المساعد الشخصي الرقمي

مشاهدة النسخة كاملة : ( المطبخ الرمضاني ) .. موضوع خاص بالحريم والبنات بس ! ( 1/3 )

مدمن شاهي
28-09-06, 02:23 PM
سلام علاكم

حيّالله الغالين كلّهم .. وكل عام وانتم بخير وصحّه وعافيه

أخباركم .. وأخبار رمضان معكم .. ؟ (hjh)

شكلكم عفلتوا أبو النعمه .. ويارب يتقبّل من الجميع !

الثلاثة الأيام الماضيه انقطعت " جبراً " عن النت .. لسفري للخارج .. رحت للإمارات الحبيبه وجلست فيها ثلاثة أيام بلياليها .. وكلمة حق أقولها .. أهلها رجال ويبيّضون الوجه .. !

عدّة نقاط أحب أبينها على غِرارهالموضوع المتفركش ... ! (hjh)

أولاً : هالموضوع خاص بالحريم والبنات فقط .. يعني أي شنب أو تمساح يدخل .. يحاول يشرفنا آلحين بطلوعه مع الباب .. لأن " الطبخ والنفخ " مهوب له .. التمساح والشنب حدّه موتر يزبرقه ويلمّع كفراته ليل ونهار ... أنا داري أن كلامي هذا آلحين قاعد يقراه " شاب " يبي يشوف وش ورى المُدمن ومطبخه الزهري .. بس أنا أكرر له مره ثانيه وأقول ( يا أخ .. يا أنت ... يابو ... أطلع الله لايهينك .. رح أمسك لك مصحف واقرا لك كم آيه أبرك لك .. مالك ومال " البرياني " و " السمك المحشي بالخلطه " .. شرّفنا برّا ياحلو ) ! :gg4mpup:

سادساً : الموضوع " هاد " يصلح لجميع فئات الحريم .. بنات عزبات .. متزوّجات .. عانسات ... مُطلّقات .. حتى المُعقات .. من باب الفرح بجهودهم في المطبخ !

عاشراً : أنصح أختي اللي تبي تطبخ أنها تستغل وقتها " وتشتري " لها مسجّل أبو سماعات كبار ( كبر أذاني دحيّم ) تشتريه لها وتركزه في المطبخ وتشغّل المسجّل على محاضرة حلوه ومفيدة .. وتجمع مابين الفائدة .. وفي نفس الوقت " تحرق طبختها " !

أخيراً : أعتذر للإخوه والأخوات خاصّة اللي راسلوني على البريد عن تأخر طرح هذا الموضوع لانشغالي .. وآلحين لقيتها فرصه أني أطرحه ... لأننا في رمضان .. ورمضان فرصه أننا نتعلّم عليكم كم طبخه ! :D

= = =

أختي الكريمه .. يالله آلحين شديّ حيلك .. أدخلي المطبخ .. جمّعي أغراضك .. سكاكين .. ملاعق .. قدور .. صياني .. شغّلي الفرن .. شغّلي الهواية عشان ماتنكتمين .. أستعيني بالله ..

اليوم طبختنا بتكون من الأطباق الرئيسيه ..

يعني طبخة دسمه وماتُخرّش " الميّه " ..

اليوم بتكون الطبخه عباره عن ( مكرونه بقشطة الخفق )

المقادير /

علبة مكرونه + علبة ذره + قشطة الخفق + 3 حبّــــــات جزر مبشور+ كيس جبن موزريلا + 3 ملاعق زيت زيتون + دجاج مقطع مكعبات صغيره + بصل مفروم + ملح ( على كيفكم مهوب إجباري ) . :)

طريق تصيلح الطبخه المتفركشه تفركش أنما إيه /

أوّل شي نسلق المكرونه مضبوط ، ثم نحط عليها زيت الزيتون ، نخليّها شوي .. ثم نحط البصل والدجاج .. وتقعدين تقلبين فيه شوي وتحركين بهدوء ( أركدي يابنت .. شوي شوي عشان تطلع الطبخه مضبوطه ) .. ثم تحطين بعدها الذُره والجزر والملح .. وتتركينها لين تشوفينها بدت تنضج وتزين .. بعدها تحطين خليط الدجاج على المكرونه وتضيفين عليها قشطة الخفق .. وتخلطينها مضبوط مضبوط .. وتحطينها في صينية وترشين فوقها " جبنة الموزريلا " .. ثم تدخّلينها في الفرن لين تذوووووب الجبنه .. :)

ثم عاد تطلّعين الطبخه من الفرن .. وتقدمينها للاهل أو الزوج أو العيال أو الزميلات والصديقات .. أو تبيعينها كطبق خيري في دار تحفيظ .. والنص بالنص !

اليوم طبختنا كانت رئيسية والحلقه الثانيه بتكون صنف " حلى " .. والحلقه الأخيره بتكون صنف " عصير ومشروب بارد " ..

والايام الجايّه مانيب ناسي أني أنبهكم على بعض الأمور اللي لابد للحرمه أنها تنتبه لها أثناء الطبخ ...

أيضاً .. لابد أن اللي تطبخ أنها تحتسب الأجر عند الله في طبخها .. لأنها تقوم على شؤون الغير وتؤدي خِدمه جليله مُباركه ... :)

بالنسبة لاخواننا التماسيح والشنبات بشتى أشكالهم وأصنافهم ومؤهلاتهم " الجامعيه " .. تراي مانسيتكم .. بيجي اليوم اللي أعلّمكم وش لون تطبخون في البر .. من أوّل طبخه لآخر طبخه .. بس فكوّني من شرّكم وخلوني أكتب مواضيع هالشبّاصات الزهريه اللي يزدهر سوقهم في رمضان وترتفع نسبة الطلب عليهم ! :)

أسعد الله مسائكم .. وبالهنا والشفا .. وجعلكم ماتغصّون

أخوكم الشيف " مدمن شاهي :) "
مذهلــــــــــــــــه
28-09-06, 02:32 PM
شكلك جوعان
مدرعمه
28-09-06, 02:41 PM
ماشاء الله كل يوم طالع لنا شيف بقصيمي نت

مره الشيف جنط السفينه بموضوع المراصيع

واليوم الشيف مدمن شاهي بموضوعه ذا....
أبونديم
28-09-06, 03:21 PM
أولاً : هالموضوع خاص بالحريم والبنات فقط .. يعني أي شنب أو تمساح يدخل .. يحاول يشرفنا آلحين بطلوعه مع الباب .. لأن " الطبخ والنفخ " مهوب له .. التمساح والشنب حدّه موتر يزبرقه ويلمّع كفراته ليل ونهار ... أنا داري أن كلامي هذا آلحين قاعد يقراه " شاب " يبي يشوف وش ورى المُدمن ومطبخه الزهري .. بس أنا أكرر له مره ثانيه وأقول ( يا أخ .. يا أنت ... يابو ... أطلع الله لايهينك .. رح أمسك لك مصحف واقرا لك كم آيه أبرك لك .. مالك ومال " البرياني " و " السمك المحشي بالخلطه " .. شرّفنا برّا ياحلو ) !

خلاص ابطلع لا تدف
بس ترا بعض الشباب يشتغلون بالمطبخ
فيه نظام طالع اليومين اسمه فيفتي فيفتي (q20)
د. جنط السفينة
28-09-06, 03:27 PM
^


^

^

مثل هرج الحج ابونديم


.
شباصة قصيمية
28-09-06, 03:30 PM
ما عرفنا لك انت مدمن شاهي وطبخات الله من السمن خخخخخخخخ

بس باطبخه ان شاءالله واصوره وانزله هونيك عند الطباخات

<<الصراحه انتس بتطبخين هههههههه نكبه

<<اتحداكم ان فهمتوا من هالخنبقه شي
مدمن شاهي
28-09-06, 04:59 PM
شكلك جوعان

اي والله جوعان ... وحاط حيلي بمسواكي ! :)
بنت الماضي
28-09-06, 10:14 PM
طبخه حلوه

ابسويه بكرا انشاالله (qq170)

وعندي طلب ياليت تقول للي عندهم صلاحيه يحذفون ردود الشهبان اللي داخلين >> ياقوتس
الأمل
28-09-06, 11:01 PM
ياحليييييييييييييييييييييييييييلكم
<<مادخلت عرض
صبح,,
28-09-06, 11:32 PM
يعطيك العافيه ......

ياماللجنه انت ووالديك....
صبح,,
28-09-06, 11:34 PM
طبخه حلوه

ابسويه بكرا انشاالله (qq170)

وعندي طلب ياليت تقول للي عندهم صلاحيه يحذفون ردود الشهبان اللي داخلين >> ياقوتس

اهب مااقواهااااااااااااا طراااااااااااااااااااخ طقته عين .............(qq15)

الا صدز وش دخل محفر السكري ومراصيع الجبن هنا ...هاه
ابوهتون
29-09-06, 12:22 AM
مدمنوه يوم انك ماتبينا ندخل

وشوله مانزلت موضوعك ذا بقسم الطبخ ؟؟؟؟


انا اطالب بنقل الموضوع
ولا خلنا نمطرس معكم تراني احب المطرسه
مدمن شاهي
29-09-06, 01:25 AM
من يوم شفت الردود .. وانا داري أن الموضوع فيه ( أنّ ) !

شامن ريحة بعض الناس قبل أدخل .. !

نعنبوا بليسكم ياهالتماسيح تحشرون عماركم مع هالحريم ( ليه ) !

الموضوع خاص فيهم .. أنتم وش دخّلكم ؟

يامُشرف .. أطردهم واسحتهم سحت مع الباب .. تراهم غايرين مني عشاني راعي طبخ ونفخ وعندي دورات في تلميع السراميك والأفران !

أخواتي الطباخات .. الحلقة الجايه عن الحلى .. اشتروا ثلاث خياش سكّر .. وكرتون دريم ويب .. ترى الشغله مهيب سهله ويبي لها بعد كم حبّة " جالكسي ".. :)

شكراً لكم ..
زهره بنفسجية
29-09-06, 07:29 AM
واااااااااااااو الصراحة حسبتك تستهبل
بس طلعت عليك حركاااااااااات
لكن ودي تشوف لنا حل بتسبيع الموااااااااااعين
يادكتور مدمن اما الطبخ خله لاهله
بعد عساي اسبع المواعين يبونن اطبخ
وه بس ياربي الله يعين...
فاتن عسيري
29-09-06, 09:49 AM
والله انك مسيكين تلقاك راز وجهك قدام الشيف اسامه السيد وبطنك توصوص والحاله يرثي لها
بس للأمانه اذا الطبخه من tv قول ترا السرقه مو زينه برمضان خخخخخخخخخخخخخ
مدمن شاهي
29-09-06, 07:04 PM
ماشاء الله كل يوم طالع لنا شيف بقصيمي نت

مره الشيف جنط السفينه بموضوع المراصيع

واليوم الشيف مدمن شاهي بموضوعه ذا....

والله أنا بعد أجاويد ياهالرجاجيل .. مابلا نعلّمكم .. تقول ماتعرفون شي :) .. وان علمناكم قمتوا تتطنزون فينا (q104)

نعنبوا بليسكم وش نسوي بكم !
الملقوفة
29-09-06, 09:01 PM
ماحب الطبخ ماطيقة
مدرعمه
29-09-06, 10:53 PM
والله أنا بعد أجاويد ياهالرجاجيل .. مابلا نعلّمكم .. تقول ماتعرفون شي :) .. وان علمناكم قمتوا تتطنزون فينا (q104)

نعنبوا بليسكم وش نسوي بكم !

انا ماسبيت مدحت قلت الشيف يعني طباخ قصيمي نت <<تحسبك ماتفهم(q31)
مدمن شاهي
30-09-06, 12:48 PM
أولاً : هالموضوع خاص بالحريم والبنات فقط .. يعني أي شنب أو تمساح يدخل .. يحاول يشرفنا آلحين بطلوعه مع الباب .. لأن " الطبخ والنفخ " مهوب له .. التمساح والشنب حدّه موتر يزبرقه ويلمّع كفراته ليل ونهار ... أنا داري أن كلامي هذا آلحين قاعد يقراه " شاب " يبي يشوف وش ورى المُدمن ومطبخه الزهري .. بس أنا أكرر له مره ثانيه وأقول ( يا أخ .. يا أنت ... يابو ... أطلع الله لايهينك .. رح أمسك لك مصحف واقرا لك كم آيه أبرك لك .. مالك ومال " البرياني " و " السمك المحشي بالخلطه " .. شرّفنا برّا ياحلو ) !

خلاص ابطلع لا تدف
بس ترا بعض الشباب يشتغلون بالمطبخ
فيه نظام طالع اليومين اسمه فيفتي فيفتي (q20)

الفيفتي فيفتي

أنا اللي أعرفه أن هالنظام مايطبّق إلا في أيام الحمل ويوم المره يالله ماتقدر تمشي من كبر بطنها ! :)

أحس أني أحرجت بعض الحريم عندنا في المنتدى .. وشكلهم يبون يسقّطون :D
مدمن شاهي
30-09-06, 01:49 PM
^


^

^

مثل هرج الحج ابونديم


.

^

^

^

مثل هرجي مع الحج والعمره : أبو نديم :)
مدمن شاهي
30-09-06, 01:52 PM
ما عرفنا لك انت مدمن شاهي وطبخات الله من السمن خخخخخخخخ

بس باطبخه ان شاءالله واصوره وانزله هونيك عند الطباخات

<<الصراحه انتس بتطبخين هههههههه نكبه

<<اتحداكم ان فهمتوا من هالخنبقه شي

أحسّ أنك ياوخيتي حدّك تصبين كيسان التوت على السفره :) .. !

ربي يوفقك .. ونحتري الصوره الفلته !
مدمن شاهي
30-09-06, 02:04 PM
طبخه حلوه

ابسويه بكرا انشاالله (qq170)

وعندي طلب ياليت تقول للي عندهم صلاحيه يحذفون ردود الشهبان اللي داخلين >> ياقوتس

وين المشرفين عنهم ! :)
مدمن شاهي
30-09-06, 02:10 PM
ياحليييييييييييييييييييييييييييلكم
<<مادخلت عرض

أي والله ياحليلنا ..

نتعب ونشقى وانتم مابلا في الاسواق ! <<< رد في الصميم ! :)
مدمن شاهي
30-09-06, 02:15 PM
يعطيك العافيه ......

ياماللجنه انت ووالديك....

واياك أختي :)

أيه هذا الرد والا بلاش .. !
وليد 1
30-09-06, 02:17 PM
نبي المرة الجاية طبخات دسمة
مدمن شاهي
30-09-06, 02:17 PM
مدمنوه يوم انك ماتبينا ندخل

وشوله مانزلت موضوعك ذا بقسم الطبخ ؟؟؟؟


انا اطالب بنقل الموضوع
ولا خلنا نمطرس معكم تراني احب المطرسه

أسمعني يامحاميهم :)

الموضوع بينزل هنا .. عشاني أنا ما أقدر أدخل هناك عندهم ... أخاف أفتنهم واستاثم في غيري ! :)

هنا أبرك لي ...
مدمن شاهي
30-09-06, 02:18 PM
واااااااااااااو الصراحة حسبتك تستهبل
بس طلعت عليك حركاااااااااات
لكن ودي تشوف لنا حل بتسبيع الموااااااااااعين
يادكتور مدمن اما الطبخ خله لاهله
بعد عساي اسبع المواعين يبونن اطبخ
وه بس ياربي الله يعين...

تسبيع المواعين مهوب اختصاصي وانا اخوس .. !

أنا دوريني في الطبخ والنفخ .. والا شغل المطرسه هذا فمانيب أحرص عليه :)
مدمن شاهي
30-09-06, 07:23 PM
والله انك مسيكين تلقاك راز وجهك قدام الشيف اسامه السيد وبطنك توصوص والحاله يرثي لها
بس للأمانه اذا الطبخه من tv قول ترا السرقه مو زينه برمضان خخخخخخخخخخخخخ


اي والله مسيكين !

يعني بلا عليك .. واحد في نهار رمضان .. صايم ويتجلس مهاوش مع اخوانه ماتبينه يصير مسيكين !

أما موضوع السرقه .. فالموضوع مسروق ونصف من وحده من خواتي ! .. هاه .. عندك شي ؟ :)
سكروب 14
30-09-06, 07:58 PM
(hjhjlj) (hjhjlj) (hjhjlj) (hjhjlj) (r70yty) (r70yty) (r70yty) (r70yty) (r70yty) (r70yty) (r70yty)
الملقوفة
30-09-06, 07:58 PM
ههههههههههههه اي دسم
الملقوفة
30-09-06, 08:00 PM
(hjhjlj) (hjhjlj) (hjhjlj) (hjhjlj) (r70yty) (r70yty) (r70yty) (r70yty) (r70yty) (r70yty) (r70yty)

وعل شنو الاحتجاج ياعم
الاميرة عنابة
30-09-06, 08:01 PM
مدمن شاهي انا منحاشة عن منتدى الطبخ وانت لاحقنا هنا

مدامك تعرف تطبخ الله لايهينك تعال اطبخ بدالى(hjh)

انا قريت المقدمه بس وحلوووووووه:D :D
الاميرة عنابة
30-09-06, 08:02 PM
(hjhjlj) (hjhjlj) (hjhjlj) (hjhjlj) (r70yty) (r70yty) (r70yty) (r70yty) (r70yty) (r70yty) (r70yty)

قايللك للحريم والبنات وش جايبك(q84)
سكروب 14
30-09-06, 09:08 PM
أنا أحتج على هالأسلوب من يووووم دخلت المطبخ وهوز قاعدن يدفدفن يطردن أنا وأصدقائي التماااسيح عيني عينك
.
.
وأنتن مصدقااات ترا طبخته مهب زينه بتله إذا كشتنا يزينه ولا أحد يأكل منه كلهم يأكلون مطازيز أمي وسألي أبو شدق
.
.
شف يما تسوي لنا موضوع خاص ولا أبقعد أحوس مطبخكم .... وهـــه هاذي قعدة
الملقوفة
30-09-06, 09:14 PM
هههههههههههههههههه
مدمن شاهي
01-10-06, 12:37 AM
والله أني قايله ياناس ..

التماسيح مايخلّون الواحد بحاله .. إلا يشغلونه في نفسه عشان يطلّعونه عن طوره ثم يخرّبها ويديور في نصف طريق الملك فهد .. أو يضرب فرامل في شارع المصانع ووراه تريله محمّله بحديد !

نعنبوا بليسكم ياتماسيح الغفله ... خلّونا نعلّم هالمخافيع اللي يالله يمشون بالدفّ وينفعون امهاتهم في المطبخ .. ! <<< لاحظوا يابنات .. تراي ماعممت .. وطول عمري ماأحب التعميم ! :)

لي عوده .. بس خلّوني أفرط هالسنبوسه اللي قدّامي !
الخطابه ام رويشد
01-10-06, 12:58 AM
الحين يوم انك تكتب هالطبخه يعني بنياتنا ما يعرفن يطبخن ولا عندهن قل سنع هاه

انتم يا الرجاجيل يبي من يسنعكم عشان تسنعون حريمنا

ولا شاطرين بالبلع بنياتنا يكرفن بالمطبخ وانت مستغل وقتك واكثر من يبلع انتم

صحه وعافيه هي هي هي هييييييييييييييييييييييييي
مدمن شاهي
02-10-06, 01:56 AM
ماحب الطبخ ماطيقة

قولي " قسم " (asj)
مدمن شاهي
02-10-06, 01:39 PM
نبي المرة الجاية طبخات دسمة

الدسمه والله يوم أني أشوفك يالتمساح أنت وربعك طالعين منها :)
شباصة قصيمية
02-10-06, 05:21 PM
أحسّ أنك ياوخيتي حدّك تصبين كيسان التوت على السفره :) .. !

ربي يوفقك .. ونحتري الصوره الفلته !

لا اصب شاهي (q31)
مدمن شاهي
03-10-06, 06:31 PM
(hjhjlj) (hjhjlj) (hjhjlj) (hjhjlj) (r70yty) (r70yty) (r70yty) (r70yty) (r70yty) (r70yty) (r70yty)

والله لو تحتجّ إلى باتسر .. مادريت عنك :)
مدمن شاهي
04-10-06, 12:41 AM
مدمن شاهي انا منحاشة عن منتدى الطبخ وانت لاحقنا هنا

مدامك تعرف تطبخ الله لايهينك تعال اطبخ بدالى(hjh)

انا قريت المقدمه بس وحلوووووووه:D :D

والله أنا ماأجبرتك تدخلين ! :)

بعدين الطبخ والنفخ مهوب " لزوم " .. جيبس لتس شغاله .. ويالله القبول :)

شكراً لك ولحضــورك ،،