!!..أوطــان الحمام ..!!

[*الجاسي*]

كرهتك ما عرفت أكره أبد ، علمتني أكره "=" ياذنب اجتاح أوطان الحمام وزعزع اطرافي

أنا ف كل يوم أشوف الشمس أساءلها بكل حسره "=" عن آخر قلب فى الدنيا يسمونه ذهب صافي

حسبتك للاسف يثرب وكانت صوبك الهجره "=" معي قوت، وملك موت، وخشب تابوت ياكافي

وعلى أول مشارف هالبلاد، وبآخــر السكره "=" عرفتك وابتدى درب الذنوب، ورحلة اسفافي

وجت فكره ورى فكره، مع فكره على فكره "=" وأنا واقف ما بين الشف والشرهات وأعرافي

وكانت فجعتي، والوقت ياطوله ويا قصره "=" تقطع فى ذرى ريحك شراعي وطاح مجدافي

حفظتك ما حفظت الطيب ولا راعيت لى عشره "=" وصرت النقطه السوده فى قلبي الطيب الوافي

وانا لى قلب لامنه نزف وشلون ما يشره "=" تبيني أنزف وأصونك جرح وأفضفض همي لقافي

سنين أكبر على متن الهموم وفى الصدر جمره "=" حرام اليوم وانت الهم تبي تكبر على أكتافي






لسماع القصيده بصوت الجاسي

يرجى الضغــــط .. هنــــــــا (http://www.angelfire.com/tx6/aljasy/mhmh.htm)