المساعد الشخصي الرقمي

مشاهدة النسخة كاملة : تعالوا فسروا حلمي للي عنده سالفة في التفسير


أبـوعـبـدالـرحـمـن
13-10-06, 09:10 PM
.منقوووووووووووول.

يا شباب .. يا بنات ....
والله يا أنا البارح شفت لكم حــلم !!! حل ل ل ل ل لم ... بس حلم يخوف بصراحة !!؟؟
وهذاني احاول اخلي لهجتي تقريبا لهجة قصمان واعروني على اللهجة ان كان فيها خطأ خبركم انا في مت
* * *

حلمت البارح ( اللهم اجعله خير ) إني ملبـق - راكن – وانيتي البيك أب قدام مبنى الحرس الوطني اللي على طريق خريص ، بعز الظهر .. ومحمل الوانيت جح !!

إيه جح : ( يعني بطيخ .. شتسمونه أنتم : حبحب .. أو رقي أو شمام ؟؟ مدري ) المهم وقاعد
أحرج عليه بصوت عالي .. " ( على عشرة .. على عشرة .. يا اللي تبي الطيب على عشرة
جح ساجـر .. جح ساجر ( طبعاً جح ساجر من أفضل أنواع البطيخ في المملكة) .. ما دريت إلا
هالمطفوق يلبق – يركن – موتره جنبي " جمس حوض 87 دفرنسين مليان جح .. ونزل وركب فوق الجمس وانسدح على شحنة الجح تـقـل ضب !! وبدا يحرج على الجح : " ألى همسة .. ألى همسة ( يعني : على خمسة ) .. يا اللي تبي التيب على همسة !! ليامل الوجع

قربت منه وأطالع في وجهه زين !! إلا هذا والله إلفيس برسلي ( نجم البوب الأمريكي في الستينات ) لابس فنيلة وسروال .. وطاقية عن الشمس ، وبياض بطنه يلق ( يلمع) .. وسره طالع من تحت الفنيلة " مجعـص يعني " ؟؟؟؟؟
أنا بالأول شبهته على واحد من شباب ( سدير) أعرفه .. يوم قربت منه و الا هو يقول :

" جح من ( ميسوري ) ميسوري في أمريكا طبعاً.. لا يفوتك يا اللي تبي التيب . جح ميسوري مهب جح ( قصمان ) !!

يــؤ !! قهرني بها الكلمة .. هديت أعصابي وقربت من الجمس .. و الا الجمس مليان أجهزة إليكترونية وأذرعة آلية تنزل البطيخة لين سيارة الزبون .. وحصالات تماتيك .. وأناتل مضادة للصواعق .. وشــــي ........

قلت : يا إلفيس تكفى انقلع من هنا وخلنا نترزق الله ..

قال : وين أروه ؟؟؟؟

قلت : ياخي دور لك أي شارع فاضي .. شف عندك الربوة ولا العزيزية ..

قال : أنت شايفني أبيع جح مستعمل أنت ووجهك !! هذا جح المسيسبي يا لوح .

أرتفع ضغطي يوم قال المسيسبي قلت : ما نيب لامسن شي بس انقلع الله يلعن والديك لا هالحين أعفط وجهك .. حسبته كان يقل أدبه مافهمت عليه بصراحه وش يقصد .

قال : الهين بتجي البلدية وبيضفونك من هنا يا الهيس ( علباله هو بس اللي عنده واسطة)
أنا أحترق جلدي يوم قال يا الهيس ، يحسبني ما أعرف واحدن في وزارة المعارف يعني ...

تجيكم السالفة ...

المهم . . رحت الوانيت وسحبت لي ذيك العجرا ( عجرا يعني عصا غليظة نستخدمها للأزمات).. ويوم رجعت إلا صاحب ( كامري ) خضرا مضلل وقف وسط الشارع قدامنا وقام السواق حط شماغه على الطبلون ونزل وجا عندنا .. يوم قرب وأثاريه : آرنولد شوارتزنيقر
ومعه الأهل و.. ( عجيز ن ) راكبتن قدام أظنها أمه .. قبل يتكلم الدب .. وحده حلوه فتحت الشباك اللي ورا بالكامري وطلت منها بنت في منتهى الجمال وأثاريها : بروك شيلدز .
وسلمت علينا بالإشارة بس .. الظاهر أنها كانت متحنية بعد ماني متأكد !!!

تجيكم السـالفة ...

نزلت العجوز ... أثاريها ماهيب عجوز !! صارت ( جانيت – جاكسون ) أختك يا مايكل جاكسون بس متـنكرة ....

الظاهر أنهم بيمثلون برنامج " طاش ما طاش بالإنقليزي " ... قامت ( بروك ) وشغلت المسجل وعلت عليه ع الآخر على أغنية خالد عبد الرحمن الأخيرة ( خواطر العشاق ) وقامت ها اللحجية ( جانيت ) تشقق .. يا ويــلاه .. آآآه وتسدح على الزفلت .. وتسحب سحبات أخوها القرد وتصرخ صرخات تعور ؟؟؟
أظنها طاحت زار .. أبووووك يالرقص !!! لعنبو ها العبند إذا استنزلوا !!!!!!

تجيكم السالفة ....

المهم .. أنا خفت من ذا الدب ( آرنولد ) وحسيت إن إلفيس يـبي يستفزع به وأنا عاد العربي الوحيد بين هالحمران .. قام صفط جنبنا راعي سيارة بيجو 76 ونزل منها شويب يعرج وبيده عصا يوم قرب عرفته على طول .. فرانسوا ( رئيس فرنسا السابق ) ونزلت من السيارة زوجة ملك السويد ( أنا أحسنت الظن بصراحه وما شكيت فيهم قلت يمكن تكون أخته من الرضاع ولا شي ؟؟)

المهم قلت بس ... الحين هالشويب يبي يفزع لي يوم دريت إلا هو يقول : ( =*# @@ >+ × @ $% ) يعني : " بكم هالتفاح الكبير ماشا الله " ؟؟

أبووووووك يا النذالة أثاريه جاي يشتري !!! يوم دريت ( مار ) يجي عريف من مبنى الحرس اللي قدامنا .. بالبداية كلنا خفنا بصراحة !!

حتى إلفيس إ نصفق لونه وطلع المسواك يمكن علشان ما معه إقامه .. والعجيز جانيت ضفت عبايتها من الأرض وركبت السيارة .. وبروك تغطت و سكرت الدريشة والمسجل .. يوم وصل العريف قال : يا جيماااعه .. يا جيماااعه حياكم الله ...أقلطوا .. أقلطوا فينجال قهوة .. تعوذوا من بليس !!!

تجيكم السالفة ...

ما درينا إلا صوت سحبت جلنط سيارة !! ( فرملة قوية يعني ) لكزس بيضاء مليانة شباب متلطمين نزلوا كنهم كوماندوز .. يعجبونك والله عيال ديرتي .. نزل أول واحد وبيده مربوعة( مربوعة يعني عصا للمباني والعماير يستخدم عندنا أحياناً للمضاربة ) ولابس زبيريات برتقالية ( زبيريات ماراح أترجمها عاد ) والشنبات طالعه من ورا اللطمة .. يوم قرب والا هذا ( وهم !!) واللي وراه معاه (بلكة ) يا الله .. يا الله يشيلها .. وأثاريها ( الفك المفترس الحب خطر وسنونها تخوف !! ) والثالثة جايه مسرعه وبيدها قلاية بيض تبي تفقع آرنولد مع خشمه وأثاريها النطيطة ( سحر الغرام أختك يا طاير من الفرحة !! )

< == معليش السلوك كلها ضاربة عندي وانا نايم ...

والسواق شكله يشبه ( إحساس عاشق !! ) بس ما نزل !! الظاهر جالس يتسمع أخبار بانوراما . أبوووووك يالثقة علباله الربع يصورون فلم " ميشن أمباسيـبـل "

يوم درينا كلنا إلا صوت انفجار قوي !!؟؟

فزيت وقمت من النوم إلا أمي الظاهر تعبت من كثر ما تتصل علي على تلفون غرفتي تصحيني للدوام يوم ملت جت وبالعصا تخبط الباب بقوة أثاريه ماصار أنفجار ..

قمت وتفاجأت لمن شفت غرفتي محيوسه ع الآخر ويبدو أنه كان فيه ناس يتضاربون البارح وأنا نايم !! الكمبيوتر طايح !! ولوحات الرسم ع الأرض !! والتلفون سلكه مقطوع!! وأمي تقول بصوت عالي : " سامي أنا ماقلت لك البارح على العشا ماتكثر جح يعور بطنك !!

تعوذت من الشيطان وتوضيت وصليت وقبل ألبس ملابسي شفت ورقة صغيرة تحت شاشة الكمبيوتر مكتوب فيها : "


هاه جح ميسوري أحسن ولا جح ساجر يا ...يا الهيس !!؟؟؟ " *45*

التوقيع / إلفيس ابن برسلي بن ردن


شرايكم عا د من يفسر لي هالحلم !!! ؟؟؟ *24*

أم خماس
13-10-06, 09:32 PM
أنا عندي تفسير حلمك... أنت عندك مشكله مع الجح....ههههههههههههههههههه مئساه الله يعينك حلمك طويل فلم مب حلم .....

أبـوعـبـدالـرحـمـن
14-10-06, 04:50 PM
أنا عندي تفسير حلمك... أنت عندك مشكله مع الجح....ههههههههههههههههههه مئساه الله يعينك حلمك طويل فلم مب حلم .....


شكرا على المرور ام خماس

الملقوفة
14-10-06, 09:31 PM
والله فلم هندي

اسمع ادخل لموقع تفسير الاحلام وانشاء الله هم اللي يفيدونك

زعبور
14-10-06, 09:35 PM
مبروك حامل

أجل يقول ألى همسه

خخخخخخخخخخخخخ

anady][-][
15-10-06, 01:34 AM
وش في العالم طايحتن بالاحلام هاليومين :D

بارعه
15-10-06, 02:03 AM
هذا من افلام الرعب الامريكيه
خاصه لما صحيت ولقيت الورقه
تحت الكمبيوتر
باقي تلف وجهك للكاميرا وتبتسم ابتسامه شريره وعيونك حمراء >>> http://smilies.sofrayt.com/%5E/s/asthanos.gif
والوالده في الخلف
تناظرك بمنتهى الحب والبراءه!! (qq172)

ابو شدق
15-10-06, 04:23 AM
يقول البيع الددسن

انت عارضه للبيع

حمد العثيم
15-10-06, 05:11 AM
إيه جح : ( يعني بطيخ .. شتسمونه أنتم : حبحب .. أو رقي أو شمام ؟؟ مدري

حشى خواجات حنا
ايه مثلكم يابعدي نسميه جح ترنا مهب من المريخ ياخلفهم
يابعدي انت مالك بالطويله تفسيرك حلمك كالتالي
البيك اب تبي تبيعه وعلى من
على ابوشدق يبي يشريه منك

وهمن تبي تشري مازدا وتعرس على عجوز عمره
190
وهمن تروح انت واياه شهر البصل لديرتكم
ساجر وتلقى ابن محيا متغير
واخذتها واحده يقالها بارعه
رئيسه متسلطه وجبراه وملقوفه وتحمك عليكم
وهمن يصير انقلاب طال عمرك وياخذ شخص
وجوده مثل عدمه خخخخخخخخخخ
شخص اسمه علووووش
واخرته تموت انت قبل العجوز
الاعجوز زوجتك تعمر وتعيش عقبك 100 سنه زياده
وتاخذ المهنه اب عن جد
تبادا تبيع جح بس في مكان اخر غير الحرس الوطني ياخوك
تبدأ تبيع في اللبيديه ( المغتصبه)

او في مليدا

الباقي في الحلقه القادمه

مشكور ابوعبدالرحمن على الحلم الرهيب

حمد العثيم
15-10-06, 05:24 AM
http://www.w30w.com/up-pic/uploads/2dfd7d2d94.jpg

شكله هذا انت يا ابوعبدالرحمن




http://www.w30w.com/up-pic/uploads/7889a0d17b.jpg

على خسمه ياولد

ابوعبدالرحمن يابعدي تراي امزح معك
مزوح تحي وتروح

بارعه
15-10-06, 06:07 AM
ساجر وتلقى ابن محيا متغير
واخذتها واحده يقالها بارعه
رئيسه متسلطه وجبراه وملقوفه وتحمك عليكم
وهمن يصير انقلاب طال عمرك وياخذ شخص
وجوده مثل عدمه خخخخخخخخخخ
شخص اسمه علووووش


هذي اخرتها ياحمد تخلي علوش يسوي انقلاب
وياخذ الحكم مني ...... بس ابشرك الانقلاب فشل
وعلوش تحت الاقامه الجبريه بالشماسيه http://smilies.sofrayt.com/%5E/0/hanged.gif
حتى لو قدر يهج ماراح يسلم من اهل الشماسيه .......... وووواه وشلون قدر يهج هب...... تمشي شوي تلقى علوش في حفره
يصيح من كراعينه المتكسره.......... http://smilies.sofrayt.com/%5E/e/armed.gif

حمد العثيم
15-10-06, 07:10 AM
لا ياختي وش دعوه
وهو يسطي يهج من اهل الشماسيه
ايه يصير خير والا كان يروح به على قولتس
تكسر عظامه

http://www.w30w.com/up-pic/uploads/1a002a6cac.jpg

عاد ماله داعي صدس وهمن

http://www.w30w.com/up-pic/uploads/a54f3e616a.jpg

نبلش تكاليف المستشفى وغيره انا اقول نعدمه ازين(qq168)

http://www.w30w.com/up-pic/uploads/7e53949fd5.jpg

او
http://www.w30w.com/up-pic/uploads/4d307f78d4.jpg

ياختي ارخص لنا ولا فرق نطير هالراس ونفتك

الملقوفة
15-10-06, 07:33 PM
^

^

^

مافهمت

حمد العثيم
16-10-06, 07:04 AM
حتى لو قدر يهج ماراح يسلم من اهل الشماسيه .......... وووواه وشلون قدر يهج هب...... تمشي شوي تلقى علوش في حفره
يصيح من كراعينه المتكسره.......... http://smilies.sofrayt.com/%5E/e/armed.gif


وانا اقولك حرام لانه يبي يكلف علينا
تجبير ودواء اذا طاح وانسكر
خلينا نعدمه علطول قبل ليهج
ارخص واوفر اذا طار هالراس دفناه وانتيهنا
خخخخخخخخخخخخخخخخخخخ

شباصة قصيمية
16-10-06, 09:45 PM
.منقوووووووووووول.



حلم ومنقول ههههههههه

أحلى برنسيسه
17-10-06, 05:20 AM
ادخل على موقع لتفسير الاحلام (وانشاء الله خير)