ماموقفك من النظره الشرعيه ؟؟

[** نــــــوااارهـ **]

السلام عليكم ورحمة الله وبركاته


اليوم حبيت اطرح لكم موضوع ونتناقش فيه جميعا وهو من المواضيع الحرجة اللي يطول فيها

النقاش موضوع (النظرة الشرعيه)..


فقد تكفل الدين الاسلامي بكل نواحي الحياة

الفردية والاجتماعية والزوجية

فحينما يتقدم شاب لخطبة فتاة شرع له الله أن ينظر اليها قبل قبوله بها

ولم يشرع الله ذلك من فراغ

فالكل يعرف خطورة عدم النظرة تلك وما يترتب عليها من مشاكل

مستقبلية بعد الزواج.

بصراحه تعبت من الفصحى


في بعض القبايل بالمملكه عندهم ماتحل الشوفه الشرعيه قبل الزواج للاسف ...

ولما يتزوج الولد بالبنت المسكينه ... يدور الزله بس عشان يطلقها ..

و يرجع لاهله ويقول لهم والله مهي اللي ابيها هذي خشمها كبير

او هذي جسمها مو حلو او هذي فيها وفيها ... الخ الخ الخ من العيوب ...

وطبعا حتى هو مسكين لانه يكون حاط براسه وحده ملكه جمال ...

وبالنهايه تطلع له وحده مو زي ما اتمنى ... لانه من البدايه لو شافها ماكان صار اللي صار ...

ياناس ياعالم ياهوو ابيكم تفتحون اذانيكم زين وتسمعون وش بقول

لقد جاءت الشريعة الإسلامية بالأمر بغض البصر وتحريم النّظر إلى المرأة الأجنبية طهارة للنّفوس

وصيانة لأعراض العباد واستثنت الشّريعة حالات أباحت فيها النّظر إلى المرأة الأجنبية للضرورة

وللحاجة العظيمة ومن ذلك نظر الخاطب إلى المخطوبة إذ إنّه سينبني على ذلك اتّخاذ قرار خطير

ذي شأن في حياة كل من المرأة والرجل ،

قال رسول الله صلى الله عليه وسلم : ( إذا خطب أحدكم المرأة فإن استطاع أن ينظر إلى ما يدعوه إلى نكاحها فليفعل )

وطبعاالنظرة الشرعية في الوقت الحالي لها عدة طرق حسب عادات وتقاليد المجتمع الذي ينتمون له...


في عوايل تدخل الفتاة متحجبه ما يبين منها غير وجهها وكفيها بس <<

في ناس تدخل الفتاة بكامل زينتها بدون حجاب بس بملابس محتشمه >> وهذي معقوله بس عاد

مو بكامل زينتها كحيله وروج خفيف وسلامتكم

وفي عالم تدخل الفتاة بملابس تظهر أجزاء كبيره من جسدها بحجة أنها شوفه فلازم تكون للكل

<<< خير وش ذا العالم يبون ريالين خخخخ

وعوايل ثانيه الشوفه عندهم عبارة عن تبادل صور >>> والله انها خطيره بس بعض الاحيان الصوره

تكون غير عن الطبيعه تفرق 180درجه

وفي ناس ما تعترف بالنظرة . والرد الوحيد ( معصي ماعندنا بنات تنكشف على رجاجيل )


طيب وش رايكم في كل نوع من هذة الانواع وأيهم تؤيدون ..وأيهم تعارضون ؟؟؟


وهل النظرة الشرعية تقتصر على الشاب بمعنى إذا أعجب الشاب بالعروس لا يعود للفتاة رأي ؟؟؟؟؟

ما أول مايلفت نظرك للفتاة ..وجهها ..جسمها ..يدها ..أو شي ثاني ؟؟؟

وإذا شفت البنت طالعت لك بمكياج كامل بحيث انك ما تقدر تميز ملامح وجهها وش ردت فعلك ؟؟؟

إذا وجدت الفتاة واضح عليها علامات الجرأة وتنظر لك بدون خجل وأنت خجلان أكثر منها ماردت فعلك ؟؟؟
أخيرا هل تعترفون بالنظرة الشرعية في عوايلكم ولا لااا معصي ؟؟؟


تحياتي...

[فآرق عنـي !]

قال رسول الله صلى الله عليه وسلم : ( إذا خطب أحدكم المرأة فإن استطاع أن ينظر إلى ما يدعوه إلى نكاحها فليفعل )

حديث رائع يغلق براطم اللي يقولون
الحجاب لا يشمل تغطية الوجه
مافي غير الوجه وزولها
ولا بينظر لما لكراعينها ولا ولا ولا ولا

النظرة الشرعية كفلها الله سبحانه لنا
لكن وش تقولين عالم مريض متناقض
يدعو للتمسك بالدين وو و و
ويقصي من الدين ما يشاء !

[moneeeb]

السلام عليكم ورحمة الله وبركاته



اليوم حبيت اطرح لكم موضوع ونتناقش فيه جميعا وهو من المواضيع الحرجة اللي يطول فيها

النقاش موضوع (النظرة الشرعيه)..



السلام عليكم...

الموضوع قصير جداً و لا يوجد فيه حرج

الله يهدى المعارضين

[... بنت الجنوب ...]

حديث رائع يغلق براطم اللي يقولون
الحجاب لا يشمل تغطية الوجه
!


ههههههههههههههههه

حلووه يغلق براطم (qq166)

..


بمناسبة هالموضوع بنت اختي رفضت واحد لما شافته .

واهلها محرجين مره من العريس واهله وجالسين يقنعونها لكن وش نقووول.

الحين صارو البنات هم الي يطلبو النظره الشرعيه وهم الي يتشرطو.(q30)

[تاهت افكاري !]

انا بصراحه مؤيده للنظره الشرعيه(q31)
لان كل واحد يشوف الثاني
ويعرف الشخص اللي راح يتربط فيه
انا صارلي موقف محرج (qq166) مع شخص قد خطبني
انا طلبت اني اشوفه وهو يشوفني طبعا كنت لابسه تنوره ميدي
وتي شيرت وميك اب هادي جدا (wtg)
جاء طبعا يشوفني وانا ميته خوف ومستحيه انقلب وجهي (wtg)(wtg)
يبوني اقدم له العصير والله يبطون عشان اكبه فوق راسه (qq166)(qq166)(qq166)
دخل وانا جالسه من شفته وانا افز واطالع بابي (qq15)
سلم ومد يده بيصافحني المفروض مايلمسني (qq166)(qq166)
مديت يدي وصافحته
الرجال ضاعت علومه مايدري وش يسوي (qq166)(qq166)(qq166)
بعد ها صليت صلاة الاستخاره كم مره ماحس براحه (qq79)(qq79)(qq79)
وكلن راح بحال سبيله :ham020:

عذار عالاطاله موضوع رائع يستاهل النقاش من مؤيد ومعارض

تقبلي مروري اختي شيخة الدنيا

تحيااااااااتي لك

[انين الليل !]

السلام عليكم ورحمة الله وبركاته


اليوم حبيت اطرح لكم موضوع ونتناقش فيه جميعا وهو من المواضيع الحرجة اللي يطول فيها

النقاش موضوع (النظرة الشرعيه)..


تحياتي لك ياشيخة الدنيا واشكرك على موضوعك الاكثر من رائع ...فعلا" النظره الشرعيه هي اهم مرحله قبل الزواج لانه من خلالها يتحدد كل شيء من ناحية البنت او الولد يا يرتاحون لبعض يا مايرتاحون بغض النظر عن البنت إذا شكلها حلو او لا وكذلك الشاب اذا كان شكله مقبول او لا لان صلاة الاستخاره وحده من دون نظره شرعيه ما تكفي ... وشكرا"(q41)

[وهـ بس قصيمنا]

هذا أمر شرعي ماتوقع فيه احد يرفضه الا الجاهل!!
أماطرق دخول البنت داخله بدون زينه اوبكامل زينتها
فهذا يرجع على حسب العادات..
لكن بالنسبه لي الفتاة هي اللي لها حريه من ناحية
انها تدخل بمكياج اوبدون,, اوحجاب اوبدونه!!
مع اني اعتقد فكرة الحجاب هذي خاطئه وحركه جاهله!!
الشاب يبي يشوفها كلها وعلى طبيعتها يكون افضل بعد
ومن ناحية ان الولد فقط هو اللي يتخذ القرار؟
هذا لا ومستحيل يكون!!
القرار راجع لكلا الطرفين..ولاماكان حلل ربي النظره الشرعيه.

مــودتي..

[الهنـوف]

الللي يعارض فهو نقص في الدين لانه يناقض الشرع
واول نظرة تكون في الوجه الظاهر

[عاشقة الإبداع]

موضوع أكثر من رائع،،، ووالله إني في مأسأة من عدم النظرة الشرعية فقد تزوجت واحد ماأعرف شكله ولايعرفني ووفقاً لعاداتنا ماشافني ولاشفته إلإ يوم الزواج ووالله إن جميع الأوصاف الرائعه في وفيه من جمال وعلم وأخلاق ودين ولكن !!!! فقط 17 يوم وطلقني ولم يلمس شعره مني لأنه ماأرتاح لي وأنا بعد ماأرتحت له .. وهذا نتيجة عدم النظرة الشرعية .

[cardiac]

في بنت اول شي شفتها وبعدين طلبت جلسة ثانية باشوف فكرها وطريقة تفكيرها وفي الاخير ما حصل نصيب ..

[راعية غنم]

انا مع النظره الشرعيه

لكن ليس لكل من هب ودب

اذا رأوا ان الخاطب كان جاداً ووافق عليه اهل البنت يسمحون له بالنظره اما غير ذلك فلا أؤيد ابداً

[شموخ بدوية]

النظرة الشرعية جائزة شرعاً ....


لكن التقاالليد عندنا ترفض هذا الشئ بتاتاً > على قولتهم معصي (a21)

[جليل]

موضوع واقعي ...
أولا : أنت قلت النظرة الشرعية ... وإن كانت كذلك فلا مجال للحوار حول أمر أقره الشرع ...
ثانيا : لست ملتزما بهذه التسمية ... ولا أعتبرها شخصيا ملزمة .... !!
ثالثا : لن أسمح أن تكون ابنتي سلعة أعرضها بين يدي شاب أدمن النظر في وجوه المومسات ليفحصها !!
رابعا : ترى ! كيف ستكون مشاعر الفتاة .... قبل ..... أثناء ..... ثم بعد !!!
خامسا : النظرة الشرعية كما أفهمها أن ينظر إليها خلسة دون أن تدري هي .... حفاظا على مشاعرها ... وهذا المقصود في الحديث ..... وحينها كانت الفتيات يخرجن إلى حقول المدينة .... ويشرع - فقط - للباحث عن الزوجة أن يختلس النظر إلى الفتاة .....


بناء على كل ما سبق (( محضر !! )) :

يمكن أن أدبر طريقة مبتكرة لأري الشاب الذي أقبل دينه وخلقه ابنتي في وضعها التلقائي .... دون أن تدري أنها مخطوبة أصلا ..... وإذا ناسبته أخبرتها وتمت بقية الأمور ......

كما يمكنه أن يبعث من يريد لرؤيتها في المدرسة أو مكان عام ......

لكن :

أن يأتي أهله أو هو للفحص !! فلا .....
سائلا الله لكل فتاة الزوج الصالح ..... والرجل الذي لا يكون مجرد ذكر !!!



وجهة نظر .

[** نــــــوااارهـ **]

فارق عني
اشكرك على مرورك الرائع يا نجم المنتدى
بس انت ماجاوبت على كل النقاط
خخخخخخخخخ

[** نــــــوااارهـ **]

عزيزتي طايرتن بالعجه
اسعدني مرورك بصراحه انت مناقشه رائعه لاتحرمينا طلتك البهيه ..

[** نــــــوااارهـ **]

غاليتي انين الليل مشكوره على المرور النااااااااااايس ...

[بنت الهيلا]

حياك الله

النظره الشرعيه لابد منها للطرفين

بس بعد مايتاكد من العريس والسؤال عنه وبعد الاستخاره

وافضل تكون عشر دقائق بعدين يتكل مو هروج وسوالف

[اخو جميلة]

عن نفسي متنازل عن النظره الشرعية
لانها حتى لو ماهي حلوه مايطاوعني قلبي ارفضها أحس انها تتحطم
أخلي الاختيار لأمي واتوكل على الله
الجمال مو كل شيء

[معشي الذيب نواشف]

ههههههههههههههههه


حلووه يغلق براطم (qq166)

..


بمناسبة هالموضوع بنت اختي رفضت واحد لما شافته .

واهلها محرجين مره من العريس واهله وجالسين يقنعونها لكن وش نقووول.


الحين صارو البنات هم الي يطلبو النظره الشرعيه وهم الي يتشرطو.(q30)


وليش لا.. من حق البنات انهم يطلبون النظرة الشرعية

مثلهم مثل الشباب

والا انتي تشوفين غير كذا

:6655:

[بنت الهيلا]

عن نفسي متنازل عن النظره الشرعية
لانها حتى لو ماهي حلوه مايطاوعني قلبي ارفضها أحس انها تتحطم
أخلي الاختيار لأمي واتوكل على الله
الجمال مو كل شيء

الله ماطيب قلبك ياخو جميله

يارب يرزقك ببنت الحلال الي مثل القمر

واوصيك اذا مو متزوج بالفتاه المتدينه تربح

[... بنت الجنوب ...]

وليش لا.. من حق البنات انهم يطلبون النظرة الشرعية

مثلهم مثل الشباب

والا انتي تشوفين غير كذا

:6655:





لاوالله مااشوف غير كذا ..بس اقوول الحين الوضع تغير عن الاول بكثير

بالاول الشاب هو الي يطلب النظره ..الحين البنت هي الي تلزم على هالشيء.

وبصراحه الطرف الي ينرفض سواء بنت او شاب يكسر الخاطر.:khmas258:

[المحــــارب **]

النظرة الشرعية جائزة شرعاً ....


لكن التقاالليد عندنا ترفض هذا الشئ بتاتاً > على قولتهم معصي (a21)
نعم كل البدو مرفوض عندهم هذا الشي ...
ليس رفضا للدين ولكن العرف والعادات ...
ومادام ان الدين لم يوجب فهو
غير الزامي ... ومن هنا اتى اختيار عدم الرؤية
ومن جهة اخرى من اراد ان يجيز هذا الشي فهو دين ولا اعتراض

[معشي الذيب نواشف]

لاوالله مااشوف غير كذا ..بس اقوول الحين الوضع تغير عن الاول بكثير

بالاول الشاب هو الي يطلب النظره ..الحين البنت هي الي تلزم على هالشيء.

وبصراحه الطرف الي ينرفض سواء بنت او شاب يكسر الخاطر.:khmas258:



لا والله لابه كسر خاطر ولايحزنون

الا على ماقال المثل (فكة من جحا غنيمة )

[ملك الوسط]

في بنت اول شي شفتها وبعدين طلبت جلسة ثانية باشوف فكرها وطريقة تفكيرها وفي الاخير ما حصل نصيب ..


على كيفك الشغله:d

[** نــــــوااارهـ **]

بنت الجنوب
وهـ بس قصيمنا
الهنوف
عاشقة الابداع
راعية غنم
شموخ بدويه
اشكرررررررركم اخواتي على مروركم
واسعدني تواجدكم..

[اللطيفة]

النظرة الشرعية من حق الرجل والمرأة
يترتب عليها الراحة النفسية
لكن كيف بنعرف
في مجتمعنا الجادين ؟!!
للأسف الشديد هذا اللي
بيكون مفقود في عالم الرجال (asj)
ماعلى المرأة إلا حسن الإختيار والتوكل على الله
وكل شيء قسمة ونصيب بالأول والأخير
تقبلي شكري وتقديري
اللطيفة00

[أسد بلاد الحرمين]

لانببلايشوفهاوتشوفه ويسلم عليها ويسمع صوتها
ولاحرج ياشيخة

[** نــــــوااارهـ **]

جليل احترام وجهة نظرك
بس انا ابي ابين ان الغرض من النظره فقط حصول القبو ل بين الطرفين يعني
سبحان الله احيان البنت تكون جميله جدا لكن مايحصل قبول فيه شي مايزبط الي هو النصيب
يعني الغرض موبس شوفه وبس ومقايس جمال ..الغرض توافق كيميائي بين الروحين

ودمت بخير..

[... بنت الجنوب ...]

لا والله لابه كسر خاطر ولايحزنون

الا على ماقال المثل (فكة من جحا غنيمة )




شرير ..:khmas258:

[إعتدال]

بمناسبة هالموضوع بنت اختي رفضت واحد لما شافته .

واهلها محرجين مره من العريس واهله وجالسين يقنعونها لكن وش نقووول.






المفروض شافته قبل لايعطونه كلمه ..
كسر خاطري والله(qq60)

[اوتار الغلا]

السلام عليكم ورحمة الله وبركاته..

انا رأيي ضروري النظرة الشرعية للبنت والولد..حتى يتم القبول والراحة تجاه كل طرف نحو الاخر..

بس اهم شي يكون بعد السؤال عن الشاب من جميع الجوانب ..ثم بعد السؤال..واذا تم قبوله من

قبل الاهل اولا..يتم سؤال البنت واخبارها عن مواصفاته ..اخلاقه ..واذا رضت ذيييك الساعة تتم

الشوفة>>>لكن لابد من ان يضع كل من الطرفين في باله ..انه ممكن يتم رفضه من قبل الطرف

الاخر..وبامكانه هو يرفض ايضا الطرف الاخر اذا لم يرتاح له <<واللي يغصب روحه ..ويقول اخاف

اكسر خاطره والا ماادري ايش..عند ذلك يقع في مطب خطيييير ..وذلك لاسباب::





1_انت بذلك تظلم نفسك وتظلم الطرف الاخر معك..


2_يتم الرفض من اول الطريق..
افضل من بعدين اذا جاه عيال ..
جا بيطلق او يتزوج وحدة ثانية ويقول اناماارتحتلك..>>وللاسف رأينا نماذج لهذه الزيجات..او هي تطلب الطلاق..ومثال على كذا..وحدة قريبة لي قاعدة مع زوجها خمس سنوات ماحبته..وتبي تطلق منه بس اهلها رافضين..


3_الرفض لايعنينقص شخصك..بل هو ائتلاف الارواح واختلافها..بس اهم شي توطين النفس بأنه ممكن يتم الرفض


بالنسبة لتجربتي..

انا دخلت على اللي خطبني..وكنت اقول بنفي ماراح ارفع عيوني ابد مو ضروري اشوف شكله..>>من

الحيا..(wtg)

اهم شي يوم دخلت قعدت قدامه..>>وصية ابوي..عشان يشوفن زين(a21)

وبعدييين هو جريئئئئئئ بشكل ..كلمني وقال وش اخبارك؟ورفعت عيوني وشفته ورديت عليه

..(حسيت انه ثقيل دم وغليظ )طبعا حكمت من شكله

وناداني اجلس قريب منه.. ((طبعا ترا موجود ابوي..بس مخليه على راحته))وقالي نجحتي؟؟

وسأل وشو تقديري العام ورديت عليه وكل مارديت عليه رفعت عيوني اشوفه..
وانا اللي كنت اقول مولازم اشوف..احس ماراح اقدر ارفع عيوني..يامقلب الاحوال

اهم شي قمت وطلعت ..

قعدت عند خواتي وانا بي الصيحة ..اللي مستغربته ابوووي ساااكت>>لان ابوي شدييييد

جا لمي ابوي بعد خمس دقايق ..قال يبي يشوفك ثانيه قلت يالله<<<راح الحيا صرنا نمون

ورحت وجلست من الجنب الثاني..وكلمني بس نسيت وش قال...بعد كذا طلعت..

وهو راح ..يوم صار بالليل..

قعدت افكر فيه..وحسيت انه مااعجبني وماارتحت له..

جا ابوي لمي بالليل ..قال:انه وده يشوفك بكرا بعد..وش رايك..؟؟اميير بغيت اتهور واقول ..ماابيه

شايفني سلعة على كيفه يقلبني.؟؟؟.(طبعا قال لي ابوي..انك كنتي فاكه شعري وهو طويل وانا منزله

راسي ..يمكن ماشافك زين..)

الزبدة..

امييير افكر شوي قلت لاااااا..حتى انا ودي اشوفه مره ثانيه..يمكن ارتاح له هالمره..عاد هالمره قلت

اتمقل..مافيييها ..>>طبعا لان الولد حساافة ورجااال وخوش اخلاااق ..

يوم صار من بكرا واجي..واربط شعري ..لايصير له علثه كل شي واضح..(نسيت اقولكم يوم طلب

يشوفن المرة الثالثة..قال لابوي ابيه تجيب لي كاس ماء او عصير..<<الرجال بشوف مع كل

الاتجاهات..وانا اصلن رااافضة اقدم اي شي له..كان ابوي مقترح علي هالفكرة من قبل..وانا رفضت

خفت اكبه عليه..واشوه الرجال لاسمح الله..اهم شي رفضت ايضا .. وقلت لبوي ابجي وابقعد قدامه

زي امس وخلاااص جاز له ولا يتوكل..قال ابوي كيفك..

دخلت زي ماقلت ..وجاااءت المفاجأة؟؟؟؟

طلب مني اني اجي واصب له كااس ماء>>>>جريئئئئئئئئ

انا قمت وانا مذهوله..من جرأته..صبيتله ماء وعطيته اياه وقلت تامرون شي ..قال سلامتك..امييير

اكشر بوجهه بدووون شعووووور..

يله وش تتوقعون تزوجته ولا ؟؟لا

[طبعي شموخ لو أسكن بكوخ]

طايرتن في العجة
ماله داعي تقعدين توصفين لبسك قدام الرجال
ودي اعرف وش الفايدة بس

[اوتار الغلا]

(hjh)ااا

[** نــــــوااارهـ **]

اشكرك اختي اوتار الغلا على مرورك واسعدني تواجدك
بس بصراحه زودها هذا الرجال ولو انا مكانك ما اخليه يشوفني لا ثانيه ولا ثالثه
المهم اتوقع من كلامك انك اتزوجتيه .. تحياتي

[انين الليل !]

الله يسقي زمااااااااااان اول كانوا الرجال والحريم مع بعض وكلن يعرف الثاني زين يعني نظره شرعيه على مدار العام ...
اما الحين والله كلن منهم ينخم في الثاني ...بس اللي اقوله الله يرزق كل شاب بالبنت اللي في باله وكل بنت بالشاب اللي في بالها يا ررررب .. تحياتي (q87)(q87)

[راعية غنم]

يله وش تتوقعون تزوجته ولا ؟؟لا

اتوقع تزوجتيه :)

[عــزالخــوي]

وعليكم السلام ورحمة الله وبركاته
صحيح ان النظره الشرعيه حلال محلله ربي
بس انا ضد هالشي واكثرهالامور تحصل عند الحظر ما البدووو نووو مافيه لوينط مافي عينه قطره ماشافها

[الشـــــادن]

انــا ضــد النظره الشرعيه << ما هو بكيفك اصلا


لأنه لو كان الهدف منها معرفة كل واحد للاخـر

فـ أعتقد انه مستحيل يكون الأئتلاف والارتياح من اول مقابله
او يكون هناك مجال ان واحد يعرف شخصية وتفكير الثاني > في الغالب طبعا
بالتالي الحكم فيها يكون سريع وظالم

لانه في حياتنا العامه ، احيانا ما نرتاح للشخص من اول مقابله ،
لكن مع مرور الوقت والعشره ، تتغير نظرتنا له 180 درجه ، ونكتشف اننا ظلمناه فيها ، بل ويصبح من أعـز وأحب الناس لنا ...


واذا كان الهدف هو ان يرى شكل الفتاه ، و مستوى جمالها
انا مع كلام الاخ جليل ، والبنت ليست سلعه ، معروضه
وبامكانه الاستعانه بالام والاخوات لاختيار الفتاه المطابقه للاوصاف التي يريدها ..


استغرب صراحه ممن يربط فشل حياته الزوجيه النظره الشرعيه
هي ليست الا أقدار مكتوبه للانسان ، ونرى الكثير ممن تزوج بدون النظره
وعايشين بسعاده ، وكل واحد وجد في الاخر الصفات اللي يتمناها وأكثـر ..

وشكـرآ لكِ ...

[اوتار الغلا]

ايه..تزوجته..

وقالي شفتك يوم كشرتي,,

بس عادي ماالومك..

[** نــــــوااارهـ **]

عز الخوي
احترام وجهة نظرك بس هذي شريعه من حق الشاب والفتاه شرعها المولى
يعني ليه المعارضه في شي مشروع ..
اسعدني تواجدك ..