المساعد الشخصي الرقمي

مشاهدة النسخة كاملة : اليوم تعبني مشهد قاسي


ولد حمده
04-06-09, 07:23 AM
اخوكم ولد حمده صابته وعكه صحيه وكان بيروح فيها بسم الله عليه (qq15)


تماسكت وتشجعت وركبت سيارتي ورحت للمستوصف شفت منظر اقسم بالله محد يتحمل يشوفه


وانا بالانتظار الا اشوف ولد عمره تقريبا ست سنوات مع ابوه والولد الله يصلحه مايقر في مكانه

رايح جاي وابوه ينادي ويأشر والبزر يلعب في ساحة المستوصف

الابو ماتحمل قام من مكانه وياليته ماقام

مسك الولد وفسخ عقاله واشتغل في هالولد بعقاله قسم بالله صراخه يقطع القلب

وما اكتفى بالعقال صار يشيله فوق ويرمي به تحت في الارض ويشوته قدامه لحد ماجلسه على الكرسي
قلت له حرام عليك يارجال البزر ماسوا شي يخليك تضربه بهالوحشيه

قال لي لاتدخل فيمالايعنيك هذا ولدي وانا حر فيه

قلت ولدك مسؤل عنه امام الله وتدخلوا ناس كثير نصحوه والاخ مسوي فيها تطنيش شال الولد بكل قسوه وقال بندور لك مستوصف ثاني وطلع

يعني الولد تعبان جاي يعالجه و يضربه بكل همجيه

تصدقون هالمنظر عجزت انساه

الابناء نعمه من الله واذا الله رزقكم بابناء هم أمانه عندكم وليسوا ملك لكم

اتمنى اشوف رايكم

فيلسوف البدو
04-06-09, 07:30 AM
الف لا باس عليك طهور ان شاء الله وماتشوف شر
العطف والحنان نعمه من نعم الله على الناس وهذا الله لايبلانا لو دققت في وجهه
راح تعرف ليه اخلاقه بهالشكل نسئل الله السلامه
اذكر في احد المرات احد ابناء العمومه جاب ولده معه لطلب خدمة من الشركة
اللي اعمل فيها وكان معه ولده وقال له كلمة اقسم بالله العظيم تمنيت لو اني
ضاربن الاب على قولتها لولده باسلوب استفزازي وفيه سخرية من الولد قدام الناس
المصيبة ماهي الحين المصيبة لمنه بكرا كبر هالولد راح تشوف انواع العقوق والسبب
في البدايه هو الاب الله يرزقني البر بوالدتي ويرزق ابنائي البر فيني عند شيخوختي

ماهـينور
04-06-09, 07:37 AM
حرااااااااااام عليك ياخي ماكفاك تعب قلبك جاي تتعب قلوبنا معك والله كرهت هالشخص وانا ماشفته

ياربي ليش القسوه ومع من مع الابناء اقرب ناس لك واطفال صغار

الله يكون بعون كل طفل تحت رحمة ابو ظالم او زوجة ابو ظالمه حسبي الله ونعم الوكيل

[ إحســآس ]
04-06-09, 07:56 AM
.

يآحـــــرآم ..

عجبي من هذا الزمآن ترى آب لآ يستحق الأبوة وأم لآتستحق الأمومه !!

سيجني ثمآر فعلته عاجلاً أم آجلاً .

الوادي
04-06-09, 01:01 PM
اولا لابأس طهور ...ماتشوف شر ..
ثانيا ياشين الرجل الي يكفخ بعياله قدام الناس ولا هوب اي ضرب بقسوه والضعيف تعبان ...مايدري ان فيه ناس يتمنونهم ..
انا ماقهرن الا قولته مالاكم دخل ..المفروض اعتذر للناس وقال ازعجنا وازعج المرضى الموجودين ..

ولد حمده
04-06-09, 04:39 PM
الف لا باس عليك طهور ان شاء الله وماتشوف شر
العطف والحنان نعمه من نعم الله على الناس وهذا الله لايبلانا لو دققت في وجهه
راح تعرف ليه اخلاقه بهالشكل نسئل الله السلامه
اذكر في احد المرات احد ابناء العمومه جاب ولده معه لطلب خدمة من الشركة
اللي اعمل فيها وكان معه ولده وقال له كلمة اقسم بالله العظيم تمنيت لو اني
ضاربن الاب على قولتها لولده باسلوب استفزازي وفيه سخرية من الولد قدام الناس
المصيبة ماهي الحين المصيبة لمنه بكرا كبر هالولد راح تشوف انواع العقوق والسبب
في البدايه هو الاب الله يرزقني البر بوالدتي ويرزق ابنائي البر فيني عند شيخوختي


الفيلسوف الله يجزاك خير وجعلك ماتشوف شر وانا اخوك

حتى الكلمات الشينه المفروض ماتنقال للولد ويلومون الورعان اذا سمعوا منهم مثل هالكلمات المفروض الاهل ينلامون

الله يرزقك ابناء برره وتلحق برهم في شبابك وفي شيخوختك

ولد حمده
04-06-09, 04:42 PM
حرااااااااااام عليك ياخي ماكفاك تعب قلبك جاي تتعب قلوبنا معك والله كرهت هالشخص وانا ماشفته

ياربي ليش القسوه ومع من مع الابناء اقرب ناس لك واطفال صغار

الله يكون بعون كل طفل تحت رحمة ابو ظالم او زوجة ابو ظالمه حسبي الله ونعم الوكيل
ياختي ماكتبته الا وانا ابيكم تشاركوني الاحساس بالالم وتخففون عني

الله يعطيك العافيه

ولد حمده
04-06-09, 04:45 PM
.

يآحـــــرآم ..

عجبي من هذا الزمآن ترى آب لآ يستحق الأبوة وأم لآتستحق الأمومه !!

سيجني ثمآر فعلته عاجلاً أم آجلاً .
اكيد يجني الثمار
الله يكون بعونه ويحنن قلب ابوه عليه

ولد حمده
04-06-09, 04:47 PM
اولا لابأس طهور ...ماتشوف شر ..
ثانيا ياشين الرجل الي يكفخ بعياله قدام الناس ولا هوب اي ضرب بقسوه والضعيف تعبان ...مايدري ان فيه ناس يتمنونهم ..

انا ماقهرن الا قولته مالاكم دخل ..المفروض اعتذر للناس وقال ازعجنا وازعج المرضى الموجودين ..


صدقتي ياختي لو انه اعتذر كان يهووون خان ربه وخان رعيته

الله يعطيك العافيه

اليتيمه المجروحه
04-06-09, 05:10 PM
حسبي الله ونعم الوكيل
طيب عندي سؤال
هل ياثم الي يقول اكره ابوي لانه
كان ومازال يعامله بقسوة؟

@ جوري @
04-06-09, 05:14 PM
صح انه مايجوز يضرب الطفل الضرب هذا خاصه هو تعبان لكن صراحة بعض البزران يرفعون الضغط ماينفع معهم الطيب لكن وين اللي بيحتسب الاجر ويصبر

مغترب في بلدي
04-06-09, 05:41 PM
لو كان بأحد الدول الأوروبية أو أمريكا , لأوخذ منه الولد رغما عنه وأحيل لمؤسسة معنية بتريبة الأطفال , لأن هذا الأب لا يستحق بأن يكون أبا .

على العموم هذا المنظر الذي رأيت لايتعدى كونه مظهرا طبيعيا لمظاهر التخلف التي نعايشها بشكل يومي .



تحيــــــــاتي ,,,,

حياتي تساهيل
04-06-09, 08:59 PM
اكيد اعصابه مشدودة في ه ناس يسوون تصرفات حمقاءفي حالة عصبيتهم
وبعد ان يهدأو سرعان مايندمون
ولكن مهما كان السبب مايحق له هالضرب المبرح
والابناء أمانه في اعناق ابائهم

ديفا
04-06-09, 09:10 PM
ياااقلبي !

(q78)

ايه يا دنيا
04-06-09, 09:22 PM
نعوذ بالله من قسوة القلب
يبدو ان الأب مريض نفسياً وكان يتعرض في طفولته للضرب

غريب المهاجر
04-06-09, 10:23 PM
وألاً طهورإن شاء الله أخى الحبيب
وقدتذكرت الحديث عندما
قدم الأقرع بن حابس للنبي صلى الله عليه وسلم رآه يقبل الحسن والحسين،فقال الأقرع-بطبيعة الأعراب أتقبلون صبيانكم؟!والله إن لي عشرة من الأولاد ما قبلتُ واحدًا منهم.فأجابه النبي صلى الله عليه وسلم:”وما أملك أن نزع الله الرحمة من قلبك؟!”
وبقول نبينا عليه الصلاة والسلام نقولها لمثل هؤلأ:وما نملك أن نزع الله الرحمة من قلوبكم؟؟!!
نسأل الله السلامه

سيمار
05-06-09, 12:37 AM
الحمدلله الذي عافانا مما ابتلاهم به
فيه ناس ماتستاهل تكون اب او ام

الهلالي
05-06-09, 12:41 AM
شفت منظر مماثل والله قبل سنه ونصف، كأنه نفس هالموقف، اب ومعه ولدين، قاموا الولدين يلعبون، ويقوم ويجلدهم بالعقال، وهم يصيحون وهو يزيد عليهم ، والله ما رحمهم ولا شي

نبض قلبه
05-06-09, 01:21 AM
سبحان الله قلوب قدت من حجر

نبضة ألم
05-06-09, 01:36 AM
مثل هذا من يستحق أن يحرم من ابنه ويستحق انه يؤخذ منه هذا الولد
كي يشعر بالنعمة التي اعطاه الله اياها

حسبنا الله ونعم الوكيل

مشرقه
05-06-09, 01:59 AM
والله شي يعور القلب


طيب وش رايك هذا عمره عشر سنين

انا مره في السوبر ماركت

طفل عمره ثلاث سنين اخذ حلاوه من عند الكاشير

شافه ابوه وامه معه اخذو الحلاوه من بين يدينه وهو يصيح منهار

ويبونه يسكت اجلدوه قدام الناس لارحمه من الاب ولا من الام

انا مدري كيف يتعاملون مع عيالهم

حسبنا الله ونعم الوكيل

ولد حمده
05-06-09, 06:42 AM
حسبي الله ونعم الوكيل

طيب عندي سؤال
هل ياثم الي يقول اكره ابوي لانه

كان ومازال يعامله بقسوة؟


والله ياليتيمه محد يقدر يجاوب على سؤالتس غير الشيوخ اهل الفتوى

الله يوفقتس ويحنن قلب ابوتس

ولد حمده
05-06-09, 06:51 AM
صح انه مايجوز يضرب الطفل الضرب هذا خاصه هو تعبان لكن صراحة بعض البزران يرفعون الضغط ماينفع معهم الطيب لكن وين اللي بيحتسب الاجر ويصبر

ويييييييين ماينفع معهم الطيب البزر لاتجاهلتيه وسفهتيه هذا عقاب له اما الضرب اجراااااام

ولد حمده
05-06-09, 07:14 AM
لو كان بأحد الدول الأوروبية أو أمريكا , لأوخذ منه الولد رغما عنه وأحيل لمؤسسة معنية بتريبة الأطفال , لأن هذا الأب لا يستحق بأن يكون أبا .

على العموم هذا المنظر الذي رأيت لايتعدى كونه مظهرا طبيعيا لمظاهر التخلف التي نعايشها بشكل يومي .




تحيــــــــاتي ,,,,


يابن الحلال لاترجع كل شئ للتخلف ترى محد استحقرنا الا يوم استحقرنا انفسنا خلك شامخ واحترم مجتمعك يحترمك الجميع ولاتقلل من قيمة نفسك ولا قيمة مجتمعك

ويعطيك العافيه

ولد حمده
05-06-09, 07:23 AM
اكيد اعصابه مشدودة في ه ناس يسوون تصرفات حمقاءفي حالة عصبيتهم
وبعد ان يهدأو سرعان مايندمون
ولكن مهما كان السبب مايحق له هالضرب المبرح
والابناء أمانه في اعناق ابائهم
اعصابه مشدوده لايتولى البزر يرسله مع احد اعصابه رايقه

في شي فوق كلمة عصبي ماعصبي في شي اسمه الخوف ومراقبة الله

الله يعطيتس العافيه