المساعد الشخصي الرقمي

مشاهدة النسخة كاملة : ضاوي .. والدفرنشين .. والعراوي..


خلي البال
26-04-06, 12:39 AM
مساكم الله بالخير ..

هذاك اليوم وانا مسير عند واحد من ربعي والصراحة ان جلسته أبد ما تنمل يعني مسولفجي مثل ما يقولون.. ما يمديك تقعد معاه الا والسالفة جاهزه .. وتراه بعد شاعر وموهوب في الشيلات المهم مالكم بالطويلة.. تتعب وانت تمدحه .. تقهوينا وعينا من الله خير.. وقال اسمع هالسالفه..
من زمان كان واحد من الشيبان الله يرحمه حي ولا ميت..عنده غنم ماشاء الله وذاك الوقت حاطٍ لها حوش في البر تخبرون يشغل وقته ووسع صدره... يطلع لها كل يومين ثلاثه يتفقدها ويشوف الراعي ويتطمن على الحلال.. ثم ينكس للديره عند اهله معاه له وانيت فورد دفرنشين اللي حوضها طويل وسياره بعد ما يحتاج تخبرون قويه وان بغيتها على الزفلت ولا في بر حطها على يمناك وأبد ما تخيب ظنًك... الشايب الله يجزاه خير مبسوط ومرتاح وما هو شايل هم طعس ولا غراز سيارة مقضيه جميع أموره وقايمه بالواجب واكثر.. ما أطوًل عليكم.. هالشايب كان له ولد اسمه ضاوي يعني عمره تعطيه بهاالثمنطاعش .. او تسعطاعش .. حولها.. من بد اخوانه هو اللي دايم مع الشايب يروح ويجي معاه .. يساعد أبوه ويريحه.. يوسع صدره.. واحيانا يسوق عنه .. والله ومره وهم رايحين للغنم لاحظ الشايب ان ولده ضاوي ضايقٍ صدره سرحان ويفكر.. وماهو يمه أبد.. فسأله الشايب وش اشفيك يا ولدي عسى ماشر وش مكدر خاطرك وانا أبوك.. قال ضاوي وهو متردد يايبه بصراحه انا ودي أكلمك بماضوع من زمان واخاف انك تزعل علي.. قال أبوه أفا عليك يا ولدي قل وانا ابوك ..رد ضاوي بصراحه يايبه ونيتك هذا صار قديم وكسر ظهورنا من كثر المناقز.. وانا اشور عليك كانك تسمع شور ولدك نبيعه ..سكت الشايب وسرح شوي بتفكيره.. خبركم الشيبان اذا شرا سياره والله ما يبيعها لوتقوم القيامه.. قال بس ياولدي هالونيت مقضي امورنا ومابه خلاف وشووله نبيعه يا ولدي.. طبعا ضاوي حاط براسه يبي ددسن(عراوي) وامنية عمره يكون عنده ددسن.. يبي يكشخ مثل ربعه ويفرفر بهالشوارع.. فعلى طول قام يقنع الشايب يايبه نبيع وانيت الفورد ونطق لنا عراوي جديده وترى والله يبه انهم يمدحون العراوي ويقولون عنها قويه .. ونقدر نحمل عليها الغنم والعلف... ويقولون.. ويقولون.. وهات يا مدح بالعرواي لين اقتنع الشايب..وقرر انه يبيع الفورد الدفرنشين ويشتري بداله العراوي.. يا فرحتك يا ضاوي منهو قدك.. وذاك الوقت كانت الددسن عند الشباب أحسن سيارة .. يعني مثل الشبح والفياغرا واللنكون بزمنا هذا..
مالكم بالطويلة.. باعو الدفرنشين وشروالعراوي من الوكاله بقراطيسها.. ضاوي الدنيا ماهي سايعته من الفرحه..طول النهار مقابل الددسن ينظفها ويلمع كفراتها وكاشخ على عيال الحاره.. اي والله منهو قده.. المهم في يوم من الأيام قال له أبوه يله يا ولدي قم شغل عراويك ترى اليوم شريت لي تيس ونبي نوديه للحوش ونتطمن على الحلال.. قام ضاوي وتقول ماله نفس بالروحه كلها.. تعرفون ليش..وحمل التيس بالحوض وشغل الددسن وركب معاه أبوه وتوكلو على الله .. يوم قربوا على حوشهم ونزلو عن الزفلت.. وفرقو للبر الا يوم الددسن غدا لها حنًه.. وشوي الا هاك الطعس ويلقمها ضاوي بثاني.. وطبي يالعراوي بوسط الطعس وغرزي.. حاول ضاوي يطلعها ما قدر الرمل وصل للصدام الخلفي.. ولا حولهم أحد يساعدهم..هاه الشايب الحين بس عرف ان الددسن من جنبها ومافيها خير وتذكر كيف كان أيام الدفرنشين يقص الطعس قص وما يهمه شي.. فجلس على الطعس وقال هالبيتين :

لعنبوا ذا الخشه يا وارد عراوي
كيف غرزتي وتوك جديده
الحموله تيس والسواق ضاوي
والبلى من ضاوي الله لا يعيده

وسلامتكم ومعذره على الأطاله والحقيقه القصه قديمه يمكن بعضكم سمعها من أول
أعجبتني وحبيت أسولفها للي ما يعرفها... مع السلامه..

النجديه
26-04-06, 02:03 AM
يبي ددسن(عراوي) وامنية عمره يكون عنده ددسن

الطموح مقطع بعضه عند ضاوي ههههههههههههه

تسلم يديك يا خوي على هالقصه الرائعه

وتسلم على هالمشاركات المميزه والمستمره

يعطيك العافيه ياخوي

واحنا في انتظار جديدك القادم

صافية الجبين
26-04-06, 09:55 AM
تسلم يمينك خلي ...

من زمان وخاطري اعرف شله قيلت ... (( لعنبوا ذا الخشه يا وارد عراوي كيف غرزتي وتوك جديده))

ماء الورد
27-04-06, 02:11 PM
يمسيك بالنور والسرور يا خلي البال

تسلم يدك

روعة القصة والشلة

لعنبوا ذا الخشه يا وارد عراوي
كيف غرزتي وتوك جديده
الحموله تيس والسواق ضاوي
والبلى من ضاوي الله لا يعيده

يعطيك العافية

خلي البال
27-04-06, 10:52 PM
تسلمين أختي النجدية.. يعطيكِ الصحة والعافية..
أخوي خرنوب حاظرين يالغالي.. وشكرا لك..
أختي ماء الورد.. تسلمين ان شاء الله .. مشكورة ..

المهاجر
02-07-06, 06:13 PM
الله يعطيك العافية