طريقة الجريش يابنات القصيم والرياض

[بنت الواحة]

السلام عليكم ورحمة الله وبركاته

أبي المساعدة من بنات القصيم أو بنات الرياض

وأنا أعرفكم أهل الفزعة

أبي منكم طريقة الجريش وخاصة الصلصة الي معه

وبعد طريقة المرقوق عشان عندي عزيمة

معليش أنا مسختها بس سامحوني

ارجوكم في أقرب فرصة

لكم مني جزيل الشكر والاحترام

[بنت نجد]

بسم الله الرحمن الرحيم
السلام عليكم ورحمة الله وبركاته

هلااا و غلااا (q72) بك حبيبتي ... بنت الواحة ...
ابشري يا الغلا ...
بحط لك طريقة الجريش والمرقوق ...
بس المرقوق اللي بتستخدمينه قرصانه جاهزة أو بتعجنين العجينة أنتِ ...
على أن الجاهز اريح لك بكثير من انك تعجنين عجينة ...
والجريش اللي عندك ...
تاريخ انتاجه قديم شوي أو جديد ...
علشان تضبطين مقدار المويه واللبن اللي بتحطينهم في الجريش ...

الله يحفظك
أختك
بنت نجد

[بنت الواحة]

http://www.3e6r.net/data/media/20/User5148.gif
يـــــــــا
بــنــت نــجــد

أنا في أنتظارك

بنسبة للجريش تاريخه جديد

أما عجينت المرقوق أبي طريقتها لاني أفضل العجينة التي تعجن في البيت

ما يكون عليك أمر ولا جميع أخواتي

مشكووووووووووورة يا الغالية

http://www.3e6r.net/data/media/20/barra_86.gif

[@@منيره القصيم@]

بــنــت نــجــد
بوركتي اخيه

[مستغرب]

من حبي للجريش بشرح لك الطريقه

عن أذنك بنت نجد بفزع مع الأخت

الجريش

أحسن جريش هو الجريش اللقيمي. وهو رز يجي من العراق
يستغرق عمل الجريش من 6-8 ساعات تقريبا.
ْالمقادير:
1/4أكواب جريش .
2/8أكواب ماء.
3/أصبع زبدة .
4/3بصلات حسب الرغبة.
5/نصف ملعقة صغيرة ماجي أبيض.
6/3زبادي والأفضل الصافي.
7/ ملح وبهارات (قرفة، فلفل أسود، كمون،000 إلخ)
مقايرالصلصة:
1/4طماطم.
2/1فلفل حارحسب الرغبة.
3/2بصل.
4/نصف إصبع زبدة.
الطريقة:
1/يوضع الماء في قدر ويترك حتى يفوح يغلي .
2/يقطع البصل ثم يوضع في الماء ويوضع كذلك الماجي الأبيض والملح، ويترك لمدة 10 دقائق.
3/يوضع الجريش على القادير السابقة ويترك ليغلي لمدة 5دقائق ،ثم يقلل من درجة اللهب حتى
تصل الى اقل درجة . ويترك لمدة 5-6 ساعات.
4/ يوضع بعد ذلك الزبادي والبهارات، ثم يحرك
لمدة 5دقائق بحركة دائرية في جهة واحدة .
5/ يعاد على النار لمدة 15 دقيقة.
6/ يوضع في صحن تقديم ويجمل بالصلصة في المنتصف ويتم لهمه
طريقة عمل الصلصة :
1/ يخلط الفلفل الحارمع الطماطم.
2/يوضع البصل في قدر وتوضع الزبدة معه
ثم يقلب البصل حتى يصير لونه اشقر لا تخلينه يصير اسود مثل ركب السعوديات .
3/ يوضع الطماطم المخلوط على البصل والملح والبهارت ،تترك لمدة 25دقيقة على نار هادئة .


وتم بناء طبق الجريش

وبالهناء والعافيه

[شيخة الكعبي]

^
^
^
ماشالله عليك مستغرب ماتوقعتك تعرف تطبخ :o



سمعت بالمرقوق بس الجريش ماعرفـه شكلها اكلة سعودية شعبيـة أكيد لذيذة :)

[بنت نجد]

بسم الله الرحمن الرحيم
السلام عليكم ورحمة الله وبركاته

حبيبتي ... منيرة ...
الله يبارك فيك يا الغالية ...
وياهلا وغلا فيك ...

*
*

الشيف ... مستغرب ...
ما شاء الله تبارك الرحمن ...
وصفة جريش ولا احلى منهم ...
شكلي بستحي انزل طريقتي ...
غطيتا علينا يا الشيف رمزي :)

*
*

الغلا ... بنت الواحه ...

طريقة الجريش ...

المقادير ....

3 كاسات ماء
2/1 1 كاس لبن
1 بصلة متوسطة الحجم ومقطعه قطع صغيرة
2/1 اصبع زبدة
1 ملعقة صغيرة ملح أو حسب الرغبة
2/1 ملعقة صغيرة كمون مطحون
1 بيالة رز مصري ( سليق )
2 كاس جريش
1 ملعقة صغيرة ماجي ابيض

الطريقة ....

نحط الماء واللبن والزبدة والبصل والكمون والملح في قدر ونولع عليهم النار لين يفور ...
طبعاً يكون الجريش والرز المصري مغسولين زين .. ثم نحطهم على الماء واللبن وتوابعهم ونقصر على النار .. وقبل ماانسى نحط عليهم كم حبة فلفل أحمر والماجي الأبيض ...
نترك الجريش على نار هادية لمدة 3 ساعات ونصف ..
قبل مانحرك الجريش نحط عليه عصير ليمون حسب الرغبة ..
طبعاً نحرك الجريش بالمعصاد ( نقول له معصاد ) عاد أنتم ما ادري وش تسمونه
نحركه لين تذوب حبات الجريش ..
طبعاً نكون مجهزين ( كشنة ) نحطها على وجه الجريش إذا غرفناه .. وتتكون من بصل مقطع قطع صغيرة + زيت أو زبدة أو سمن + شوي كمون + شوي ملح + شوي بزار + طماط مقطع .. ونحطها على النار لين يذوب البصل والطماط شوي ..
بعدها نغرف الجريش ونحط الكشنة على الوجه ونجمله بالفلفل الأحمر ...

طريقة الصلصة اللي مع الجريش ...
نكشن بصل مع شوي زيت وبهارات وفلفل اسود وملح ...
ثم نصب عليه الطماط المعصور ونحط عليه ملعقة صلصة وفلفل احمر ونتركه يغلي على النار لين يتسبك شوي ...

وعليكم بالف عافيه ....

*
*

طريقة المرقوق ...

مقادير العجينة ...

- طحين بر ...
- مويه للعجن ...
- ملح إذا كان الطحين مافيه ملح ...

- نعجن العجينة لين تصير مثل عجينة الفطائر أو اقسى شوي ...
ثم ندق العجينة لين تلين وتقطع لقطع صغيرة بحجم البيضة أو اصغر إذا كنا بنفردها ( الله يخلف علينا مناب مثل امهاتنا نرقها على اليد ماشاء الله عليهن ) ....
ونرش الصينية اللي فيها كور العجينة بالمويه ونترك العجين يرتاح شوي ...

المقادير الثانية ...

- لحم مقطع ..
- بصل مقطع ..
- طماط معصور ..
- صلصة حمرا ...
- كوسة مقطعه بالطول ...
- باذنجان مقطع بالطول ...
- قرع اصفر مقطع قطع طوليه بعد ...
- ليمون اسود ...
- بهارات + فلفل اسود + ملح +
- مويه مغليه ...
- زيت نباتي ...
- فلفل احمر واخضر حار ...
- مكعبين ماجي ...

الطريقة ...

نكشن البصل في الزيت ثم نحط عليه اللحمة ونحمسهم سوا ...
ثم نرش على اللحمة البهارات والفلفل الاسود والملح ونتركه شوي على النار ...
بعدها نحط عليهم عصير الطماط والصلصة والماجي ونترك الطماط لين ينحمس ...
بعدها نصب عليه الموية ونكثر شوي لأنه المرقوق يبغى موية كثيرة ...
نتركه يغلي لمدة ربع أو نصف ساعة لين تستوي اللحمة نصف استواء ...
ثم نبدأ نرق العجينة لين تصير رهيفه بالمرة ونحطها بالقدر بشرط ما تتصفط العجينة ولا تنشق ...
بعد كل قرص مفرود نغطي القدر شوي ثم نفرد القرص الثاني ونحطه وهكذا ...مع زيادة الماء إذا احتجنا له ...
وضروري تكون النار عاليه شوي ...
بين كل قرصين أو ثلاثة نحط في الزوايا بعض الخضار ( الكوسه والباذنجان والقرع ) ...
بعد ما ننتهي من قرص العجين وحطه بالقدر نحط الليمون الأسود والفلفل وباقي الخضار ونقصر النار على المرقوق ونتركه على النار لمدة ساعة ...
بعدها يغرف ويقدم ...

وعليكم بألف عافيه ...
واي استفسار أنا حاضرة يا الغلا ...

حفظكم الله
أختكم
بنت نجد

[الدبدوبة]

ثم يقلب البصل حتى يصير لونه اشقر لا تخلينه يصير اسود مثل ركب السعوديات

لسان يبيله قص

[عاشقة العلا]

طريقه حلوووووه وسهله بس فيه ناس جريشهم لونه احر يحطون عليه طماطم وناس بدون يكون لونه احمرانا احب اللي يكون لونها ابيض وانا من محبين اكل الجريش ولا احب اسويه لانه متعب

الله يعطيك العافيه