28-03-13, 07:15 PM
|
|
اليا كتبت الشعر جبته على الجرح
حتى بليد الحسّ يصبح له إحساس...
خذ غيض من فيض بتفاكيري القرح..
ماهوب عَكْرٍ حاسه الطين وانداس...!!
له صرح بالتاريخ بالمجد له صرح..
مانيب مثل اللي بنا الساس بنحاس...؟!
من قوة المعنى إلى جودة الطرح..
تعجز على حصره وجمعه بفهراس...
مايقبل القسمه ولا يقبل الطرح..
(وزن الذهب وأجود) (وانفس من ألماس)...
تفطن له العقّال ما احتاجت الشرح..
وبشرحه الجهّال تبطي وتحتاس...
ماضاق صدر الشعر فالخاطر الشرح..؟
ويضيق منه البحر وتضيق الأنفاس...؟!
زرحت يوم الناس ماتوحي الزرح..؟
من فيّ غرنوقه إلى ضيّ نِعّاس...!!
في غيبة الفرّيص مرواحٍ وسرح..؟
جا وزنها حب وقصايد بقسطاس...
تشكي خفوقٍ من عنا وحدته درح..؟!
وشخصٍ تركها ((حايره بين الأقواس))...!!
وتقول يابن الناس شعرك على الجرح..
واهل الحسد زادوا على الجرح أتعاس...
قلت الحسد شيطان وبدمعتك مرح..
تعوذي بالله من كل خنّاس...؟!!
لو لا الحزن محدٍ عرف لذة الفرح..
ولو لا الأمل متنا من الهم والياس...
|