المساعد الشخصي الرقمي

مشاهدة النسخة كاملة : الرازق في السماء سبحانه


هلال نجد الاوسط
18-10-05, 07:38 PM
مساكم الله بالخير جميعا....بما انا مرينا قسم القصص والروايات ولما في قلوبنا من الصدق والمحبه لمنتدانا الغالي حبينا نشارك بقصه حقيقيه حصلت في منطقه الرياض.
هذا واحد من الشباب موظف على قد حاله ودخله الشهري ياله يلحق على نفسه الولد سعودي من اسره عريقه واشهد انا بالله انه يستاهل كل خير لان الولد خلوق ومحترم بشكل فضيع وبنفس الوقت من الزملاء الخاصين والمقربين لي الولد اسمه خالد عمره 27 سنه راتبه الشهري حوالي 3500 ريال امه متوفيه من حوالي 5سنوات والده متزوج وعايش بالكويت وبالخط العريض ناااااسيه ليس لديه اخوه اشقاء .لديه اخت من ابيه ويقول الاتصال بيني وبينها بواسطه التلفون فقط ومتزوجه ولديها اولاد وبنات وساكنه في المنطقه الشرقيه ومستوره الحال... خالد يسالني دائما ياخي كيف بنفتح بيت ونتزوج ونصير زي الناس نعيش وننعم باولاد ومال ارد عليه انا ييسرها ربك ياخالد ماتضيق الا تنفرج.
في يوم من الايام كلمني قال ياخي عندي مشكله في اسناني احس بألم فضيع تعرفلي دكتور اسنان كويس اروحله قلتله والله فيه عياده بالمكان المهم ووصفتله ولاراح.
الولد عمله مأمن لهم في مستشفيات الحرس الوطني مجانا......
راح لمستشفى الحرس الوطني بالرياض واخذ موعد مع طبيبه استشاريه وقابل الطبيبه وعالجته وقالت له هذا العلاج وراجعلي بعد اسبوع وامتنع عن شرب البارد والجماع وانشاء الله ماتشوف شر قالها البارد مقدور عليه الجماع انا ماني متزوج بس لو احتلم في الليل هذا من رب العالمين مأقدر اعترض عليه....
قالت هي ليه ياخي شاب في زهره شبابك ولا تزوجت حرام عليك قال هو خليها على الله الوضع مايساعد انا يالله امشي نفسي براتبي كيف تبيني افتح بيت وانا وضعي المادي مايساعدقالت له انت اعزم ويسهلها ربك قالها شكرا الله يوفق الجميع اخذ الموعد بعد اسبوع او اكثر شوي وراح الرجال...
رجع بعدها وكشفت عليه قالت ماشاء الله الجرح شفا والحين مافيه الم ولا ازعاج قالها يعطيك العافيه خلاص جاء بيمشي قالت وش صار معك على الموضوع اللي كلمتك فيه قالها اي موضوع قالت له الزواج ضحك قالها من جدك ومنهي سعيده الحظ اللي بتاخذني قالت انا قلتلك أعزم على الموضوع ولا عليك يقول قلتلها من باب المداعبه على يدك انا جاهز اذا تبيني اللي تقولين عليها بس بثيابي اللي علي انا جاهز........
قالت له عطني رقمك وانا اتصل عليك يقول عطيتها رقمي ودخلني شك عجيب لمده يمكن ثلاث ايام وبعدها قلت ذي فاضيه وتتمسخر (على فكره الرجال مره عاقل ويناظر بنات الناس بكل احترام وتقدير ) جاه اتصال بعدها من نفس الشخص وقالت له لقيت لك وحده تبي الستر بس خل اهلك يكلمون على ذا الرقم يقول عطتني رقم بيت وخلهم يتقدمون رسمي يقول قلت اي أهل وأي بطيخ انا وضعي كذا كذا كذا وقالها السالفه قالت خلاص كلم انت صاحب الشأن موب ابوك ولا اختك فكر بالموضوع واذا عزمت دق على الرقم اللي عطيتك واسئل عن عبدالله وقله انا بخطب من عندكم يقولون عندكم بنت اسمها (.......) وانا ابي اناسبك وتكلم عادي كانك اي واحد يبي يخطب من عائله قالها طيب اذا قالي عبد الله المهر وش اقول له اقوله مامعي شي؟؟؟؟؟؟؟ قالت ماعليك انا مضبطه الوضع مالك شغل بشي يقول قلت علميني مايصلح كذا وشلون مظبطه الوضع لا تحطيني بوضع اني مغفل مدري عن شي قالت ياخي بالعربي انا اللي بتتزوجني وانا بنت بكر بس بس عمري 38سنه وبحكم دراستي وعملي مافضيت اني اتزوج وجاء نصيبي شديتني من يوم اول مراجعه لك وجت منك وقلتلك فهمت الحين والرقم اللي عطيتتك رقم اخوي الكبير وانا مفهمته الوضع واخوي متفهم للوضع وينتظر اتصالك والى الحين ماصار شي تبي تشوفني تتقدم رسمي وتجي البيت زي الناس الثانين فهمت ومن ناحيه الماده انا اتكفل بكل شي من الالف للياء......... فكر بالموضوع وردلي قبل لاتتصل على بيتنا وتطلب يدي من اخوي.............................................. ..
الرجال جلس حوالي 3 ايام في حيره استخار وتوكل على الله وخطب وتزوج وتغيرت دنياه 180 درجه شقه باسمه وسيارته القديمه فورد 88 باعاه وجته سياره هديه من نوع لكسز 430 موديل 2002 على موديلها طبعا ويدير اداره محلات تجاريه متنوعه مابين ملابس نسائيه ومستوصف اهلي ومحلات اكسسوار ومحلات جوالات واستقال من وظيفته السابقه وتفرغ كليا للتجاره ورزق بولد سماه مشعل الله يخليه له ويصلحه يارب العالمين(كتكوت الولد) وعايش مبسوط مرتاح الله لايغير عليه يارب العالمين.............
( الموضوع اللي قلته ذا من جد وقسما بالله لازدت بحرف ولا نقصت بحرف وسباحنه رازق من في الارض جل جلاله)
والله يوفق الجميع الى مايحب ويرضاه. وننتظر التعليق من الجمهور ولاتنسونه بالدعاء.

حسن خليل
19-10-05, 04:26 PM
قصة جميلة جداً

سبحان الرازق

ولله يعطي كل انسان بحسب نيته

سلمت يداك أخي الكريم على هذا النقل الرائع.

بارك الله فيك وجزاك الله خيراً

هلال نجد الاوسط
20-10-05, 02:32 AM
اهلا وسهلا بمشرفنا الغالي..... وأعضائنا الكرام

بسومه
02-04-06, 06:23 PM
سبحان الله يرزق من يشاء بغير حساب

ŘǻŶąŅ~ •●∫
09-04-06, 07:07 PM
قصة جميلة

مشكووور

الفارس910
06-07-06, 07:35 PM
الله يعطيك العافيه