المساعد الشخصي الرقمي

مشاهدة النسخة كاملة : تعالي شوفي زوجك وش يسوي


الــنــوخــذة
22-09-05, 10:28 AM
أجيبي لتعرفي ــ

هل زوجك يحبّك والا مايواطنك !!ــ

ــ توطئة ــ ....... اتفلفس عليكم ؟؟؟؟؟؟؟

هذا استبيان أو اختبار بسيط وهو عبارة عن مجموعة أسئلة وعدة اجابات .. تستطيع الزوجة أن تعرف من خلال الاجابة عليها أين موقعها من قلب زوجها و هل هو يقدِّرها والا وده يدقّ خشتها ..


بسم الله نبدأ........ اربطو الاحزمة والجزم اعزكم الله لان الرحلة طويلة خخخخخخ

---------------------------------------
س1 إذ بغى زوجك يناديك :

أـ يناديك باسم دلع مثل : ( ياحياتي ـ ياعمري ـ ياعيني ) ـ
ب - يناديك باسمك : ( ياسارة ، ياريم ، ياميّ )ـ
جـ يناديك بكنيتك : ( يا أم محمد ، يا أم عبدالله، يا أم خالد )ـ
د ـ يناديك باحدى العبارات الرومانسيه التاليه : ( يامرة ـ ياهيش ـ هو هنا احد ) ـ

------------------------------------
س2 وش تلاحظين انه :

أـ معسكر في البيت 24 ساعة واذا راح للعمل يغثـتس بالاتصالات
ب ـ يقضي أغلب وقته في البيت
جـ دايم يختخت للإستراحه ولربعة
د ـ ماتشوفين خشّته الا أوقات الوجبات ولا يجي للبيت الا قبل الفجر بنصف ساعه ـ
--------------------------------------
س3 اذا صرتي جالسه معه :

أ ـ يسولف عليك دايم ويتميلح ويحاول يستخفّ دمّه عندك ؟
ب ـ يسولف عليك سواليف عاديه .
جـ يسولف عليك الا قلتي له سولف .
د ـ مهوب يسولف أبد والا قلتي له سولف نزرتس و قال وش تبيني أقول ويلقط الجريده ويسد بها وجهه على باله انها يقراها .

------------------------------------------------
س 4 لو تسوين له طبخة ولا تصير مضبوطه .. أما جت محترقه والا خانسه والا مالحة وجيتي تعتذرين له وش يقول : ـ

أ ـ يقول : أي طبخة منك زينه حتى لو تطبخين ضاطور ويجي خانس كلت يديني وراه ـ
ب ـ يقول : اللي يجي منك زين
جـ ـ يقول : افطني لطبختس واضبطي شغلك
د ـ يقول : بلاتس الرفالة الواجدة ولاتم تعودين لها يارفيله ـ

------------------------------------------------------
س5 الا قلتي له ودّني للسوق وش يقول :ـ

أـ أبشري ولو تبين جبت لك السوق هنا ولا خليتك تتعّبين روحك وتروحين له ـ
ب ـ إن شاء الله .
جـ كانك ملزومة وديتك هالحين والا خليه عقب .
د ـ معصي .. وماتلاحظين انك ذبحتينا بالسوق الا ماودك تطقين لك خيمةٍ فيه أزين ـ

---------------------------------------------
س 6 ـ الا قلتي له عطني 1000 ريال ابفصّل ثوب لزواج اختي وش يقول :ـ


أـ مغير 1000 غالية والطلب رخيص .
ب ـ خذي ولو ان الألف واجده .
جـ ماتيزيتس خمس ميه .
د ـ وشي ألفه ؟ لو تفصلين لك فستانٍ بمية الف منتيب زاينه خذي ميتين بس ودوري لتس أيّة خلـَق ورجّعي الباقي ـ

---------------------------------------------
س7 ـ الا قعدتي تموّلين وانتي تقطعين السلطة وش يسوي رجلك :ـ

أـ يجي يقطع السلطة بدالك ويقول لك : غني لي شويه شويه .. والسلطة خليهاعليّّه ـ
ب ـ يقول لك ارفعي صوتك وأطربينا
جـ يقول اقصري حسّك شويّ ياظلال أم كلثوم .
د ـ يقول لك ورى العنز صجتنا قطتس ماحطيتي لها شعير اليوم ـ


------------------------------------------
س 8 اذا صار زوجك عندك في البيت وش تحسين انه :


أـ يكشخ ويتمكمك ويتطيّب ويتسكسك وكل شويٍ يتنظّر كنه يبي يروح لعرس
ب ـ يكشخ على خفيف
جـ ـ مرٍ يكشخ ومرٍ يطنش
د ـ يطق صروال السنة .. 24 ساعة.. والا خربها وكشخ لبس قميص النوم المقـلــّم ـ
-----------------------------------------------

س 9 الا قلتي له أبروح أزور أهلي يومين بس .. وش يقول لك :ـ

أ- يومين كاملات !! مايكفي يوم والله يصبرني على فراقك
ب ـ أبشري بس يومين مافيه أكثر
جـ ـ مايخالف وان بغيتي تجلسين أكثر ماعندي مانع
د ـ مغير يومين ؟ ماتسوى العنوة ماودك تقعدين عندهم شهر ترى ذولا أهلك ولهم حقٍ عليك وان قعدتي شهرين بعد مهيب شينه ـ

ياكثر اللي بينفضحون في ذي

--------------------------------------------------------

س 10 الا قلتي له تحبني وش يقول :

أـ " منيب أحبّك أنا والله من حبّك .. أحبّ حتى ثرى الارض اللي تاطاها " ـ
ب ـ أجل ما احبك
جـ يعني مرّ ومرّ
د ـ ياشين العجز الا جن على بالهن رومانسيات أقول خلي حركات المراهقه عنتس و هذا اللي جنيتيه من المسلسات المصرية .. قومي كبي الجريش بس تراه داقّني الجوع ـ

--------------------------------------------
س 11 وش تلاحظين انه :


أ ـ يجيب لك هدايا دايم ويكتب فيها أبيات شعر خاثرة ـ
ب ـ يجيب لك هدايا أحياناً
جـ يجيب لك هدايا الا جاء من السفر ولا هوب قبل بعد .
د ـ ماعمره دخل الا وهو مدودل ٍ يديه ولاعمرك شفتي منه شي عقب الشبكة ـ

----------------------------------------------

س12 إذا كشتّي انتِ واياه في البر وقلتي له وش رايك نمرح فيذا الليلة وش يقول

أ- تامرين أمر .. ودامك معي لو تبين نمرح في عشّة غنم ماخالفت

ب - والله ان ماودي مرة بس كانك صاملة مايخالف

جـ - ودي نمرح فيذا الليله بس إني أخاف تغثنا القواريص

د - وش اللي نمرح ، تبين عشان تقرصك عقرب والا دابّ وأبلش بك يالله بس مشينا ماعاد الا خير

-----------------------------------------------------

وهالحين ناظري النتيجة :



اذا صارت أكثر اجاباتك بحرف الألف : ـ


فترى زوجك ضايعٍ في خرايطك ودايخٍ معك ورايحٍ معك خرخر ولو شبيتي له ضوّ وقلتي طبّ فيها قال آمري بس تبيني أطب ( لقّافي ) والا ( محيفرة ) .. و أنصحك انك تحافظين عليه وتحاولين انك تشوفين وش الأشياء اللي محببته فيك وتستمرين على فعلها .. عشان تستمر هالخقّه


واذا صارت أكثر اجاباتك بحرف الباء :ـ

فاعرفي ان زوجك يحبك مرة بس هالحب من المحتمل انه يقل لو ضيقتي صدرة ببعض الاشياء فانتبهي له . ـ


واذا صارت أكثر الاجابات بحرف الجيم :

فاعرفي ان زوجك مهوب يحبك مرة ودوّري الاسباب اللي خلته مايحبك وحاولي تعالجينها .. والا تدرين عطيه أشكل بس أريح لك ( الله من زين النصيحة ) .ـ


أما اذا صارت أكثر الاجابات بحرف الدال :ـ

فإعرفي ان رجلتس مهوب يهيطتس ، ولا يواطنتس في عيشة الله .. و أيّسي انه يبي يحبك لو تحطين له الشمس ساعة في يده ، وتنظمين النجوم ( صنقل ) لها .. وتحلبين له خنفسان وتخرفين له من البرسوبس تمر برحي ، مهوب حابك .. هذا شاطبٍ عليك شطبٍ مافيه ملح أكود من شطب جمهور الهلال على البلوي ـ.




ــ همسة للأزواج ــ
إن بغيتَ سو الاختبار على زوجتك وان جابت " أ " مدّحني عندها وقل اني دكتور في علم الاجتماع وخبير في شؤون الأسرة ( عشان تصدّق النتيجة ) ، وإن جابت " د " اغسل شراعي وقل لايهمك تراه سلتوح ٍ فاضي وماعنده ماعند جدّتي .

والله يحللك ويبيحك على الحش ـ

بس عاد لا تحش فيني مرة .. حش شويّ



ولنا وقفة ـ إن شاء الله ـ مع الرجال المتزوجين وكيف يعرفون هل حريمهم يحبونهم والا لا

.. إن بغيتوا والا الأماريه الغفلة

ام أيمن
22-09-05, 10:35 AM
نتائج الاختبار احتفظ بها لنفسي
مصدومة
اهئ اهئ اهئ

الــنــوخــذة
22-09-05, 10:42 AM
نتائج الاختبار احتفظ بها لنفسي
مصدومة
اهئ اهئ اهئ

افااااااااااااااااا ليش كذا مايصير ماتوقعتها منه الله يهديه

ام أيمن
22-09-05, 11:20 AM
افااااااااااااااااا ليش كذا مايصير ماتوقعتها منه الله يهديه
صدمتي فيه كبيرة
ما كنت اظنه






















يحبني ومهتم فيني





ههههههههههههههههههههههههههههه

الــنــوخــذة
22-09-05, 11:31 AM
صدمتي فيه كبيرة
ما كنت اظنه

يحبني ومهتم فيني

ههههههههههههههههههههههههههههه


من جد ماتوقعته كذا الى هالدرجة



















شهم وجال وقد المسئولية لكن تدرين طلع نذل وخراط وغشاش










لانه



















مايعلمنا علشان المستقبل لكن هين اوريك فيه

الله يسعدك معه ويخليكم لبعض حبايب

المُهرة
22-09-05, 01:50 PM
إذا تأهلت جيت أجاوب

(r50yty)

الــنــوخــذة
22-09-05, 03:22 PM
إذا تأهلت جيت أجاوب

(r50yty)

ممكن تتاهلين اذا كنتي مستعجلة ونكام الخطابة علشان تجاوبين طال عمرك خخخخخخخ

زعبور
22-09-05, 03:27 PM
س12 إذا كشتّي انتِ واياه في البر وقلتي له وش رايك نمرح فيذا الليلة وش يقول

أ- تامرين أمر .. ودامك معي لو تبين نمرح في عشّة غنم ماخالفت

ب - والله ان ماودي مرة بس كانك صاملة مايخالف

جـ - ودي نمرح فيذا الليله بس إني أخاف تغثنا القواريص

د - وش اللي نمرح ، تبين عشان تقرصك عقرب والا دابّ وأبلش بك يالله بس مشينا ماعاد الا خير

الجواب الاخير

العاذريه
22-09-05, 03:30 PM
ولنا وقفة ـ إن شاء الله ـ مع الرجال المتزوجين وكيف يعرفون هل حريمهم يحبونهم والا لا

.. إن بغيتوا والا الأماريه الغفلة

نحتريك على احر من الشيشة
ثم نطلع الفضايح
<<<
باين كل اجاباته من الداء وتحت

المُهرة
22-09-05, 03:52 PM
ممكن تتاهلين اذا كنتي مستعجلة ونكام الخطابة علشان تجاوبين طال عمرك خخخخخخخ
ابد منيب مستعجلة
(hjhjlj)
اخاف اتحول من المُهرة إلى الفرس
(sfsdfsfs)

الــنــوخــذة
22-09-05, 07:43 PM
ابد منيب مستعجلة
(hjhjlj)
اخاف اتحول من المُهرة إلى الفرس
(sfsdfsfs)


ههههههههههه ايه هين عاد هذي تحولين فرس مشي خشك المهم ان كانك مستعجلة كلمت الوالدة تجي عندكم تقهوا وتسولف معتس

قصيميه22
22-09-05, 07:59 PM
احلا اختبار يانوخذه والنتايج نص نص
بس مافي مشكله نحاول مره اخر ى
مشكووور

المُهرة
23-09-05, 01:24 AM
ههههههههههه ايه هين عاد هذي تحولين فرس مشي خشك المهم ان كانك مستعجلة كلمت الوالدة تجي عندكم تقهوا وتسولف معتس
خشتي ومشيتها
هـــــــــــه
( ايقونه تمش خشتها )
وإذا تبيني ادربي امكـ مع الدرجة
فخلها تجي تتقهوى معي أنا ومامي
(q88)

الــنــوخــذة
23-09-05, 03:35 PM
خشتي ومشيتها
هـــــــــــه
( ايقونه تمش خشتها )
وإذا تبيني ادربي امكـ مع الدرجة
فخلها تجي تتقهوى معي أنا ومامي
(q88)

افاااااااا ماتوقعتها منك وتدربين خالتك مايصير؟؟؟؟؟؟؟

الــنــوخــذة
23-09-05, 03:38 PM
احلا اختبار يانوخذه والنتايج نص نص
بس مافي مشكله نحاول مره اخر ى
مشكووور


طيب ماتغيرت النتيجة بمناسبة اليوم الوطني والاجازة وتكون نفسيته حلوة

ام أيمن
23-09-05, 06:34 PM
من جد ماتوقعته كذا الى هالدرجة

شهم وجال وقد المسئولية لكن تدرين طلع نذل وخراط وغشاش




لانه




مايعلمنا علشان المستقبل لكن هين اوريك فيه

الله يسعدك معه ويخليكم لبعض حبايب


امين
امين
امين

الــنــوخــذة
24-09-05, 01:05 PM
هلااا و غلااا (q72)