همهمت وارخت خطاها والفرح فيها قتيل

[الفـارس]

همهمت وارخت خطاها والفرح فيها قتيل=واحتبس دمي فعروقي قلت عمري وش بلاه

اسكتت واضمت شعوري وانتشى قلبي العليل=يوم شفت الكحل سال وارتعد جمر الشفاه

وكلما حارت بكلمه خلت الدمعه تسيل=كنها ترجي الكلام و لا لقت منه انتباه

ويوم وجف الدمع حارت ولا لقت غيره بديل=اهمست والصوت خافت انت لي كل الحياه

وارتعش قلب وتعلق في طرف غصن نجيل=ولاقدر يضمن نجاته والمدى حذفة حصاه

قلت يفدا لك خفوقي هاتي حمولك واشيل=فضفضي واروي شعورك دام فالعبره دواه

شفتها حارت وتاهت واثرها تنوي الرحيل=اثرها تنوي تفارق خافقي وتترك هواه

تاهت والدمع يملى مقلة الطرف الكحيل=وشفت فيه الحظ شيخ ضامه الوقت ونساه

و شفت فعيونه بقايا عاشق و حظه قليل=الزمن شتت دروبه لين ضيع به وتاه

وادعتني والهواجس تحرق الماضي الجميل=والحزن يملى خفوقي ومابقى به غير اه

ويوم قفت هب نسناس تلاعب بالجديل=ولاح لي كف يوادع خافقي ويطلب رضاه


اعجبني هذا الشاعر وابحث له عن ديوان

الشاعر\حمودبن ناهض الحبيل