محمد الشهري

[~نسيت انساك~]

هذه القصيده اعجبتني ويارب تعجبكم

ماني بساذج .. وتكفى غيّر اعـذارك
ولاّ انت يعني بعينك ويش شايفنـي؟
أدقّ دايم عليك .. اسأل عن اخبـارك
تقول: مشغول وادري بـك تصرّفنـي
مشغول عني وانا اللي أعرف اسرارك
واعْرفْك جدا ..ً وأكثر ممّـا أعرفنـي
تراني افهم عليك .. وكـنّ أطـوارك
تقول شكلك زهقْـت وشبْـه عايفنـي
إذا وجودي معك مـا يلفـت انظـارك
فالأحسن امشي.. ولا أقعد وتنزفنـي
يجوز لامن مشيت .. الحـال يتبـارك
أرتاح وانسى ويرجع للكـرى جفنـي
صحيح.. ودي في هذا العمر نتشارك
لكنّ وضعي معـاك الحيـن يؤسفنـي
أنا طباعي كذا مـن قبـل لا اختـارك
ماقطّ وجهي على اللي مـا يوالفنـي
إمـا تجينـي .. وداري عدّهـا دارك
والاّ على الوهم .. يكفـي لا تكلفنـي
تعبـت والله .. ولا يمدينـي اتـدراك
قطار عمر ٍ مـن اول معـك طايفنـي
قلّي شسوّي إذا استبطيت مشـوارك؟
الصبر يفني وبعض الضيـم مايفنـي
أخاف باكر يجي واغْدي "سِنمّـارك"
ومن فوق قصرٍ بنيته لـك بتحذفنـي
واخاف تخلف حلاوة جنّتك .. نـارك
واموت وحدي ولا الْقى مين يسعفنـي
شف عاد لا من بقالي غيـر تذكـارك
أحَنّ من هالحيـاه .. بترْبتـي دفْنـي
فارجوك تصْدق معاي وتكشف ْستارك
من دون احلّفْـك أو حتـى تحلّفنـي
سؤال واحد .. وابيك تجمّـع افكـارك
حتى تجاوب بكلّ وضـوح وانصفنـي
إصرارك اول علي هو نفسه اصرارك؟
ولاّ تغيّرت؟.. ياخي قـول واتحفنـي
ومن قبل تحكـي تأكّـد إن مقـدارك
ما زال نفسه .. وما زالـك تشرفنـي
واهمّ حاجه .. قبـل تبـدي تِعـذّارك
عشان تسحب.. وللذكـرى تخلّفْنـي
أبيك تعرف .. وتدرك .. إنّ مسيارك
هذا أخير .. وبعَدْهـا منـت شايفنـي
إمشْ بطريقك .. وانا بتجيني اخبارك
لاعاد اعَرْفك .. ولاعاد انت تعرفنـي