المساعد الشخصي الرقمي

مشاهدة النسخة كاملة : تم فوز القصه الثالثة بجداره ( الريح تنقل الرسالة )


النجديه
19-03-06, 01:26 AM
السلام عليكم ورحمة الله وبركاتة ..

تم بحمد الله فرز صناديق الاقتراع وحصلت القصة الثالثة على اكبر عدد من الأصوات بينما القصة الأولى حصلت على

صوتين أو ثلاثة والقصة الثانية توحيكم محد جاب خبرها هههههههههههه . (a21)

القصة الثالثة ( الريح تنقل الرسالة )

يقول الراوي يا ساده يا كرام
7
7
7
7


هالشاعر اللي ابتكلم عنه هذا من الشعراء الأعلام البارزين المعروفين بمنطقة الإحساء اسمه محمد بن مسلم يرجحون

الرواة ان وفاته كانت عام 1280 هـ , كان يعشق أو يحب هاك الوحدة اللي اسمها لطيفة واسم الدلع أو اسم التصغير

لطوف فيقول يعني دايم يتلمس أخبارها , اهلها وين يروحون ويحاول يرضي أبوها يرضي أخوانها أقاربها ودايم

يزورهم في نخلهم و يقعد عندهم ويتقهوى عندهم حتى لو صار شاهيهم مر يصير حالي عنده ( ايه الحب وما يسوي (a21) )

المهم انه يجي عندهم ويتردد عليهم ويسير عليهم حتى لو كان مهوب وقت مسيار يسير ويحاول انه يكون خفيف دم

وخفيف ظل عندهم ويسولف وإذا طلعوا مثلا للبر طلع وحاول انه يصير قريب منهم كله يبي يتلمس وش الأخبار عن ذا

البنت , الحاصل ان ابن مسلم راح مرة معزوم بعرس والاه موبد وعارف ان لطوف هذي اللي هو يحب بتجي الليلة في

العرس وخابرها موصوفة له ما شاء الله مذكورة بشعرها الجميل ( شفتو يا بنات اللي تبي العرس لا تقص شعرها (a16) ) شعر

لها مسترسل طايح طيح ومن اول كانوا الناس ما عندهم مثلا هالزيوت وهالشمبوات اللي توها طالعة ذي ما عندهم

هالاشياء هذي دايما يكدون الشعر وخاصة الأغنياء والناس اللي احوالهم زينه يكدون شعور بناتهم بمشط خشب يغطونه

ويلمسونه بالزباد والزباد هذا نوع من الطيب كان يجي من الهند أو من جهة عمان والله مادري من وين يجي , الزباد هذا

نوع من الكريم مضاف له عنبر وعليه دهن عود وطيب وورد المهم انه اذا البنت اخذت منه وحطته بشعرها وكدته يطلع له

ريحة تهبل واللي فيه وما فيه يعني مثلا قلبه سفنج اذا شم الريحة ذي يروح ملح . (qq168)

المهم ان ابن مسلم داري انها بتجي للعرس , فهذولا جو مجموعة من ضمن المعازيم في العرس ومن ضمن هالمجموعة

عايلة البنت كل البني المعزومات بهالزواج يتكددون (gssfs) ويلبسون من هالثياب الزينه ( ايه كود الله يقود نصيب (hjh) ) اللي فيها

زري والجدايل اللي من اول تحط احياناَ عشر عمايل واحيان يخلون الشعر جديلتين جبرات يجن من قدام والشعر الى صار

وافي وصار جديلتين واسود يصير شي عجيب ويحطون لها قصة وقذله والاولين يقصون قصه خفيفة مع الجدايل اللي

قدام فهالبنت هذي لطوف جاية من ضمن المعازيم اللي جايين للعرس وابن مسلم خابرن شعرها ويمكن انها تطلع وتبي

تلعب مع اللي يلعبون او يرقصون فالرجال مثل ما تقول متجمعين بصاله ووجة الصالة او وجه هالديوانية مفتوح فالهواء

الشمالي هذا الى صار فيه طيب او بخور او ريحة يبي يدفه لجهة الجنوب اذا صار فيه هواء فمن الصدفة هاك اليوم انه

تجمع الرجال في الجهة الجنوبية كلهم وابن مسلم قاعد في طرف المجلس هو اول واحد من جهة الشمال يتلمس ويتحرى ,

والرجال يوحون حس الحريم وهو يغنون ويهلون ويرحبون والحريم من الجهة الشمالية .

عقب ما تعشوا وسرى الليل وصار فيه رقص ويوم فاحت ريحة هالطيب وهو ابن مسلم يخبر ويعرف الطيب الزين ويعرف

الطيب اللي تطيب منه لطوف وتكد فيه , والله ويشتاق يوم شم ريحة العطر الزينه وجازت له فالشاعر محمد بن مسلم عقب

ماطلع من الزواج هذا كان متأثر بهالريحة ريحة الزباد اللي فاح عليه حتى يقولون عطس خمس مرات في هاك العرس من

شدة اشتياقه لهالريحة ودمعت عيونه من الفرحة واستانس ( (qq4) هذا بس وهو شام ريحتها اجل لو هو شايفها وش بيصير له ) .

عاد قال القصيدة الغزلية هذي عقب يومين أو ثلاث..


ذا مسك او عنبـــر تنشيت ريحــــه = او ورد جوري مع الطل مقطـــوف
او عشب روض عط رمثه وشيحة = او قرن عطار مع الريـح مكشـــوف
ان جاد هجسـي والعقـــل بالقريحة = انه زباد فـــاح من عــرف لطــــوف
ماجت بقذلتـها وهـــي مستريحـــة = ووافت بموجتها مع الريح عاصـوف
عطست خمـــس يوم جاني نفيحـه = والسادسة لحقت وانا طحـت محذوف
ناديت للريحـة ونفســــي جريحــة = والدمع يجري والقف الدمع بكفـــوف
ياريــح شيـــح طيـب الله ريحــــه = الريـــح ما يبرد حشــا قلب ملهــــوف
ما يبرده كـود العلـــوم الفصيحــة = ومزت شفاه ورص جوف على جوف
قل له يخاف المعتـلي في طريحــه = ويروف بي يـوم ابتلى مثــل ما روف
ما تهتنــي نفـس ونفــس مشيحــــة = كان الشقــا بين المحبيـــن منصـــوف
شــرواه ما يدعــي محبه ذبيحــــة = ولا بيـــع القرمز الزيـــن بالصــــوف
قل له يخلينـي على امره منيحــــة = ما كـــل رجــــال الى فات مخلــــوف
قال الهـوا حقــك علي النصيحــــة = اخبره عن حالتـــــك مثل ما شــــوف
راح يتنـــدح يـــــم دار المليحــــة = قال له محبك طاير القلب مشغـــــوف
يصبح و يمسي في امور مشيحــة = كنه عن المشروب والزاد مصــروف

بونواف
19-03-06, 01:29 AM
تسجيل حضور اول

ولي الشرف طبعاً ان اكون

اول واحد يحضر لمجلس راويتنا النجديه
:)

النجديه
19-03-06, 01:42 AM
الله يشرف مقدارك يا رب (qq13)

تسلم يا ابو نواف على هالحضور الاكثر من رائع

والله لا يحرمنا من تواجدكم معنا

كاتم الونة
19-03-06, 01:51 AM
الدعوى يبي لها جلسة لي عودة بحول الله:)

النجديه
19-03-06, 01:54 AM
حياك اخوي كاتم في اي وقت

ومشكووور على الحضور والتشريف

كاتم الونة
19-03-06, 02:05 AM
الله الله الله الله الله الله الله

علييييييك ياراويتنا...

تسلم يمينك وذوقك واسلوبك الفريد والله كني جالسٍ معهم ..

بيض الله وجهك ..,

اجل اللي قلبه سفنج يروح ملح؟

هههههههههههههههههههههه

حلوووو وجديدة... السفنج...:)

اجل تهقين قلبي سفنج؟ (asl)

انا رايحٍ ملح مبطي (g)
:
:

وكلش ولا القصيدة ذي عاد تحفة فعلاً..الله يرحمهم يازينهم ويازين علومهم.. (qq6)

من طيب القصيدة نسختها هناااااا :)





ذا مسك او عنبـر تنشيـت ريحـه=او ورد جوري مع الطـل مقطـوف
او عشب روض عط رمثه وشيحـة=او قرن عطار مع الريـح مكشـوف
ان جاد هجسـي والعقـل بالقريحـة=انه زباد فاح مـن عـرف لطـوف
ماجـت بقذلتهـا وهـي مستريحـة=ووافت بموجتها مع الريح عاصـوف
عطست خمس يـوم جانـي نفيحـه =والسادسة لحقت وانا طحت محذوف
ناديـت للريحـة ونفسـي جريحـة=والدمع يجري والقف الدمع بكفـوف
ياريـح شيـح طيـب الله ريـحـه=الريح ما يبرد حشـا قلـب ملهـوف
ما يبـرده كـود العلـوم الفصيحـة=ومزت شفاه ورص جوف على جوف
قل له يخاف المعتلي فـي طريحـه=ويروف بي يوم ابتلى مثل مـا روف
ما تهتنـي نفـس ونفـس مشيحـة=كان الشقا بيـن المحبيـن منصـوف
شرواه مـا يدعـي محبـه ذبيحـة=ولا بيع القرمـز الزيـن بالصـوف
قل له يخليني علـى امـره منيحـة=ما كل رجال الـى فـات مخلـوف
قال الهـوا حقـك علـي النصيحـة=اخبره عن حالتك مثـل مـا شـوف
راح يتـنـدح يــم دار المليـحـة=قال له محبك طاير القلب مشغـوف
يصبح و يمسي في امـور مشيحـة=كنه عن المشروب والزاد مصـروف

الله الله الله الله الله

شىء عجييييييييب

تسلمين يالنشمية ملااااااييييين

وافر الشكر والتقدير

تحيتي:)

كاتم الونة
19-03-06, 02:27 AM
اطالب بتثبيت هذه القصة والقصيدة..فضلاً ..:)

عنيزاوي 2005
19-03-06, 08:34 AM
والله ماقصرتي يالنجدية يابنت الأجواد قصة رائعة وقصيدة أروعة من مشرفه أروع وأروع

يامال العافية وأنا مع أخوي كاتم ودنا يثبت الموضوع ومشكورة

ام أيمن
19-03-06, 10:33 AM
بصراحة القصة الحلوة
استمتعت وضحكت وانا اقراها
انا صوتي عطيته للقصة نمبر وان ومصرة اني اسمعها
هههههههههه


ما تقدرين تغشين وتخلينها الاولى ههههههههه

في انتظارها وفي انتظار كل ما هو جديد

تحية تقدير وحب لك

حسن خليل
19-03-06, 07:00 PM
قصة جميلة ورائعة وقصيدة أروع

باين الرجال توهق في حب البنت وجعلته يعطس خمس عطسات من ذاك العطر، ربك ستر ما راح فيها (قوية)

تسلمين على هذا السرد الجميل للقصة.

لا عدمناكِ

النجديه
20-03-06, 01:52 AM
كاتم الونه
*
*
الله يسلمك ياخوي من كل شر

انا من شفتك مشغول وتلحق نخل على قول ابو نواف هههههههههه وانا داريه انك رايح ملح (q33)

ومشكووور على المرور الاكثر من رائع

وتسلم على هالتعليق الجميل

والله يعطيك العافيه

النجديه
20-03-06, 01:56 AM
اطالب بتثبيت هذه القصة والقصيدة..فضلاً ..:)

ابشر باللي يسرك وانا اختك :)

النجديه
20-03-06, 01:58 AM
عنيزاوي 2005
*
*
الاروع هو مرورك يا اخي الكريم

يعطيك العافيه وما قصرت وابشر بالخير

النجديه
20-03-06, 02:06 AM
بصراحة القصة الحلوة
استمتعت وضحكت وانا اقراها
انا صوتي عطيته للقصة نمبر وان ومصرة اني اسمعها
هههههههههه


ما تقدرين تغشين وتخلينها الاولى ههههههههه

في انتظارها وفي انتظار كل ما هو جديد

تحية تقدير وحب لك

اقول اختي سفيره انا عارفه ما عطيتي صوتك للقصه الاولى الا عشان السياره الوري (a26)

يعني تبغينا نتلاعب في نتائج الصناديق الله يقطع بليسك (qq1) هههههههههههههههههه

مشكووووره يالغايه على هالحضور الرائع والكلام الجميل

يعطيك العافيه وما قصرتي

انتظري ان شاء الله القصه اللي انتي مرشحتها قريبا على الشاشه :)

خلي البال
20-03-06, 07:17 AM
قصة جميلة جدا والأجمل طريقة وأسلوب السرد
فعلا أسلوب مميز في الطرح..يعطيكي العافية..

صافية الجبين
20-03-06, 07:44 AM
الله الله الله ....

اقولكم يا خواني ان الثالثه فيها شي ..يا عزتيل الشاعر

تسلمين يالنجديه.. وفي انتظار الثانية والاولى..

جهام
20-03-06, 07:07 PM
تسلمين ياراويتنا على العدل في النتائج على اننا لم نطلع على القوائم هذا من زين الشفافية على العموم الحمدلله فزنا وسلمك الله من الطعون اللي كنت اقدمها الى الادارة الموقرة هذا اولا0
ثانيا ابي امدح القصة رائعة والاحلى الاسلوب الشيق للسرد القصصي لا وماشاء الله عليك ماتعرفين تشرشحين 0
وبعدين اريد ا اسأل سؤالا (حلوه اللغة) طبعا انت اقرب من الجميع بتفاصيل القصة وخفاياها وزواياها هذا اذا انت ماعايشتي القصة عيانا بيانا اكيد الشاعر على هالمعاطس شام زباد هندي انت متأكده او شام قاز0 يابنت الناس محلب وديرم ويخب
اشكرك اختي النجدية على جهودك المميزة وعلى اسلوبك الفكاهي الذي اضحكني كثيرا في كل قصة مما اضفى على مواضيعك رونقا وجمالا الله يوفقك ايتها الاخت الكريمة
اخوك
جهام

النجديه
26-03-06, 06:47 PM
حسن خليل
*
*
الاروع ياخوي هو تواجدك الدائم معنا

يعطيك العافيه على هالمرور الرائع

النجديه
26-03-06, 06:51 PM
خلي البال
*
*
الاجمل هو مرورك الكريم يا خوي

يعطيك العافيه وما قصرت

النجديه
26-03-06, 06:54 PM
الله الله الله ....

اقولكم يا خواني ان الثالثه فيها شي ..يا عزتيل الشاعر

تسلمين يالنجديه.. وفي انتظار الثانية والاولى..

كان قلبك حاس ياخرنوب ان القصه فيها شي (qq6)

الله يسلمك ومشكور على المرور الرائع

النجديه
02-04-06, 01:10 AM
الشاعر على هالمعاطس شام زباد هندي انت متأكده او شام قاز0 يابنت الناس محلب وديرم ويخب

وش فهمك في الحب بس يا جهام ههههههههههههههه

مشكوووور اخوي على هالمرور الرائع والتعليق الجميل

يعطيك الف عافيه وما قصرت

إبن دواس
02-05-06, 10:07 PM
يعطيك العافيه على روعه القصه والقصيده

ياأختي العزيزه النجديه

بارك الله فيك

النجديه
03-05-06, 12:48 AM
ابن دواس
*
*
الاروع هو مرورك اخي الكريم

يعطيك العافيه وماقصرت

أبو زقم
08-05-06, 03:16 PM
صراحة رائع ما شاء الله تبارك الله

النجديه
09-05-06, 12:37 AM
ابو زقم
*
*
الاروع هو مرورك يا اخي الكريم

يعطيك العافيه وما قصرت