .. لأن اهلي مسيرين علينا .. من يوم راحوا نمت
وصبح الاربعاء داومت .. وجيت من الدوام .. وقالت ودني لأهلي بروح بدري .. يبون يجونهم حريم
قلت ما يخالف .. وديتها ورجعت للبيت ونمت للمغرب .. وآخر الليل مريت ابي آخذها كالعاده ..
لكنها قالت لي بالتلفون .. ماني رايحه معك .. ولا عرفت السبب ..
الحين ابيك تشوف وش الموضوع وتحله بدون محد يدري ..

قضى حواري مع هويمل ..


رحت لمنيفه عند اهلها وقلت لها ..
وش بلاك زعلانه على هويمل ..
قالت : هويمل هاوشني

قلتها لها .. وش الجديد ..
( عاد انا خابرهم .. ما اكثر من هواشهم .. كنت اذا رحت عندهم استانس على معاركهم الكلاميه وادخل مره بصف هويمل ومره بصف منيفه ههههههههه .. )

وهم فهموني ان هالشيء ما يصير إلا اذا كانوا لحالهم .. لكن انا وضعي غير وانهم ما ينحرجون مني
وياخذون راحتهم ..
فعلا كانت حياتهم عسل .. حتى انا تعلمت منهم هالطريقه .. ( المناقشه مع التريقه والخبال ههههه )
بالنسبه لي كانوا مميزين في تعاملهم وميانتهم على بعض .. مشاء الله تبارك الله ..

قلت لها وش نوع الهوشه .. وش قالك هويمل ..
قالت قالي .. انا ما قلت لك ابي ابو خيط

قلتها لها بلا في شكلك .. منهو ابو خيط ..
وش يقرب لكم .. ماني خابر احد من قرايبهم اسمه ابو خيط ..

قالت : السالفة بالتفصيل .. ان اهله كانوا عندنا ..
والوضع كان زي العسل ..
وكلش تمام
بعد العشاء .. كنا جالسن انا وامه وابوه وخواته ..
وقالي جيبي لنا المزاج ..
عاد انا متعوده وياه نشرب شاهي اخضر عقب العشاء
وكان كل واحد منا يحب نوعيه .. انا احب الصيني الورق .. وهو يحب شاي لبتن الاخضر ابو خيط وكل واحد له كاس بلحاله .. ..

يوم قالت كذا ههههههههههههههه وانا افطس من الضحك
حتى قالت لي .. انا وين وانت وين .. وش بلاك تضحك
قلت اضحك على خبالكم ..

كملي كملي :

قالت : رحت وعملت شاهي احضر من الصيني ..
عشاني مسويه الشاهي في براد واحد
عاد يوم جبته وحطيته قالي وين ابو خييييييييييييييط بصوت عالي ونفس شينه.. يعني رفع صوته علي

قلت لها وين المشكله .. مو دايم انتم ترفعون اصواتكم على بعض

قالت لي : ياعبدالله قدامك عادي .. لكن قدام اهله لا و ألف لا ..
حنا ناخذ راحتنا ونتهاوش ونتمازح .. بس قدام الناس لا .. وخصوصا قدام اهله ..

حسيت وقتها بالمشكله ..
المسأله معنويه ونفسيه اكبر من كونها كلمات جارحه او محرجه
منيفه كانت تقصد .. انك ياهويمل .. لازم تراعيني قدام اهلك اكثر من غيرهم ..

قلت لها .. قولي لأمك اني بروح مع الدب للبيت ..
قالت لا ماني رايحه .. لازم هويمل يحس ولا عاد يرفع صوته علي ..

اقنعتها .. تروح .. معي ..
واتجهنا على هويمل مباشره هههههههه
طبعا بالسياره تناقشنا بما فيه الكفايه وطاح الحطب حتى قبل ما اتفاهم مع هويمل
لأني وعدتها اني رايح اخلي هويمل يفهم الوضوع ..
يمكن انه ما حسب حساب هالشيء ( اقصد كلامه عليها قدام اهله )

دخلنا البيت وانا اقوم امسك عقالي .. وامثل كني اجلده .. وهو يصايح
لين جت منيفه واخذت العقال مني وقالت .. لعيناك ياهويمل ههههههه

بعدها جلسنا وتفاهمنا ع اللي صار ..

واتفقنا .. ان هويمل ينتبه لأي كلمه يقولها لزوجته في حضور اهله او اهلها
واهله هو بالذات ..
لأنها تتحسس من ناحيتهم ..
حتى هويمل .. قالها انتي بعد خليك حريصه لاصاروا اهلي عندي
خليك شقرديه .. وذربه في تعاملك معي .. عشان اهلي ما يقولون زوجته معه مو قد كذا

طلع حتى هويمل يتحسس اذا اهله عنده ..
ونفسه يكشخ عليهم ان زوجته صاحيه وفاهمه وذربه وتسمع كلامه

مدري ليش منيفه وهويمل كذا ..
انا فهمت منهم .. انهم لما يتهاوشون او يتعاندون او يرفعون اصوتهم على بعض .. وهم بروحهم ولا عندهم احد ..
ان هالشيء عادي ..
والكل منهم ما وده هالشيء يصير بحضور اطراف ثانيه ..
سواء اهله او اهلها ..

يعني انا بس اللي ادخل معهم بالمهاوشات ههههههه

عاد بعدها انا طلعت واسمع لجتهم وصياحهم .. حتى قالوا لي خذ الباب معك ..
حاولت افك الباب وآخذه معي .. ما قدرت .. قمت صفقته بكل قوتي .. واتسكر ..

بس : قضيت موضوعي ..
ابيكم تستفيدون من منيفه وهويمل .. واتفاقنا المبرم ..

شكرا لكم ,, آسف آسف على الاطاله .. لكن القصه كذا ..
وتراني اختصرت سواليف كثيره .. من هذرة منيفه معي بالسياره ..


/إ×لإ)؛لإ)؛*×[&لأ*ב[&{*‘× لأ

مشاركة هذا الرد في Google Facebook Twitter Digg

أنت معجب بهذا.