|
مساعدة بمعالج شعبي في الرياض
بسم الله الرحمن الرحيم السلام عليكم ورحمة الله يااخواني احتاج لمعالج شعبي او معالجة شعبية في الرياض تسوي لي صبخة للراس لاني اعتقد ان عندي فتحة بالراس تسبب لي تعب ووساوس وحزن ودورت قالو لي ام ناصر في احد قرى القصيم اسمها الذيبيه وضربت لها مشوار وقالو مافيه الا بد الفجر وام سعود في الخرج ممتازه بس اخاف اروح لها ويطلع ماتعالج رجال او لها وقت محدد ايضا المسافه مهيب قريبه اللي يعرف بالرياض يساعدني الله بجزاه كل خير وهل اللي موجودات بسوق حجاب معروفات بالطب لاني سمعت ان فيه دجل واجد وبعضهم مسمية نفسها طبيبه وهي ماتعرف ودي بوحده او واحد معروف وهل اللي في سوق حجاب بتفحص راسي والا بس تعطيني وهو غير مؤكد ان عندي فتحة بالراس وهل لو اخذت وماعندي فتحة وحطيت الصبخة بتضرني الله يجزاكم خير ساعدوني الله يعافيكم |
طيب ليش ماتروح للمستشفى
خل الطب الشعبي أخر شيء أنا من الرياض بس والله ما أعرف احد عشان افيدك وبالنسبه للعجز الي في سوق حجاب هج منهم بعضهم حتى سحرات الله لايبلانا أتمنى لك الشفاء العاجل |
الله يجزاك خير اختي دلفينه
المستشفيات ماعندهم الا طب نفسي والادوية النفسية جربتها سنين طويله تهديك طالما انك تاكلها عقب ماتتركها ترجع على ماكنت اذا مهوب اردى حسبي الله ونعم الوكيل على الرجال اللي عند ام ناصر في قرية على طريق المدينة المنورة وطاق له 450 كيلو اقوله جايك من الرياض يقول ماعلي منك تعال عقب الفجر وين اروح انا لين بكرى انام بالبر |
طيب أخوي وين الفتحات000أعلى الرأس000او الجنب الايمن
اذا أعلى الرأس تسبب النسيان واللي على يمين الدوخه000والصباخه انا جربت وصفه وفادتني لان كان عندي000اربع فتحات000وهي بيالة سدر بيالة حنا ملعقة ملح خشن لاتحط الملح الناعم ساسا وغيره ملعقة زنجبيل0 وحاول تقرأ عليهم الفاتحه000واية الكرسي00والمعوذتين000 والايه(لو أنزلنا هذا الكتاب على جبل 00الخ0000وتراني جربتها بدون قرأن مفيده بس سبحان الله000بالقرأن النتائج مررره عجيبه000سبحان الله فيه شفاء للناس |
اختي اسية الله يجزاك خير
انا مدري عندي فتحات بالراس او لا لكن رحت لمشائخ للقراءة وقالو لي ان اغلب الظن ان فيه فتحة والا محد فحص راسي لاني مالقيت احد طيب يا اختي انا بسوي وصفتك ان شاء الله لكن لو ماكان عندي فتحات بتضرني ؟ والمقادير اللي قلتي عليها احطها مع كم مقدار من المويه وهل يصلح احط مويه مقري فيها ؟ وطريقة وضعها شلون احلق شعري بعدين انشرها على راسي واخليه لمدة كم؟ وكم مرة اسويها؟ وهل فيه اشياء اتجنبها ؟ الله يجزاك خير ولا يوريك مكروه |
أخوي اذا تخطيط الرأس سليم معناتها أنك موسوس اوفيك عين عليك بالقراءة
|
اختي اشير عليكي والقرب لكي والذي سمعت عنهاا انهااا ممتاازه وكثير من الزملاء ذهب لهااا ام سعود في الخرج واحده باا وحده بس ترهاا غااليه شوي في العلاج بس بااا اذن الله جديده احسن لكي من المصااريف اليوميه دون جدوه الله يستر عليك ويشفيك
|
ام سعود اشهر من نار على علم لكن ماودي يصير اللي صار
شلون طريقتها ومواعيدها ومتى تعالج وهل تفحص الرجال او مختصه بالنساء فقط بالنسبة للسعر مافيه مشكلة بس ابي العافيه اكرر شكري لكم |
وعليكم السلام ورحمة الله وبركاته أسأل الله العلي القدير يشفيك ويذهب مافيك من بأس... توكل على الله الشافي ولاتجعل الشفاء في يد أحد من خلقه... وأن كنت رجل لاتضع هالصبخات بتجعل لون شعرك أحمر ولكن تغسل بماء وسدر وملح خشن والأفضل لو تتغسل فيه وتنام عليه ويكون وقت الظهر .. مجرب بقوة الله الشافي سبحانه وتعالى وأشرب مويه وسدر ونصيحة’’ لاتتعلق أن الشفاء بيد أحد أنتبه سوف ينزرع بداخلك ويضعف إيمانك بقوة وقدرت العلي القدير... وتبسم ماالمرض إلا أبتلاء من الله أن صبرت فلك الآجر وأن سخطت فلك السخط تمنيآتي لك بالشفاء |
الامر بسيط بالنسبة للشعر وتغير لونه
احلقه على الصفر ولا يبان لكن الصبخة كم تحط مرة ؟ وكم المدة اللي تحط على الراس ؟ |
يا اخواني شلون تسوى الصبخة احط عليها مويه والا لا
اغليها على النار والا لا |
انا أقو لك أتجه لله تعالى ولا تتجه للعجز ولا لغيرهن
الله سبحانه قال ( وننزل من القران ما هو شفاء ورحمة ...) ارق نفسك وعالجها بالقران والمحافظة على الصلاة والعمره والدعاء في جوف الليل والله يشفيك اسأل الله العظيم رب العرش الكريم أن يشفيك ويعافيك وجميع مرضى المسلمين |
ماعليش أنا قلت الوصفه000ولا ظهرت بعدها00لكن راح أقولك
عن كل الاسئله اللي في راسك000عسب ماترجع تقراها000واتمنى اني أكون حطيت النقط على الحروف0000شوف الصبخه ماتظر000 وأذكر سمعت عبدالباسط يقول000ان الرسول عليه الصلاة والسلام يصف الحناء لكل من اشتكى من ألم برأسه000هي ماتطبخ ليس قالولك مولوخيه000هي تعجن بماء وممكن يكون مقري فيه وانت وش مخوفك مادري ليه أحسك موسوس شوي الله يهديك000اعجنها بماء أنا كنت أعجنها بماء زمزم عندي وأقرأفيه من نفسي000وهذا أفضل000مممم وش بعد000وكونها تكون ثقيله والا خفيفه هذا راجع لختيارك000بس خير الامور الوسط000ومسألة كم يوم00هذا راجع لرب العالمين00وارادته لك بالشفاء00أنا عن نفسي جلست شهر واذا غسلته00حطيت من زيت حبة البركه واخلطه مع زيت الزيتون000الاصليين000أخليه لحد مايجف وأغسله000بس المقري فيه يقلل مدة العلاج ويعطي نتائج ماشاء الله معجزه00بس هذا يعتمد على قوة ايمانك000وظنك بربك00 ولاتنسى التفاؤل له دور عجيب وفعال00ياخي أكثر من الاستغفار بنية الشفاء000بس ياخوي أنت متأكد انو مافيك زيادة كهرب00يعني سويت تخطيط000وفيه علامات تدل على وجود الفتحات000النسيان وبشكل غير طبيعي000الدوخه بدون اسباب مثلا ماعندك فقر دم أو أي شي يسبب الدوخه مثل بعض الامراض اللي من أعراضها الدوخه سواء عضويه والا نفسيه000الانزعاج من الاصوات000وتعب من الانوار00والالوان الصارخه والزاهيه000الم باأعلى الرأس وكأن مطرقه تطرق فيه00ولايستجيب لاي مسكنات00شرود وعدم تركيز00هذي بعض الاعراض اللي أعرفها00وكانت تجيني لاني مثل ماقلت لك000عندي أربع00وحده بأعلى الرأس وثنتين على الجنب الايمن00وحده مادري وين نسيت خخخخخخ اتمنى أكون حطيت جواب لكل أسئلتك أخوي000وأتمنى انو تغير اسمك من باب00التفاؤل00ويكون اسمك المتعافي باذن الله000 |
اقتباس:
المسأله ياخوي موب اللجؤ لغير الله هذا اسمه بذل الاسباب وهذا واجب علينا بس لازم معه الاتكال على الله000 |
الله يوفقك يا آسيه وينفع بك آآآآآآآآآآآمين
|
الله يجزاكم خير جميعا
جربت الصبخة اليوم وحسيت باحساس غريب هداوه وكسل وكأني مخدر |
اقتباس:
تصحيح الأيه؟؟ لمن لا يحفظ القران ارجو الرجوع والبحث في قوقل عن الأيه حتى لا نقع في التحريف والعياذ بالله (لو أنزلنا هذا القرآن على جبل لرأيته خاشعا متصدعا من خشية الله وتلك الأمثال نضربها للناس لعلهم يتفكرون) هذه الآية 21من سورة الحشر وهي سورة مدنية عدد آياتها 24. |
اخت آسيه
اعجن بيالت حنا.. وبيالت سدر.. وشوي ملح خشن بماء مقروء فيه واحطه على الرئس واغطي رائسي واتركه لين يجف ...بعد غسله ... ادهنه بزيت زيتون مع زيت الحبه السوداء كذا صحه... ارجو الرد انا عندي اغلب الأراض الي قلتي ..ما كنت عارفه السبب بارك الله فيك الله يكتبه في موازين حسناتك |
اقتباس:
الحمدلله يعني مرتاح 000الحناء هوالحجامه الصغرى الله يكتب لك الشفاء عاجلا غير آجل |
اقتباس:
وعالعمومماراح يضر لان الحناء ماله أي أعراض جانبيه مثل بعض الادويه000انت المسي رأسك واحتمال تحسين كأن فيه زي العرق ليين مره كأن مافيه عظم أنا تأزم الحال عندي وكل من لمسه000اقشعر جلده تقولين ماكأنه راس لين مره000بس اذا كان في بدايته000ماتلقينهم ولا تحسين فيهم000وصح زي ماقلتي بس لاتغطينه راح يضر000الراس يحتاج يتنفس يعني بدل ماتنتفعين تتضررين000خليه لحد مايجف وخلاص اغسليه000والله يكتب لك الشفاء000بس المقادير على حسب الشعر أنا قصرت شعري000أثناء العلاج000واذا كان شعرك طويل حطي اللي يناسبه000 |
اولا عزيزي اسأل الله الكريم رب العرش العضيم ان يشفيك
اسأل الله الكريم رب العرش العضيم ان يشفيك اسال الله الكريم رب العرش العظيم ان يشفيك يقولوا فيه معالج بالرياض اسمه صالح الصمعاني يعالج الحالات هذي اقرا عنه بالنت وهذا رقم جواله :0554404530 |
اسال الله لي ولك الشفاء العاجل
انا من اللي يعانون من الصداااااااااااع المزمن لي 5 سنوات وانا بحاله لايعلم فيها الا الله الم الم كان احد ينزع عروق راسي ولا اشوف شيء كل اللي حولي اسود ورحت للطبيبه شعبيه بالرياض بحي الخالديه اسمها ام مصعب حطت لي صبخه قالت يمكن عندك فتحه بالراس بس اللي طلع فيني شقيقه ولا فادت الصبخه وقالت لي عليك بالرقيه الشرعيه والله مازلت اعاني الله يشفينا ويشفي مرضى المسلمين اجمعين |
اقتباس:
والحين امي تقنعني اني اروح له بس انا خايفه يكويني مثل امي بس الوالده سالته قال انا مااكوي على طول اول شيء اصبخ اذا مافاد اكوي وكل واحد على حسب الاعراض اللي فيه الله يشفيني ويشفي اخوي يوجعني راسي وكل مستضر يارب |
الله يجزاكم خير جميعا
اختي لطوف الصمعاني رحت له ابيه يكويني وعيا قال مافيك مايستدعي الكوي والحمد لله وهو رجال سماته سمات خير المهم وصف لي وصفه ممتازه وهي اني احط على راسي خمسة او ست ورقات ملفوف يكون مادخل الثلاجة واحط على راسي طربوش صوف والف راسي بشماغي على الاقل ست ساعات لمدة شهر والحمد لله بديت احس بتحسن وش رايك تجربين وعسى الله يكتب لي ولك الشفاء المهم لاتتعرضين للمكيف مباشرة |
|
الله يكون بعونك والله يشفيك..
راح ارسل لك رقم وانت تفاهم معهم فتحات الرأس ليست بالبسيطة |
امي قبل كذا يوم راحت لوحده اسمها ام عبدالله السبيعي بالنسيم عند شارع ابو الاسود الدؤلي
امي ارتاحت عندها والالم الي برقبتها خف وشافت وحده جايه من الطائف بنت صار لها حادث وصار كل جسمها مايتحرك لان ضربته ع العمود الفقري تقول عطتها صبخه << على ما إظن اسمها كذا والبنت صارت تحرك شوي من جسمها واطرفها وتقول هذي ثاني مرره روحي لام عبدالله السبـــــــــــــيعي بالنسيم عند شارع ابو الاسود الدؤلي والله يشفيك ويشفي جميع المسلمين واذا خشيتي وتبين تسؤلين عن شي ارسلي لي رساله لاني ماخش كثير |
أسأل الله العلي القدير يشفيك ويذهب مافيك
من بأس.. والله ما عندي علم |
الله يشفيك ويعافيك
ويوفق اختنا اسية فقد ابدعت كثير فوصفتها ووصفت الصمعاني لك هي الانسب وعن من يقيس الصداع أنا اعرف ام سعود وقد راجعتها بمريضة وقاست راسها وقررت انه صداع وصبختها وتحسنت المريضه وبعد مده عاد لها الصداع واتصلنا بها فابلغنا ابنها بانها قد توفيت الله يرحمها وابنتها ورثت منها الطب الشعبي ولكن لم اراجعها ولست متاكد من هل هي مثل امها او اقل او افضل فيه حرمه في سوق حجاب اعتقد مطيريه اذا ماخاب ظني ونسيت اسم ولدها واعتقد اسمه نايف ( ام نايف ) بالماريه عند المدخل الشرقي في سوق النساء بالنسيم تقيس الراس وتقول اذا فيه فتحه او مافيه ولكن ياخوان اذاكر مره قست مريضه عندها وطلبت منها تقيس راسي وقالت عندك فتحه بمقدار خمسة اصابع وانا ولله الحمد لااشتكي من شي وبعد هذا التشخيص شكيت في صدقهم والله اعلم تسبب والله يشفيك |
يااخي الله يعافيك هل جربت الحجامه؟؟(a21)
|
السلام عليكم ورحمة الله وبركاته
ياأخوان الموضوع صار له فترة وأتوقع الاخ عمل الصبخه أنظروا لتاريخ دخوله للموضوع ... ربي لايحرمكم الآجر |
الله يجزاكم خير جميعا
والله يرحم ام سعود ويرحمنا جميعا والله يااخواني اللي وصاني اروح لها قارئ في قرية في القصيم سمعتها الطيبه كانت سابقتها يا اخواني راسي خف وجعه عن اول والحمد لله رب العالمين هذا بفضل الله عز وجل ثم بفضل دعاؤكم الله لايحوجكم لاحد انا رحت للشيخ الصمعاني عيا يكويني ووصف لي الملفوف وسويت صبخة بنفس مقادير اختي الله يجزاها الجنة ونفعت اول الامر ثم ماعاد نفعت رحت لدكتور نفسي وصرف لي علاج اسمه سيروكسات استخدمته واول العلاج كان ممتاز ثم راح مفعوله ثم رحت لدكتور ثاني ووصف لي علاج اسمه بروزاك وكان افضل من اللي قبله وللحين اقول يالله الشفاء والستر وياربي مالي عنك غنا دعواتكم لي ولكل مريض ومسلم ان الله يشافيه ويستر عليه ويتغمده بواسع فضله ورحمته |
الشيخ حمد الدغريري مؤذن مسجد الراجحي
باذن الله سوف تجدي كل خير عندة |
جزاك الله خير
الشيخ الدغريري معروف الله يرفع قدره |
اخوي الغالي انا طبيب طب بديل
اخي العزيز كلمة فتحه بالراس هذه غير موجوده عند اهل الطب سوى الطب الحديث ام الطب القديم وهذه من معرفة من لامعرفه لهم يجيبون من بنات افكارهم ويوهمون المريض بان عنده فتحه بالراس حسبي الله عليهم وهذه النضريه عالقه في ذهن الكثير وكثير من ياتوني يتعالجون عندي يقول قالت لي ام فلان بان عندك فري بالراس او فتحه بالراس اخي العزيز لو فيه فتحه بالرس ماتعيش لجضه واحده وشيل من بالك سالفة الفتحه بالراس لكن فيه اسباب كثيره للصداع منها الحالات النفسيه والعصبيه ولتهاب الاذن وضيق شرايين بالدماغ وقد يكون من البصر وقد يكون من الجيوب الانفيه او الاذن وقد يكون مرض الخوذه او الشقيقيه وهذه يحددها الطبيب الحاضر ونا انصحك بعدم المعالجه عند ام فلان وم اعلان وياليت تعطيني فكره عن تاريخ هذا المرض وهل هو بمقدمة الراس ام في الموخره ام هو بمنتصف الراس اي عنة جنب وذا شميت دهن العود هل يزود عليك الوجع امة لا وهل عيونك تعورك ام لا وهل عندك ضغط وهل تحسن احيانا وهل عيونك تدمع وكم عمرك وكم وزنك وطولك وهل تسهر على الكمبيوتر وكيف نومك هل تنام نوم هادي ام متوتر احيانا وهل انت عصبي وكل هذه الاجابت ارغب بمعرفتها على الخاص تحياتي لك |
| الساعة الآن 01:39 PM. |
Powered by vBulletin® Copyright ©2000 - 2024, Jelsoft Enterprises Ltd. , Designed & TranZ By
Almuhajir