المساعد الشخصي الرقمي

مشاهدة النسخة كاملة : هل هذا الامر خطير ؟!.. ام انه عادي جدا؟! .. آرائكم


memo-chan
14-11-09, 01:37 AM
.
.
.
.
.
.
.
.
.
.
.
.
.
السلام عليكم اعضاء قصيمي نت ..

بقولكم سالفتي ويارب القى عندكم الحل ..

اخواني انا اخوي تقريبا عمره 14 .. وتعرفون هالعمر يبدا الواحد يخبي اسرار عن اهله وكذا

انا دايما احاول اخلي اخوي يقولي كل شيئ .. على الاقل اصير متطمنه ..

وهو ما يقصر يحكي لي كل اللي عنده .. لأنه عارف اني ماراح اقول لاحد

ولا احاول اعطيه نصايح او شيئ.. كذا بصير زي امه وبينبثر فيني

لذلك امشي معاه باي شيئ يقوله .. اهم شيئ اني عارفته

المشكلة اخوي صاير يقولي اشياء ما تعجبني :( ..وانا اضحك اسوي الامر عادي وامشي معاه

يعني لما كان اصغر من كذا شوي كان يقولي عن هباله في المدرسه وهرباته ومطاقاته مع الاستاذ :)

وكان الامر عادي ما اخالف

لكن الحين صاير يقول لابوي بطلع مع السواق وبعدين يرمي السواق ورى ويروح هو واخوياه مادري وين ويفحطون ومادري ايش يسوون :(

الامر صار خطير لانه كم مره كان بيروح فيها وربي ستر !!

الحين وش اسوي ؟.. هل اخون اخوي واقول لابوي عن هذي الاشياء ؟ بس احس صعبة مره :( .. ولا اسكت واصبر وادعو من الله انه مع الوقت بتتحسن سواقته وانه ماراح يصير حادث لا قدر الله ؟!!.. وهذي اصعب (qq79)

وش رايكم انتم؟

هل هو عادي ان الواحد في سن الـ 14 يسوق ؟! .. بعض الناس يخليه يسوق في الـ12 :(
هل الشباب دايم بهالسن يسوون هالحركات ؟
واذا انت قد سويتها او احد اخوياك كم نسبة انه بيسوي حادث ؟
هل هو امر خطير .. او امر يتغاضى عنه؟

انتظر آرائكم

بنت الهيلا
14-11-09, 01:48 AM
نصيحه لا تتغاضى عنه

لازم تخبرى على الاقل الوالده وهى تتصرف

سنه صغير على السواقه والخوف لا قدر الله يسيرله شى بعدين تندمى انتى

الجبل الشاهق
14-11-09, 02:16 AM
إذا صار له شيء لا قدر الله ماينفع الندم

نصيحة الحقي عليه وعلمي أبوك أو أمك وأنتي عارفه الحوادث الله يكفينا شرها كلت العالم

كل يوم في الصحف أخبار عن وفياة بسبب الحوادث فتداركي الأمر بسرعه قبل مايطيح الفاس بالراس

خاصة إذا كنتم ساكنين في مدينة مكتضه بالسكان مثل الرياض و جده و الدمام وغيرها .



تحياتي

هذرهـ قوايل
14-11-09, 02:23 AM
نصيحتي خوووني اخووكـ وعلمي الواالدهـ واذا ماانفعتـ علمي الواااالد
لانه بهالسن يصير طااااايش ماايعرف مصلحه نفسه واذا صاار شي
لاقدر الله بتلؤمين نفسكـ قبل اي شي خليهم يووقفوونه عند هالحد
لاتكبر الساالفه وتصير اشيااء ثاانيه هو بسن مرااهقه واي شي
ممنوع بالبيت بيسوويه خاارج البيت ...

فآرق عنـي !
14-11-09, 02:23 AM
ما فيه أحد يتعلم آلسوآقة إلآ يفحط إلآ مأ ندر
ومرحلة وتزول
لكن خآفي من آلآمور آللي تجي مع آلتفحيط
آلمخدرات وآلدشير
أعطوآ آلمرآهقين إهتمام وحنان
بدون ما تحسسوه بآنه طفل او اهتمامكم إهتمام أوصيآء

الهلالي
14-11-09, 02:36 AM
لا فات الفوت ما ينفع الصوت

خبري ابوك بحيث ما يدري انك انتي اللي خبرتيه

الحادث لا قدر الله يصير بأٍرع من غمضة العين

واخوك بعيد الشر عنه لو صار له شي ما رح تلقين احد تلومينه الا نفسك ، لانك بتعيشين بحالة نفسيه وقلق دائم من انك انتي السبب اللي ما انقذتي اخوك

عمر 14 في هالوقت المفروض ما تسلم له سيارة، بداية مرحلة المراهقه واصحاب السوء ما يقصرون

هم اللي يخلون بنظره ان اللي ما يفحط او يخاف من التفحيط موب رجال

اسرعي لاناذ اخوك قبل ان يحدث ما لا يحمد عقباه

أصفر عرقوب
14-11-09, 08:25 AM
مرة من المرات خرجت من البيت فإذا أحد أبنائي يسولف مع طفل يقود سيارة فان صغيرة وكان السواق بجانبه فاستغربت وبعدين سألت ابني من هذا فقال صديقي في الفصل وكان ابني في ذلك الوقت في الخامس الابتدائي ولم أكن أعرف والد هذا الطفل لأبلغه فالأمر خطييير جداً ، أبلغي الوالد فالموضوع لا يحتاج إلى تأخير وليعمل الوالد له كميناً حتى يعتقد أخوك أن أباه كشفه صدفه لكي لا يعرف أنك ِ من بلغ الوالد وكذلك يجب أن يُهزأ السواق ويهدد بالطرد .





.

memo-chan
14-11-09, 09:09 PM
والله شكل معكم حق .. بس اذا اكتشف اني انا اللي معلمته بكره ماراح يجيني ابدا :( .. وانا احسه كل ما يكبر كل ما يطيح باشياء اكثر .. ومستحيل احد يوقفه دائما يسوي اللي في باله ..

مافيه طريقه تجي من طرفي انا ؟ .. بدون نصايح لانها ما تفيد ,,

ومشكورين كلكم على المساعدة .. يعطيكم الف عافية