المساعد الشخصي الرقمي

مشاهدة النسخة كاملة : طبق بيض وكيسة صامولي ضيعت علي 100 ريال


اهم 1
15-03-05, 11:15 AM
مسيكم بالخير يا اعضاء المنتدى

والله مدري وشلون ابدى معكم قصتي هذي اللي تفشل وتقهر لان اللي نصب علي ابو هنود حسبي الله عليه

البارح طلبت مني ام راشد اجيب لهم طبق بيض وكيسة صامولي وانا كنت ابي اطلع اجيب لي كرسي للكمبيوتر بدال هاللي انكسرت رجله عندي ومتعيجز اطلع من العصر الى بعد العشى المهم يوم شفت الدعوا فيها تشغيل سياره وروحه للبقاله قلت اجل امر واجيب لي الكرسي معي بالمره (( عشان مانصرف بنزين مرتين روحه وجيه )) (qq69)

المهم لبست وطلعت وانا عارف محفضتي مافيها الا حول 27 ريال والكرسي خابره من الـ 120 وطالع قلت خل امر على الصراف واسحب لي ميتين ريال وبعدين اخذ الخبز وامر اجيب لي الكرسي

بالفعل رحت للصراف وسحبت ميتين ريال (( امهات ورقه وحده مهيب ورقتين )) حلوه امهات مدري بتعرفون لها ولا لا :(

المهم خذت الميتين ورحت للبقاله اللي بجنب الصراف وخذت منه طبق بيض بـ 11 ريال وكيسة صامولي بريال وعطيته الميتين ريال وانا جالس اهوجس ورجع لي الباقي وانا اخذ الفلوس واحطها بجيبي بدون ما اعدها من العجله

ورحت لذاك المحل اللي ودك بس تسكن في عمارتهم من زين الكراسي اللي عندهم ماشاء الله المهم ربع ساعه ولا عيني طايحه على ذاك الكرسي الدوار اللي ماودك الا تحطه في مدخل البيت من زين فيه

هاه يا محمد بكم الكرسي

الكرسي بـ 185

افاااااااا طيب والنهايه بكم

النهايه ( اكر ) كلام 180

الا باخده بـ 150 يا الله حمله يا صديق

ايس كلام 150 كيف 150 هذزا خساره كتير اكر اكر 175

اقول يا الحبيب معي 155 تبيها ولا مشيت هذا اخر كلام

لا صديق بس عسان انتا 160 ريال مافي كلام زياده

طيب مافي كلام زياده مافي مهيب مشكله ميه وستين ميه وستين توكلنا على الله جيب يا محمد ركب سياره

فين سياره صديق

وادربي راسي معه رايحيين للسياره وبالعفرته والتدزز والنغبره يالله ركب هالكرسي في المرتبه اللي ورى

ويوم جيت احاسبه واطلع فليساتي من مخباتي ولا مامعي الا 88 ريال وفي المحفضه 27 ريال ياولد وين الميه وابترم في هالسياره ياناط في المرتبه اللي ورى يا راز خشمي اطل تحت المرتبه وجع وين راحت الميه الثانيه

وابو هنود يطالع فيني وشكله يقول وش هالنصاب اللي طلع لي كن وده يرجفني وانا احوس في السياره وماسك باب السياره يخاف اشغل وانحاش

انا لله وانا اليه راجعون طيب يا سديق نزل كرسي خمس دقيقه بعدين انا يجي

نزل الحبيب الكرسي وهو يطالع فيني بعين قشراء وريحة اباطيه يشمها اللي على بعد كيلو

المهم نزل كرسيه واطربق رايح للبقاله

صديق وسافهني يكلم له هندي معه يا صديق ولا كنه شافني واطق بيدي الطاوله يا صديق ويناضر فيني ايوا صديق ايس في

صديق انا قبل شوي يجي شيل طبق بيض وواحد صامولي بـ 12 ريال

ايوا صديق ايس مسكل

انا عطيتك 200 ريال وانت رجعت لي بس 88 ريال باقي لي 100 ريال يا صديق جيب 100 ريال

ايس جيب انتا بس جيب 100 ريال مافي جيب 200 ريال

واطلع له ورقة الصراف واقول له شوف يا صديق انا قبل شوي بس سحبت 200 ريال

قال لا صديق انتا في كلتان انت بس في 100 ريال مافي 200 ريال

وقلت له افتح درج الطاوله وانت شوف في ميتين ولا لا وفتح الدرج واشوف عنده كم ميات وخمسينات وعشرات وريالات بس ماشفت لا ميتين ولا خمس ميه

ولا ادري وش اسوي اختبصت وسكت وقلت في نفسي انا متأكد اني معطيه 200 بس وين دليلي والغلط غلطي انا اللي مايعد فلوسه قبل يطلع

ورجعت لام راشد بالبيض والصامولي وتعيجزت ارجع للبنك واسحب مره ثانيه واروح لابو هنود راعي الكراسي ضايق صدري من هاللميه اللي طارت ومافيني شده اروح اشمشم ريحة اباطي هالجلف

والضاهر اني ببتل على كرسيي ابو كفر منكسر الين اروح مشوار مره ثانيه اجيب للبيت اي غرض يبونه

سامحوني لو في القصه اغلاط املائيه او كلام مهوب مفهوم متعيجز والله اراجع القصه من اول وجديد

اقروها كذا ومشو حالكم

تحياتي للجميع

اهم 1

ابو راشد

بوصلة احساس
15-03-05, 11:31 AM
يبوراشد حتى طبق البيض ب 9 اريل مو 11 ريال

الله يعوضك

بس كنك حومت كبودنا يوم قلت ريحة الهندي


.......

اليمامه
15-03-05, 12:54 PM
طيب يابوراشد وراك ماحاسبت بـ 27


وريحت عمرك من هالبلشه هذي كلها


والله يخلف عليك بس احسن هذا التعيجز ومايسوي


بس بقالتنا يبيعون طبق البيض بـ 10 ريال

اهم 1
15-03-05, 01:11 PM
طبق البيض له اسعار

فيه ابو تسعه ريال وفيه ابو عشره وفيه ابو احدعش ريال

من قال لكم ان مافيه الا بـ تسعه وعشره ولا عشانكم ماتشترون الا هذولا بس

لوكم رجال كان قلت ماعندكم سالفه بس بنات والبنات ماينلامون مايفهمون في الامور هذي زين

شكرا لكم على هذا التعقيب الجميل منكم

تحياتي

العاذريه
15-03-05, 02:47 PM
ياخي كل ماجيت ارد وشفت هالعالم اللي تناقز وترقى وتحول بتوقيعك طارت بوهتي..على العموم ماعلينا..

اولا:انت غلطان 100% قلي ليش؟ ابشر ابقولك ليش بس لايدري الشنفره تراي سارقته منه..ياخي المفروض يوم جيت

تحاسب الهندى تركت هالهوجاس عنك .. يعني انا لو مكانه كان مارجعت لك الا 31ريال بس ..امزح

ثانيا:من بغاه كله خلاه كله..يوم ان العجز ذابحك والبنزين عامل عمايل معك وودك توفر..كان انتبهت وفتحت عيونك زين

<<< عارفه انه نفس النقطه الاولى بس مشتهيه اتفلسف..

ثامنا وهو المهم:طبق البيض بعشره مهب بحدعش..<<<وقفت على الحريم طبق البيض.. مسكل كبير عسان فيه مخ صغير

<<< هذا انت مهب حنا(وجه كاتم الضحكه)

خامسا:تكفى ياخوي اسحب موضوعك للترفيهي حسافه تحط بالعام ..ودي اكركر حتى اشبع عليك بس مستحيه هنا..

محمد الراشد
15-03-05, 02:51 PM
الله لا يشغلنا الا في طاعته . ابى اخفف من ضيقة صدرك ترى في محلات العدد................ في التخصصي . ( ممنوع ذكر الاسماء لان ماراح يعطوني عمولة لو شريت منهم ) يبيعون كفرات متنوعة . وما دام مابقي معك قروش والنقالي ( مع انك تقول هندي )راعي البقالة سرقك عينك عينك اشتر كفر للكرسي اوفر.
يقول الاول .................قديمك نديمك لو الجديد اغناك . ترى فيه محلات كثيره في شارع السويدي العام الروضة . انا مع الضحك على سالفتك ضنيتك من جيرانا فوصفت لك اللي حول بيتنا ...............تراي ما نيب في التخصصي . عنها غرب شوي .........( ام الحمام ) بش حبيت اشخص عليك .................................................. ......................لك اطيب التحايا

القصيميه
15-03-05, 03:24 PM
هلا اهم واحد

الله يعوض عليك

المهم البيض طلع زين

والخبز طلع طازه والا بايت؟

شئ احسن من لا شئ

يعني لو عطاك بيض نصه خربان

وصامولي متنتف من امس

كان وش يصير موقفك قدام

ام راشد؟

تحلى الدنيا
15-03-05, 03:24 PM
هههههههههههههههههههههههه

كل موضوع عاجبتنى توقيع ابو راشد
وش الناس مفرفش وناقزين يمين ويسار
والله رجا ل هذا فلــــــــــــــــــــــــــــــــــــه

وربى فله

غير كذا

يا خى من اللى قائلك اسحب من مصرف ام المئتين
هههههههههههههههههههههههههههههههههههههههه

عاد اللى يجى من هندى تستحمل واذا سالفه الكرسى بارسلك درزن بس تكفى علمنى ؟

المهندسة
15-03-05, 10:58 PM
أهم واحد .. والله ضحكتني ضحك ..
بس هاذيلا الهنود في منهم ملاعين .. حرامية عيني عينك ..
ومدام يوم رديت له وما عطاك وجه .. يعني هو الحرامي ..

بس وين بيروح من الله بيخسرهم مني ولا منيه ..
هذا كلام مفروغ منه ..

والله الواحد ينقهر يوم ينسرق ..
حتى لو كان ريال واحد ..

ما عليه خيرها في غيرها ..
ولا تنسى تعد فلوسك مرة ثانية ..
والدنيا مب أمان مثل أول ..

الحمد لله ان ما خطفوك مع الفلوس ..

قلم بلا قيود
16-03-05, 01:39 AM
بعد اذنكم جميع يعني

وبعد اذن اخوي اهم 1

يطير للترفيهي دون هواده وعلى المتضررين من الطياره المقلعه مراجعة أقرب دورية خفر سواحل

هذا عجز مثل ما قالو السابقين بالردود
معك 27 ريال بتصرف 200 ريال ليه ؟؟؟
كسل

أمـــ(الورد)ــيـرة
16-03-05, 08:07 PM
هههههههههههههههههههههههههااااااي..

وطارة الميه.. احسن <<<<< ذابحتها الشماته..

اهم 1
19-03-05, 07:34 AM
الاخت العاذريه

والاخ محمد الراشد

والاخت قصيميه

والاخت حورية البحر

والاخت المهندسه

والاخ الاستاذ قلم بلا قيود

والاخت اميرة الود

اشكركم جزيل الشكر على هذا المرور الجميل والتعقيب الاجمل

والله يعافيكم ويخليكم


تحياتي للجميع

Deema
19-03-05, 12:27 PM
الله يعينك ويعوضك بس خلاص المره الجايه تاخذ بالك تمام اخخخخخخخخخخخخخخخ

اذا انت اهم واحد وضيعت فلوسك هههههههههه اجل لو ما اهم ايش راح تضيع حالك هههههههههه

تسلم اهم

اهم 1
19-03-05, 01:07 PM
مشكوره اختي ديما على المرور الحلو

اما بالنسبه لاسم اهم 1 هذا سالفته سالفه الاسم هذا انا اول ماجيت ادجخل المنتدى هذا لاول مره لقيت الاسم هذا منطول عند باب المنتدى ورحمته بصراحه وشلته معي واضفته عندي في دفتر العائله رحمتا وعطفا له

شكرا لك مره ثانيه

هبوب الشمال
19-03-05, 08:00 PM
واللة من الهووووووووووووول يابو راشد

مية وضاعت شكلك ناسى النظارة بالبيت صح0 هههههههههه

قم بس قم

ابــوفــيــصــل
19-03-05, 08:29 PM
الله يعينك ويعوضك بس خلاص المره الجايه تاخذ بالك تمام اخخخخخخخخخخخخخخخ

ღبـ ح ـر الكتـ م ـانღ
20-03-05, 06:04 PM
ههههههههههههههههههههههههههههههههههه

الله يعطيك العافيه اخوي اهم 1


تحياتي لك ياغالي

اهم 1
21-03-05, 07:02 AM
يا مرحبا بالغالي هبوب الشمال

اسفرت وانورت يابو وليد

لا والله يا هبوب الشمال لانسيت النظاره في البيت ولا في السياره حتى

الا ملعوب علي وانا بكامل قواي العقليه وبنظاراتي لكن المشكله الضاهر اني كنت اهوجس فيك لحظتها ولا دققت في الباقي اللي رجع لي

على العموم شكرا لك على هذا الحظور الطيب والجميل يا هبوب الشمال

تحياتي وتقديري لك

اهم 1
21-03-05, 07:03 AM
جزاك الله خير اخوي ابو فيصل ليتك عاد قلت مر علي واعوضك الميه ريال

لكن عاد بنسامحك هالمره بس عشانك كتبت ردك هنا وتشرفنا فيك وفيه

تحياتي لك

اهم 1
21-03-05, 07:04 AM
الله يعافيك ويخليك اخوي رهين الوقت

شكرا لك ولحظورك الطيب والجميل

تحياتي وتقديري لك

ابو خلف
21-03-05, 07:16 PM
الله يلعن ام الجريه



اكره المواقف


هذي مررررررررررررررررررررررررره




يعطيك الف عافيه اخوووي



تحياتي

اهم 1
22-03-05, 07:00 AM
الله يعافيك ويخليك اخوي ابو خلف

شكرا لك ولمرورك الطيب

تحياتي وتقديري لك

عبْث
22-03-05, 08:18 AM
المهم لبست وطلعت وانا عارف محفضتي مافيها الا حول 27 ريال والكرسي خابره من الـ 120 وطالع قلت خل امر على الصراف واسحب لي ميتين ريال وبعدين اخذ الخبز وامر اجيب لي الكرسي




اخس ولد نعمه مع صراف


هههههههههههههههههههههههه

نصب عليك ابو فسيه

ابو فسيه = ابو هنود ( اختلاف ثقافات ماعليك)


بس يابو الشباب غالي البيض بــ 11

الله يخلي لنا فقييييييه للدجاااج

ويسلمون

اهم ون