المساعد الشخصي الرقمي

مشاهدة النسخة كاملة : دعوه للنقاش (( حول امر مهم ))


ابو شدق
14-11-05, 07:09 PM
هذه القصه حصلت لي في 25\9\1426هـ وسوف اسردها كما وقعت بالضبط

الجوال يرن وارفعه

الوالده يتصل بك

انا : سمي

الوالده : السلام عليكم

انا : وعليكم السلام والرحمه يالله حييه

الوالده : الله يحيك وشلونك

انا : بخير الله يسلمك وشلونكم انتم ووشلون ابوي

الوالده : بخير الله يسلمك كلنا بخير

انا : الحمدلله

الوالده : انا متصله اعلمك ان فلان الفلاني (( الي هو زوج اختي )) حاصل عليه حادث وصادم بعير

انا : طيب عسا ماجاهم شي ووينهم الحين

الوالده : الا الابو انكسرت يده وانشق برطمه والبنت الكبيره انشعر كتفه والولد مايدرون وش فيه وهم بالمستشفى الحين هم وامهم

انا : انا لله وانا اليه راجعون

طبعا قمت من فراشي وغسلت ورحت للمستشفى المركزي ببريده وزرت الرجل قلت له وين العيال قال حولوهم للتخصصي

وانا اشغل واروح للتخصصي وادخل عليهم طبعا الزوجه الي هي اختي والولد والبنت كلهم جميع بغرفه وحده طبعا اختي سلمت لكن الولد هو الي متاثر واسلم عليهم واجلس والتعب ماثر عليهم حمدتهم السلامه قلت وش الحاصل قالت اننا نجينا من موت قلت وش السالفه قالت انا اعلمك وش السالفه 000

تقول جاء لمنا الاسعاف حق المستشفى نفسه بموقع الحادث والولد مايقدر ينفس من الصدمه لان البعير ماثر فيه هو اكثر شي ويفتحون الباب حق الاسعاف ويحصلون الاوكسجين ولا يلقون مفتاح يفتحونه ولولا ستر الله ان اخوي كان موجود بموقع الحادث ونزل الزراديه من سيارته كان الولد راح فيها المهم راح لاسعاف المركزي واخذو اجراءتهم وحولوهم على قسم التنويم بنفس المستشفى وبعدين قالو الولد مافيه له عندنا حل نبي نحولوه للتخصصي ويالله ترجع البهذله من جديد جب الاسعاف وسواق الاسعاف رجال كبير بالسن وافتحو الاسعاف وركبو الولد طبعا الولد تقريبا من سره وتحت مايتحرك نهائي يركبونه بالعفرته واخوي يقول لهم حطو خشبه تحته لان ظهره متاثر ويقولون تعلمنا بشغلنا المهم الولد مايقدر ينفس نهائي لان الضربه جايه على صدره ومتاثر التنفس عنده ولا يحصلون فيه اوكسجين نهائيا (( بسيارة الاسعاف لايوجد فيها اوكسجين )) ويمشون وتقول الممرضه المرافقه مافيه اكسجين ويرجعون ويجيبون وحده ويحصلونه فاضيه وثلاث اسطوانات كلهن فاضيات هههههههه وفعلا شر البليه مايضحك المهم مشو للمستشفى التخصصي بعد ماشاف الولد الموت ويدخلون المستشفى ويحولون للتنويم ماعندهم مشكله المهم ويجلسون بالمستشفى حوالي سبعة ايام ماصرفو لهم دهون الجروح حنا مشترينه لهم من برا المستشفى سبعة ايام ماكتشفو كسر برجل الولد سبعة ايام لم يفعلو اي شي سوا اشاعه وطبقاته يقولون ان الحبل الشوكي مقطوع وحالته ميؤس منها المهم ابو الولد قال انا ماعترف فيكم نهائيا دبر عمره (( والحمدلله الواسطه عملت لنا الشي الكثير )) ونقله للرياض ودخلوه للمستشفى بالرياض واخذو عليه التحاليل والاشاعات وتبين ان كل شي سليم والحبل الشوكي سليم ولايوجد فيه الا بعض الفقرات طالعه من محله ويقول الدكتور مع الوقت والعلاج الطبيعي يرجع كل شي بمحله 00

الحمدلله وانا عندهم بالمستشفى بالامس والحقيقه تاثرت من قولة اهل الولد ان اصغر ممرض بمستشفى الرياض افضل من استشاري بالتخصصي ببريده

وسوف اطرح بعض الاسئله اتمنى ان نجد له حل مع ادارة المستشفى ومع المديريه العامه للصحه بالقصيم

س1: لماذا يعني القصيم بالذات عندهم تدهور المستشفيات بهذه الدرجه مع العلم ان المستشفى اقليمي ؟؟

س2: من المسئول عن هذه التجاوزات التي تحصل من الدكاتره لان كثير منهم سوو اشنع من كذا ؟؟

س3: لمن نشتكي بعد الله عن هذه الادارات السيئه وللاسف وقلة المراقبه على المستشفيات ؟؟

س4: مسألة سواقين الاسعاف ليش السواقين من العامه ويخلونه يسوق بالمرضى وكأنه سواق معده

ليش مايعطون الشباب دورات وويظفون ويخلونهم سواقين متخصصين للحالات الاسعافيه ؟؟ مو يجي سواق كبير بالسن ولايعلم من الاسعافات الاوليه الا الاسم او بعد مايعرف الاسم ؟؟

انا اقول هذا الكلام من الحرقه الي بداخلي لديرتي الى متى هذا الاستهزاء بأرواح الناس وادري بانه ليس انا من اول من قال هذاالكلام ولكن اقول لعل وعسى ان يطبق المثل (( كثر الطق يلين الحديد ))0

اتمنى طرح ارائكم وانشاءالله توصل المعلومه للمسئولين المختصين بذلك 0

ص: لمدير المستشفى التخصصي

ص : لمدير الشئون الصحيه بالقصيم

الاصل لمنتديات قصيمي نت

وتقبلو فائق التحيه والتقدير

المحــــارب **
14-11-05, 08:40 PM
أبو شدق
الحمد لله على السلامة
وابئا أبلني ان احد رد عليك من وزارة الصحة
او حتى اجاب عن تساؤلاتك
وصدقني لو تروح لهشانم ناظرة شخصيا
راح يتفلسف عليك ساعتين ويحاول اثبات ان مصادرك مشكوك بها ويعدد الانجازات
ويشهد له دكتورين من المركزي بان حالة مريضكم اخذت حقها من العناية وبان الغلط عليكم
وصلى الله وبارك



يارجل من امن العقوبة اساء الادب
عمرك سمعت احد شاكي وزارة الصحة وانصف
كل ماعليهم تكذيب في الجريدة وطز بابو المواطنين
وصورة مع التحية للبلاد الكافرة

ابو شدق
14-11-05, 09:16 PM
هلا وغلا اخوي المحارب


والله يسلمك من الشر والنار يارب


هذا القهر انهم ماراح يعدلون شي ولا راح يزينون شي


طيب بوجهة نظرك ارواح الناس رخيصه عليهم


وطيب الي ماعنده واسطه وش يزين بروحه


يجلس بالمستشفى ينتظر الموت


وفعلا مثل ماقلت من امن العقوبه اساء الادب


لان اقسى عقاب يتم فعله تسفيره الى بلاده لو ارتكب اشنع الجرائم


فالله يلطف بنا ياحي ياقيوم


مشكور على مرورك وتعليقك اخوي العزيز


وتقبل تحيتي

أم أديم
14-11-05, 09:25 PM
الحمدلله على السلامه طهور ان شاء الله

بالنسبة لمستشفى التخصصي كثير رفعوا فيه وفي ادارته اللي ماتراعي الا اهل الواسطه

وللأسف مافيه أي جديد لكن الجديد اننا كل يوم نسمع ونشوف مصيبه من مصايبهم

انا كنت مع امي قبل كم يوم ودخلنا الاسعاف وكانت امي تعاني من سعال شديد

وقامت الدكتوره من دون فحص ومن دون اشاعه وصرفت الدوى

قلت لها لو سمحتي امي قبل كم سنه اصيبت بالدرن وتعالجت عندكم ثلاث شهور تقريباً واخاف ان المرض عاد لها

لان الفيروس احيانا ينشط

قالت صحيح ؟ خلاص بنسوي لها اشاعه وتحاليل واسكتت دقيقة وبطلت عن التحاليل

وقالت لي وش رايك احولكم مباشره لمستشفى المركزي على طول

قلت طيب لكن على أي اساس تحوليننا وانتي ماتدرين هو اللي فيها درن والا لا ؟؟

اكتبي ورقة تحويل واكتبي كلامك هذا كله بعدها خافت من المسئولية وقالت خلاص بنسوي التحاليل

والاشعه هنا وبعدها نشوف

انا يوم شفت الوضع سئ وانا اللي جالسه امشيها كلمنا الواسطه

وجابوا لنا دكتور ممتاز وضبط الوضع كله

وصارت اميمتي مافيها الا كحه عاديه من تغير الجو والحمدلله والشكر

اخوي وضع مستشفياتنا للأسف متدهور مره وياليت أحد من المسئولين يقرا موضوعك ويسارعون لتعديل

الاخطاء الكبيرة التي قد تؤدي بحياة الناس بسبب هذا الاهمال


الله يعطيك العافيه والحمدلله على السلامه مره ثانيه لاختك وعيالها وزوجها ومايشوفون شر يالطيب

ابو شدق
14-11-05, 09:36 PM
الله يسلمك من الشر والنار خيتي ام اديم


انا ودي اقبع بادارته هالمستشفى لانه محسوب علينا مستشفى وهو بالعكس يزيد المرض


امس تقول لي اختي ان الدكتور الي هناك ببريده يقول خلاص الولد ائيسو منه مشلول


والله لو انا ببريده امس وربي لامسح به بلاط المستشفى كله بالله عليكم هذا دكتور


وهذا دليل اميمك الله يخليه لك ويرزقك بره


لكن اظن المسئولين اذا شافو مثل هالمواضيع ضربو حوله ولاتسنهم شافو شي


لكن شكلي ابعرضه عليهم بمكاتبهم غصب عليهم ولا نتهاوش حنا واياهم


وش رايكم ؟؟؟ (( الى الحين تسبده محتميه ))


اكرر شكري وتقديري لكي اختي على هذا المرور والتعليق


وتقبلي تحيتي

المزدادعلما بجهله
14-11-05, 10:31 PM
بسم الله الرحمن الرحيم

اولاً الله يشفي مرضاكم ومرضى المسلمين...امين,


الحقيقة ان وضع وزارة الصحة مزري وبانحدار مستمر...

كنا لانرى المستوصفات الخاصه الى نادر ..

وام الان فهي بكثرة واكثر من الحكومية ...

وهذ دليل على تدني مستوى المستشفيات الحكومية..

واما من ناحية الهلال الاحمر ...فانا بصراحة ممتن لهم بجل الامتنان . لقد كان لهم موقف لن انساه ماحييت ؛
حيث انقذوا زوجتي من موت محقق (من بعد الله).

ولكن انا لا ابريهم جميعا؛ قد يكون فيه تهاون عندكم بالقصيم فقط.....


واما لمن تشكي ... فانصحك ان تشكي عندنا بامنتدى,

ولا تروح بعيد لانه الضاهر ان المسؤلين متعمدين تدني المستوى علشان...(التامين الصحي , وتسويق الادويه , وانعاش المستوصفات الخاصة)والفهيم يفهم..

والسلام عليكم.

ابو شدق
14-11-05, 11:10 PM
اخوي المزداد جهلا بعلمه

اولا جزاك الله خير على مادعوت

وثانيا انا ماسبيت الهلال الاحمر فالهلال الاحمر متدربين

لكن سواقين اسعاف المستشفيات وليس الهلال الاحمر

ونعم كما قلت بالضبط

اشكرك اخوي على تشريفك ومرورك

وتقبل تحيتي

مستغرب
15-11-05, 08:31 AM
س1: لماذا يعني القصيم بالذات عندهم تدهور المستشفيات بهذه الدرجه مع العلم ان المستشفى اقليمي ؟؟

أخي ابو شدق

لأنه لا يوجد مسئول قوي يقوم بضبط الأمور مع أن الدكتور هشام ناظره يقوم بعمل كبير

لكن كنا نتمنى منه أكثر لأنه أكثر شخص يعلم بتدهور المستشفيات في هذه المنطقة

س2: من المسئول عن هذه التجاوزات التي تحصل من الدكاتره لان كثير منهم سوو اشنع من كذا ؟؟

المسئول جميع شخص في هذا البلد

فيجب أن تكثف الخطابات في الشكوى على هؤلاء

وأعتقد أن الشكوى يجب أن تصل إلى أكبر مسئول لأني أعتقد ( ان المنطقة مافي يديهم الا مفاتيح التبن )

س3: لمن نشتكي بعد الله عن هذه الادارات السيئه وللاسف وقلة المراقبه على المستشفيات ؟؟

يجب أن يصعد الموقف للمسئولين الكبار ونشر هذه التفاهات عبر الصحف المحلية


س4: مسألة سواقين الاسعاف ليش السواقين من العامه ويخلونه يسوق بالمرضى وكأنه سواق معده

هنا المشكله ان سواق الإسعاف مثل سواق شيول بالبلديه

لا يوجد تصنيف لسواقين الإسعاف سد فراغ بس

على فكره قبل سنه ارتفعت حرارتي ورحت للمستشفى المذكور التخلصي

ومن الباب بس دخلت راسي صرف لي الدكتور السوداني علاج قال عندك برد سوادي اعتقد أنه راعي غنم

يعني لو إني رايح للسيف مصيخ لي الإدارة كان أفضل من هالزول

وأنا متأكد إن هالطبيب السوداني شايفه في قبه يرعى غنم كاني ماني واهم

والله يشفى مراضكم إخوي أبو شدق

ابو شدق
15-11-05, 12:39 PM
حيا الله مستغرب

أخي ابو شدق

لأنه لا يوجد مسئول قوي يقوم بضبط الأمور مع أن الدكتور هشام ناظره يقوم بعمل كبير

لكن كنا نتمنى منه أكثر لأنه أكثر شخص يعلم بتدهور المستشفيات في هذه المنطقة

اخوي مستغرب لو عمل جهد لبين لانه هو المسئول الاول والاخير عن هذه الاداره والدكتور هشام سبق وان صار مديرا للمستشفى ولا شفنا جديد اتوقع انهم يبون عين حمراء ودور غيره يمسك المحل

المسئول جميع شخص في هذا البلد

فيجب أن تكثف الخطابات في الشكوى على هؤلاء

وأعتقد أن الشكوى يجب أن تصل إلى أكبر مسئول لأني أعتقد ( ان المنطقة مافي يديهم الا مفاتيح التبن )

يعني لو كثفنا الشكاوي راح يسون شي الا ان تسان تغيرت الوزاره كامله ومن ناحية المنطقه عز الله انك جبته


يعرفون يطبقون فقط من غير جديد ولا برفيسور عند سمامه كخخخخخخخخ وشلون بالله تجي هاذي


يجب أن يصعد الموقف للمسئولين الكبار ونشر هذه التفاهات عبر الصحف المحلية


نتمنى ذلك ان نكون يد واحده وتخبر لي صحفي ينقله لي تدري مستغرب انا ماقهرن الا هالاسعاف الي مابوه اكسجين


فاقع مرارتي


هنا المشكله ان سواق الإسعاف مثل سواق شيول بالبلديه

لا يوجد تصنيف لسواقين الإسعاف سد فراغ بس

على فكره قبل سنه ارتفعت حرارتي ورحت للمستشفى المذكور التخلصي

ومن الباب بس دخلت راسي صرف لي الدكتور السوداني علاج قال عندك برد سوادي اعتقد أنه راعي غنم

يعني لو إني رايح للسيف مصيخ لي الإدارة كان أفضل من هالزول

وأنا متأكد إن هالطبيب السوداني شايفه في قبه يرعى غنم كاني ماني واهم

والله يشفى مراضكم إخوي أبو شدق


تدري مستغرب انهم بالاسعاف وطالعين من المركزي للتخصصي صدم بهم الاسعاف مرتين


وخضهم كلهم لمين رابو


واحمد ربك انه قال لك انه عندك برد ماقال شي اعظم


اللهم امين والله يجزاك خير اخوي ومشكور على مرورك وتعليقك


تحيتي

القناص المحترف
15-11-05, 01:40 PM
أهبال اوالله المستشفى

الله يقومهم باسلامه

قلم بلا قيود
15-11-05, 04:25 PM
الحبيب أبو شدق

أولاً حمد لله على سلامتهم وعافى الله مصابهم واقامه لكم بالسلامة

الأمر الأخر صدقني ياسيدي هذا الأمر متكرر في مستشفيات كثيرة
وحسبي ما ألتمسه في منطقتي عندما عين مدير للصحة جديد تلك التغيرات الملموسه في المستشفيات والمستوصفات
من هذا الأمر أيقنت أن العامل الأول للتحسين هي أن حمل المسؤل العام عن الصحة على عاتقه المسؤلية وأدى الأمانة حقها وهذا ينطبق على أي قطاع أخر
فهم الرجال المسؤليين أن أحسنو العمل عم الخير وأن تغافلو وأهملو وأوكلو المهام على عاتق غيرهم وإن كان جديراً بذالك حدثت التجاوزات ويبقى الرادع معلقاً بأولويات ومجاملات فهو محوسب من رجال المسؤل
غير ذالك المحسوبية لدينا على تلك الأخطاء بطئية جداً جداً ودائماً يوجد لها الأعذار ويستباح بها حقوق الغير
ألى وقد سمعنا بحادثة شهار ماذا حدث بالتحقيقات للأن لا شئ يذكر بل تكتم نرجو أن يكون خيراً

لذا كان الله بعون المواطن

من جديد حمد لله على سلامتهم وكان الله بعونكم بحفظ الله

المتحد
15-11-05, 04:26 PM
ابوشدق
الامكانيات متوفره لدينا والميزانيات كبيره للقطاع الصحي
لكن هناك هدر
وعدم إدارتها كما ينبغي
لاحول ولاقوة الا بالله
.

ابو شدق
16-11-05, 04:39 PM
الحبيب أبو شدق

أولاً حمد لله على سلامتهم وعافى الله مصابهم واقامه لكم بالسلامة

الأمر الأخر صدقني ياسيدي هذا الأمر متكرر في مستشفيات كثيرة
وحسبي ما ألتمسه في منطقتي عندما عين مدير للصحة جديد تلك التغيرات الملموسه في المستشفيات والمستوصفات
من هذا الأمر أيقنت أن العامل الأول للتحسين هي أن حمل المسؤل العام عن الصحة على عاتقه المسؤلية وأدى الأمانة حقها وهذا ينطبق على أي قطاع أخر
فهم الرجال المسؤليين أن أحسنو العمل عم الخير وأن تغافلو وأهملو وأوكلو المهام على عاتق غيرهم وإن كان جديراً بذالك حدثت التجاوزات ويبقى الرادع معلقاً بأولويات ومجاملات فهو محوسب من رجال المسؤل
غير ذالك المحسوبية لدينا على تلك الأخطاء بطئية جداً جداً ودائماً يوجد لها الأعذار ويستباح بها حقوق الغير
ألى وقد سمعنا بحادثة شهار ماذا حدث بالتحقيقات للأن لا شئ يذكر بل تكتم نرجو أن يكون خيراً

لذا كان الله بعون المواطن

من جديد حمد لله على سلامتهم وكان الله بعونكم بحفظ الله


الله يسلمك اخوي ابو جابر


طيب هذه الوزاره تختلف عن باقيها من الوزارت لانها وزاره حساسه


وان عندنا ميزانيات بالهبل ويوجد بالمستشفيات اجهزه متطوره ولكن من يشغلها بالوجه الصحيح


وفي منطقتكم الشي الكثير من هذه البلاوي المتلتله ونقول الله المستعان


مشكور اخوي ابوجابر على مرورك وتعليقك


وتقبل تحيتي

ابو شدق
16-11-05, 05:12 PM
ابوشدق
الامكانيات متوفره لدينا والميزانيات كبيره للقطاع الصحي
لكن هناك هدر
وعدم إدارتها كما ينبغي
لاحول ولاقوة الا بالله
.


هذا الموسف اخوي المتحد


حياك الله اخوي ومشكور على مرورك


تحيتي

الصواعق
16-11-05, 05:38 PM
حمدلله على السلامة
وشفى مرضاكم


بخصوص مشكلتك

فيها أكثر من بلوى

لا طرق
ولا اسعاف
ولا مستشفيات سنعة ..!

شيء يقهر

واللي يقهر أكثر
نص اعضاء مجلس الشوى من أهل القصيم

وأكثر المناصب والوزراء من الرياض

ومع هذا شف مستوى المستشفيات؟

مدينة الرس (( بحكم انها ديرتي ))

أرى أنهم داجين وبالقوووووووة فتحوا مستشفى جديد مع انهم يعانون من الكثير من سوء التنظيم

فيه كوادر ممتازة وفيه معدات

لكن عدم الإنتباظ والإحساس بالمسؤلية هو السبب في تدهور الصحة


والله لا يبارك فيهم


والله يشفي ولد اختك وباقي أهله

ويستر عليك وعليهم وعلى كل المسلمين

يامال العافية يابوشدق

راقي قول وفعل
16-11-05, 08:19 PM
يا أخي الحبيب الصحة كلها متردية إلا مستشفيات محددة للذوات ولأصول المباهاة في فصل السياميين وهذه هي الحقيقة


ليست القصيم وحدها


وليتهم يصورون لنا طائرة الإخلاء الطبي التي لاتستخدم إلا بمنحة!!!!!!!!!!!


وهي أقرب للتلف أكثرها


وعلى كل حال حمدا لله على سلامة أقاربك

أم مشاري
17-11-05, 03:24 AM
اخي ابو شدق:

وعلى وزارة الصحة ياقلب لاتحزن .........لقد اسمعت لو ناديت حيا ........ولكن لاحياة لمن تنادي

بالنسبه لمستوى الاسعافات عندنا فحدث ولا حرج .(.قصة الاسعاف بدون اكسجين ذكرتني بطاش ما طاش

بحلقة الدفاع المدني اذا وصلو للحريق وما معهم ماء لاطفاء النار .)

هل سمعت بقصة شابين تعرضا لحادث في احدى الطرق بالمملكه وكانت اصابة احدهما شديده فاتصل الشاب

الاخر للتبليغ وطلب من يسعفهم ولكن لم يحضروا بسرعةفخاف على صديقه وقام بالاتصال على911

بأمريكاوشرح لهم اصابة صديقه واخبروه بالاسعافات الاولية التي يستطيع تقديمها لحين وصول

الاسعاف .....وعند وصولهما للمستشفى اثنى الاطباء على الاسعافات التي قام بها وانها خففت من مضاعفات

الاصابه .

انا كل ماشفت حلقات911احزن واقول ليش مانصير زيهم في سرعة تقديم الاسعافات وش ينقصنا

لدينا الميزانية التي تكفي لتدريب الكفاءات وتوفير الاجهزه ووضع الخطط والبرامج لتنفيذها ؟.

على العموم الحمد للة على السلامه ....وان شاء الله سلامة دائمه ...والله يغنينا عنهم بالعافيه

ابو شدق
17-11-05, 08:56 AM
حمدلله على السلامة
وشفى مرضاكم


بخصوص مشكلتك

فيها أكثر من بلوى

لا طرق
ولا اسعاف
ولا مستشفيات سنعة ..!

شيء يقهر

واللي يقهر أكثر
نص اعضاء مجلس الشوى من أهل القصيم

وأكثر المناصب والوزراء من الرياض

ومع هذا شف مستوى المستشفيات؟

مدينة الرس (( بحكم انها ديرتي ))

أرى أنهم داجين وبالقوووووووة فتحوا مستشفى جديد مع انهم يعانون من الكثير من سوء التنظيم

فيه كوادر ممتازة وفيه معدات

لكن عدم الإنتباظ والإحساس بالمسؤلية هو السبب في تدهور الصحة


والله لا يبارك فيهم


والله يشفي ولد اختك وباقي أهله

ويستر عليك وعليهم وعلى كل المسلمين

يامال العافية يابوشدق


هلا وغلا بابوعبدالاله


وش نفعنا ان المسئولين اغلبهم من القصيم


لا بالصحه ولاغيره مايجي الشي الا بجهود اهل المدينه


والي يوقف بوجيههم المسئولين نفسهم


بارك الله فيك اخوي على مرورك وتعليقك


وجزاك الله خير على الدعوه واللهم امين


تحيتي

ابو شدق
17-11-05, 09:10 AM
يا أخي الحبيب الصحة كلها متردية إلا مستشفيات محددة للذوات ولأصول المباهاة في فصل السياميين وهذه هي الحقيقة


ليست القصيم وحدها


وليتهم يصورون لنا طائرة الإخلاء الطبي التي لاتستخدم إلا بمنحة!!!!!!!!!!!


وهي أقرب للتلف أكثرها


وعلى كل حال حمدا لله على سلامة أقاربك


هلا وغلا باخوي راقي


طيب الي ماعندوه واسطه وش يسوي ؟؟؟


والي مخصصه لهم المستشفيات نازلين من السماء بفاين


الله يسلمك اخوي ومشكور على مرورك وتعليقك


تحيتي

ابو شدق
17-11-05, 09:24 AM
اخي ابو شدق:

وعلى وزارة الصحة ياقلب لاتحزن .........لقد اسمعت لو ناديت حيا ........ولكن لاحياة لمن تنادي

بالنسبه لمستوى الاسعافات عندنا فحدث ولا حرج .(.قصة الاسعاف بدون اكسجين ذكرتني بطاش ما طاش

بحلقة الدفاع المدني اذا وصلو للحريق وما معهم ماء لاطفاء النار .)

هل سمعت بقصة شابين تعرضا لحادث في احدى الطرق بالمملكه وكانت اصابة احدهما شديده فاتصل الشاب

الاخر للتبليغ وطلب من يسعفهم ولكن لم يحضروا بسرعةفخاف على صديقه وقام بالاتصال على911

بأمريكاوشرح لهم اصابة صديقه واخبروه بالاسعافات الاولية التي يستطيع تقديمها لحين وصول

الاسعاف .....وعند وصولهما للمستشفى اثنى الاطباء على الاسعافات التي قام بها وانها خففت من مضاعفات

الاصابه .

انا كل ماشفت حلقات911احزن واقول ليش مانصير زيهم في سرعة تقديم الاسعافات وش ينقصنا

لدينا الميزانية التي تكفي لتدريب الكفاءات وتوفير الاجهزه ووضع الخطط والبرامج لتنفيذها ؟.

على العموم الحمد للة على السلامه ....وان شاء الله سلامة دائمه ...والله يغنينا عنهم بالعافيه


هلا وغلا بام مشاري


هذا الي نطمح له


انهم يدربون الشباب ويخلونهم هم بالاسعاف


مهوب يجتمعون بغرفه وشاهي وتتن وبلوت بالغرفه


ومتى ماجاهم حاله شغل ومشى وهو يفكر بالورقه


الله المستعان


مشكوره على مرورك وتعليقك


تحيتي