المساعد الشخصي الرقمي

مشاهدة النسخة كاملة : ياشبــــاب لـــدي أسئـــــلة @@ فهل من مجيــــب @@ المحــــارب **


المحــــارب **
18-11-05, 07:12 AM
الأخوة الأفاضل
الأخوات الماجدات
أيها الحفل الكريم :)

قررت وانا بكامل الحالة المقررة شرعا أن أحج أنشاء الله هذا العام

وهي اول حجـــــــــــة للمحـــارب **
((طبعا على جمس وابحط علىالكبوت بيرق لزوم الكشخةواحياء للتراث )) :)
ولدي عدة أسئلة إن لم أسميها إشكاليات تنبني عليها القرارات فأفتوني ماجورين
فلربما اجد عندكم ردا شافيا وكافيا أو رأيا صائبا أو مشورة نيرة

لأننا للحق حسبنا 4 أشخاص فوجدنا تكلفتها عند حملات الحج حوالي الـــ 20000عشرون ألف ريال
فقلنا انا وزميلي لما لا نحاول الحج بدون حملة أوفر للتكاليف والتي ستكلف ان زادت 6000-8000 آلاف مع أجار الجمس :)

والاسئــــــــــــــــــــــــــــــــــــــــــــ ـــــــلة هي :

1-هل تدخل سياراتنا الى المشاعر علما ان عدد الركاب 4 فقط
2-هل تبنى الخيمة في مكان واحد اثناء الحج كله ام انه لازم نبنيها مرة في عرفة
ومرة في مزدلفة واخرى في منى !!!! بمعنى هل الخيمة ثابته او متحركة أثناء ايام الحج
3- هل يسمح ببناء الخيام أم أنه ممنوع لانني سمعت بالخيام الجديدة التي ضد الحريق ؟
4-هل هناك خيم للآجــــــــــــار !!!!
5 -ما رأيكم بالحج بشكل أفراد وهل تؤيدونه أم تؤيدون الواحد ياخذ حملة وصلى الله وبارك
6- ان كانت الاجابة بنعم فهل تعرفون من واقع التجربة أي الحملات جيدة

وللامـــــانة فالمحــــارب ** وكما عودكم دائما على الديمقراطية :)
ومن هذا المنطلق فلا نستغني عن آرائكم ومقترحاتكم حيال الموضوع اجمالا
فلربما كان لديكم من الافكار ما غاب عن صلجتنا الموقرة



** الموضوع جدي أكثر مايكون وان رماه البعض بالهزل

ودمتم بخير

الحــــــــــاج // المحـــــــــــارب **
أبجيب صورة وانا بالحرم واعلقها بالمجلس :)

عاشق عنود الصيد
18-11-05, 07:30 AM
تبي تحج ولا تبي تسافر انت

اهم شي اخلص عملك لله وحده واترك عنك العلوم اللي مانت قدها

الصواعق
18-11-05, 08:42 AM
1-هل تدخل سياراتنا الى المشاعر علما ان عدد الركاب 4 فقط
2-هل تبنى الخيمة في مكان واحد اثناء الحج كله ام انه لازم نبنيها مرة في عرفة
ومرة في مزدلفة واخرى في منى !!!! بمعنى هل الخيمة ثابته او متحركة أثناء ايام الحج
3- هل يسمح ببناء الخيام أم أنه ممنوع لانني سمعت بالخيام الجديدة التي ضد الحريق ؟
4-هل هناك خيم للآجــــــــــــار !!!!
5 -ما رأيكم بالحج بشكل أفراد وهل تؤيدونه أم تؤيدون الواحد ياخذ حملة وصلى الله وبارك
6- ان كانت الاجابة بنعم فهل تعرفون من واقع التجربة أي الحملات جيدة


هل تدخل سياراتنا الى المشاعر علما ان عدد الركاب 4 فقط

طبعا لااا


2-هل تبنى الخيمة في مكان واحد اثناء الحج كله ام انه لازم نبنيها مرة في عرفة

ماراح تقدر تبني خيمة .. الا يمكن في عرفات .. وهذا شيء صعب .. لأن الخيم تبنى قبلها بيوم .. بعدها ماراح تلقى شيء فاضي


3- هل يسمح ببناء الخيام أم أنه ممنوع لانني سمعت بالخيام الجديدة التي ضد الحريق ؟

ماراح تلقى وقت تبني لك خيمة .. وأيضا ممنوع .. الا بتصريح من وزراة الحج والأوقاف


4-هل هناك خيم للآجــــــــــــار !!!!

تقدر تروحون لأي حملة .. وتطلبون منهم الجلسو معهم
يمكن يوافقون ويمكن لا

أو تبي الصدق؟
تقدرون تحشرون روحكم عليهم




5 -ما رأيكم بالحج بشكل أفراد وهل تؤيدونه أم تؤيدون الواحد ياخذ حملة وصلى الله وبارك


تبي الصدق؟
والله أريح لك بكثير

تلقى مكان تنام فيه .. والمواصلات مأمون مكفول

أيضا حاول تاخذ حملة . .يكون في النطاق (( أ ))
يعني قريب من الجمرات
وأسعار الحملات
تقريبا من 3000 أليييييييين 10 الأف
وعلى حسب الخدمات اللي راح تقدمها لك .. وكم عدد الموجودين بالخيمة
بالعادة يكون في الخيمة من اربعة الى ثمانية .. حسب الرفاهية :)


6- ان كانت الاجابة بنعم فهل تعرفون من واقع التجربة أي الحملات جيدة




فيه الكثير من الخدمات
لكن السنة الماضية .. لا أدري ماهي أفضل شركة
لكن السنة التي قبلها .. شركة القرشي لخدمة حجاج الداخل .. كانت أفضل شركة
والمركز الثاني . .أخذتها شركة موسى الصبحي لخدمة حجاج الداخل

وفيه شركات كثيرة .. على حسب الخدمة

وتقريبا . .كلها مثل بعض

لكن تدري وين تكون الشطارة؟

مين اللي عنده باصات مكيفة وزينه .. وتوصلهم لعرفات بدري .. بدون زحمه



طبعا هالكلام أقوله يالمحارب
لأن الواحد كان شريك في احدى شركات الحج .. وكنت معاه في الحج
وعرفت الطريقة

ونسيت أقولك شيء

أنت ماراح تقدر تاخذ تصريح للحج .. إلا عن طريق حملة
ولو رحت لهم وقلت أبي تصريح راح يرفضون
هذا القانون أخبره السنة اللي فاتت وقبلها

مدري عاد الحين . فيه ولا لا :)


والله يقبل منك .. ومن ربعك


وكويس أنك راح تسلم . أقصد (( تكمل اسلامك )) :o

مستغرب
18-11-05, 10:33 AM
6- ان كانت الاجابة بنعم فهل تعرفون من واقع التجربة أي الحملات جيدة

العتيق حمله متتازه من واقع تجربه
ولهم خبره كبيره في التنقل بين المشاعر وسرعه ودقه

العام مخاويهم يوم اقول لك قوه معي وتعيي

لا يفوتونك وتبي تدعي لي

فلة حجاج سواليف وضرب من هالمفاطيح وصلى الله وبارك

فريق أول
18-11-05, 11:39 AM
ماشاء الله .. الله يتقبّل ..
من قدّكـ قبل كم شهر بـ ماليزيا .. وبعد كم شهر بـ مكة ..
والحين بـ بريدة .. :)






الفريق أول

:)

المحــــارب **
18-11-05, 12:18 PM
تبي تحج ولا تبي تسافر انت

اهم شي اخلص عملك لله وحده واترك عنك العلوم اللي مانت قدها


لا تعليق

المحــــارب **
18-11-05, 12:26 PM
كويس أنك راح تسلم . أقصد (( تكمل اسلامك )) :o

الاخ الصواعق
السلام عليكم
معلوماتك جدا مفيدة ومتبدو في بعض جزئياتها محترفة
خاصة النطاق ""أ"" هذي أحس انها متعوب عليها
أبكشخ فيها عند حقين الحملات يقالي أعرف :)

سيدي أشكر لك ردك التفصيلي الذي انا بحاجة اليه

وحلوة ذي راح تسلم ليه شايفني فرناندو :)

المحــــارب **
18-11-05, 12:29 PM
العتيق حمله متتازه من واقع تجربه
ولهم خبره كبيره في التنقل بين المشاعر وسرعه ودقه

العام مخاويهم يوم اقول لك قوه معي وتعيي

لا يفوتونك وتبي تدعي لي

فلة حجاج سواليف وضرب من هالمفاطيح وصلى الله وبارك


أهلين مستغرب افندي
هلا والله وغلا
انا ما قصدي بس العام خفت اجتمع انا وياك في صعيد واحد :)
صدقني يامستغرب انها هم الله يعين
ونصيحتك مقبوله بعد علوم الصواعق هذي شكلي بهون واطلع حمله
وصلى الله وبارك

حج +مفاطيح =من قدك يامستغرب
أشوفك لاهس على الحج من تالي :)

المحــــارب **
18-11-05, 12:33 PM
ماشاء الله .. الله يتقبّل ..
من قدّكـ قبل كم شهر بـ ماليزيا .. وبعد كم شهر بـ مكة ..
والحين بـ بريدة .. :)






الفريق أول

:)


الفريق أول
السلام عليكم
هلا والله بك وبارك الله بالحجة اللي جابتك :)
خبرك يافريق الأمور تبي دبرة :)
وبعدين منين جبت معلوماتك هذي يابن الايه
شغل جيمس بوند هذي :)

ركز على ببريدة هذي >>>>>حياك طال عمرك باي وقت أعز من يجي يافريق :)
متى الله يامرك بس


دمت بخير من مخرج 12 ليــــــــــــــن تفتيش صلبوخ :)

المحــــارب **
18-11-05, 12:36 PM
أما هالابتسامات يابو لجين
شغل اتاري كل شوي ناطه شجرة :)


المحــــارب **
التمس :)

راقي قول وفعل
18-11-05, 07:57 PM
أخي المحارب سأعود وأخبرك الخبر :) ربما لدي شيء مفيد



ولك مني خالص الود ياعزيزي الغائب الحاضر

المحــــارب **
18-11-05, 09:22 PM
أخي المحارب سأعود وأخبرك الخبر :) ربما لدي شيء مفيد



ولك مني خالص الود ياعزيزي الغائب الحاضر



مرحبا ياصاحبي الذي مازال كما كان :)
حسبتك من لا تحسبني حسبتك اياه
ولكن أحسن كن اصيلا كما أنت
في انتظار عودتك الملئى بالمفاجآت
لعلك تكون مكملا لروح الفريق وتؤيد خطة الحج المفتوح
والتي لم يشجعني عليها الشبابفالكل يدعو الى حملة وان كنت جاعلها
خياري الأخيــــــــر :)

دمت عزيزا

ابو شدق
18-11-05, 11:18 PM
ابولجين يالله حيووه

انا اعرف واحد كل سنه يحج ولا عمره راح بحمله

ويدخل بموتره جيب ولا هم جمس بعد

يروح يوم 8 ويدخل ويترزق الله بس انت زبن لك سكن هنا

حدر شجره ولا من هالقبيل وتوكل على الله

وانت نيك سليمه ويعينك الله لاتخاف

موفق اخوي

المتحد
19-11-05, 01:32 AM
الرفيق المحارب
ليش ماتسوي لك حمله ( خاصه )
وتطلق عليها إسم :-
حملة (العصلان) إلى بلد (الرحمن)
جمس (تسعيني) الموديل وشبك فوق
وهات ألفك وأنت ماشي
فكره جميله وتاخذ أجرهم
ومنها تجرب مهاراتك بالمصاقط وحك الأرصفه
فعلاً تجربه (خلاقه)
ومحفزه لرحلات مكوكيه ( طاشيه ** )

دعك من هذه الهرطقه (بعاليه)
فلاتعدوا أن تكون من ( سحاحيات ) الساعه ثنتين
الحمله جميله
وإن كنت أتحفظ على (السقف) العالي من الراحه
فهو لايشعرك بالروحانيه

والله أعلم
.

موت & ميلاد
19-11-05, 11:51 AM
المحارب **

وش سالفة الحج معي اليوم ؟؟!!

اليوم اقول لاهلي ودي احج واساحر اخوي يحج معي مش لله ابيه محرم >> كل سنه نقول نفس الكلام ولا نروح :)

وادخل للمنتدى واشوف موضوعك عن الحج ..

الله يتقبل منك يارب مقدما ً ..

ولو انك بـ تقول قاطه بالموضوع بس ابقولك رأيي



تخيل وضعك كيف بيكون ؟؟!

تسوق من القصيم لمكه .. وبعد ارهاق الطريق تدور زاويه لخيمتك

وبعدها تطق الخيمه وتروح طاقتك على تنقيلها من مكان لمكان

وتتعب ولا تأدي مناسكك على اكمل وجه

يعني سالفه طويله انت بغنى عنها

الحمله احسن << الزبده

دلع عيني دلع
19-11-05, 08:16 PM
هلا بك اخوي :: المحارب ..

لو إنك من جده كان أقولك ماله داعي الحمله بالعكس تستمتع والله بالحج

وبيكوون رووعه .. بس من بعيد أحسه صعب شوي الحمله بتوفر عليك التعب

بالنسبه لنا .. نروح بدون حمله ونوقف سيارتنا بالعزيزيه

ونكون مستأجرين خيمه بمنى { فيه حملات تأجر خيام لك لوحدك } ..

وبعرفه ومزدلفه ماتحتاج خيمه كلها كم ساعه ومافيه حر

{ اذا تعرف أحد ممكن يوفر لك خيمه بعرفه .. بالخيام الخاصه إحنا احيانا نسوي كذا }

مع اني ماشوف لها داعي بعرفه

والتنقلات بتكون بتاكسي او باصات ولاخفت الزحمه تقدر تدخل سيارتك

ولاتنقل هـٌـم أخوي ربي بيسهل لك

الله يتقبل من الجميع مقدما

:)

المحــــارب **
20-11-05, 12:34 AM
ابولجين يالله حيووه

انا اعرف واحد كل سنه يحج ولا عمره راح بحمله

ويدخل بموتره جيب ولا هم جمس بعد

يروح يوم 8 ويدخل ويترزق الله بس انت زبن لك سكن هنا

حدر شجره ولا من هالقبيل وتوكل على الله

وانت نيك سليمه ويعينك الله لاتخاف

موفق اخوي



أبو شدق مرحبا بهالحضور الجميل
ياشدقدق افندي
صدقني معلومة جدا ممتازة ولكن الواحد يحسب اخماس في اسداس
وقلة عرف المكان والطرق مع هالمكاوية الرايقين تخلي الحج شيكا بيكا
عموما شـاكر لك واعلمك بعد كم يوم وش استقرت عليه

دمت بخير

قمراي
20-11-05, 01:40 AM
الله يتممها ويسرها لك

تعال ليه تبى تعذب نفسك بالسفر وشلة عفش وخيمه وحوسه ودوسه

هذا غير ان وقتك بيروح وانت تدوّر مكان تحط فيه خيمتك

وغير الزحمه والازعاج والنظافه بتكون شبه معدومه <<<< دورات المياه يدخلها كل من هب ودب

وربى يسرها بالحملات والخدمات اللي يوفرونها لك وانت قاعد مرتاح

بالاضافه الى طبيب وطبيبه وشيخ او داعي معروف يكون مرافق للحمله
.
.
حج مبرور مقدما ولاتنسى تاخذ لقاح قبل تروح الحج

المحــــارب **
23-11-05, 06:43 AM
الرفيق المحارب

ومنها تجرب مهاراتك بالمصاقط وحك الأرصفه
فعلاً تجربه (خلاقه)
ومحفزه لرحلات مكوكيه ( طاشيه ** )

والله أعلم
.

أيها الاخ الماجد // المتحد
سلام من الله على خشيمك :)
مساقط وحك أرصفة ...... ليه يالاخ سلاحف نينجا عندك :)
هذا ماصار حج هذا فورمولا

أعجبني مسمى الحملة
ولله ثم للتاريخ لان حججت على جمس
لاضعن بيرقا في كبوته يراه من في
آخره ....

المتحد .... انت احد الدواعي للانقلاب على كفرين ...:)
اتخيل حملة حجي لو اتبعت نصيحتك مشغل لهم
موسيقى أبطال الديجتيل والجمس يناقز ويقفز الباصات وانواع الحمااااااس

المحـــــارب ** <<<<جنننننح وفي رواية هستر

باقي من الصورة أعلاه ((سفتي أحمر )) على التنده <<<<تنده بكسر الطاء المعجمه :)


المحـــــــارب **
سانشيرو :) :)

راقي قول وفعل
23-11-05, 09:01 AM
أخي العزيز


لي معرفة بموسم الحج جيدة ولله الحمد



وما أختار لك إلا ما أختار لنفسي


اذهب مع حملة النور ووالله لن تندم بحول الله


إن شئت أن أحدثك عن العقبات الجسام في سبيل الحج المفتوح سأحدثك وإن كنت مقتنعا بكلامي هذا فالحمد لله


محبك الذي لم يهدأ به عصف الشوق إليك

راقي

عربجي مزيون
23-11-05, 08:52 PM
ليش ما تهج بكربلاء اسمع الحجه مثل الزواج تهابة وهو خذني جيتك ما تدري الا انت مخلص كلها اربع ايام وانت خالص تراها ماهيب سنة الحج انصحك تطلع بجمس لكن خل دخولك لمكه بفجر يوم عرفة وخذ معك فيفادول من يوم تحرك كورس وبايسن صندوق كامل وفصفص وان كان انت تدخن حاول تتركه والا خذ معك كرز عن الضروف لانه تبي تصير السالفه توزيع زقاير وتراها انواع الفتن انا علمتك والصخنة بك بك اذا رجعت تبي تخم الفراش اقل شي سبعة ايام تمام وانصحك تاخذ معك موس الحلاقة من هنا وتخلي الحلاق يحلق لك بموسك وصابونة ديتول وصندوق برتقال يمكن تشتهي برتقال ولا تنسى تاخذ معسل اهناك مستحيل تلقاه الله يتقبل منك قبل الزحمه

المحــــارب **
23-11-05, 09:42 PM
المحارب **

وش سالفة الحج معي اليوم ؟؟!!

اليوم اقول لاهلي ودي احج واساحر اخوي يحج معي مش لله ابيه محرم >> كل سنه نقول نفس الكلام ولا نروح :)

وادخل للمنتدى واشوف موضوعك عن الحج ..

الله يتقبل منك يارب مقدما ً ..

ولو انك بـ تقول قاطه بالموضوع بس ابقولك رأيي



تخيل وضعك كيف بيكون ؟؟!

تسوق من القصيم لمكه .. وبعد ارهاق الطريق تدور زاويه لخيمتك

وبعدها تطق الخيمه وتروح طاقتك على تنقيلها من مكان لمكان

وتتعب ولا تأدي مناسكك على اكمل وجه

يعني سالفه طويله انت بغنى عنها

الحمله احسن << الزبده


الحجــــه موت وميلاد <<<<باقي صورة المحروس سي العمدة على الجدار وثلاث اولاد وتصير مسلسل :)
اما بعد
أصلا طال عمرك نصف الحياة توارد أفكار ورؤى
والحج بيني وبينك اصبح ضرورة ملحة فيكفي ما أخرناه
وبعدين انا ابن بيئتي عندنا حنا يالبدو لاحج الواحد وتزوج خلااااص ماعاد يقطع راسه سيفين :)
فانا ودي اوطد اركان الهيبه بالحج ...
وصدقيني <<<<<شطح ابو لجين

احس ان الدنيا موضات فعام 23/24 هـ أزعجونا الناس بالعروس والحياة الاسرية والكتب الزوجية وبرامج المشايخ المصريين عن الحياة الاسرية ودخنا ودوخنا وانهدمت عروش الاجلاف واعداء المراة وكان العام عام بركـــة على الرومانسيين وانصاف الرومانسيين

25/26هـ هبت الناس بالحج وسوالفه ومكه وعرفه وجاك الذيب جاك وليده وابلشونا العائدون من الحج كلن يمدح حملته ويقول عنها انهم يعرفون مواعيد الرمي وفيهم وفيهم وازعجونا باخوياهم كلما دق واحد قالوا ((هذا من اللي حجوا معنا )) نفس القصه (( ناس حليلين ومطوع رايق ومدرس )) :)

وهه طال عمرك كل سنة لنا مــــــــــوال

لذا وبناء على الشطوح السابق نرى فيما يرى النائم والرأي الأتم لسعادتكم ان ماتفكرون به ماهو الا نتاج بيئتكم ومحيطكم وزمنكم فلا عليكم وعندي لك طريقة مارسي على امك ارهاب فكري وكم نصيحة وموعظة وهي بالتالي ومتوالية السلطات المنطقية سوف تنقض على اخوك واشوف قناصيعك وسط حجاج اندونيسيا هالسنه في الحرم

حرم حرم .... مرااااااوح مراااااوح :)

الحجة موت وميلاد
دام ظلك كجدار شرقي الساعة 9

المحـــــــــارب **
سلمتو مكاتي <<<<اندونيسي حليل :)

ملفى
26-11-05, 04:53 PM
محارب

خذلك شقه فى منطقه قريبه من الجمرات مثل العدل وخصوصا اذا كنت معاك عايله شقه مفروشه ماتكلفك شى كثير

(التفاصيل لاحقن اذا اعجبك الراى اغلق القوس ) من تجى مكه انزل فيها قبل تروح الحرم

بالنهار خلك بالشقه والعصر جمبك الجمرات ميتين متر على رجولك بات هناك الى ساعه متاخره وارجع الشقه

ترى الخيمه ماهى من شروط الحج للاحاطه

وعرفه تنزل لها قبل الظهر والجو براد ومايبغالك فيها شى ساعتين ويجى المغرب وانزل على مزدلفه

حتى لو جيتو بطياره لمكه ماتفرق تاخذ شقه بعفشها انا هذى سواتى لاحجيت

اشبك انت ترى انا من مكه خل عنك الخوووف

المحــــارب **
26-11-05, 07:26 PM
هلا بك اخوي :: المحارب ..



ولاتنقل هـٌـم أخوي ربي بيسهل لك

الله يتقبل من الجميع مقدما

:)
دلع عيني دلع
هلا بك اكثر احس اسمك يصلح موال عراقي :)
اشكر لك تاعلك وحضورك
وانتي الوحيدة التي شجعتني على الحج بدون حملة وسوف
ابحث عن ما ذكرتيه فهو يوفر الشي الكثير
وصدقيني ان البعد مشكلة حنا لا بغينا مكة يوم ع الوجه :)
جزاك الله خيرا ....

وشكرا لك

دمتم بخير

المحــــارب **
30-11-05, 03:31 PM
الله يتممها ويسرها لك


.
حج مبرور مقدما ولاتنسى تاخذ لقاح قبل تروح الحج


الاخت قمرا
مرحبا بك واهلا
أشكر لك مرورك العطـــــــر
وسوف اخذ بنصيحتك
شكرا لك سيدتي

نسر
30-11-05, 08:06 PM
تقبل الله منك حجك مقدما

toti.
12-11-07, 08:25 PM
لـرفـع


الحج على الابواب واللي ناوي يحج يستفيد

سيمار
12-11-07, 11:01 PM
توتي ليتك مارفعته هههههههه
اجل بيرق لزوم الكشخه
والثاني يقول فلة حجاج وضرب من هالمفاطيح ههههههه
الله يتقبل من الجميع يارب ويعين اللي ناوي يحج هالسنة
متى ولدي يكبر ان شاءالله واكشخ فيه اذا حج بي
على الاقل ابركب قدام :")

بنــت حمــوله. . .
12-11-07, 11:28 PM
يربي وش ذا الحوسه وش لكـ بدوخة الراس خذلك حملة لو هي ب40000 الف


اهم شي راحتكـ ,وتكون حجتكـ صحيحه..


ممكن في اشياء تغفل عنها أنت وأصحاب الحملات يكونون بدراية تامه فيها بحكم ترددهم كل سنه ...


تراها مرهـ بالعمر لاتخسرها بدقة خيام وتنزيل عفش ونسينا وحطينا وخرب الجمس فضى البانزين ,,


بلاها من الأول يا شيخ المحاربين:)


كانك ما تزوجت اصبر لين تتزوج وخذ مرتكـ معك حتى لا تكون الدوخه دوختين (a26)


واضح انهُ بخاطركـ روحة الجمس كانكـ معزم شد الرحال وتوكل على الله
:

/


:

/

المحــــارب **
13-11-07, 12:34 AM
بلاها من الأول يا شيخ المحاربين:)


كانك ما تزوجت اصبر لين تتزوج وخذ مرتكـ معك حتى لا تكون الدوخه دوختين (a26)


واضح انهُ بخاطركـ روحة الجمس كانكـ معزم شد الرحال وتوكل على الله
:

/


:

/

بنت حمولة
فاتك ان الموضوع عام 2005
وابشرك حجينا طال عمرك عسى الله يتقبل
واللي يبي الراحه يحج مع السكينة تنطلق من عنيزة
بس الحقيقه قمه والقائمين عليها طلبة علم ...
/
\
وللعلم كنت انا والحاجة ام لجـــــــــــين حفظها الله
:)

-------
استانس لاشفت سيمار هنيا :)

صورة مع التحية لكل جمس 89 منطلق وعليه بيرق ...
سيمار هالهكر التالية ماهي عارفه جموس ...
جيل الباصات ابو 20 راكب ...

ياشينك ياسيمار وانتي عجوز انتي باذتنا هالحين
وشلون لاعجزتي ... (a14)

المحــــارب **
13-11-07, 12:38 AM
وبعدين حلوة "شيخ المحاربين "
اخر المحـــــــــاربين القدامى ...
الراحـــــــــل نحو الشمــــــــــس ....
سيدتي ...
لم أعد كذلك صدقيني ياسيدتي ...
الآن تسحبني الهانم هي وبنتها بكل سوق
سيدتي بكل تواضع لقد صرت "حليلا"

المحــــارب **
13-11-07, 12:44 AM
توتي ليتك مارفعته هههههههه
اجل بيرق لزوم الكشخه
والثاني يقول فلة حجاج وضرب من هالمفاطيح ههههههه
الله يتقبل من الجميع يارب ويعين اللي ناوي يحج هالسنة
متى ولدي يكبر ان شاءالله واكشخ فيه اذا حج بي
على الاقل ابركب قدام :")

كني اتخيلك انتي ونظاراتك كبااااااار
....
... ومعك ريحه فازلين
والمفتاح بالبخنـــــــــــق وتسألين هذي مكككككــــــــــة ...
(لاباريس ) وحنا وين رايحين ...
عاد جيل عيالك ... الاحترام لك عليه .. مشغلين الديسكو وانتي معهم
وانتي من الحماس تهزين بشويش .. هلا .. والجمس يمشي 160 ..
وتبتعد الصورة .. عن الجمس قليلا ... والعجوز على اليمين ...
ابتسموا .. انها الحاجة سيمــــــــــــار ....


هذي مكــــــــــــــة .... >>>يرد عليك ولدك .. ماما .. الطسي

ام لجين تقول يبي يحججها ويتركها بمكــــــــــــــه .. (a14)
(a14)

سيمار
13-11-07, 01:08 AM
ان غدا لناظره قريب
عندي حدس اني انا اللي ابسوق
الله يتقبل بس
اجل صرت حليل
حلك بطنك :")

ام لجين
ولدي راح يكون من ابر ابنائي بي <<ماعندها الا واحد ههههه
وانتي تقولين بيتركني بمكة :"(
ماعليك
لو تركني الحروه اني اتشعبط اي هندي وارجع للرياض
<<سأظل سيمار الغثيثة ولو بعد حين هههه

خشخاش
13-11-07, 01:34 AM
يا قدم الموضوع قدماه

الحين يمدي عيال أبو لجين حجوا ورجعوا

الزهراني و القصيمي
13-11-07, 01:43 AM
وأنا بأجاوب عليكـ من باب اني ساكن بمكة:

الاسئــــــــــــــــــــــــــــــــــــــــــــ ـــــــلة هي :

1-هل تدخل سياراتنا الى المشاعر علما ان عدد الركاب 4 فقط ؟
تدخل بشرط وجود تصريح وكون السيارة عائلية.
2-هل تبنى الخيمة في مكان واحد اثناء الحج كله ام انه لازم نبنيها مرة في عرفة
ومرة في مزدلفة واخرى في منى !!!! بمعنى هل الخيمة ثابته او متحركة أثناء ايام الحج ؟
بكل تأكيد الخيمة متحركة وشدوا حيلكم.
3- هل يسمح ببناء الخيام أم أنه ممنوع لانني سمعت بالخيام الجديدة التي ضد الحريق ؟
ظاهرة الافتراش ممنوعة ولكن اكثر الناس لايذهب مع الحملات للتكاليف الباهظة.. ولكن لايمنعونك.
4-هل هناك خيم للآجــــــــــــار !!!!؟
أنصحك تاتي بخيامك معك والا فاهل الايجار بمكة سيسلخونك مثل مايسلخ عبداللطيف جميل الشعب.
5 -ما رأيكم بالحج بشكل أفراد وهل تؤيدونه أم تؤيدون الواحد ياخذ حملة وصلى الله وبارك؟
إذا كنتم شباب مفتولي العضلات يعني ماشاء الله همتكم فوق اتكلوا على الله بدون حملة ولاهم يحزنون.
واذا ودك بالراحة على الاصول خذ حملة.

على فكرة انا هذي السنة نويت الحج وبأحج لحالي وأنا من أهل مكة.
وهذا بريدي اذا ودكـ تستفسر [email protected]

المحــــارب **
13-11-07, 02:30 PM
وأنا بأجاوب عليكـ من باب اني ساكن بمكة:

الاسئــــــــــــــــــــــــــــــــــــــــــــ ـــــــلة هي :

1-هل تدخل سياراتنا الى المشاعر علما ان عدد الركاب 4 فقط ؟
تدخل بشرط وجود تصريح وكون السيارة عائلية.
2-هل تبنى الخيمة في مكان واحد اثناء الحج كله ام انه لازم نبنيها مرة في عرفة
ومرة في مزدلفة واخرى في منى !!!! بمعنى هل الخيمة ثابته او متحركة أثناء ايام الحج ؟
بكل تأكيد الخيمة متحركة وشدوا حيلكم.
3- هل يسمح ببناء الخيام أم أنه ممنوع لانني سمعت بالخيام الجديدة التي ضد الحريق ؟
ظاهرة الافتراش ممنوعة ولكن اكثر الناس لايذهب مع الحملات للتكاليف الباهظة.. ولكن لايمنعونك.
4-هل هناك خيم للآجــــــــــــار !!!!؟
أنصحك تاتي بخيامك معك والا فاهل الايجار بمكة سيسلخونك مثل مايسلخ عبداللطيف جميل الشعب.
5 -ما رأيكم بالحج بشكل أفراد وهل تؤيدونه أم تؤيدون الواحد ياخذ حملة وصلى الله وبارك؟
إذا كنتم شباب مفتولي العضلات يعني ماشاء الله همتكم فوق اتكلوا على الله بدون حملة ولاهم يحزنون.
واذا ودك بالراحة على الاصول خذ حملة.

على فكرة انا هذي السنة نويت الحج وبأحج لحالي وأنا من أهل مكة.
وهذا بريدي اذا ودكـ تستفسر [email protected]


ايها الزهراني الفاضل ...
الموضوع قديم عام 2005 واشكر لك صادق مشاعرك وعرضك
جزاك الله خير ...

فجر
14-11-07, 12:50 AM
يا حليلك كانك تبي تحج بصفر مو بذي الحجه
ماخذ الدنيا بكل اريحيه وكان عدد الحجاج مئه حاج فقط بس صراحه هالسؤال هذا تحفه جبته يمين يسار حاولت افهمه ما قدرت

2-هل تبنى الخيمة في مكان واحد اثناء الحج كله ام انه لازم نبنيها مرة في عرفة
ومرة في مزدلفة واخرى في منى !!!! بمعنى هل الخيمة ثابته او متحركة أثناء ايام الحج
:)

يعني اشلون خيمه متحركه تبي تسحبها ورا السياره بقلص ؟؟

المهم الموضوع قديم واكيد انت حجي الان وين الصوره الي وعدتنا فيها
ونبي موضوع كامل عن هالفريضه الروحانيه التي لا نشبع منها ابدا
انا حاجه اربع مرات وخاااااطري احج السنه

على فكره باخذ دوره البرمجة اللغوية العصيبة (nlp)
مع الدكتور مصطفى ابو السعد

طبعا الدوره على حساب الوزاره ولا انا مو مقتنعه فيها بس لما عرضت على قلت يلا خل اشوف كلام المحارب صح ولا مثل ما كنت متوقعه بيع كلام

وسن@@
14-11-07, 05:00 AM
الله يسامحكم (qq167) تعبت اقرا الموضوع يطلع من عام2005
من طلع الموضوع هذا من اطلال المحارب

بس ماعليه خمس مدري عشر دقايق عشان ابو لجين ماهي مشكله
مبروك الحج والعروس ولجين
انجاز والله يالمحارب من 2005 الي 2007
حجيت وتزوجت وخلفت
مشاء الله عليك خمسه وخميسه(z)

وصرت حليلا ياحليلك:)

المحــــارب **
14-11-07, 04:03 PM
طبعا الدوره على حساب الوزاره ولا انا مو مقتنعه
فيها بس لما عرضت على قلت يلا خل اشوف كلام
المحارب صح ولا مثل ما كنت متوقعه بيع كلام


فجر ...
تسمعين اللي يقول لاتحب ولاتكره ...
هي ليست شيئا عاديا ولكنها ليست العصا السحرية
وانا قلت لك انها اعادة النظر للأمور من زاوية اخرى ...
الخروج عن العادة في النظرة للاشياء هي اس البرمجه
مع اكتساب بعض المهارات كنتائج لذلك

تحياتي لك ياسموها ...

المحــــارب **
14-11-07, 04:11 PM
الله يسامحكم (qq167) تعبت اقرا الموضوع يطلع من عام2005
من طلع الموضوع هذا من اطلال المحارب

بس ماعليه خمس مدري عشر دقايق عشان ابو لجين ماهي مشكله
مبروك الحج والعروس ولجين
انجاز والله يالمحارب من 2005 الي 2007
حجيت وتزوجت وخلفت
مشاء الله عليك خمسه وخميسه(z)

وصرت حليلا ياحليلك:)

الاستاذة الفاضلة نصف الدنيا /وسن ات ات
مرحبا بك ثم اما بعد ...
اذكري الله بس وعقبال عندك ...
واخر انجازاتي ان صرت حليلا ...
وهي على فكرة اقل درجات الشيطنه ماقبل المنطقة المحظورة :)
استمتعي بعزوبيتك ان كنت كذلك وان تهورتي يوما وتزوجتي
فستستمتعين بالمقارنه بين ماتخيلتيه وماتعيشينه ..
وستضحكين كثيرا ... فكل التخيلات عن الحياة الزوجية لم تحمل
يوما صراخ طفل في الثانية فجرا (a14)
وانتي تراك لاحقه خير ... الله لايوليك ..

اشكر لك حضورك والعشر دقايق ...
احترامي سيدتي ...

乀م.ـِـَلاّكـَ.آلــرٍوٍح 乀
14-11-07, 04:43 PM
11-18-2005, 04:12 Am

سبحان من يحيي العظام وهي رميم سبحان الملك الكريم

وربي اذكر هالموضوع قريب بس تبون الجد

من قلب احسدكم عمره وهي عمره مالي حظ فيها

ناويه هالسنه حج ولا تمت .. لنا ااالله :)

المحــــارب **
15-11-07, 09:09 AM
11-18-2005, 04:12 Am

سبحان من يحيي العظام وهي رميم سبحان الملك الكريم

وربي اذكر هالموضوع قريب بس تبون الجد

من قلب احسدكم عمره وهي عمره مالي حظ فيها

ناويه هالسنه حج ولا تمت .. لنا ااالله :)

بنت النور ...
السلام عليكم ...
اختي ابشرك الانسان يرزق على نيته
وتبلغون بنياتكم مالاتبلغون باعمالكم ..
فانتي ان تمنيت العمرة ولم تستطيعينها فالله
بكرمه وفضله يكتبها لك .. وكذلك الحجه ..
اسال الله ان يبلغك مابنفسك وان ييسر امرك