|
حالي حال وتعبت من هل حال ...انصحوني
اااه ياقلبي انا قلبي محروق على حالي
عمري 20 وخطبني رجال عمره 48 واهلي شافه طيب وحنون وكريم وقالو ملكي عجبك الوضع كملتي ماعجبك افسخي الملكه ولي 6 شهور واسلوبه وتصرفاته ماتعجبني صح انه طيب وكريم كل شهر شهرين يرسل 10 او 15 الف مصروف لي وبعد الزواج يبني لي بيت عند اهلي ويكتبه بأسمي بسس انا ابغا اهتمام وحب ابغا رجال يكون زي ضلي معاي بكل حالاتي وكل الناس يتكلمون بنتك صغيره زوجتيها واحد قد ابوها وانا كررهت نفسي كل وحده زوجها مو متزوج عليها ومعاها وقريبين من اعمار بعض وافكر بعض الا انا متزوجه متزوج كبير وعنده عيال اكبر مني ومن عيوبه يكذب ويوعد ويخلف حتى مو راضي يوريني اهله ولا يعرفني عليهم لانهم من منطقه بعيده عننا بس مرتين كلمت وحده يقول انها امه انا ماصرت اصدقه احسسه يكذب كثير \ وانا الحين ابغا الطلاق وخايفه من كلمت مطلقه وانتبهو انا قلت مملكه وما شفته طول 6 شهور الا مرتين لانه موفاضي لي ومشغغول عني وخايف يواجه اناس فيني وانا طالبتكم احسبوني وحده من اخواتكم وانصحووني انا فكرت اطلق الحين احسن من يوم اطلق وانا مو بنت او يكون معاي اطفال وفي نفس الوقت انا بححاجه لزوج طيب وحنون ويكون معاي وقريب مني فالله يخليكم انصحوني ومرات افكر انو انا ماعندي الاشهادة متوسط واكره الدراسه واكثر الرجال يبغون مدرسات جامعيات اخاف اجلسس وماعاد اللقا نصيب ومحتاره وخايفه من زواجي منه سااعدوني وانصحوني عشان اخذ قراري النهائي ولو عندكم اي سؤال او استفسار عن حالي انا حاضره وشــكرا.. |
الله يخلللللليكم ردو على لو بكلمه
*_* |
انتي ونا اختك متوهقه ملكتي واصبحتي زوجته
لاكن لايكلف الله نفس الا وسعها ولاانتي مجبوره تعيشين بالدف المشاعر والرغبه من ربي الحل يالطيبه الإستخاره وادعي ربك يارب ان كنت تعلم انه سعاده لي في ديني ودنياي استمر معاه وان كان شر تبعدده عني وتعوضني خير وانتبهي تشبكين اوتعلقين مع غيره واأنتي بذمته عشان ربي ماينكبك لأن هذا يعتبر خيانه ولا توفقين === وأي اسأله اعتبريني اختك |
الله يعينك
انتي متأكده من اخلاقه ؟؟يعني ملتزم ويخاف ربه ويصلي وبعدين يااختي الاستخارة افضل شي والله يوفقك |
نصيحة صلي استخارة كثري من قراءة سورة البقرة
حبيبتي لاتقول شهادي متوسط ماحد يجي وتضيع نفسك نصيبك راح يجيك لحد بابك فلا تحزني ربنا يوفقك ويصلح حالك ويرزقك بالزوج الصالح والذرية المباركة |
شوفي النصيب عند الله والمكتوب حاصل من كلامك عن الرجل ثري ويكذب ومتزوج وفي منطقة بعيده وناوي يسكنك حول اهلك آرى التشاور مع اهلك بهدوء وإذا استخرتي عن هذا الزواج ربما يكون افضل بالتوفيق |
انت وش عليكي من كلام الناس
إذا انت راضيه هذا أهم شيء.. وترا الزواج تفاهم ومسؤليه وتضحيات من كل الطرفين مادام هو كريم معك..فاهذا طريقته بالحب.. واذا على الكذب اختي لاتكونين ملحاحه بالطلبات والتساؤلات إذا انتم لسه ملكين ولا صار فيه زواج .. يمكن مأجل هالشيء...لما بعد الدخله..والرجوع من السفر ويقدمك لأهله كزوجه..مثلك مثل الأولى إذا المساله كذا فاصبري.. أما إذا متزوجين ليه مايعرفك على أهله أنت زوجته مو غريبه.. |
حياك الله قريت كلامك اللي كتبتية وحسيت ان عندك تناقضات غريبة في وصفك لزوجك تقولين طيب وكريم وعاطفي وبعدها بشوية وفي نفس الصفحة جبتي صفات مش كويسة فية مثل الكذب مع انك ماوضحتي كذب عليك في ايش ؟ مسألة انة يخبي عنك اهلة فيمكن لانة مايبي احد يعرف حتى يتزوجك و حتى لايحصل مشاكل بينة وبين زوجتة او اهلة ويمكن يكون المتضرر الاول منها انتي . مادام انة يرسل لك مابين عشرة وخمسة عشر الف كل شهرين ومستعد لبناء بيت خاص فيك عند اهلك فالرجال شاريك ومستعد يضحي بكل شيء لاجلك . اما فارق السن وانة اكبر منك فما اعتقد انك ارتبطتي بة ووافقتي علية الا وانتي عارفة كل شيء عنة وعن تفاصل حياتة فلا تقنعي نفسك بملاحظات انتي عارفتها مسبقتا ها1 انا اتوقع ان فية ناس جالس يزن وراك ويحاول نبش بعض العيوب الغير مؤثرة حتى يكرهك في الزواج من هذا الرجل.ويأثر على قرارك حولة ويزين لك امور معاكسة لمصلحتك انتي صاحبة القرار ومن خلال سردك فمن النادر ان تجدي في هذا الزمن مواصفات متكاملة مثل ماوصفتي فيها العريس. لذلك اعيدي النظر كويس وادرسي الموضوع من كل جوانبة وتذكري ان فية بنات متزوجات من ازواج اصغر منهم وعايشين في جحيم لايطاق ولاتحكمين على بيوت زوجية بالسعادة من الشكل الخارجي فاغلب البيوت فيها مشاكل لاحصر لها ولكنها ظاهريا بين الناس كانهم عايشين في جنان الارض ها1 لا تتهوري ولا تتسرعي في القرار فالعوانس في المملكة اعدادهم مذهلة وفي تزايد في ضل عزوف الشباب عن الزواج وعدم تحمل المسئوليه لذلك استخيري ربك وفكري كويس وادرسي الوضع من جميع الجوانب لان هذا قرارك انتي وحياتك انتي وهذي حياة زوجية ابدية باذن الله . لذلك انصحك الا تستمعي من الغير ممن يشوشون الافكار ولا يريدون الخير للغير خلي قرارك بيدك وبيد من تثقين انة يريد لك الخير فقط طبعا كول الكلام الي فوق وجهة نظر خاصة حول الموضوع وما اشوفة انا انة صحيح وهو لايعني ان رأيي هو الصح :whwhwh: وفقك الله وسدد رأيك لأختيار افضل الحلول لحياتك متمنيا لك سعادة لاتنتهي :whwhwh: |
بينكم 28 سنة فرق كبييييير
ماهو سهل راج يطلع التأثير بعدين ... توك صغيرة والعمر قداامك ....بعدين انت ملكة يعني ماهو زواج فعلي توك على البر استخيري ..ماعليك من احد اللي مقتنعة فيه سويه هذه حياااتك انت .....مو حيااة غيرررك |
اختي انا ابكون اخوك الناصح لماهوا في مصلحتك
فوالله انني صادق فيما اقول وحولك ساتكلم على اساس انك اختي وادور مصلحتها ومايسعدها 1/ ابعدي عن جميع الشكوووك والضنون والمؤثرات الي حولك ( ترا الحساد واجد ) 2/ انتي عمرك عشرين وهو عمره 48 وهذا قمة الرجوله والنضج لاتخافين من فارق السن 3/ بما انك قابلتيه فحتم ستكووونين قد زالة الرهبه بينك وبينه لذالك ستعرفين شخصيته 4 / سبب العنوسه عندنا هي من كلمة خايفه ومادري انجح او افشل مع العلم ان مؤشرات النجاح ماتبين الى بعد الزواج وهي بيدك 5/ من كلامك انه كريم وماقصر معك وانتي بالملكه باذن الله سيكووون اكرم بعد الزواج 6 / لو كان كذاب ولعاب مانتظر هالفتره كان سواها خبط ولزق من دووون فرصه لاكن الرجال واثق من نفسه ومعطيك الفرصه والمده الكافيه للتفكير 7 / انتي مؤهلك متوسط صدقيني ماراح يجيك الى اقل من مستواه 8 / عليك بصلاة الاستخاره وبعدها اعقليها وتوكملي دمتي بصحة وعافيه وحياة سعيده ملاحظة / والله ثم والله ان فيه كم بنت تتمناه او تتمنى اقل منه همسة / اوخيتي اقسم بالله العظيم انني اكتب هذه الاسطر وانا لا اعرفك ولا اعرفه لاكن تكلمت من النصيحة وحب الخير للناس |
إبنتي الغاليه حفظك الله
من وجهة نظري الشخصيه أنه لايوجد توافق بينكم كزوجين من عدة جوانب ومنها: -الفارق الزمني (وهو العمر) وهذا في حد ذاته له تأثير قوي في طريقة التعامل بين الزوجين وأنتي تعلمين يا إبنتي ما للعمر من تأثير في أشياء كثيره ولكي أقرب لك المعنى فقط تخيلي الفراش مع رجل بعمر والدك أعتقد أنه مقزز جدا -أنتي بعمر الزهور وهناك من يتمناك كزوجه بمعنى ن لك مستقبل طويل بإذن الله فلا تقحمي نفسك مع رجل بعد عشر سنوات تقريبا والله أعلم سوف ينهك ويتعب وينشغل بصحته ووووو وأنتي تكوني بعمر الثلاثين وبأمس الحاجه للعاطفه ولتواجد الرجل في حياتك (فكري بهذه جيدا)فكري بعد وقت كيف سيكون وضعك تخيلي عمر زوجك بعد عشر سنوات أو 15 سنه أغمضي عينيك وتخيلي الحياة أنتي وأطفالك وزوجك كهل مريض يريد من يهتم به صحيا ويراعيه كأب -إبنتي الغاليه إذا رغبتي بالطلاق الآن فهذا أفضل بكثير لما سيأتي -وأنتي الآن بحكم الفتاة البكر بمعنى أنك لم تدخلي عالم الزوجيه من أي باب سوى الحكم الشرعي فقط -من وجهة نظري أن تطلبي الطلاق الآن أفضل بكثير من أن تخوضي المعركه وأنتي خاسره مسبقا وستخرجين منها على الآقل بثلاث أو أربع أطفال 000فكري بهذه -إبنتي وغاليتي إنني أتكلم معك ببحكمي والدتك الثانيه هنا ويعلم الله مدى نصحي لك وحب الخير لك لذا أقول فكري جيدا قبل الإقدام على الزواج - -زوجك رجل لن أتحدث عنه لآني لا أعلم عنه شي ولكن كما ذكرتي هو متزوج وله أبناء وبعيد عن أبنائه هل فكرتي كيف سيعيش معك ..؟ كيف ستقضين حياتك بين أبنائه وزوجته وأنتي دخيله عليهم وبعمر أبنائه الحياة معركه يا إبنتي ولكن ليس بهذه الطريقه 0لآن معركه مثل هذي أنتي الخاسره وحدك فقط أتمنى أن أكون أوصلت لك بعضا مما أريد إيصاله لك حفظك الله ورعاك وذا رغبتي بمزيد من النصح والتوجيه فأنا لك أم ثانيه هنا-(فقط أرسلي رغبتك بذلك على الخاص) والدتك الثانيه ومحبة الخير لك وللجميع (أم اليسر) |
اقتباس:
اوخيه اضم صوتي لصوت ام اليسر فوالله من وجهة نظري كلامها عين الصواب ... وربي يكتب لك اللي فيه الخيره |
غاليتي انتي عمرك 20 وهو 48يعني الفرق 28سنه
--السؤال اللي يطرح نفسه هل تحسين انها عاديه السنين هذي؟؟ انتي متردده فيه وهذا الواضح اهلك اشرطو عيك لوعجبك اقبلي ولو ماعجبك ارفضي بعد المله يعني ماجبرتي عليه انتي متردده ومحتاره تقبلين امواله والعيشه اللي بيعيشك فيها نعمه تحسدين عليه لكن ابسالك النعمه هذي بتدوم سنه سنتين سنين وبعدين !!! راح يتخللك الملل فكرتي فيه بعد عشرسنين وانتي عمرك 30 سنه وهو كم58 انتي في قمه نشاطك وهوراح يكون كبير ماله في الامور اللي انتي تبينها زي كل زوجه في عمرك ارجو انك فهمتي مقصدي امور كثيره بتتعبين فيها معاه ولوزادت طلباتك عليه راح ينتقدك عليها. راح تقارنين بين نفسك وصديقاتك واقاربك وراح تتعبين نفسياً من طلباته ومشاكله لا ويمكن يتزوج عليك .. يمكن تقولين بيوفر لي سواق واكون حره في اموري لا ماراح تكونين حره راح يقيدك .. هذا كله كووووم وعياله ومشاكلهم معك كوووم... غاليتي لاتغرك الكم الف اللي يرسلها لك في هالفتره... هذا يبي يغرقك في المال حتى تندفعي له وتقولين لكم 6شهور ماشفتيه الامرتين .. خليني احكي معك بصراحه لوكان هذا شاب عمره قريب من عمرك اواكبر بعشر سنوات حتى وماتزوج..... ياترى راح يزورك مرتينبس في خلال 6شهورلا والله ويستجيل هذا اسالي القريب منك شوفي كيف ايامهم قبل الزواج فتره الملكه كيف كانت اتصالاتهم مع بعض... لاتزعلين علي انتي توك بنوته صغيره هذا كبييير عليك لاعنده الرومنسيه اللي تحلمين بها ولا الحنيه ولا التعامل الطيب والواضح من تعامله معك... اتمنى مايزعلون علي الرجال الافاضل لكن هذي الحقيقه يعني لو البنت عمرها فوق الثلاثين قلت الامرعااادي ومافيها اشكاليه لكن بها العمر حرااام تضيع حياتها مع واحد اكبرمنها ب28 بسنه اتمنى اكون افدتك.. ويكفيك رائي اختنا الفاضله ام اليسروامثالهالاعدمناهم |
| الساعة الآن 11:58 PM. |
Powered by vBulletin® Copyright ©2000 - 2024, Jelsoft Enterprises Ltd. , Designed & TranZ By
Almuhajir