المساعد الشخصي الرقمي

مشاهدة النسخة كاملة : اكثرها بالقصيم ..


مخزخز
28-09-20, 04:44 PM
قرأت لي خبر من وزارة التجاره
ان تصاريح فتح محلات كفي (القهوه) بلغت 30%
الرقم عالي جدا جدا ..صارت اكثر من المطاعم .
والصراحه اني بسوي دراسه عن هذا الامر ..
محلات الكفي كاثرة هاليومين مدري هو خرمه او مزاج
مزاج الشعب متعكر مايزبط الا بكوب قوه ب 35ريال ..
من منكم يمسك سرا عند ستار بكس علشان هالكاس ..
الصراحه انا اول من رواد ستار بكس لكن مافيه زحمه
مثل الزحمه هالايام .. انا مدري الناس كثرت او خرمت قهوه .


انتم وشرايكم في الكافيهات ؟؟

مخزخز
28-09-20, 04:45 PM
يقال ان اصل التجاره والافكار التجارية
في القصيم .

مخزخز
28-09-20, 04:46 PM
ان كنت تحتاج الى نجاح تجارتك وفكرتك التجاريه شارك قصيمي .

الميسم
28-09-20, 04:53 PM
هذي طفرة من الطفرات اللي يهبون فيها العالم ثم تُصبح نسيًا منسيا

وبرضو للتصوير ومشاهير السنابات دور كبييير


وللأسف الشديد أن هذا نوع من أنواع التبعية لكن الناس تتغاضى أو أنها تجهل ذلك

ترى سهل تخدير العقول بمجرد التكرار ترسخ الفكرة في العقل الباطن وخلااص يصدقها صاحبها ويؤمن فيها

والدليل إذا سألته ليه تحب القهوه أو ليه تقاتل عشانها ماعنده إجابه

إلا إني رأيتهم يفعلون

لحد يقول تبالغون وعظمتوا الامر ووووو

لالا والله هذا الحاصل

حتى آلة القهوةوبأشكالها وأنواعها متواجدة تقريبًا في كل بيت ومع ذلك يطلبون !

أنا من شفت مره طابور وش طوله كله رجال كبار بشمغهم وعقلهم صافين عند كوفي

عرفت وجزمت ان الدعوه فيها تخدير للعقول





طيب ليه الشاهي صاير مثل اليتيم محد جاب خبره ؟


الجواب

لأنه مايعطي مجال في التشكييل والتزيين والتفنن الشاهي هو الشاهي لو جبته شمال او جبته يمين 😅

غريب الماضي
28-09-20, 05:03 PM
موضة لاتلبث الا قليلا وتخبو وتتلاشى

إرتكاز
28-09-20, 05:35 PM
من بعد الضريبه

اصبح الكثير من الناس يشتري مكونات القهوه من الهايبر ماركت
ويصنع افضل قهوه بالمنزل.

افضل جهاز لصنع القهوه في السوق لاتتجاوز قبمته الفين ريال

وافضل نوع من القهوه لايكلفك في البيت اكثر من ثلاثة ريالات



لاحظ الفرق وبطل غفله استغلها الجشعوون .

كلمااات
28-09-20, 06:31 PM
محلات القهوة كثييييييره والناجح منها ينعد على الاصابع
مافيه توجيه صحيح كل من معه كم قرش فتح له كوفي
يبدعون في الديكور يتجاهلون الطعم الحقيقي للقهوة
الشغلة تجاريه بحته

طُهـر
28-09-20, 06:40 PM
-



والله لا النآس كثرانه ولا هي سالفة خرمة قهوَة ،
العالم طآحت فـ التصاويّر والسناباتْ والخرآبيّط هذيّ ،



ماليّ فيّها من فضل ربيّ ،
أخر مرَة غيّرت فيّها عن (قهوتنا الزنجبيّل)
كانت العام لما أخذنا عمره طلب لنا أخوي وجلس يقول لنا قائمة والله ما أذكر منها اي إسم ،
ولانه (لزّم عليّنا) كل وحده تذكر طلَبها ،
ومن بابْ (وجهٍ تعرّفه ولا وجهٍ تنكره)
طلبت (كابتشينوّ) يوم مرنيّ إسمه :)

لكِن والله إننيّ أتعجب بشكلْ لا يُوصف من الليّ يجلسن في الكافيّهات المفتوحه في بعض الموُلات !!!!!

مدري ويّن المُتعه فيّه !؟
طيّب روحيّ كافيّ نسائيّ مُغلق وإستمتعيّ في قهوتك !!
إطلبيّها وإنتيّ طالعه وتقهويّها بالبيت
ليّش لازم رِجل على رِجل والليّ مايشتريّ يتفرجْ !؟



الله يعافيّنا بس ...

الــــدانة
28-09-20, 06:46 PM
عاد على كثرهن بالقصيم ما رحت لمهن :)
إلا إذا كان كوفي نسائي فالمقصد مقابلة الصديقات وليس القهوة نفسها


إذا حسيت محتاجة كوفي وأنا بالمول طلبته سفري ما أجلس جوا الكوفي

طُهـر
28-09-20, 06:52 PM
-


على طاريّ القصيّم وقهاويّها ،

شصار على الرقيّبة ونقّده للقهوَة ،
سمعت إنه ناقدٍ الأساميّ المعروّفه بالسوّق

ياماااال الْليّ يا (علوّش بن ظويّهر) على غفلَة :)




ماباقيّ إلا هالكذوّب يتنقد القهاويّ ...

سليمان١٣
28-09-20, 07:19 PM
اعتقد انها هبة وموضة فترة وتخفت لان الجو اساسا عندنا مايساعد

لما تسافر فكل مكان تلاقي ستار بكس والشركة الثانية المشهوره ناسي اسمها

الجو هناك يساعد والحياة حلوة ومافيه نفسن ثقيلة الا ان كان ثقالة وزن

ترتشف لك كوب من القهوة وتفطر من الكورسونات احب الجبن بالدجاج مع الخس والصلصة البيضاء اعتقد جبنه بيضا وكزبرزه

فيه محل كان يسويه مستحيل امر المدينه هذيك وما افطر فيه

انا تعجبني السندوتشات السمراء ام نخالة وحبوب كذا استمخ عليها

الكوفي ماكنت من عشاقها بس جد لما تكون منهك من اللفلفة تحس انها تديك طاقة جديدة واستكنان وهدوء

بعدها صرت اهتم بس مستحيل اقف في صفوف عشانها ولا عشان غيرها

ثلاث اشياء اكرها

السرا والحلاق واطالة الاستحمام

تشعر انه وقت مهدر من عمرك

المهم هذي هبة وما اعتقد انها بطول لان اساسا مافيه عقول عشان تتكيف

اغلبهن حريم يحبن الاستشراف وشبان لديهم موهبة الترقيم

الزنقب
28-09-20, 07:53 PM
يقال ان اصل التجاره والافكار التجارية
في القصيم .

صحيح ها الكلام رجل دين ودنيا
اهلنا علمنا على كلمتين
قم صل
قم ترزق الله
تعودنا على الصلاة .. وعلى العمل ونحن صغار
انا وعمري ست سنوات كنت ابيع في سوق الحضار واحمل على العربيه
واجمع الريال على الريال حتى حصلت سيكل
ثم جمعت الريال على الريال حتى شريت سيارة من عرق جبيني ما دفع فيها الوالد ولا قرش

فيه نماذج قصمان لكنهم مولودين وفي افوههم ملعقه من ذهب
اكثرهم ما تعلموا من ابائهم يدرسون واكثر جلوسهم مع امهاتهم فأخذوا سلوم وعادت النساء
ما تعلموا المرجله وهم صغار

الزنقب
28-09-20, 07:55 PM
ان كنت تحتاج الى نجاح تجارتك وفكرتك التجاريه شارك قصيمي .

لكن شارك القصمي ووضح من البداية الي لك والي عليك
لا تركن الى الشراكه بدون توثيق
اهلنا يقولون قدر الشراكه ما يفوح
هناك مشاكل كثيره في الشراكه بين القصمان وغيرهم
علمونا اهلنا مبدأ
دقق الحساب تصفي الموده
هذه الحكمه نقولها اذا طلعنا للبر وكانت قطيه
ونقولها في البيع والشراء
مافي ياما ارحميني ..

سليمان١٣
28-09-20, 08:11 PM
بالنسبة للاسعار انا اشوف انه بيبيعك مع الكوب مكان تجلس فيه لوقت محدد
طبعا هم ماجرينه ومصممينه بملبغ وقدره لذلك ماتستغرب السعر ولو غلا

وف النهاية لك مطلق الحرية بالشراء من عدمه

ملاحظة انا لما ادفع 15 ريال ع كوفي جيبي احسه يتالم

مو بخل لكن احس ان الشغلة فيها اهدار كبير للمال لو اشتريت بعشرة منها كرتون ماء بارد وتصدقت به ع العمال اللي ف الشوارع
خراجه ع نفسك بيكون اعظم واجمل من الف كوب من اكواب ستار بوكس وغيرها من الكوفيهات

طبعا هذي وجهة نظري للحياة بشكل عام

الكماليات لا تفرط فيها واحفظ قرشك الابيض ليومك الاسود ولو مافيه اسود ان شاء الله فاستثمر في اخرتك قد مااستطعت لذلك سبيلا .

عساس الحيا
29-09-20, 01:27 AM
انا اضبط لنفسي كوفي افضل من الكفهات
اصبع كفي قيمته ريالين يسوي لي ثلاث اكواب
علبة حليب متوسطه تكفي خمس اكواب مع ملعقة سكر

اول شيء تسخن حليب ثم تضع اقل من ربع الكوب بالكوب ووتضع عليه مسحوق الكفي شيء بسيط ملعقه ثم تحركه دقيقتين ثم تزيد نص الكوب وتضع المسحوق الذي تريد ثم تحركه دقيقتين
ثم تملأ الكوب وتحركه وبالهناء والعافيه

عساس الحيا
29-09-20, 01:33 AM
وجبة هبرجر من المطعم اقل شيء 20
واضرب 20وجبة في عشر اشخاص »تكلفك 200 ريال

لو شريت جميع اغراض وجبة البرجر من السوبر ماركت ماتكلفك 40 ريال
وتسد 15 شخص
جملة البرجر كيسة فيها 15 حبة 25 ريال

كيسة بطاطس مجمد تكفي 15شخص قيمتها 12ريال
مربعات الجبن 5 ريال
خس وطماط وبصل خمس ريال

وسلامتكم

روعة ملاكـ
29-09-20, 08:26 AM
ماتذكر اني مسكت طابور عشان اي نوع قهوه<< ولو اشوف المكان طابور ومزدحم مادخله
الا على قهوه 1/2mعلي الخط السريع
هذي انا اقول ادمنتها <<
ليه لانها تسليه طريق خاصه اذا صار معها مطرب يطرب مسامعك انت هنا جوك 10/10


الباقي ماعتبره ادمان كثر ماستمتع فيه
بحلاوه الجليس وروعه المكان والحديث
<< اخرج للجلوس بالكوفي عشان اسولف مع من احب واسعد نفسي واغير جوى
واغير مكان تناول قهوتي عن تناولها بالبيت <<


منذ قديم الزمان والناس بتقهون برا بيوتهم
بالبر والحدايق والمنتزهات بالشاليهات
الكوفي مكان مثل اماكن قديم الزمان

سليمان١٣
29-09-20, 11:45 AM
وجبة هبرجر من المطعم اقل شيء 20
واضرب 20وجبة في عشر اشخاص »تكلفك 200 ريال

لو شريت جميع اغراض وجبة البرجر من السوبر ماركت ماتكلفك 40 ريال
وتسد 15 شخص
جملة البرجر كيسة فيها 15 حبة 25 ريال

كيسة بطاطس مجمد تكفي 15شخص قيمتها 12ريال
مربعات الجبن 5 ريال
خس وطماط وبصل خمس ريال

وسلامتكم

كملها 25 وخذ لك لحم بقري طازج ومفروم وانت اعمل البرجر في بيتك وبالنكهة اللي تحبها

بس انتبه لا تروح تشتري من بنده وتقول طازج يمي يمي تراه برازيلي شوفه في اكياس معروض عندهم يجيك لونه مسود واخضر تقول ذنبة بزر توه والد


البرجر المجمد نوعية رديئة جدا من اللحوم ومليان بالمواد الحافظة والمنكهات وماياكل منه الا الجاهل او الكسلان

المتحد
29-09-20, 02:33 PM
الناس صحت وصارت تموت بالقهوة بانواعها وخذ لك مجاكر
ماتلاحظون اشغلونا 😣
.

الشيخـــــه شجـــــون
29-09-20, 10:18 PM
ستاربكس مره وحده في حياتي اشتريته من مول لي مول ايامها قبل يتحول مطاعم من كم سنه

ماشفت له ميزه صراحه

اللي مايحب الاستعراض والتصوير مرتاح من كل هالخرابيط المستجده

... بنت الجنوب ...
01-10-20, 02:29 AM
...

تجي أعزمك ع البآقي من عمري في كوفي مُر ؟

..

مجرد مشآركه
.

عساس الحيا
01-10-20, 03:50 AM
^
^
وين تغطسين يابنت الجنوب
احسك شبه مشهوره او طباخه مشهوره

اذكر قبل سنه دخلت وحده بقسم السوالف قالت مافيه احد منكم طلع مشهور
شكلها من المشاهير وماتبي تقول اسمها

عساس الحيا
01-10-20, 03:51 AM
كملها 25 وخذ لك لحم بقري طازج ومفروم وانت اعمل البرجر في بيتك وبالنكهة اللي تحبها

بس انتبه لا تروح تشتري من بنده وتقول طازج يمي يمي تراه برازيلي شوفه في اكياس معروض عندهم يجيك لونه مسود واخضر تقول ذنبة بزر توه والد


البرجر المجمد نوعية رديئة جدا من اللحوم ومليان بالمواد الحافظة والمنكهات وماياكل منه الا الجاهل او الكسلان

لا فيه شركة سعودية برجر دجاج ولحم غنم طازه ورخيص بعد

... بنت الجنوب ...
01-10-20, 04:08 AM
http://www.qassimy.com/vb/images/misc/quotes/quot-top-left.gifاقتباس:http://www.qassimy.com/vb/images/misc/quotes/quot-top-right.gifhttp://www.qassimy.com/vb/images/misc/quotes/quot-by-left.gifالمشاركة الأصلية كتبت بواسطة عساس الحيا http://www.qassimy.com/vb/images/buttons/viewpost.gif (http://www.qassimy.com/vb/showthread.php?p=12463293#post12463293) http://www.qassimy.com/vb/images/misc/quotes/quot-by-right.gifhttp://www.qassimy.com/vb/images/misc/quotes/quot-top-right-10.gif ^
^
وين تغطسين يابنت الجنوب
احسك شبه مشهوره او طباخه مشهوره

اذكر قبل سنه دخلت وحده بقسم السوالف قالت مافيه احد منكم طلع مشهور
شكلها من المشاهير وماتبي تقول اسمها
http://www.qassimy.com/vb/images/misc/quotes/quot-bot-left.gifhttp://www.qassimy.com/vb/images/misc/quotes/quot-bot-right.gif





الله يسعدك يـ عسآس

أنآ لو بغيت أكون مشهوره
بشتهر
يعني إللي أشتهروآ ع أيش يـ حسره
لكن م أحب الأضوآء (q39)

.