المساعد الشخصي الرقمي

مشاهدة النسخة كاملة : مغامرات مغاط....الحلقه الثانية


ابوهتون
08-10-05, 04:06 PM
الله انك تحيهم كلهم

اليوم مغاط جايب لكم سالفه......ماتخرش ميه

بس الرجال شارط ان اللي ماقراء الحلقه الاولي يقراها بعدين يجي للثانيه>>>>مسوي مسلسل

اخليكم مع مغاط والله الله بشخابيطكم علي الموضوع

----------------------------------------------------------------------------------------------------------------------------------------------------------------------------

الحلقة الثانيه

في بيتنا بترول

الصلام علاكم .. يالله انك تحييهم <<---- معزوم في رماح

-----------------
قصتي اليوم قصة .. ما ادري من وين أبدأ .. مدري من وين انتهي
مدري من وين أبدأ <<-- عدتها حسيت انها قوية
لكن تدرون اسمعوا :
مرة من المرات .. وحنا طالعين من المدرسة .. لزمت على ابوهتون ولد خالتي ......... <<--- تحسبون اني مخفة بقول اسم خالتي
اقولكم مسكت ابوهتون ولد خالتي حصة <<-- كع .. وقلت غصب(ن) عليك تجي تغدا عندنا .. قال وشلون ؟! قلت لا أبلين ولا بعدين <<-أسمع بها

قلت لازم يا ابوهتون تجي تتغدى .. يا اخي عشانك دخلت (علمي) تغلى علينا .. يا اخي والله لو انك داخل المهني الحين !!

أمش بس تعال خلنا .. نوسع الصدر في المزرعة (( طبعا انا ساكن في بيتنا اللي في مزرعتنا))

تعال بس يا ابوهتون .. نسبح ونستانس ونوسع الصدر في المزرعة .. قال ابوهتون هالدافور .. والله ما اقدر يا اخي انا اذاكر .. قلت انا لله وانا اليه راجعون
قل تم بس !! قال لا والله ما اقدر انا عندي بحث عن البترول .. ولا اقدر افرط في الدرجات .. وبعدين بصراحة يا مغاط .. ما ودي افرط بالنجاح ..
قلت طيب بس وشلون بترول .. قال لي ابوهتون :
يا مغاط .. بحثي عن : أصل نشأة البترول .. ومدرسنا يقول : ان البترول أصلا .. هو (( بقايا كائنات حية متحللة )) وعلى هالاساس ابكتب البحث

قلت : قل والله اكييييييييييد .. خلاص يالله مع السلامة لا تجي تغدى معنا اشوفك على خير <<--- فهم غلط وهذا اللي ما نبيه


بداية القصة

طبعا بعد ما سمعت كلام ابوهتون .. وانا اعض شليلي .. وامغط لم ابوي ..
وادخل عليه والقاه في المجلس يتسدح .. قلت يبه .. ابشرك خلاص امورنا تبي تزين واحوالنا تبي تصير ما يحتاج ..

قال لي ابوي : اقول همّز وكل تبن
قلت : يبه .. انت وش تسوي بالعنز اذا ماتت .. قال : أدفنها .. جعلي ادفنك !!
قلت حلو !! حلو !!
قلت له : من متى وانت تدفن هالغنم والبقر في المزرعة ؟!
قال : والله يا وليدي من عرفت نفسي .. هذا سلمي وسلم ابوي وجدي .. الفطيسة ندفنها <<-- زين السلم

وانا : اخم ابوي واقعد اجغفه .. وابوسه .. .. قلت يبه جانا الفرج .. بيتنا اجل فيه بترول .. تو يبه انا مع .. ابوهتون ولد خالتي اللي داخل علمي .. وقال لي : ان البترول يجي اذا كثرن الكاينات الحيه <<-- ما اعرف اقولها بالفصحى
في الارض .. والحمد لله مزرعتنا .. من عرفناها وحنا ندفن فيها هالكاينات اللي يقول ابوهتون ..

فز ابوي من مكانه .. وقال انت تقوله صادز !؟
قلت له : وش دعوى : كبرك انا امزح معك !!
قال لي ابوي والله لو يصير هالكلام صح يا مغاط .. ويظهر في بيتنا بترول .. والله اني لأركبك معي في الغمارة <<-- دايم مجحود في الصندوق

قلت يبه : افا عليك بس انا مغاط ما اجيب الا الاخبار الزينة..

ونقعد نطامر في البيت ونصارخ !! بيتنا فيه بترول .. او يالله .. وكل البترول كلهم لا فرق الله شملهم ..كل البترول خيالة !! وانواع الرقص وانواع المطامر !!


دروا كل الجيران .. وكل الجماعة اللي في المسجد ان عندنا بترول ..
وجوا لمنا يهنونا .. ويقولون مبروك عليكم البترول ..
ومن هنا بدت الرجة والهبال !!!!!!!!!!!!!!!!!!!!!!!!!!!!!!!!!!!!!!!!!!!!

وصرت البس كنادر حبوب .. وصرت اسمي الفلوس ( دراهم ) .. واسمي العنناص أناناس
<<-- ودي اكشخ بس ما اعرف .. وصرت اروح اشتري من البقالة .. واقوله : سجل صديق واذا طلع البترول عطيتك !! ويرد على ابو هنود : ويقول لي ما فيه مشكل عمي مغاط

وصار كلن يقدرني .. اذكر اول اذا جيت اروح العب كورة .. يقولون لي : جاء ابو نخرور وش يبي <<-- ويصرفوني حارس .. واذا جا بلنتي ما يخلوني امسك .. يقولون لي رح اجلس ورا الحارس عشان تجيب الكورة والحين .. اول من يختارون انا .. .. وكل(ن) يختارني قبل !! وصاروا ما ينفخون علي ..
واقعد افكر واقول صدق المثل اللي يقول : ( البترول يغير النفوس)

صار ابوي .. كل مغرب يجلس في البيت .. ونجيب له كرسي يقعد عليه .. وانا واقف بجنبه .. وناخذ المعاملات من الناس المحتاجة .. واللي يبون مساعدة ..
وكل(ن) صار يجي لمنا .. واللي يقول انا مديون .. واللي يقول : انا ابي حراثة .. واللي يقول ابي ارض !! يا اخي هالناس ما قدر شافوا احد عنده بترول الا حنا <<-- كل تبن اقول !!
كانت امي تدرس في محو الامية .. ما عمرها نجحت في حياتها ولا مرة !!
يوم طلعت النتايج واثرها .. صايرة الاولى على الفصل .. ومكتوب على شهادتها .. رقم جوال المديرة تحت

وابوي حلف ان جتنا بنت : والله ان يسميها ( قاز ) .. وصرنا عايله ما يحتاج ..
اذا مريت في الشارع كل(ن) يسلم علي .. ويحببوني .. حتى حسني المصري النصاب حق الحلاق !! درا ان عندنا بترول .. وقال لي :
بص يا مغاط أنا حأعمل لك حتة تحليأة (تحليقة) ما تخرش مية !!
قلت اقول : اها بس وعن الخربطة .. وسو لي (توليت ) <<-- محروم منها ايام الدجة .
قال انت تأمر يا باشا <<-- انا يعني .. قلت حلق لا والله أروح لم حلاق(ن) اخر .. وهو يحلقني والله ويسفر وجهي .. واغدي ما عندك باحسن مني ..
وادخل يدي بمخباتي .. ابشوف هو يبي الفلوس والا لا .. قال والله ما تدفعش حاقة يا باشا خليها علي .. قلت بكيفك <<-- والله اللي ما صدق

المهم حالتنا صارت على كيف كيفك .. وابوي ما يصدق على الله ان به عنز(ن) مريضة ..او بقرة(ن) بها كسر على الخفيف .. على طول دفن !! والله مار صار ما يناظر .. يدفن وهو عجل


صارت المزرعة والبيت .. انواع الخياس .. قسم بالله من بعيد تشم الخياس ..
وابوي يشم الريحة .. ويقول : ااااااااااااااااه يا ريحة ابوي وامي ايه هذا البترول النسع مهوب بترول الدمام ...

وصرت ما انا م في الليل .. ألبس ( خوذة ) <<-- مثل حقين ارامكو وأجلس بين الشجر احرس البترول .. أخاف يجيه احد لا قدر الله <<---
وصرت ما انام .. وانواع الحلوم .. في هالبترول .. اتخيل انه طلع خلاص ..
واننا صرنا من عيال المطخطخين .. وأقعد أفكر .. واقول وش بسوي بالفلوس حقات البترول الحين .. ..
مرة اقول ابفتح مطاعم .. ويصير لي مطاعم واسميها (( بابا مغاط ))
ومرة اقول لا ابشتري معرض سيارات .. وخذ تفكيرات .. حت شعر رمشي وانا افكر !!

وكل صبح اقوم وارش الارض مويه .. ابوي قايل لي عشان يصير البترول .. مابه رصاص .. احشر والديه مويه .. ومن زود الحرص ملزق على بيتنا لوحة .. كاتب(ن) عليها ممنوع التدخين
يقعد يشب البترول .. همين ابلش عاد !! من يبي يطفيه !!

وكل ظهر .. ما عمرنا سوينا غدا(ن) ابد .. كل يوم .. ناس جايبين لنا غدا .. وما تشوف عينك الا تلميحات .. اللي كاتب(ن) على ماعونهم ( نفط )
واللي حاطين بزار وكاتبين عليه .. بترول بالبصل .. واي شي يطري على بالك من انواع التلميح

المهم مرت الايام ...

وكبر أبوي وأمي بعد .. قال لي أبوي : مغاط
قلت : هاااااااه <<-- تعرفون ولد نعمة
قال : الظاهر ان ما به بترول .. قلت فال الله ولا فالك !! الا به بترول وامور(ن) سنعة وش هالحتسي ؟!! .. خل عنك حتسي ابو حدرية جارنا تراه يحب الشر !!

بيني وبينكم .. طقني الهوجاس قلت : تخيل ما فيه بترول ؟!! وش يبي يصير وضعي قدام العيال .. واقعد افكر .. الله تبي ترجع لي ( ابو نخرور )
وغلام راعي البقالة .. تبي تصير نفسه شينة(ن) علي .. ويبي ينشب في حلقزي يبي فلوسه .. وأمي يبون يصقطونها هاللي ما يخافون الله

المهم ... مات الوالد وصرت اجلس بمكانه اشوف أمور الرعية !! <<--مولم العصابة قبل الفلقة

سمع بخبر البترول واحد من اعز اصدقائي .. اسمه ( سالم ولد الدلالة) <<--عاد انتبهوا ذا يتكلم عليه احد .. والله لأفرشه .. من اعز صديقيني
قال لي : يا مغاط شف حالك وشلون ؟؟ تدهورت صحتك وعيونك صارت تسنها متساوي في رقبة صلبي .. ما صرت تنام .. لا عادت عليه بترول

وانا اخوك فيه شركات بـ 500 ريال تكشف لك عن البترول هو صحيح موجود ولا لا .. وريح نفسك يا اخي .. منها انك ما تعيش في وهم .. ومنها ترتاح وتريح هالناس ..
قلت : هاه والله انها مهيب شينة !!
قلت باتسر ان شاء الله اجيب هاللي يكشفون ..
ويضيق صدري وارجع افكر مرة ثانية اقول لو ما يصير فيه بترول وش يبي يصير !؟؟؟؟

قلت اعوذبالله من الشيطان الا به .. وراي قمت اوسوس انا ..

المهم واجيب لك ذاك الفلبيني .. واوكله اكل ما ياكله ابن امه <<-- ينقالك رشوة
ويجيب عدته .. واغراضه .. عشان يكشف على الارض يشوف بها بترول والا لا ..

ويجي يدخل حديدة(ن) معه في الارض وتوافق لها .. بطن حاشي <<-- دافنه المرحوم
يوم انشق بطنه .. قلت بس هذا البترول
هلا والله بالبترول .. صحيح ما عقب التعب الا الراحة ..
قال سالم ولد الدلالة : اركد !! اركد !!وهو يغير المهندس مكانه .. ويقعد يتفحص .. ويقلب عيونه .. هالفلبيني .. ويدور .. ويتشمشم .. الخياس ذبحنا .. وهو يقول صبر صديق ..

وحنا نحتري .. جا الخبر اللي نزل على نزلة الطشت على الراس <<-- يسمع بالحكم

قال : شوف مغاط .. بترول هنا ما فيه .. ويقعد يشرح الفلبيني لسالم ولد الدلالة .. بالانقليزي .. وانا اقول لسالم .. انهج وش يقول لك : قال انه يقول : مابه ولا حتى غضارة بترول
قلت وشو !! وانا امسك الفلبيني واقوله : انقلع بس يالنغل .. اجل .. ابوهتون ولد خالتي يتسذب ؟ <<------ اخر ما عندي

.. والناس متجمعين .. وسمعوا كلام المهندس الفلبيني وهو يقول : بترول مافي !!
ويدلون يحتسون .. يقولون : ترا بيت مغاط ما به بترول

ويتجمعون الديانة وكل اللي انا متسلف(ن) منهم .. حتى حسني الحلاق جحدني وقال جب الخمسة حقت التحليقة ...
المهم رجعت اموري مثل اول .. واردى .. ونزلوا الناس قدري أخس من أول
بس الحمد لله استفدت من هالقصة امور(ن) واجد :

منها :

ورانا تسذا أعوذ بالله اللي عنده فلوس نقدره ونحترمه .. والداج ما نعطيه وجه .

- أي خياس تراه مهوب بترول <<----- جتني عقدة نفسية لا تلوموني

- اللي عايش في وهم يصحى ..

- لا احد يدخل عياله علمي <<-- حاقد على ابوهتون

- العجله في كل الامور شينه
..-
--------------------

مع ألف سلامة يا بعدي

ام أيمن
08-10-05, 10:17 PM
ابو هتون اظن ان المهرة
راح تثبث موضوعك بمسيمير
لانه اكيد راح تصدق قصة البترول اللي عندكم

مستغرب
08-10-05, 11:12 PM
ورانا تسذا أعوذ بالله اللي عنده فلوس نقدره ونحترمه .. والداج ما نعطيه وجه .

هذا سؤال محيرني

شوف الصواعق ما يعطيني وجه

الله يرزقن بير بترول لو يقطر تقطير

المُهرة
08-10-05, 11:36 PM
يا حرااااااااااااااااام (hjh)
كنت ناوية اثبت كل مواضيعكـ :p
علشان ترشني بكم سطل بترووول (aqwa)
الآن الله يثبتني لا احذف مواضيعكـ كلهن :o

ابوهتون
09-10-05, 10:21 AM
ابو هتون اظن ان المهرة
راح تثبث موضوعك بمسيمير
لانه اكيد راح تصدق قصة البترول اللي عندكم


الله يسمع منك

واذا صار لاعطيك سطل بترول

ابوهتون
09-10-05, 10:23 AM
هذا سؤال محيرني

شوف الصواعق ما يعطيني وجه

الله يرزقن بير بترول لو يقطر تقطير



ههههههههههههههه

ماله داعي الصواعق

صراحه واحد مثلك ماتتفوت مخاواته

ابوهتون
09-10-05, 10:26 AM
يا حرااااااااااااااااام (hjh)
كنت ناوية اثبت كل مواضيعكـ :p
علشان ترشني بكم سطل بترووول (aqwa)
الآن الله يثبتني لا احذف مواضيعكـ كلهن :o






افا يعني انت مثل الحلاق يقليل خاتمه


اصلا هم بترولهم مالقوه لانه مسروق وانا اللي سرقته


لك فرصه تسحبين الكلمه

ام أيمن
09-10-05, 01:47 PM
الله يسمع منك

واذا صار لاعطيك سطل بترول
لا سطل ما يكفيني ابغى بئر بترول مثلي مثل غيري

ابوهتون
09-10-05, 02:22 PM
لا سطل ما يكفيني ابغى بئر بترول مثلي مثل غيري


من غيرك يقدر ياخذ بئر بترول؟؟؟؟؟؟


تراني مااحب اتعمق بالسياسه

ام أيمن
09-10-05, 03:46 PM
من غيرك يقدر ياخذ بئر بترول؟؟؟؟؟؟


تراني مااحب اتعمق بالسياسه
لا تعمق ولو يسجنوك بدافع عنك ويطلعونك
ولو خسرت انا القضية بجيب لك بالسجن سوبيا وكركديه
ولا يهمك

ابوهتون
10-10-05, 09:30 AM
لا تعمق ولو يسجنوك بدافع عنك ويطلعونك
ولو خسرت انا القضية بجيب لك بالسجن سوبيا وكركديه
ولا يهمك




ههههههههههه

الكركديه بيعطيني جوانيح واطير من السجن

ابوهتون
10-10-05, 12:38 PM
من مغاط ملك الغاط

الي ابوهتون المزيون

ربعك ذولا جحدات يعلقون علي مواضيع سخيفه ومافيها اي شي يونس


وساحبين علي قصصي اللي اعطيك

الحلقه الثالثه فيها نظر احس انهم مااعجبتهم الحلقتين الاوله


مع اني مع احتراماتي منتداكم فيه احد يقول قصص مثلها كلها سب في بعض ومعاير

الرمادي
12-10-05, 09:19 PM
قلت اعوذبالله من الشيطان الا به .. وراي قمت اوسوس انا ..

ابوهتون

الا الوسواس ترى الشياطين مربطه بالشهر الفضيل

عاد توسوس بدون شيطان وين تبي توديك هواجيسك

ابوهتون
14-10-05, 12:41 AM
مشكور اخوي الرمادي علي المرور

تو الموضوع ينور

الرمادي
14-10-05, 12:46 AM
مشكور اخوي الرمادي علي المرور

تو الموضوع ينور

تصدق قايلهم ابغير اسمي

ودي اصير ولد النور

بس بيني وبينك تذكرت سوداني دارس معي اسمه النور

قلت عاد كل شيئ ولا اصير ولد لذاك الزول

ابوهتون
14-10-05, 01:00 AM
ولا يهيمك

شف الجنسيه اللي تعجبك

وانا بنفسي ادور لك واحدمنهم اسمه نور

الرمادي
14-10-05, 09:16 PM
ولا يهيمك
شف الجنسيه اللي تعجبك
وانا بنفسي ادور لك واحدمنهم اسمه نور


يازيني كذا مابي جنسية

خلني رمادي عادي

واذا صر يابوهتون شف اصحاب اليورو خلن منهم

ابوهتون
15-10-05, 10:44 AM
طيب مادامك تبي اصحاب اليورو


ابروح لبنك الجزيره لانه يبيع اسهمه باليورو


بس اخاف القي سوداني اسمه نور

مملوح نجد
26-10-05, 10:50 AM
والله عليك مواضيع مدري من وين تجيبها


بوش وبترول والله لو ان السياسه كذا بهالسعه الصدر والخبال

كان اسنتر عند الاخبار كل يوم


اعجبني اسلوبك في طرح قضيه التمصلح مع الناس المطخطخه الله انك صادق اذا الواحد جته قرووش خاووه الناس وتسدحو عنده


مشكور ابوهتون ابروح للحلقه الاولي

ابوهتون
29-10-05, 10:36 AM
والله عليك مواضيع مدري من وين تجيبها


من عقلي الراجح اللي مايخرش مويه

بوش وبترول والله لو ان السياسه كذا بهالسعه الصدر والخبال

كان اسنتر عند الاخبار كل يوم



ههههههههههههههههههههههههههههه

حلوه تسنتر عند الاخبار عاد انا اكره الاخبار بشكل الله لايوريك


اعجبني اسلوبك في طرح قضيه التمصلح مع الناس المطخطخه الله انك صادق اذا الواحد جته قرووش خاووه الناس وتسدحو عنده


ايه وانا اخوك اسال علووووش

ماكان احد يثمنه ولا بنص


علي فكره علوووش صديقي في المنتدي ادخل علي مواضيعه تره رجه وونيس

مشكور ابوهتون ابروح للحلقه الاولي


حياك اخوي مواضيعي كلها لك وانت تامر امر