المساعد الشخصي الرقمي

مشاهدة النسخة كاملة : محاورة شعرية حلوه بين العريس والعزوبي


حسن خليل
04-09-05, 11:31 AM
محاورة حلوة بين العريس والعزوبي



العزوبي



قال العزوبي يوم شـاف المعاريـس=الرابـح اللـي لاقعـد مايقـومـي
أول سنـة كـلٍ يبـث الاحاسيـس=وثاني سنة تجلب عليـك الهمومـي
وثالث سنة حط الرمـل والمتاريـس=لابد مـن حـربٍ تقـوم وتدومـي
لامن دخلـت الـدار لاكنهـا بليـس=متلفلـفٍ فـي غاليـات الهدومـي
تأخذ من المخباة وتسحب من الكيس=وتغيـر الموديـل شـيٍ لـزومـي
وان قلت ما أملك يامره لوهو فليس=قالـت تديّـن لا تكـثـر بلـومـي
ولاجيت مرة نـاويٍ لـك بـ.......=قالت تصّبـر خـل قلبـك رحومـي
ليتك تساعدنـي تصحـح كراريـس=زادوا علينا أربع حصص في العلومي
أزوارة في العصر والصبح تدريـس=والليـل تصحيـحٍ وودي أنـومـي
تبكي إذا جاها وجع لوهـو ضريـس=وتقول أبي دكتـور ماهـو حكومـي
يروح عمرك بين عرسٍ وتأسيـس=واربـع سنيـن والبزاريـن كومـي
وسط المطابخ بين قـز ومحاميـس=هـذا صحـن رزٍ وهـذاك ثـومـي
والا خلصـت إمنظـفٍ الملالـيـس=جتك تقول انهـج نبـي زود لومـي
ولا جبت قالت اكنس الحوش تكنيس=خل البلاط يصيـر مثـل النجومـي
ومكرسٍ جهدك من الخوف تكريـس=وان نادتك بالصوت اقبلـت مومـي
يجيك تـال الليـل دايـم كوابيـس=ويشيبنـك مزعـجـات الحلـومـي
هذي حياة اللي ركض باغـي=ضيع حيـاة أول وصـار محرومـي
تعيش يالمعـرس حيـاة المحابيـس=وشف العزوبي بكل شارع يحومـي
من مفرق جلاجل إلى جوي للحيـس=وان حار حايرهم بوسطـه يعومـي
يفرح إذا شاف الوتـر والمراويـس=وفي كـل يـومٍ كاشـتٍ ومعزومـي
شف العزوبي مايعـرف الهواجيـس=ولا يـودي حرمتـه كـل يـومـي
يا عنك ماحاش الفخـر والنواميـس=الا عزوبـيٍ يـعـرف السلـومـي
اذا اعرس المعرس غدا عندنا هيس=ونزيل اسمه مـن سجـل القرومـي
والى بغيـت البهذلـة والدحاويـس=فأعرس وخلك من عـداد الرخومـي
وش صابكم من عرسكم يا المفاليس=وش استفدتوا غيـر دق الخشومـي
اللي تزوج أشهد انـه غـدا تعيـس=والرابح اللـي ماخـذٍ لـه..........
ترى عناق العام نطت على التيـس=والحرعقب العـرس يصيـر بومـي

قال العريس


قال العريس أنا الذي في سـعاده=ماني عــزوبــي ضايق الصدر مهموم
مبسوط من مثلي قعـد عنــد غاده=مهوب مثـل اللي لحاله تقل بـــوم
في كل لــيله حاضنٍ لـه وسـاده=وانا مـع المـزيون في غـرفة النوم
أنا اشهد انه عايـشٍ في قــراده=يروح عــمــره مـا تهنى ولايوم
الى دخــل للبيت يبلش بــزاده=يقعد يقــطّـع له طمــاطٍ معه ثوم
ولا قضى عقب العصـر من عداده=والـحوض من كثر المواعين مزحوم
والى غسلهن ثم فـك الســـداده=دلى يغســل له سـراويل وهــدوم
وان ما طــبخ روّح لمطعـم حمـاده=والا قـعد في منزله واعـلن الصوم
وان جاه ضيفٍ باغيٍ لـه رفـاده=يـروح يشــري رز وايـدام ولحوم
ما يعرف الشمبو وراسـه عــراده=وشــمغه من الكواي ملـيانه رقوم
ما يكنس الفرشــه ويلقط بــداده=أما بقـايا رز او خــبز معــروم
عنده صراصيرٍ بحـاجه ابــاده= تسـرح وتمرح في الغرف دايم الدوم
يجمع قروشه ويتســـلف زيـاده=حتى يسافر مصـر او ديرة الروم
او راح يم التاي وتـــرك بـلاده=ناظر جـوازه ممـتلي كله ختوم
دايم يسافر ما يعـرف العــباده=يسكر وينكر و........ بالكـوم
وإلى رجع يـروح يـم العــياده=حيث ان فـيده مـن فعايله مزكوم
وإلى قعد مارس مع .......عاده=حيثه مسيكينٍ مـن العرس محـروم
له موتر خرده كثير فســـاده=في كل يـومٍ في الاشارات مصـدوم
غمارته تقول ورشــة حـــداده=ومريقـده في شـنطته دوم محزوم
دوم يتنقل تقــل كنه جــراده=في كـل يومٍ نازل له على قــــوم
يسهر والى قام الظهر من رقـاده=روّح على شغله والى اليوم مخصـوم
يذي بنات الناس يبغي مـراده=في كل يومٍ زاهمٍ له على ( هـــوم )
اراه مايعـرس ويقـدح زنـاده=يترك بـنات الناس ويصير معصوم
يلقى هنوفٍ تخـدمه مثـل داده=ويصــير رجّالٍ ويسلم من اللوم
يفرح الى من قرب وقت الولاده=ويصير معنى العرس بالحيل مفهوم
يشوف أولاده ومعهم شهـــاده=قبل الـوفاة وقولة الناس مرحــوم





وسلامتكم

Cry^Poet
04-09-05, 02:11 PM
ههههههههههههههههههههههههههههههههههه

الله يعطيك العافيه اخوى حسن

حسن خليل
04-09-05, 02:29 PM
ههههههههههههههههههههههههههههههههههه

الله يعطيك العافيه اخوى حسن

الله يعافيك يا خوي كراي بوت

وأشكرك على المرور والتعليق على القصيدة

فهد بن فهم
04-09-05, 10:45 PM
جميل اخوي حسن

شكرا لك

كاتم الونة
04-09-05, 11:05 PM
لامن دخلـت الـدار لاكنهـا بليـس.... متلفلـفٍ فـي غاليـات الهدومـي
.................................................. ..........................................
اذا كانت متلفلفه بغاليات الهدومي نعمه متزينه له وتنتظره
ماعنده سالفه هالعزوبي ومايعرف يهجو صح.. المفروض يقول

لامن دخلت الدار لاكنها بليس.....متلفلفٍ في باليات الهدومي

نعم باليات الهدومي يعني مكشره ولابسه اقبح لبس صح يابوخليل؟؟
.................................................. ...........................................
وألان مع العريس وهو أقوى بكثير من العزوبي وقد أجاد وغسل
شراع العزوبي... وكلمة ( أراه ) أستفهاميه يعني لماذا.. وهي من
كلام أهل سدير وأهل الوشم..صح يا أهل سدير ويالمهره...

اراه مايعـرس ويـقـدح زنــاده ....يترك بنات الناس ويصير معصـوم
يلقـى هنـوفٍ تخدمـه مثـل داده ....ويصير رجّالٍ ويسلـم مـن اللـوم
.................................................. ................................
أحسنت يالغالي النبيل.... حسن خليل

دايم تجيب الطيب والممتع... شكر الله لك

محبك

المتحد
05-09-05, 12:38 AM
كلن بعقله راضي
.

حسن خليل
05-09-05, 07:40 AM
جميل اخوي حسن

شكرا لك

أخي المشرف فهد بم فهم

سعدنا بتواجدك في صفحتنا.

شاكراً لك مرورك وتعليقك الجميل على القصيدتين.

حسن خليل
05-09-05, 07:48 AM
لامن دخلـت الـدار لاكنهـا بليـس.... متلفلـفٍ فـي غاليـات الهدومـي
.................................................. ..........................................
اذا كانت متلفلفه بغاليات الهدومي نعمه متزينه له وتنتظره
ماعنده سالفه هالعزوبي ومايعرف يهجو صح.. المفروض يقول

لامن دخلت الدار لاكنها بليس.....متلفلفٍ في باليات الهدومي

نعم باليات الهدومي يعني مكشره ولابسه اقبح لبس صح يابوخليل؟؟
.................................................. ...........................................
وألان مع العريس وهو أقوى بكثير من العزوبي وقد أجاد وغسل
شراع العزوبي... وكلمة ( أراه ) أستفهاميه يعني لماذا.. وهي من
كلام أهل سدير وأهل الوشم..صح يا أهل سدير ويالمهره...

اراه مايعـرس ويـقـدح زنــاده ....يترك بنات الناس ويصير معصـوم
يلقـى هنـوفٍ تخدمـه مثـل داده ....ويصير رجّالٍ ويسلـم مـن اللـوم
.................................................. ................................
أحسنت يالغالي النبيل.... حسن خليل

دايم تجيب الطيب والممتع... شكر الله لك

محبك

أخي الغالي الحبيب كاتم الونه

الناقد الملهم في أبيات الشعر

صح عليك مليون صح

شاكراً لك مرورك وتعليقك الجميل على القصيدتين.

وبارك الله بك وجزاك الله خيرا.

أخوك ومحبك

حسن خليل

حسن خليل
05-09-05, 07:53 AM
كلن بعقله راضي
.

أخي الحبيب المتحد:

بعد غياب طويل أشرقت صفحتنا بقلمك المعطاء.

صدقت يا أخي الكريم كلن بعقله راضي.

شاكراً لك مرورك وتعليقك الجميل على القصيدتين.

مستغرب
05-09-05, 06:06 PM
مرحبا بك أخي الكريم حسن خليل

لكن والله المعرس هو الصادز

لا يهمك العزوبي ما حصل العرس سبهن

حسن خليل
05-09-05, 07:28 PM
مرحبا بك أخي الكريم حسن خليل

لكن والله المعرس هو الصادز

لا يهمك العزوبي ما حصل العرس سبهن

هلا وغلا بك اخوي الغالي مستغرب

وأنا معاك قلباً وقالباً بأن المعرس هو الصادز

شاكراً لك مرورك العذب وتعليقك الجميل