استفتاء للفتيات

[السهم الملتهب]

الصفات اللي تنحب للرجال في البنت معروفة، وممكن كل رجال له اشياء تشده في حبيبته، ( زوجته ) ، واللي يبي يحسب الاشياء الحلوة في البنات بيعد ، وبيغلط...
بس اللي ابي اعرفه وش هي الاشياء اللي تشد المرأة في الرجال، وكيف تفتتن به ، مع انه مافيه شي يفتن؟؟؟؟
بشكل عام ، اللي يشد الرجال للمرأة جمالها ، وش يقابل الجمال في الرجال بشكل عام,,,
ترون هذا الموضوع محد قد تكلم فيه، العرب من زمان يتغزلون في البنات ، بس ما لقينا قصايد لبنات يتغزلون في رجال، ولا هذا معناه ان المرأة ما تحب شي في الرجال، بس تحبه لانه يحبها ومفتون فيها؟؟؟؟؟؟؟؟

[تحدوها البشر]

السلام عليكم ورحمة الله وبركاته
موضوعك ممتاز صحيح ا ن الرجل يفتن بجمال المرأة ولكن المرأة
تفتن بأشياء كثيره ومنها الجمال إيضا ولكن يوجد صفات مقدمه على الجمال
مثل الوظيفة الدخل والمرأة تعجب بشخصية الرجل خاصة إذا كانت قوية
وتعجب برجولته وكثير من النساء يركزن على الجمال والوسامة
والعطف والحنية ويجدن ضالتهن في الرجل العطوف والحنون والرومنسي
والمتفهم والمتحضر وغير ذلك كثير الله يعطيك العافيه

[الله عليها عودت]

بس ما لقينا قصايد لبنات يتغزلون في رجال



الشاعره عابرة سبيل - رحمها الله

وقصيده غزليـه رائعه

هذاك لو قال الشتى صيف عرقت
____ولوقال صيفي برد شبيت نارى

هذاك لو قال الجمل طير صدقت
____ واقول ريشه بعثرته الصحارى

هذاك لو قال المطر كذبوافقت
____ وادور الاعذار حق الخبارى

هذاك لو قال القمر طاح صفقت
____ واقول مللته كثير المسارى

هذاك لوينفى وجودى توهقت
____ ماعاد ليه حل غير انتحارى



وهذي قصيدة أخرى لشاعره مجهولة بالنسبة لــي :



أحب زوله وأحب طوله وأموت برزة عقاله..
____وأحب ولاعته وعطره وبوكه وكل حاجاته...

وأحب سيارته واسمه ورسمه ورقم جواله..
____وأحب بزران شارعهم ونغمة صوت هرناته...

وأحب حكيه وأحب صمته وأحب أيامي بوصاله..
____وأحب غشمرته وجده وأهوى حتى زعلاته...

ولكن ويني ووينه؟؟ووينه كيفها أحواله..
_____وأنا خبري اذا أبعد يحس الشوق وسكراته...

واذا قلت الوعد باكر يسابق خطوة ظلاله..
_______وتحظن كفي كفوفه ويعانقني بنظراته...

يموت بكلمة(ن) مني..يذوب وحالته حاله..
__وأشوف انه يغدي طفل(ن) واناله اغلى لعباته...

أنا مشتاقة لعيونه..ولجنونه..ولخباله..
____قتلني الشوق بغيابه.. ذبحني بطول سفراته...

وأيضا هناكـ الكثيـر الكثيـر من القصائد الغزلية

لشاعرات البادية والشاعرات المعاصرات

ويسلمو على الموضوع الجميــل