بسم الله الرحمن الرحيم

هذه القصيدة من أجمل قصائد الشاعر الكبير الأمير / محمد بن أحمد السديري رحمه الله صاحب كتاب ( الدمعة الحمراء ) وكتاب ( أبطال من الصحراء ).

يقول من عدّا على راس عالــــي
= رجمٍ طويل يدهله كل قرنــــاس

في راس مرجومٍ عسير المنالـــي
= تلعبْ به الأرياح مع كل نسْنــاس

في مهمهٍ قفرٍ من النّاس خالــــي
= يشْتاق له من حس بالقلب هوجـاس

قعدت في راسه وحيدٍ لحـالــــي
= براس الطويل ملابقه تقل حــراس

متذكرٍ في مرقبي وش غدالــــي
= وصفّقْت بالكفين ياسٍ على يــاس

أخذت أعدّ أيامها والليالـــــــي
= دنيا تقلّب ماعرفنـا لها قيــــاس

كم فرّقت مابين غالي وغالـــــي
= لو شفت منها ربح ترجع للافــلاس

يقطعك دنيا ماله أول وتالــــــي
= لو أضحكت! للغبن تقرع بالأجــراس

المستريح اللي من العقل خالــــي
= ماهو بلجات الهواجيس غطّـــاس

ماهو بمثلي مشكلاته جـــلا لــي
= أزريت أسجّلهن بحبرٍ وقرطـــاس

حملي ثقيل وشايله باحتمـالــــي
= وأصبر على مر الليالي والأتعــاس

وأرسي كما ترسي رواسي الجبالــي
= ولايشتكي ضلعٍ عليه القــدم داس

يابجاد شب النّار وادن الدلالــــي
= واحمس لنا يابجاد مايقعد الــراس

ودقّه بنجرٍ ياظريف العيالــــــي
= يجذب لنا ربعٍ على أكوار جــلاس

وزلّه إلى منّه رقد كل سالـــــي
= وخلّه يفوح وقنّن الهيل بقيـــاس

وصبّه ومدّه ياكريم السبالـــــي
= يبعد همومي يوم أشمّـه بالانفـاس

فنجال يغدي ماتصور ببالــــــي
= وروابع تضرب بها أخْماس وأسداس

لاخاب ظني بالرفيق الموالـــــي
= مالي مشاريهٍ على نـايد النــــــــاس

لعل قصرٍ مايجيله ظـلالــــــي
= ينهد من عالي مبانيه للســــاس

لاصار ماهو مدهلٍ للرجالــــــي
= وملجا لمن هو يشكي الضيم والياس

بحسناك يامنشي حقوق الخيـالــي
= ياخالق أجناس ويامفني أجنـــاس

تجعل مقره دارس العهد بــالـــي
= صحْصاح دوٍ دارسٍ مابه أونــاس

البوم في تالي هدامه يلالــــــي
= جزاك ياقصر الخنا وكر الأدنــاس

متى تربّع دارنا والمفالـــــــي
= وتخضرّ فياضٍ عقب ماهيب يبّـاس

نشوف فيها الدّيدَحان متـوالــــي
= مثل الرعاف بخصر مدقوق الألعـاس

ونمشي على البيدا سوات الزوالــي
= يشرق حماره شرقة الصبغ بالكـاس

وتكبر دفوف معبّسـات الشمالـــي
= ويبني عليهن الشحم مثل الأطعـاس

منقول وأنتم سالمون وغانمون والسلام .