المساعد الشخصي الرقمي

مشاهدة النسخة كاملة : من يكسب التحدي (الشباب والا البنات ) ...... الكل مطلوب منه المشاركه


همس الشفايف
03-04-04, 02:27 PM
السلااااااااااااااام عليكم

يالله حي كل من رعص الموضوع

وشلونكم عساكم منيحين ..مهنا علوم واخبار جديده >>> مطوله شكلتس ماتبين قهوه ازين :o <<< انكان ماعليكم كلافه مايخالف :p >>>>>اقول لايكثر بس <<<< طيب بس لاتدزون :cl:

اقول يالله عاد ابطب في صلب الموضوع ( صلب والا لين هه هه هه ) :o >>> ياشين التميلح في القوايل

ايه وين وصلنا هقوتي اننا وصلنا لصلب الموضوع >>>> جايزتن لها الكلمه :p

وبما اننا وصلنا لصلب الموضوع بقولكم وشو الموضوع :o >>>>> كملي بدت سبودنا تحوم :cl: (طيب)


ايه الفكره ياطويلين العمر والسلامه

فريقين شباب وبنات

راح يطرح عليهم كمن طلب وعليهم تنفيذه

بس ابيكم الحين تسجلون حظوركم

بشوف كم عددكم على شان اشوف كم زوليه افرشها فيذا :p

وعااااااااااااااااد لاتسجلون بعدين ماعاد نشوفكم

اللي بيشارك مشاركه سنعه يسجل واللي موب مشارك يصفط على جنب ويشجع بس :p

واتمنى اتمنى انكم تتفاعلون معها لان حلاوتها في حماسها :)

عااااااد خابرتكم ماتردون لي طلب >>>>>>> اخسسسس يابنت الوليد مصدقتن عمرتس :o

يالله انتظركم

همووووووووووووووووووووووووووووووووسه

الحب الأول
03-04-04, 04:55 PM
سلااااااموووو عليكم انا اول وااااااااحد أسجل (اخس ياالقوي) همس الشفايف حطيني كابتن فريق الشباب وشووكرا




الحب الأول

أم أديم
03-04-04, 05:07 PM
:) تسجيل رقم ( 1 ) للسحالي :p

المشاغـب
03-04-04, 05:09 PM
مايصلح الترفيهي بدون شغب


حبيت اسجل حضوري

الا خطبوط
03-04-04, 05:55 PM
الاخبوط هنا (aqwa)

همس الشفايف
03-04-04, 08:54 PM
افا ياذا العلم


وين الباقين :md:

أم أديم
03-04-04, 11:13 PM
(qq157)

بدت الحرب والا :o

بنت عنيزه
03-04-04, 11:30 PM
يا الله العنيزاويه جت

عساكي على القوه هموسسسسسسسسسسسسسسسسه

همس الشفايف
03-04-04, 11:47 PM
هلااااااااااا باللي سجلوا

وهديتكم بخليكم ترتزون قدام

قصيميه جرجري البنيات تكفين معتس انتي وبنت عنيزه

والا ترى بخلي التحكيم وافزع معكم :o

أم أديم
03-04-04, 11:58 PM
من الحين

اقول اذ انتِ تحكيم بس ترى منسحبه (g)

وانا وبنت عنيزه ما نقدر على التماسيح لحالنا (a)

انتِ عنصر حريمي قوي :p

صح والا انا غلطانه يا بنت عنيزه :o

بنت عنيزه
04-04-04, 12:10 AM
اي والله صازه قصيميه ترانا اضعيفات

بنوته
04-04-04, 12:45 AM
انا وصلت هموووسة
بس خلوني ورا علشان اخاف قدام :o

سيف العداله
04-04-04, 01:35 AM
واحد تمساح وصلحوووه (aqwa)

خافت ام البراطم يوم جا اللبناني :p

ماكو فكه
04-04-04, 02:35 AM
ونا ونا ونا <<<<<<<<< والله المطفوق :o



انا معكم 00


مدري ويش السالفه بس معكم 00


(aqwa)

همس الشفايف
04-04-04, 02:08 PM
(qq93)


ترى هذا شعار المهرجان

غيرناه من ( هيتونا مير ترانا غير ) الى ( نورتونا ) لان عندنا هنا لبنانيين واجد (q33)

الحين فريق الشباب هم : (q96)
الحب الاول >>>>>>> تراك قدام انبسط :o

المشاغب >>>>>>>>> حطيناك ورى على شان مايشوفك العريف :p

الاخطبوط >>>>>> انت خلك بعد قدام على يمين على شان تمسح السبوره ماكثر الله الا يدينك :o

سيف العداله >>>>>> خلك تكفى ورى جنب المشاغب على شان ماتخيسنا بريحه التبووووولييييه :o

ماكو فكه >>>>>>> والله شكلك مفهي بنحطك قدام بعد على شان ماترقد :o


(q38) فريق البنااااااااااااااات >>>> ياهووووووووووووووووووه عاشوا عاشوا ( عسى مابان اني اشجعهم) (qq64)

قصيميه <<<<< تراتس انتي الكابتنه حقت البنياات انتبهي لهن وذاكري لهن :o

بنت عنيزه <<<<< عليتس بهم همااااااااه لياي اوصيتس :rolleyes:

بنوته <<<<<< هلا بتس ولا تخافين بنحطتس قدام مع قصيميه تجسرتس شوي (tt)

بياله >>>>>>>>>> تراها موصيتني اسجل عنها مكفولتن بها ماغير اسجلها يومها في اولى ابتدائي والحين تبيني اسجل لها بس بلعب عليها واقول لازم تطعمين قبل لا تعلمونها :p

يالله فرصه التسجيل قااااااااااااااائمه حتى نفاذ الكميه >>> متأثره بدعايات اندومي :o

شبيه الريح
04-04-04, 05:18 PM
سلام اسف همس مدري شنو السالفه بس شفيه المنتدى محيوووس والناس اكثرهم متغيريين شنو صاير والله شكل المنتدى ماله داعي شفيهم قسموا التسليه



خخخخخخخخخخ شنو عضو جديد شفيكم جحدتوني والله مالكم حق صدق اكيد فيه شئ علموني ابي اضحك ليش مسويين معاي كذى ومشاركاتي بس وحده لا والله شئ طيب منكم عى العموم مشكوره همس على هاللعبه اشوفكم على خير

... روحي احيابك ...

همس الشفايف
04-04-04, 09:23 PM
هلاااا والله شبيه الريح


من طول الغيبات جاب الغنايم ( بس وين غنمتي ) :o


اجل طايرتن بوهتك وماتدري وش صاير

ماجحدوك ولا شي بس الموقع طبوا عليه بزران ولعبوا فيه (tt)

عموما تتقدر ترجع مشاركاتك

بس انت لاتقاطع :rolleyes:

وهلا ومسهلا برجعتك خيوووووووووووو :)

الا خطبوط
04-04-04, 09:33 PM
انا هنا (aqwa)

الزاحف
04-04-04, 11:37 PM
راحت عليك يا الزاحف



همس باقي احد وىلا اكتفيتو


تراى عادي اضف وجهي وانقلع

اذا كان العدد محدود

الا خطبوط
04-04-04, 11:51 PM
انا هنا :o

حافيه القدمين
05-04-04, 12:06 AM
بعدوووووووووووووا


جتكم حف حف حافيه القدمين وصلت

أم أديم
05-04-04, 07:40 AM
:eek: وش صار علينا (qq53)

تــــــالا
05-04-04, 08:50 AM
وصلت متأخره بس ما عليش ما فاتني التوقيع


طبعاً مع فريق النواعم

الحب الأول
05-04-04, 11:54 AM
همس الشفايف تراني مرتز من أمس قدام والله العظيم ذبحنا الجوع اخلصوا علينا تراني متحمس(وين قهوة يالحبيب)


الحب الأول

غنوده
05-04-04, 12:25 PM
انا جيت تراني ماعلي قويه ومااخاف من العيال<<<< تقصد الشباب بس على باله عربجيه:o

همس الشفايف
05-04-04, 02:48 PM
ياهووووووووووووووووووه والله كثرتوا

اصلن العب عليكم مافيه شي >>>>>>>>>>> صادووه :p

امزح معكم بس استنى الفريق يكتفي

يالله ترى بنبدا التحدي وبنسكر بيبانا (aqwa)

الحين صااااااااااار عندنا سبعه تماسيح :rolleyes:

اللي هم ( الحب الاول _ المشاغب _ الاخطبوط _ سيف العداله _ ماكو فكه _شبيه الريح_الزاحف)
بس ترى يالحب منتب ميت جوع حاطين على جنب سندوتشات تونه وعصير سن توب ماشفتها :o

وصاااااااار عندنا سبعه وردات اللي هم البنيات :p ( مسابقتي وبدلعهم بكيفي ) :o

اللي هم ( قصيميه _بنت عنيزه_البنوته_بياله _حافيه القدمين_تالا_غنوده )

يعني تعااااااااااااادل (d)

ونبدأ الحين بأول طلب من الفريقين (qq) ترى هذا اسهل واحد والله يعينكم :rolleyes:

الطلب الاول في ماده التعبير :eek:
فريق الشباب: كل واحد يسولف على الاقل في ثلاثه سطور عن معانات شباب هالايام ولازم تكون باللغه العاميه :p
لاني ما افهم الفصحى ومنيب عارفه اصحح والدرجه راح تكون سبع درجات على عدد فريقكم يعني اللي مايكتب ياخذ صفر :o

وفريق البنات : كل وحده تسولف على الاقل في ثلاث اسطر عن معانات بنات هاليومين وبرضوووووه لازم تكون بالعاميه وذالك بسبب العذر اللذي ذكرته مسبقن >>>>>>. خلي عنتس التفلسف :o
وبرضووووووه الدرجه من سبعه

يالله نشوووووووووووووف همتكم ولازم تتفاعلون لان فيه مراحل بعدها اكثر حماس :rolleyes:

ملاحظه
الفريق اللي يرد كل لاعبيه اول لا تحسب بعدها ردود الفريق الثاني ويعتبر فائز في هالمرحله

عساااااااااااااااااكم فهمتوها احس اني حستكم

المهم جاوبوا موب لازم تعرفون :o

يالله تحياتي لكم وانتظر اجاباتكم وترى القلم الاحمر بيدي اليمين :p

قالش
05-04-04, 02:55 PM
افااااااااااااااااااااااا فريق شباب وبنات يا همس الشفايف انت واختراعتك لكن يالله نشارك معكم

بس تراي ابي جناح أيمن مهما كان الفريق ............

لؤلؤة الخليج
05-04-04, 03:36 PM
هذا حضورى.
وارسل هذة الصورة لاخى الاخطبوط.اتمنى ان يقلع من التدخين.



http://www.hanaa.net/postcard/images/nosmoking1_s.gif
ولكم تحيات لؤلؤة الخليج.....!!!!(q13)

الحب الأول
05-04-04, 04:21 PM
الشباب والله مساكين الشباب كلن على همه سرى وانا على همي سريت أول شي العطاله اللي مهبلتن بهم وهم الله يهديهم كل واحد فيهم يبغى مكتب وجرائد وخرابيط بداية الحياة العملية عادي ياعم اشتغل وابن نفسك وطور نفسك (يادرج) وكل شيء بيجيك خذلك دورة حاسب خذلك دورة انجليزي والله بتلقى فرصه وقليل دايم ابرك من كثير منقطع



وسلامتكم الحب الأول

المتحد
05-04-04, 06:21 PM
النص الأصلي مرسل من قبل الحب الأول
وطور نفسك ------------------> (يادرج)

:o:o:o

ههههههههههه ضحكت من قلب على الكلمه هذي ^^^

الغرام
05-04-04, 07:48 PM
هااااااااااااااااااااااااااااااااااااااااي:o
شباب وبنات...لا تنسوني انا وياكم.....عساني ما تاخرت؟:p


غرااااااااااااااااااااااام

غنوده
05-04-04, 10:29 PM
البنيات اهاهاه(g)(g)(g)
حنا مسيكينات ندرس ستطعش سنه ثم نكمل جامعه ومانلقى وظايف لا ومافيه بعد عرس<<<<<<اتكلم عن الباقي اما انا الحمد الله انفكت عقدتي عقبالكم:o:o

الوحده اذا تخرجت من الجامعه طبعا مافيه وظيفه <<<لا تحلم حتى الحلم ممنوع
بس تلقاها قدام المرايه تتزين ولا تعتني ببشرتها والاجسام تترهل من كثرة الجلوس على النت <<<<<حرام لاتلومونها ترى من القعده بالبيت
والله فيه حاجات كثيرة نواجها حنا بس الله يعين
لا واذا كان لها اخو عقده اذا شافها جالسه على مسلسل تتابعه جته جنونه قومي اكوي (oo)شماغي سوي لي شاهي انا مااحب شغل الخدامه <<<<<ياحرام مظلومات

واذا تزوجت تنبسط اول سنه سنتين لين يشرف طويل العمر <<البيبي
يبداء التعقيد ولاده ورضاعه وتربيه وقرف وتنسى انها كانت بنوته الله يعين(g)(g)(a16)

غنوده
05-04-04, 10:31 PM
ماعليش تعبيري تعدى صفحه بس لازم نفووووووووووووووز

همس الشفايف
05-04-04, 10:33 PM
لا ماتأخرتوا

وحياكم الله

الحين الشباب صاروا
( الحب الاول_المشاغب_الاخطبوط_سيف العداله_ماكوفكه_شبيه الريح_الزاحف_قالش_ المتحد )

والبنات ( قصيميه_بنت عنيزه_ بنوته_بياله_حافيه القدمين_تالا_غنوده_لؤلؤه الخليج_الغرام)

يعني تعادل تسعه تسعه :rolleyes:

يالله كل واحد يرد على الطلب اللي انا طلبته (qq)
ما اشوف الا الحب الاول اللي رد وغنوده :rolleyes:

وين البقيه :md:

بنت عنيزه
05-04-04, 11:04 PM
هلا اوخيتي هموسسسسسسسسسسسسسسسسسسسه

والله الي يشب السبد انس كل شي اتسوينه با البيت من طبخ ونفخ وغسل حمامات وانتي بكرامه
وكنس الفصفص ها الي يبذرونه كل ليله ومع ذلك ما يشافلس بشي اذا قلتيلهم اجدعون با السوق قالولس منب فاضي لس

اجل حنا الي فاضين لك لو ابقوله منب فاضيه كان مردغن هاك المردغه لين اسويله الي يبي حتى لو انا اصيح ما يهمهم الى انفيستهم وبس <<<<<<< يسفابهم عااد(g)(g)

همس الشفايف
05-04-04, 11:07 PM
هههههههههههههههههههههههههههههههههههههههههههههههههه هه
هههههههههههههههههههههههههههههههههههههه


يالله وين البقيه :o

>>>>>>>>>>>>>>> جازت لها الردود :p

فريق أول
05-04-04, 11:29 PM
ماغير حش بالفريق :(


فريق وفريق فريق وفريق :(


أناشد أهل القلوب الرحيمه بالتدخل :o


مثكوره على اللعبه يا هموسه :)


وأنا ابصير بالمدرج اتفرج (aqwa)

فريق أول
05-04-04, 11:34 PM
QUOTE]كاتب الرسالة الأصلية بنت عنيزه
هلا اوخيتي هموسسسسسسسسسسسسسسسسسسسه

والله الي يشب السبد انس كل شي اتسوينه با البيت من طبخ ونفخ وغسل حمامات وانتي بكرامه
وكنس الفصفص ها الي يبذرونه كل ليله ومع ذلك ما يشافلس بشي اذا قلتيلهم اجدعون با السوق قالولس منب فاضي لس

اجل حنا الي فاضين لك لو ابقوله منب فاضيه كان مردغن هاك المردغه لين اسويله الي يبي حتى لو انا اصيح ما يهمهم الى انفيستهم وبس <<<<<<< يسفابهم عااد(g)(g) [/QUOTE]

ههههههههههههههههههههههههه
ههههههههههههههههههههههههه

حلوووووووهـ

الزاحف
05-04-04, 11:52 PM
مادام المسابقه قرقره وكثرت حكي اكيد البنات الي بيفوزون


من ايام الآبتدائي ونا الماده الي معقدتني التعبير


ومشكوره همس

سكري
06-04-04, 12:15 AM
اقول فريق اول
الزاحف وش السالفه قرق قرق
اخوي فريق اول ابقردن واحد مصري من اخواياي ايام الدراسة بمصر لاعاده الله من ايام انتفخ راسي من كثرقرقه
بسجله بالمنتدى واسدد فواتيره على حسابي مخصوص للمشاركه ذي خصوصاًلان اخواننا المصريين بالقرقي نمره واحد
والنتيجه ايكد فتاكه
وبحر كبد القرقات
الغرام
وغنوده
وهمس الشفايف
وبنت عنيزه
لان القرق شغلت المصري الفلته بالقرق

بنوته
06-04-04, 12:32 AM
السلام عليكم ورحمه الله
والله انك صادقه بنت عنيزة مافي شئ يبين في عيونهم :(
وكل شئ ولا ودني للسوق ولايعجبهم العجب
ما يرضون نروح مع السواقين ولا هم فاضين يودننا
يؤيؤيؤ اذا كانو جوعانين ابعدي عنهم لاياكلونك :md:
خلاص هموسة تعبت من الحش في الاولاد :o

فريق أول
06-04-04, 12:34 AM
كاتب الرسالة الأصلية سكري
اقول فريق اول
الزاحف وش السالفه قرق قرق
اخوي فريق اول ابقردن واحد مصري من اخواياي ايام الدراسة بمصر لاعاده الله من ايام انتفخ راسي من كثرقرقه
بسجله بالمنتدى واسدد فواتيره على حسابي مخصوص للمشاركه ذي خصوصاًلان اخواننا المصريين بالقرقي نمره واحد
والنتيجه ايكد فتاكه
وبحر كبد القرقات
الغرام
وغنوده
وهمس الشفايف
وبنت عنيزه
لان القرق شغلت المصري الفلته بالقرق

السالفه مثل ماقلت قرق بقرق ...

بس انا جالس بالمدرج اتفرج


ان كانك بتجيب هالمصري اللي تقول عز الله فاز فريق الشباب


اقول يا سكري وش رايك بس تجي معي بالمدرج تفرج

يالله من فضلك فصفص وببسي وجالكسي (aqwa)

أم أديم
06-04-04, 01:16 AM
بنات هالوقت الله يخلف :md: على ام جابتهن لا سنع ولا ذرابه

ما غير سوط ولوط بهالشوش (q32) لا شفت شوشة الوحدة تقل قمبرة عنز (qq62)

ولا قامت من النوم العيون كافخة (q101) من مساهر هالليول (q35)

(q51)

سكري
06-04-04, 01:22 AM
استانسن يالشبابات خلاص ابروح اجلس مع فريق اول وتفرج بالمدرج
وش تبي اجيب معي فريق اول فصفص وسجاده بس والاوتامر شي ثاني قبل اجل تراني محب الرده لان الرده على الجيش ماهي على المدرج زين اخوي

فريق أول
06-04-04, 01:45 AM
النص الأصلي مرسل من قبل قصيميه
بنات هالوقت الله يخلف :md: على ام جابتهن لا سنع ولا ذرابه

ما غير سوط ولوط بهالشوش (q32) لا شفت شوشة الوحدة تقل قمبرة عنز (qq62)

ولا قامت من النوم العيون كافخة (q101) من مساهر هالليول (q35)

(q51)


ههههههههههههههههههههه
هههههههههههههههههههه ...

&&&&&&&&&&&&&&&&&&


حبيبي سكري

أنت الحين وين أنت به ؟؟

اذا كنت حول بيتكم .. ياليت تقول لأمك تضبط القهوه وتجيبها معك ...

ولاتنسى ( نبته علي ) ...

واذا جيت لا تنسى تمر ( غريب الماضي ) تراه عند الباب معه ( زمزميه الشاهي )

يحتريك ...


استملت طال عمرك؟

سيف العداله
06-04-04, 02:03 AM
ينفع تعبير الحب والاول والا نجي فزعه (aqwa)

اولم خشتي للقرق (q10)

علمينا يا ام البراطم (q21)

الا خطبوط
06-04-04, 02:15 AM
احد جاب سيرتي (qq7)(qq7)

الحب الأول
06-04-04, 08:02 AM
فشلتونا يالتماسيح مارد فيكم الا أنا والله انكم من جمبها تبغون البنات يفوزون علينا لا والف لا همتكم (يالدروج):o بسرعه..


الحب الأول

أم أديم
06-04-04, 01:26 PM
(q26) قاعدة اتغدا بس ابشرف واروح :p

همس الشفايف
06-04-04, 01:57 PM
فريق اول انت وسكري اصفطوا على جنب (aqwa)

والله لو انكم مشاركين مع فريق الشباب انتسان فازوا من كثر قرقرتكم :o

بس انتم ماعليكم الا تشجعون بس ياويلكم ان حلتوا على البنيات قواطي (a11)

وانتم يافريق الشباب ورى ماجاوب منكم الا الحب الاول يالدرووووووووووج :p

لاتحسب مشاركه الزاحف والاخطبوط شاركوا زي الناس :o

الحب الاول تراك انت قائدهم جرجرهم مع خنافسهم خلهم يعبرون فيذا

وسيف العداله لا زم كل واحد يسولف ويقرق ماتكفي اجابه الحب الاول عاد اطول مهنا لسانك (qq24)

وانتم يالبنيات عيني عليكم باااااااااااااااارده

جاوب منكم اربع عاد الباقيات وينهن على شان تفوزن بهالمرحله :rolleyes:

وانتي يالقصيميه مااااااااش علم وراتس تسبينا ياكافي بس ماعليه حسبتها لتس لانتس صازه والله (qq)


الشباب (q96) الى الان 1/9
البنات (q38) الى الان 4/9

ننتظرررررر الين يكتمل احد الفريقين بعدين ترى بنجمع الاوراق (aqwa)

تــــــالا
06-04-04, 02:43 PM
يا حسرة علينا كلمة مظلومات ما تكفي و الله (q95)


ما غير يجي اللي ما ينذكر اسمه (q96)
و تبدأ معه قائمة المشاكل
أولا إذا صحى من النوم وين الفطور؟
يعني لازم تصحين قبله
و إذا كان من مغرمين بالقهوة لازم تصلحين قهوة

بعدين يطلع للعمل و يجي الظهر
و تبدأ
مشكلة الغداء لازم يكون والم الساعة ثنتين و عشر ( عشر حقت الطريق )
بعدين يقوم ينتقد ليه مالح ليه الرز حب ... الخ
و بعدين ينام إلي المغرب ثم تجي الشله و تكمل الناقص


سمير البشيري لم يخطئ بانشاده قصيدة مظلومة و الله يعين على الظلم


(q60)
(q60)
(q60)


(q46)

همس الشفايف
06-04-04, 02:59 PM
هههههههههههههههههههههههههههههههههههههههههه


تالا :rolleyes:

ابردي سبدتس فيذا ترى محد داري :o

البنات صارووووووووووووو 5/9 :rolleyes:

والشبااااااااب ولا زالوا 1/9 :md:

أم أديم
06-04-04, 04:11 PM
(cj)

(cj)

(cj)


وين التماسيح

واللبناني وينه :p

بنت نجد
06-04-04, 04:24 PM
أحم .. أحم ..

وصلت النجدية .. (qq)

يالله .. اسجل حضوري مع النواعم .. :)

واعبر عن معاناتنا يالبنيات بثلاثة أسطر ... (g)

وش ازيد عن اللي قالن أخياتي ..

بتكلم عن معاناتنا بالسوق .. ذبحونا هالشباب إذا مرينا من عندهم نطت عيونهم .. كنهم ماقد شافوا حريم :cl:
والمشكلة أنك متستره .. حتى يدينك ورجلينك مغطيتهن بشراب وقفازات .. لكن .. بيطالعونا من فوق لتحت .. تقولون يفحصون فحص شامل :o
استحوا على وجيهكم ياشباب .. وغضوا البصر .. ولا تطالعون فينا :p...علشان تنتهي معاناتنا في الأسواق ..

وسلامتكم ...

خلصت من التعبير .. عساني بس بأخذ درجة سنعة :rolleyes:

وياملا العافية ياهموووووووووووستنا الغالية على هالتحدي الحلو .. :rolleyes:

ايه مايجيبها إلا حريمها :o

دمتم بكل الود

أختكم

بنت نجد

سيف العداله
06-04-04, 04:38 PM
اللبناني راجع لكم بالليل ان شاء الله ومعاه قرقه (aqwa)

شبيه الريح
06-04-04, 04:51 PM
ممكن اعرف شنو السالفه اذا اقدر ادخل بالموضوع ولا لا يام براطم ردي جعل برطمك للمشق خخخخخخخخ اقول صدز شنو السالفه والله مدري ابي ارجع الحروب على الدلوخ البنات يالله ردوا علي ومشاركاتي ردوها اقولكم اللي مسحتوها .


... روحي احيابك ...

لؤلؤة الخليج
06-04-04, 04:59 PM
لؤلؤة الخليج
ولكم تحياتي ......!!
(q14) (q14) (q14) (q14) (q14) (q14) (q14)

همس الشفايف
06-04-04, 09:19 PM
ههههههههههههههههههههههههههههههههههه
هههههههههههههههههههه

ياحبيلكن يالبنيات عليكم بهم ابردوا سبدي لاني مايصلح اقول اللي بخاطري (tt)

بس لاتخافون بخلي بياله تعبر عني لان بنات افكاري مسيرتن عليها :o


وانت ياللبناني اجل منتب فاضي الحين قاعدن تكدكد هالقذيله هالي كنها سعابيل بزر :p

وانت ياشبيه الريح الى الحين طايرتن بوهتك

ياخي ارسل لميكانيكي المنتدى خالد ويرجع لك عدد مشاركاتك >>> عاد من زينها كلها سب فينا :o


وبعدين يالله وين ردك ؟؟؟؟؟؟؟؟ احتس في ثلاث سطور عن معاناتكم انتم يالشباب :md:


المهم البنات صارن 6/9

والشباب ولااااا زالوا مغرزين مارد الا واحد من تسعه 1/9

الحب الأول
07-04-04, 11:45 AM
نداء عاااااااااااااااااااااجل الى جميع التماسيح هلموا هلموا بسرعه اقرقوا احسوا قولو شيء عبروا (يالدروج) اخلصوا لاتدعون الفرصة تفوتكم اقرق واكسب


واااااااااااااافشيلتاه:(




الحب الأول

همس الشفايف
07-04-04, 01:16 PM
هاااااااااااااااااااااااااااااااااه مليت وانا اراقب عليكم


الحب الاول انا اشهد انهم نكبوك:o

وين اللبناني اللي بيرد علينا

والله ماعنده ماعند جدتي حصيصه

:o

شبيه الريح
07-04-04, 01:37 PM
معاناة شنو اتكلم عن شنو انتوا وبراطمك بقول اي شئ بس لا احد يضحك

والله مدري شنو اقول بس احس ان الشباب يعانون من كيد البنات خاصه هاللي تجيك ملكعه وتسوي دلع والله ياهووو بيروح وطي وبيروح تونه في قوطي هالدلخ بس تقوله هاي راح ماي ( مويه ) _ ( ووتر بالعنجليزي ) انا اذا قالتلي وحده لبيه رحت اصطب في ذنب ضب على طول ( ايه هين ) هاه خلاص اربع سطور يام شوشه اجحديها بعد .


... روحي احيابك ...

همس الشفايف
07-04-04, 01:44 PM
ههههههههههههههههههههههههههههههههههههههههه
هههههههههههههههههههههههه

شبيه الله يرجك

اجل انت من النوع الخقووووق وانواع السعابيل(qq47)

افا ياذا العلم

المهم اهم شي انك عبرت وبكيفك

يالله صارو الشهبان قصدي الشباب 2/9

والبنات 6/9

شبيه الريح
07-04-04, 01:47 PM
يالله اقدر اعدل النتيجه يعني اشارك بعد ولا خلاص انتي وبراطمك اللي تدهنينها بديزل


... روحي احيابك ...

همس الشفايف
07-04-04, 01:51 PM
الحين يالله نتحمل ردك هذا تبينا نطلب منك تعبير ثاني

لا يسد خلاااااااص

نستنى باقي فريقك هالدرووووووووووووووووج :o

>>>>>>>> والله حست بمعانات ابلات التعبير والاملاء والخط انتسانهم بيقرون تعابير زي هاللي عندي :p

شبيه الريح
07-04-04, 02:54 PM
خخخخخخخخخخخخخخخخخخخخخخخخخخ

اقول عندي تعبير رهيييييب خخخخخخخخخ ولا خلاص اروح انزله بمنتدى ثاني تتشرطين انتي وجهك قصدي وبراطمك طيب يامعلمه خخخخخخخخخخخخخخخخ والله لو تصيريين مدرسه انتي ان يروحون فيها الطالبات والله ياهن بيطلعن عرابجه خخخخ وكل وحده ماتمشي الا والسكين بجيبها اقول اها خلاص عاد تراك طفشتنا طيب


... روحي احيابك ...

الحب الأول
07-04-04, 04:28 PM
شبيه الريح حبيبي خلك ثقل عبر وتفرج ترى اللي تسوية لك همس الشفايف اغراء وتشويش ذهني(ركب انتل)
ويعطيك العافيه على المشاركة و باقي الشهبان قصدي الشباب أنا واقف الحين عند باب المنتدى ومعي لوح مليان مسامير ابستعد عليهم واحد واحد الين يعبرون


الحب الأول

أم أديم
07-04-04, 06:38 PM
الى الآن والسحالي منتصرات على التماسيح (qq22)


فاللهم زد وبارك وهدم سنون التماسيح وخاصة ابوسنون واللبناني (q43)


(q63)

بياله
08-04-04, 02:29 AM
(qq137)


قبل لا أبدا بكتابه اللى فى تسبدى أحب امسى على البنيات بالخير

وامطخ كل وحدتن على جهتها وأقول لهن اصبرن وعسى ربى يفرجها لنا قولن امين (qq13)


وه بس خلونى ابدا بمعاناتى ...

وأنا واقفتن اكنس حوشنا ولا لى من الشيطان طارى وقاضبتن فى يدى اليمين المكنسه (qq20)

وبيدى اليسار ماسكتن طرف ثوبى وانظف هالغبره اللى مبشعتنا هالأيام

ومبشعتن خشومنا ماغير نعاطس ونتحكحك

وياليتها جت على الغبره بس (q99)

قاعدتن اكنسسسسسسسسسس اوراق شجر العبرى حقت اهل هموسه اللى قبلها توصخ حوشنا

(المشكله انهم مبشعينا بورقها ولاقد روحوا لنا من عبريها )

وهذا يعتبراكبر شى نعانيه منهم هالعبريه وهالكوره (nn)

اللى كل شوى متسطحتن عندنا

واللى ياما صمخت راس جديدتى وهى بالحوش جالستن فى المشراق تسبح وتهلل

وطبعاااااااااااااا ماانسى جرسهم اللى رنته تطش الراس ومعلق اربعه وعشرين ساعه

ولايفتحون الباب وفى الاخير حنا اللى نتورط بضيوفهم (g)


المهم وأنا واقفتن اكنس ويسيرون علينا ناااااااااااااااااااس من تتوقعونهم ؟؟

لاتخافون مهوب ضيوف اهل همس :o

شوفوهن هذولى>>> (بس لاتخافون بخلي بياله تعبر عني لان بنات افكاري مسيرتن عليها )

اللى هم بنات افكار همس البراطم انتم خابرينها مروحتهن لى عشان اعبر وأبرد تسبدها فى مسابقتها

وانا اللى أمسك كل وحدتن منهن وأقضبها مكنسه

(ماتلاحظون ان الموضوع انقلب من معانات البنات إلى شجره السدره حقت اهل همس

بس لاتلومونى من حرررررر مااونس)

بس تدرون أن المعاناة الحقيقيه اللى نعانيها حنا يالبنات هى

إذا جاء أخوى عزيزفاقن خشته ويقول ولموا زنانه البر بروح اكشت مع خالى ولايهونون اخوياى

تخلخلت جنوط ددسنكم بلا:md:

ونروح حنا مغلوبين على امرنا نسنعها لهم عشان يوسعون صدروهم وحنا منطقين فى البيت


وفى ماأنا قاعدتن اولم الزنانه وأجمعها حبيت اعلمكم بسبب تسميتى ببياله

لأنى ياما تمنيت انى اكون بياله فى عزبه اخوى (kk)

والله انى صادزه تصدقون ان البيالات يكشتون اكثر منا ياالبنيات

شفتوا وشلون طلع تفكيرنا وخبالنا بسببكم انتم (q32)

وعااااااااااااااااااد تعالوا شوفونا فى نهايه كل ترم انواع التبتسبتس

<<جاها شد عضلى فى حنتسها من هالكلمه

يعنى انواع الصياح وضيقه الصدر(والله منيب اتذكر الا الشغالات إذا جو بيودعون اهلهم

وبيروحون للمطار)

كل وحدتن تودع صديقتها لانها خابره انها مهيب شايفتها الا فى بدايه السنه الجايه

مهوب مثلكم يالعيال

ألو فلان تعال ترانى عند فلان الفلانى وجب معك فلان لاننا معزومين عند فلان :cl:

يعنى بإختصار الشله كلها مجتمعه وهذا اللى يبط التسبد

كل واحد معه سيارته ومتى مااشتاق لاحدن من اخوياه مارده الا قلايع وادرين

وه وش اقول وش اخلى

هاه يسد ياهمس والا اظهر مافى جعبتى من حتسى

وهاتس بنات افكارتس قضيت منهن مااعجبنى حتسيهن واجد وكركرتهن واجده

(ماراحن بعيد منتس وفيتس)

وقبل مااطس شوفى ذولى (qq21)

امانه ياهمسسسسسسسسس من يذكرونتس به ؟

العقيد(نواف)
08-04-04, 02:57 AM
شباب ابيكم تحطوني هجوم ممكن
قرروا وردو علي
صدقوني راح اسجل اهداف بالكوم

همس الشفايف
08-04-04, 11:31 PM
بياله ههههههههههههههههههههههههههههههههههههههههههههههههه


وجع ان شالله

انا قايلتن عبروا عن معانات البنات مو عن اسبوع الشجره :p

ماغير مستلمتن شجرتنا وتسبين فيها

تراها منا وفينا انتي ووجهتس

وبعدين وش هالتعبير ياجعلي ارقص في عرستس>>>> عز الله خربتي عرسها:o

بردتي سبدي شوي بس ترى >>>> مايبرد سبدتس الا لسانتس اللي يلوط اذانتس :cl:

المهم البنات شكلهن بيفوزن صاروا 7/9

والشباب 2/9

العقيد نواف افزع لهم مايخالف

هذولا ماوراهم الا الضعوي :p

يالله هلموووووووووووووووووووووووو :eek:

أم أديم
09-04-04, 03:54 PM
:rolleyes:

همس الشفايف
10-04-04, 02:42 PM
>>>>>>>>>>>>>> مسكت الصفيره بتصفر معلنتن عن نهايه الجوله الاولى

لاحظت الردود توقفت بسبب السيول والامطار >>> اقول انتي تلعبين على عمرتس والا شلون :md:


قلت النتيجه واضحه البنات اكثر حماس واكثر فعاليه وردود :rolleyes:

ومهنا احد متحمس من الشهبان الا الحب الاول وشبيه الريح وهذي تحية لهم (a99)



بس ماعليه بنكمل التحدي مع ان التفاعل اللي ابيه ماحصلته (q36)

النتيجه (qq56)

الجوله الاولى البنات فازن (qq177)



الجوله الثانيه

مطلووووووووووووب من الفريقين ياقفون على الاطلال ويكونون لنا بيتين شعر على الاقل

بشرط يكون الشعر استفزازي للفريق المنافس (q6) >>>> ياحبتس للمقاحر (jdf)

واتمنى القى حماس اكثر والا ببطل(qq43)

بنت نجد
10-04-04, 03:02 PM
الحمد لله رب العالمين .. :)

مايجيبها إلا حريمهاااااااااااااااااااااااااااااااااا :rolleyes:

وياحبي لك ياهمووووووووووووووووووووسة :o

قال أقول تماسيح :p قم بس قم :o

بس ياعمري هموووسة ما أعرف أقول شعر :cl:

<---------- تقرأ وبس :eek:

بحاول .. وبرجع احطه هنا .. :p

بإذن الحي القيوم طبعاً ..

دمتم في حفظ الله

أختكم

بنت نجد[/align][/size][/font]

الحب الأول
10-04-04, 06:53 PM
أول من يشارك في الجولة الثانية نجمك المحبوب (الحب الأول) :rolleyes:

فريق التماسيح لا تفشلونا بالجوله الثانيه كل واحد فيكم يخلي قريحته الشعريه تهيج ويطلع اللي فقلبه ويحر فريئ الصبايا (الدروج):o


للصبايا( وانتي بالذات ياهمس الشفايف) (( يحارش البنوتات) اللي يحبون يسوون رجيم ومو قادرين


أبي أسوي رجيم والخطة بعقلي رنانه
عطوني فكرة فيها أطفي نيران شعلانه

الشحم زايد والكرش للأكل يفرز ألحانه
تعب حالي وما من بطن يخفي أطماعه

أبي ألبس الجينزات والثقة في نفسي مرتاحه
أبي أدخل الأسواق وألقى حق جسمي مقاسه

إشلون أقاوم الرز؟ واللحم تغري نسماته؟
الطعم من بعد أمتار تكوي في قلبي أطيابه

لا تلوموني يا ناس ،،، دام الجوع يرسملي بأقلامه
أسيح من رسمه وأنسى كانت للبال أحلامه

بقول الآآآآآآآآآآآآآخ لين تتحقق للروح أهدافه
أصير سمبتيكة والشكل يهدي للناس عبراته

مليت أشكي يا عالم وأحسد غـيري بصـفاته
أشوفه قدامي يتمخطر وما ألقى في نفسي قناعه

رحت النوادي والعيادات طالب على وزني شفاعه
لكن للأسف الورد مهما كبر وجف تبقى ألوانه

الرجيم ماهي كلمة تنقال وتسمعونها بكل بساطه
صدقوني فعلها أصعب من مسيحي يعلن إسلامه


الحب الأول

بنت عنيزه
10-04-04, 07:38 PM
شخـصاً يضـرك جعـل ربـي يشــله ... أصـعب شلـل يـكـون مـا يـوجد دواه

وألا برص يضفي على الجسم كله ... يبداء بوجهه ثم يمـشي على قفـاه

وألا مــرض طــاعــون حتــى يــغـله ... يـسمــع عــلاجـه مـن دون لـقــياه

ويـصـــاب بالــسكـر لـمـــا يــحــلــه ... حتى المشي بالرجل ما عاد يقواه






و
ش رايكم بالدعوه المعتبره

متعوب عليها

بنوته
10-04-04, 08:28 PM
انا جييييييييييييييييييت :o


الاولاد خسرانين من الاول لاتحاولون بس :p


ماعرفو يعبرون بكلام عادي كيف بيكتبون شعر كسلانيييييييين


اسمعي ياهمس واليسمع الفريق الخصم احم احم :eek:


أطلق لها السيف لا خوف ولا وجل ،،،، أطلق لها السيف وليشهد لها زحل
أطلق لها السيف قد جاش العدو لها ،،،، فليس يثنيه الا العاقل البـــطل
أسرج لها الخيل ولتطلق أعنتــها ،،،، كما تشاء فف أعرافها الأمـــل
دع الصواعق تدوي في الدجى حمماً ،،،، حتى يبان الهدى والظلم ينخــذل
وأشرق بوجه الديـاجي كلما عتمت ،،،، مشاعلاً حيث يعشى الخائر الخطل
وأقــدح زنادك وأبق النار لاهبة ،،،، يخافها الخاسئ المستعبد النــذل
أطلــق لها السيف جرده وباركه ،،،، ما فاز بالحق الا الحازم الرجـل
وأعــدد لها علماً في كل سارية ،،،، وأدع الى الله ان الجرح يندمـل

همس الشفايف
10-04-04, 09:17 PM
ستوووووووووووووووووووووووووووووب


وين وين

وش هالغش اللي انتم كاتبينه


مايصلح سذا يالدروووووج والدرجااااااااااااات :o >>>> تمون ( تمون والا بومبا هه هه هه ) :p


المهم مابيكم تلطشووووووووووون لي شعر

ابيكم انتم تشعرون من عند ريسانكم يامال اللي

ابي شعر استفزازي للفريق الثاني

يعني ترفعون ضغطهم

وابي الشعر من تأليفكم ونسج خيالكم >>>>>> خابرتن ان حدكم طائر النورس حلق حلق بس اخاف عندنا مواهب مدفونه وحنا ماندري :o

يالله الهمه الهمه


بنت عنيزه يمه وش هالدعات والله وقف شعر راسي من قوته :cl:

انتي اقرب وحده للمطلووووووووووووووب :rolleyes:

اما انت يالحب الاول تعاد لك الفرصه انت ويا بنوته (qq)

يالله الحين بروح اتعشى والقاكم كاتبين >>>>>>> تبي تقهر الحب الاول هو ويارجيمه :p

ننتظركم ومشكووووووووووورين على المتابعه :rolleyes:

الحب الأول
11-04-04, 08:11 AM
المحاولة الثانية يا أستاذه همس(d) عاد من تأليفي اقول اها بس عاد وخرو يالله ابكتب الشعر



ماني بالفوز قايل الله يهنيكم ..... بالجولة الثانية بتنحرمون من قمة هناكم
عسى العمى ياخاينين العهد يعميكم .... فوق الغرور اللي على (الشهبان) أعماكم
وعسى الهزيمة تغرد بدنياكم ...... وهمس الشفايف تشق الجيب من عظم بلواكم


الحب الأول :o

تحياتي لكم

همس الشفايف
11-04-04, 01:38 PM
ههههههههههههههههههههههههههههههههههههههه
هههههههههههههههههههههههههههههههههه


الحب الاول انت سذا :rolleyes:


بس وش دخلني يالخبل


انا الحكم موب المنافس(aqwa)



بس والله رهيبببببببببببه



وينكم يابنااااااااااااااااااات ردن عليه :o >> فيها عرق تكارنه تحب الطقاق :p

تــــــالا
12-04-04, 11:58 AM
آسفه يا همس أنا راوية شعر لكن لا أنظم الشعر

سكري
12-04-04, 12:06 PM
تــــــالا
مامنا كذا بالحله ذي
فريق اول يون انت بتنتهي المبارة وانا عجزت القاك من مدرج بمدرج (g)
والقهوة بردة والتمر شكلي خلصته بس مبقيلك كم تمره :o
اكيد انك منلفز لك بزاويه حاده
والا انك متلطم وعليك فروه ون زود الذهانه (tt)
غز اصبعك ولا ناد بطول صوت سكري بس لا يسمعك احد يحسبك تحرج :rolleyes:على تمر سكري ونعاد مقدر اشوفك من كثر اللي يحبون الشرفه
تدري لوحلي بالفروه ولا تدري لوح بالشماغ
المشكله(g)
لو اعرف رقم جوالك كان من امس وانا عندك بس انشاء الله ابلقاك(aqwa)

فريق أول
12-04-04, 01:25 PM
النص الأصلي مرسل من قبل سكري

فريق اول يون انت بتنتهي المبارة وانا عجزت القاك من مدرج بمدرج (g)
والقهوة بردة والتمر شكلي خلصته بس مبقيلك كم تمره :o
اكيد انك منلفز لك بزاويه حاده
والا انك متلطم وعليك فروه ون زود الذهانه (tt)
غز اصبعك ولا ناد بطول صوت سكري بس لا يسمعك احد يحسبك تحرج :rolleyes:على تمر سكري ونعاد مقدر اشوفك من كثر اللي يحبون الشرفه
تدري لوحلي بالفروه ولا تدري لوح بالشماغ
المشكله(g)
لو اعرف رقم جوالك كان من امس وانا عندك بس انشاء الله ابلقاك(aqwa)


تعال يا سكري

أنت اللي لابس فنيله علاقيه وشورت أخضر (aqwa)<< أما شورت اخضر هالحزه :o

هذاي اشوفك ... ارفع راسك ... هاه شفتني ؟(aqwa)


يالله تعال .. الله ياخذ هالوجه مابغيت تجي :o


سكري

قبل ما تجي .. ما تقيب بوسه ياله :o

العاشق
12-04-04, 01:44 PM
جاكم راعي المرسيدس

وانا مع الشباب

همس الشفايف
12-04-04, 02:48 PM
تالا مااااااااااايخالف حطي اي شي

اهم شي لا تستسلمين وانا اختس :rolleyes:


سكري وفريق اول


انا قلت شجعوا فيذاك موب فيذا ضيقتوا علينا :p


العاشق اصفط على جنب انت ومرسيدسك وشارك :rolleyes:


يالله تراها تعادل

الشباب واحد

والبنات واحد

نبي اي واحد من الفريقين يرجح فريقه:rolleyes:

موب لازم كلكم تشعرون لاني خابرتكم ماعندكم سالفه بالشعر

الحين اي واحد من الفريقين الحين يشارك يكسب الجوله (aqwa)

بنت عنيزه
12-04-04, 05:35 PM
أبصملك على العشـرة

الله ياخـذ هالكـشـرة

ابصملك على الخشـة

يامخنفش يابو كشـة

انت وراسك المفلـوق

والبرطم نصه مشقوق

تركض تقل انك ملحوق

ابصملك على العشـرة

نيابه عن البنات يا الله عااد هموسسسسسسسسسسه

همس الشفايف
12-04-04, 08:39 PM
هههههههههههههههههههههههههههههههههههههههههههههههههه
ههههههههههههههههههههههههههههههههههههههههه


حلووووووووووووووووووووووووووووه يابنت عنيزه

قسمن بالله انتس تبردين السبد:rolleyes:

المعاصر
12-04-04, 09:31 PM
انا وياااااااااااااااااااااااكم بس خلوني الاخير احسن
((((((الهمة شباب))))))

ههههههههههههههههه


مشكورة هموووووووووووووووووووسه

همس الشفايف
13-04-04, 02:07 PM
المعاصر حياك اقلط مهنا اجناب :o



بياله اوريتس ان ماجريتس مع قنازعتس ما اكون بنت ابوي (aqwa)


ردي جعلتس الحروال :md:


والباقين بعد يردون بس موب ياجعلهم الحروال :p

بياله
14-04-04, 03:19 AM
( بياله اوريتس ان ماجريتس مع قنازعتس ما اكون بنت ابوي

ردي جعلتس الحروال )

أقول ردتس الدعيع مع براطمتس :md:

بس خلينى ألتقط انفاسى لقط خشمتس قطون مايشوف

ولا تتعبين عميرتس وانا بنت عمتس حنا اللى بنفوز ان شاء الله

احمممممم خل اتكحكح واتنحنح وأعطيتس ذيك القصيده


أول مانبدا بسم الله *** ووجيه الخير نحييها

وثانى مانبدا بهالشله *** اللى بوريكم فيها

روحوا ترى كلن يشهد *** ان هاالجوله كسبانينن فيها (qq22)

كلن يجى يسجل اسمه *** ومهنا احدن منكم راعيها

طبعكم طبع النحشه *** والا التحديات مالكم فيها

اهلا هلا ياشلتنا *** اللى الملح والله كاسيها

وعلى راسنا هموستنا *** اللى العيب معديها <<تتليوق لهمس

ماأشعرت الا ببرد تسبدتس *** بس انتى ازهليها

واخر ماننهى به جولتنا *** عطونى العجرا أحميكم فيها

(q44)


وسلالالالالالالالالالالالالامتكم:o

شراع
14-04-04, 04:28 AM
هذاي جيت ياأم براطم أنتي وسحاليس,والله لأهج بكن هجة وتشوفن وش يقول شروعي .
عاد أنت وياوه لاتفشلوننا وكملوا خن نهزم هالسحالي .
ياأم البراطم والله ماهقيناك***هذي سواتس وشراع غايـــب
وبيالة أنكسرت والكل شافك***لاتحرفين الهرج يأم المصايب
وبنوته الله يشغلس بدنياك***نعنبو رجل يرد الطلايـــــــــــب
تحيات شراع

شراع
14-04-04, 04:36 AM
وتراي ياأم براطم أتحداتس أنتي والسحالي كلهن ,ترى شراع يساوي عشر منكن يامال اللي .
عاد لاتزعلن تراى صادز.

تحيات شراع.

همس الشفايف
14-04-04, 02:47 PM
بياله ههههههههههههههههههههههههههههههههههههههه يابعدي والله

والله منتي سهله تشعرين يام كشه

كني اشوفتس عند بياره بيتكم الطافحه ترمين حصى ينقالتس على الاطلال الحين :o

بسسسسسسسسس والله شعرتس سذا :rolleyes: >>> موب شعرتس يعني شوشتس قصدي قصيدتس يعني لاتفرحين قوه :p


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ
شراع :p
ههههههههههههههههههههههههههههههههههههههههههههههه
هههههههههههههههههههههههههههههههه

والله ضحكتني وانا متربعه :o

اقول يالاشهب تراني الحكم وساكته لاتتحداني وتخليني اصير معهم وافجر مافي جعبتي من قصيد واقلبها مضارب الباديه فيذا :o

ومير بردك عليك على شان ماتتحداني مرتن ثانيه (aqwa) >>>>> ودها تشعر بس مالقت لها عذر


فزعتك ياشراع لهالشهبان والله ماتفيد ***** جيتك وغيابك كلهن واحد:p

لانك وياهم في الشعر جايبين العيد ***** مدري شايفين نفسكم مثل الشاعر مساعد:p

لا تتحداني احسن لك وخلك ابعيد ****** لاني الحكم والحكم لازم يكون راكد:o

يالله يابنات ردو عليه بالقصيد ******* وخلوه بشعركن للامل فاااااقد :rolleyes:

ياااااااااااااااااهوه والله اني شي :o

هاه رديت ياشراع .... قل الحين وش عندك :p

البنات الحين رد منهم بياله وبنت عنيزه بقصيدتين يامال العافيه :rolleyes:
والشباب رد منهم الحب الاول واشراع بس :p

وانا قصيدتي تعتبر فاصل اعلاني بس :o


يالله فيه احد بيشارك والا نحسم الجوله (aqwa)

nono 92
14-04-04, 02:57 PM
انا احيي البنات لأني بنت
واسمعو
حبي لك اعمق من اليم
وفراقك صار يجري في دمي مثل السم
لاتغيب ترى صار عندي سكر في الدم
وقلبي مملوء بالهم
وسبح فكري في بحر الغم
وشلون تتحمل روحي كل هل الكم؟؟


هذا من تأليفي شرايكم؟؟
عمري 12
زين او لا:o:o:o
بااااااااااااااااااااااااااااااااااااااااااااااااا اااااي

همس الشفايف
15-04-04, 04:47 PM
موب كنك ياشراع هجيت :p

عكرة ضب
18-04-04, 09:49 AM
قريت الموضوع وجيت رررركض !!!

مهوب شطاره فيني ..
بلاي ملحوق !

ددسن ,, الله لا يبارك فيه ولا في اللي يسوقه !!!

خبركم الصيف بدا ,, يعني موسم صيد الضبّان ..
بس قدرت اضيّعهم ..

دخلت جحر جربوع .. ويوم قربوا قلت ( ميااااو ) !
وضاعت علومهم ..
ما يدرون هو جربوع او ضب او بسّه !!



ما علينا ..
انا عضو جديد .. وتوني جاي من الصمّان

مدري التماسيح ما ودهم يشاركهم اخوهم الصغير ( الضب) ؟؟؟

والا ارجع لجحري ابرك !!!!

همس الشفايف
18-04-04, 07:54 PM
يالله حي الضبااااااااااان كلهم

الا والله شارك ....

وان رجعت لجحرك ترى والله بالشكمان على طول :p

سكري
19-04-04, 03:32 PM
همس الشفايف وش يدريك عن الشكامين والضبان
والله لا علم عليك ابو زنده
قال شكمان قال
اسمع يا همس االشفايف ( براطم )
انا مبصم على العشره فوزكن يالشبابات
بس مباره من طرف واحد مايصير
تدرين ودي اقترح عليك
تسوين رديه بين العيال والبنات وتبي تشوفين الاعضاء مالهم سيرة الا ههمش السفايف
ومنتداها
وبكيفك مجرد اقتراح لا اكثر والا اقل

فريق أول
19-04-04, 03:37 PM
8
8

وين القهوه :(

همس الشفايف
19-04-04, 08:45 PM
سكري :o

والله مدري وش انت تقصد :cl:

ماعليش ترى بعض الاحيان اتنح واصير كني تنكة :eek:

انت قصدك اني احط مراد بالشعر بين الشباب والبنات (tt)

انتسان قصدك سذا ترى هذا اللي انا مسويته بس محد عطاني وجه (kk)

والا انا ودي احد يتفاعل مع الموضوع لانه مرره حماسي

بس الاعضاء الله يهديهم عجازين يقصدون كني اطر القصيد منهم طراره (tt) >>> استلمتهم وطبت فيهم طبه :p

واقتراح على عيني وراسي

وبعدين انت اولهم ورى ماتشارك يامال اللي (aqwa)

انتظر توضيحك وماقصرت :rolleyes:

سكري
20-04-04, 12:06 AM
فريق اول انا ايه اللي مكمل بفنيلة علاقية برتقاليه وبالماريه هدية من صديق عزيز
وين انت اثرك شايفني ومتخبي والا الشوف لك عليه
وابشر القهوة والمه
واللي ابرك منها كبسة دخيخلات تعال انت بس
تراني ماعاد اخظر بالمدرجات مدري ادورك ولا اتفرج على اصحاب القصات العجيبه الغريبه الكبريا والفرنسية واللي مدري وشي
وغيرها كثير
المهم الذنب ذنبهم اشغلوني عنك
واصبر ابجي

همس اختي او؟؟
نعم اقتراحي رديه بين البنات والعيال على شان نسهلها ماهو لازم التقيد بالقافية
على شان الكل يشارك
زين اختي
امفروض توضفيني استشاري من الدرجه الاولى عنكم بالمنتدى حق السواليف ولافصفص
الا على فكره ليه متغيرينه منتدى السواليف والفصفص والله انه اسم مسكت ولا فيصليه
(اقول هها بس سكري اعقل طيب)
زين اختي

همس الشفايف
20-04-04, 01:31 PM
سكري ماقصرت والله

بس وين التفاعل

اشوف الاعضاء كل يوم عن يوم تقل مشاركاتهم (kk)

عساه خير بس (tt)

ام جيهان
20-04-04, 03:24 PM
:rolleyes::rolleyes::poهلا عمري همس الشفايف ..
اقبل اكون من ضمن لاعبين الدفاع
اختك ام جيهان:p

همس الشفايف
20-04-04, 05:35 PM
هلاااااااا والله ام جهان

يالله ان تحييها

وامسكي الدفاع وانا اختس

تراتس قدها واقدور :rolleyes:

حلاة الكون
21-04-04, 07:53 AM
عساه مافتني شي ؟؟؟
<<<من امس نايمة الساعة 8 الى هالحين ثمان الا عشر :o

تهقون فاتني شي والا مافاتني شي :rolleyes:

<<<تحلفون بالإبتدائي تنام بدري عشان المدرسة :o

ودي اغيب بي نوم ماشبعت :cl:

جاسم الجاسم
21-04-04, 11:08 PM
ابي العب جاااااااااااااااي متاخر توي صاحي اههاهاهااه تروني ذكي

أم أديم
21-04-04, 11:56 PM
(q36) نسيت التحدي

الا وش الاخبار هنا و ش صار عليكم

يا ام القطايف :p

همس الشفايف
22-04-04, 05:22 AM
جاسم :o

حياك اخوي:rolleyes:

قصيميه (tt)

والله مااااااااااش الوضع موب زين

الاعضاء مدري وش فيهم هالايام ماجازوا لي (kk)

عكرة ضب
23-04-04, 12:22 AM
يالله حي التماسيح .. (qq165)

والبنات لا !

لا ما نسينا التحدي ..

الوقت اللي راح قاعدين نتدرب

(q17)


يمكن طوّلنا شوي .. لكن مثل ما يقولون : الجود من الماجود .. واللي في الدزدر يطلعه الملاس !!!

يمكن الجماعه واجهتهم بعض الصعوبات في تنفيذ الطلب ..

لكن التماسيح يجيدون التصرف في الازمات الحاده . (q16)

ما اطول عليكم ..

هذي مشاركتي ,, وتراني مستحي من الجميع لاني جديد معكم ..
يعني ما طلّعت اللي في خاطري كله !

يقولون .. يا غريب خلّك اديب !!
لكن اوعدكم بالمزيد متى ما صار فيه مناسبه ..

سمّوووووا .. واستلمووووووا ..

يقول العكره :


شمسنا غنّت .. ونجوم المجرّه ........ولَعْلع القمري على جال الغدير

والقمر يزفن وصوت(ن) له يجرّه ..... يومه اقبل (عكرة الضب) الخطير

جا من الصمان بكل خيره وشره ...... فزعة(ن) لعيال عمّ(ن) تستجير (qq37)

شقّ ثوبك يا ولد والجيب طرّه ....... التماسيح مغلوبه ؟؟!! (a) ما يصيـر !!

هَقْوتي راحة محارب ،، ما تضره .... يرسم الافكار ثم يبدا المسير

ولو تفــوز البنــت ألفييين مرّه ..... في النهايــه قلبهــا بِيـده أسـيـــر

ناقصه بالدين والعقل يتشرّه (q38) ..... قالها ( طَـهَ ) .. وحي(ن) من خبير

سلطة الرجال دايم مستمره ..... يسمعنَّه لو غدا شيخ(ن) ضرير

مبعد الاحزان .. جلاّب المسرّه ... قايد بطبعه من يومه صغير

والنتيجه للتماسيح مستقره ..... لو توَقِّع (هَمْسـهن) والاّ تطير(qq22)

وسلامة التماسيح ..

ماس
23-04-04, 01:25 AM
ما تبون حكم ؟؟؟ تراني محايد جدااااا والدليل دليلي احتار وحيرني

همس الشفايف
23-04-04, 04:21 PM
عكره ضب هههههههههههههههههههههههههههههههههههههههههه

والله منتب هين ....بس والله شعرك سذا :rolleyes:


والحين هذا شعرك وانت مستحي منا (tt) وطابن فينا طب

مير اوريك تراني بفزع مع البنيات وماعلي منكم :eek: >>>>>> مااااااش منتيب راعيه تحكيم انتي

يالله هذي لكم انتم يالتمااااااسيح ولا يهونون عكرات الضبان :p


انشدك عن ضب(ن) جاي(ن) من الصمان ....... طالع (ن) من جحره يوم ذبحه الشكمان:p

وناسف(ن) عكرته وجاي لمنتدى القصمان ...ومشمر(ن) عن كمومه وبفزعته فرحان :o

ويقول ان البنات في دينهن وعقلهن نقصااااااان....مادرى ان اللي قالها ماقالها فينا حقران(tt)

قالها لان من طبعهن العطف والحنان ..... وانتم تحاولون تفهمونها غلط يالشهبان (d)

مير ماعلينا منكم قولوا الين يعجز هاللسان ... وعلى قولتهم الحقران يقطع المصران :p

ومن الحين اقول لك تراك خسران ...... لانكم كلكم يالتماسيح خوافين وذرقان :p

يالله يا بنات خلوه لتحديكن ندمااان ....... وردوا عليه بالقصيد اللي نرفع به هالريساان:rolleyes:

أستاذ قلق
29-06-07, 09:21 PM
وهـ بس من ها السحالي