المساعد الشخصي الرقمي

مشاهدة النسخة كاملة : لو كان عندنا قانون تعويضات...وش راح تسوون ؟!؟!


عذب السجــايا
25-05-09, 12:39 PM
السلام عليكم ورحمة الله وبركاته

(ردوا السلام أول :gg4mpup:)...

سيدة سعوديه تطلب تعويض خمسه مليون ريال سعودي من احد فنادق جده
لأن البعوض الي في الفندق قرصها وخرب وجهها...

سيدة أمريكيه ...تقاضي "كوفي شوب" على حد علمي ..لأن الكوفي انكب عليها وأحرقها..
.قالت ليش ماكتبوا على الكأسه "تحذير" يبين ان الكوفي ساخن
وبالفعل كسبت القضيه ...وصارت تكتب على الكاسات كلمة HOT

لو ان قانون التعويضات عندنا هنا كان رفعت دعوى على البلديه عشان الحفره
الي قريب من بيتنا الي اعدمت سيارتي خصوصا اذا جيت مسرع ابي الدوام في الصبح...

ولو كان قانون التعويضات موجود لقاضيت مدرس درسني في رابع ابتدائي عطاني
مقبول في الفقه من دون وجه حق وجلدني بسلك الكهرب 6 جلدات لين احمرّت ايدي
حسبي الله عليه ....

وأقاضي فريق نادي النصر الي تسبب زيادة معدل الضغط والسكر لمشجعيه ... من زمان ماجاب لهم بطوله

وقاضيت...دوريات الأمن ..لأنهم يوقفونك ويجبرونك تنزل عندهم..والمفروض هو يجي عندك وانت تبقى في السياره...

وقاضيت المستشفى يقول لولد عمي ان ايدك مافيها كسر.
..على الرغم ان الرجال شاف العضم متحرك من مكانه...ولكن الي سوى الاشعه...ما صوّر مكان الكسر.

وفي الأخير سأطالب بتعويض 2 مليون ريال سعودي من منتديات قصيمي نت
لعدم توقيف العضو "فيلسوف البدو" عند حده ...محد سلم من شرّه
حتى العضوه الخلوقه "الميسم" رفع ضغطها يقول انك تحبين الرافضه

وانتم راح تقاضون من؟؟
(qq15)

نبض قلبه
25-05-09, 01:17 PM
وعليكم السلام..
اول من بقاضي الجامعه اللي نقلت منها والجامعه اللي نقلت لها لعدم معادلتهم المواد الله حسيبهم قولوا امين
وبقاضي مديرتنا اللي بالثانوي اللي ظلمتنا مع انا ندرس بفلوسنا مو مدرسه حكوميه عشان تبطش فينا
اصلا اللي يطلب تعويض هنا مستحيل يناله ...شي معروف
اما السعوديه اللي الناموس لعب بوجهها(qq2) ضحكتني الله يسعدها على بالها احد بيعبرها
الاطباء عندنا ذبحوا الاطفال بخطأ طبي
استأصلوا اعضاء حيويه بخطأ طبي
وياكثر البلاوي اللي صايره بخطا من مسؤؤل
بدون ماحد يحاسبهم والا ياخذ منهم تعويض
والعوض من الله :(
عاد بنقدر ناخذ حنا تعويضات ياعذب
ضحكتني :rofl951:
احلم وخلينا نحلم زيك مو مشكله (bb)

@ملكة الورود@
25-05-09, 02:22 PM
وعليكم السلام ورحمة الله وبركاته


موضوع حلو وخفيف ياعذب

راح افتح لك لسته انتظرني باذن الله عاد الله الله بالتعويض




سيدة سعوديه تطلب تعويض خمسه مليون ريال سعودي من احد فنادق جده
لأن البعوض الي في الفندق قرصها وخرب وجهها

... هذي ما اصدق انها عندنا الا ان كانت من ال000000000؟ يحق لها الديره كلها على كيفها

مشرقه
25-05-09, 02:44 PM
ياكثرهم... أخي عذب

كل هذا شايله بقلبك من يوم كان عمرك عشر سنين

وش اللي فتح جروحك وأنا أختك

أنصحك ..حللهم بس ماعندك أحد

ام فريق النصر انت صادق والله ارحم مشجعينها

الحين أنت فاتح المجال لنا والا وشلون

يعني نفضفض

بوركت

عذب السجــايا
25-05-09, 03:31 PM
وعليكم السلام..
اول من بقاضي الجامعه اللي نقلت منها والجامعه اللي نقلت لها لعدم معادلتهم المواد الله حسيبهم قولوا امين
آمين يارب العالمين ولعلمك نظام الجامعات عندنا زي نظام البريد السعودي...شياب قاعدين على كراسيهم لاتطوير ولاشي
وبقاضي مديرتنا اللي بالثانوي اللي ظلمتنا مع انا ندرس بفلوسنا مو مدرسه حكوميه عشان تبطش فينا
هذي مشكلة الي يبي يثبت العكس فيتهور ويظلم...يعني تبي تقول للناس ان مو كل المدارس الأهلية مفلوته
اصلا اللي يطلب تعويض هنا مستحيل يناله ...شي معروف
(asj)
اما السعوديه اللي الناموس لعب بوجهها(qq2) ضحكتني الله يسعدها على بالها احد بيعبرها
يمكن تكسب قضيتها....في المشمش :whwhwh:
الاطباء عندنا ذبحوا الاطفال بخطأ طبي
عمي كان دكتور في المستشفى الجامعي قال لنا عن قصة بنت عمرها 10 سنين ..حقنها واحد من زملائهم بمحلول زياده عن اللازم وماتت...يقول لي انها قبل تدخل الغرفه تمسك بيده وتقول تكفى ساعدني يادكتور....والله بكيت لما دريت عن القصه (qq60)
استأصلوا اعضاء حيويه بخطأ طبي
وياكثر البلاوي اللي صايره بخطا من مسؤؤل
بدون ماحد يحاسبهم والا ياخذ منهم تعويض
والعوض من الله :(
العوض من الله ....ونعم بالله
عاد بنقدر ناخذ حنا تعويضات ياعذب
ضحكتني :rofl951:
احلم وخلينا نحلم زيك مو مشكله (bb)
الاحلام...هماهي بلاااااااااش؟؟
:danc854:


شكرا نبض

قلم بلا قيود
25-05-09, 03:36 PM
شئ يعود لنا ممنوع عائد لهم وبالنهب مسموح


ياخي التعويضات مجالها في المحاكم عندنا مو مسؤلة ومختصين زي الدول الأخرى
عند اصابة عند حادث عند تشويه سمعه في اقتصاص
لذا على حسب المعاملة

عذب السجــايا
25-05-09, 03:43 PM
وعليكم السلام ورحمة الله وبركاته


موضوع حلو وخفيف ياعذب

راح افتح لك لسته انتظرني باذن الله عاد الله الله بالتعويض


ابشرك وصل رصيدي هلحين 35 مليون ريال سعودي
كلها من التعويضات :smileybunny:



... هذي ما اصدق انها عندنا الا ان كانت من ال000000000؟ يحق لها الديره كلها على كيفها
ترى مافهمت ال000000000؟
(hjh)



بانتظار عودتك

عذب السجــايا
25-05-09, 03:47 PM
ياكثرهم... أخي عذب



كل هذا شايله بقلبك من يوم كان عمرك عشر سنين

وش اللي فتح جروحك وأنا أختك
يقهرون وانا اخوك...يضربونا زي مايضربون البهايم
واهلنا شعارهم دائما..."لكم اللحم ولنا العظم"

أنصحك ..حللهم بس ماعندك أحد
لالا مارح احللهم ...لاتحاولين (asj)

ام فريق النصر انت صادق والله ارحم مشجعينها
مشكلتهم انهم يكابرون .....مايعترفون ان فريقهم ضعيف :whwhwh:

الحين أنت فاتح المجال لنا والا وشلون

يعني نفضفض
فضفضي...شوف وش الاشياء الي تبين فيها تعويض وكم التعويض الي تبينه
وبارفعها للمقام السامي (qq6)


بوركت

وبوركتي ايضا

عذب السجــايا
25-05-09, 03:50 PM
شئ يعود لنا ممنوع عائد لهم وبالنهب مسموح


ياخي التعويضات مجالها في المحاكم عندنا مو مسؤلة ومختصين زي الدول الأخرى
عند اصابة عند حادث عند تشويه سمعه في اقتصاص
لذا على حسب المعاملة

قبل كم يوم اقرا في الجريده
أهالي منطقه من مناطق المملكه يشتكون من الحفريات في الطرق
ومن الحوادث الي حصلت فيها...وان ماخاب ضني فان فيها وفيات
طيب هذولي من الي يعوضهم
ياخوي نظام ماكو....وقلة ثقافة الشعب ساعدتهم...

ولو تصدم نخله في الشارع يسجنونك وماتطلع حتى تدفع قيمتها 7 الاف ريال

فيلسوف البدو
25-05-09, 03:53 PM
وقاضيت...دوريات الأمن ..لأنهم يوقفونك ويجبرونك تنزل عندهم..والمفروض هو يجي عندك وانت تبقى في السياره...


قبل شهرين مسددن مخالفة لاني وقفت بوسط الشارع انتظر السيارة تطلع من مكانها ابي البق محلها والعسكري بسيارتهم الجديدة السرية اطلع اطلع وانا مطنشه ويوم لبقت ومير ينتظرني انزل له واجيه والحمدلله ماعمري سويتها معهم ولا راح اسويها يوم مل من الانتظار ومير ينزل ويجي وشفيك واقفن بوسط الشارع قلت انتظر السياره تطلع قال لي بذكاء منقطع النظير كان اخذت لك لفه ورجعت للموقف قلت له قل والله انت تنكت والا مستخف دمك والله لوتعطيني مخالفات الدنيا مارحت وخليت هالموقف لواحدن غيري واطلع له على طول الرخصة والاستمارة قلت خذ ولا تتفلسف علينا هات المخالفة يبي كلمة اعتذار كلمة تودد وش عليهم لاقين لهم ناسن يتوددون لهم ويشحذونهم علشان يتركون لهم المخالفة وابشرك سددتها في اول يوم نزلت فيه نظامي حتى النخاع مع ناس ماتطبق النظام الا على امثالي اللي روسهم فوق مرتفعه ماتنزلها لامورن تافهة مثل هذه والوكاد وصية لا تعطيهم وجه اجلس لين يجيك لو تجلس يوم كامل تنتظره هذا النظام ومثل مايبي يطبق علي النظام خله يطبقه هو
وبالنسبة للنصر احلى مافيه انه غايب عن البطولات لكن عشقه في الدم يسري وماحبينا النصر لبطولاته الا حبينا النصر بسبة رجالاته والجاي احلى يانصر
وش تبي يعطونك مقابل لمنهم قاضوني علشان الميسم تبيهم يطردوني عادي الطرد للرجال اللي رافعتن الراس من يوم خلقها ربي عسى ماينزل لك راس ياملح السجايا

سيمار
25-05-09, 04:09 PM
انا احس بعد يافيلسوف ان التدقيق بالمخالفات يرجع للميزاينه المرجوه ذيك الفترة
يعني كل ما انزنقو كل ماكانوا اكثر تدقيق وامانه
طبعا ما اتكلم عن رجل الامن لانه عبد مامور
اتكلم عن البيق هيدز *_^
والوكاد انك لك فقده يالبدوي


عذب
بالنسبة للتعويضات كثيرة وخلني اجيك من اخرها
الحفريات اللي ماسكتنا بكل شارع هالفترة عشان التصريف الله يكرمكم لمتى نعاني منها؟؟
والمشكلة تخلص وتبدا غيرها بمشكلة ثانية وفوق كل هذا اسفلت ينشال واسفلت ينحط وكوكتيل مكبات وبلاوي زرقا
اكره الرياض بالزحمة واحس سوء التنظيم عندنا والسواقه الهمجيه والفوضوية في كل شي تسحبنا لورى
<<موكنها شتت الموضوع هههه

سيمار
25-05-09, 04:10 PM
اوه نسيت

وعليكم السلام ورحمة الله وبركاته

عبادي نت
25-05-09, 04:31 PM
وعليكم السلام ورحمة الله وبركاته


المخالفات إجبارية على رجل المرور

والمرور السري اخبث من المرور الجهري :D لأنه يترصد للمخالفين وعدم المخالفين

المهم ان ينهي استلامه وفي جعبته 10 مخالفات على الأقل

ويخبرني احدهم عن عريف سري يقف في الدائري ويرصد مخالفات على سيارات بدون توقيف اهلها وبغير وجه حق ويكتب هروب ويشقق الورقة الصفراء


واحد من اقاربي الأسبوع الماضي وقفه مرور سري بدون سبب في احد الأحياء

وقال رجل المرور للولد : تقولي من هو راعي السيارة الي مشت من هنا والا عطيتك مخالفة

قال : والله مااعرفه

وكتب عليه مخالفة عدم وجود كوابح وعدم وجود لوحات الكذاب ابن الكذاب حسبي الله عليه


المهم ابوه هو وإياه شكاوي ويقولون ان العريف السري هذا راعي تفحيط وبزرنجي يدور الحلوين :danc854:








ويقولون الأولين ياعذب السجايا


العوض مافيه خير (asj)

اليتيمه المجروحه
25-05-09, 05:50 PM
اوما تعويضااات
كثر منها
اوكي

لو


لو


لو عندنا قانون تعويضات
كان اطالب تعويضات من المستشفيات
الي لاعبه با ارواح الناس
ولي معاهم موقف ماراح انساه
حسبي الله عليهم
بس ماراح اسكت ياعذب
راح اطالبهم لما يتحقق حلمنا
ويكون هالقانون موجود على ارض الواقع (q84)

عوافي عذب

غالي1234
25-05-09, 06:51 PM
وعليكم السلام ورحمة الله وبركاته
موضوع شيق اسال اللعاب عند الجميع
كلن وده يهبرله هبره ولكنها ستنهبر منا سريعا
ويوخذ معها هبرة من اجسادنا
ترجمه:ههههه
لو عندنا هذا ورفعنا قضية وكسبناها
سترفع علينا قضايا وستكسب
شكرا عذب السجايا مواضيعك مميزة

* Jun1n
25-05-09, 09:51 PM
انت وحدك ياعذب الي تطلب تعويض من قصيمي

يانصااااااااااب(vv)

وانا وين رحت

اتوقع اكثر النساء بتجمع تعويضات من ازواجهن

لما يلحقهن من اضرار معنويه وغيره

وبالتالي يقل الاقبال على التعدد من الرجال لانه ستكثر الضرائب عليه

ايضا الحالات الي نسمع عنها في المستشفيات كل يوم والتاني

بسبب اهمال ممرضه او دكتور من ابره غلط وعلاج غلط

وتوقيت غلط وووو

هذيايش يعوض عنها

الميسم
25-05-09, 11:34 PM
وعليكم السلام ورحمة الله وبركاته ..

من سأطالب بمقاضاتهم ربما غيري لايرى اهميه من طلب تلك المقاضاة ..ولكن أنا أراها مهمه ومهمه جدا

أطالب بمقاضاة من يبصق في الطريق ..والله لاتتصور الأذى الذي يلحق بي عند سماع ذلك الصوت..أعزكم الله ..حتى لو كنت افكر في أمر ما يطير كل ما في رأسي وتنتابني حالة غضب
أتمنى لحظتها من يمسك بذلك الشخص ويتقاضى لنا منه ....وأكثر من يتفنن بها العمال ...

وأكثر من مره ونحن عند الإشاره يقوم من لايملك ذرة أدب وحياء ومراعاة الآخرين بفتح الباب والبصق بكل بجاحه ...

كذلك اطالب بمقاضاة من تركب مع السائق وهي لاتعرف الطريق جيدا ..وأثناء توافد السيارات وكأننا في سباق ..تجدها فجأة تأمر السائق أن ينعطف يمينا أو يسارا ..فتكاد أن تحدث بتصرفها حوادث في الطريق وليس حادث واحد ....

بالأمس كدنا أن نذهب ضحية أنسان متخلف يضع أبنه في حضنه وهو يقود السياره بسرعه جنونيه ..هذا أيضا أطالب بمقاضاته وبأقصى العقوبات ..

المشكله أن أكثر مقاضاتنا ستذهب لمن نواجههم في الطرقات والشوارع ..لأن الناس فعلا تحتاج للتثقيف للأسف ما زلنا في حاجة تطوير وتعديل سلوكي ويبدوا أننا سنظل ...


بالنسبة لرجل المرور كنت أظن انه هو من يحضر للمواطن وليس العكس ..إلى ان رأيت ولم أصدق ..رجل المرور يظل في سيارته والمواطن هو من يحضر له ..فسألت قلت أليس من الواجب ان نرى العكس قالوا بلى ولكن هذه قوانينا ...فوضعتها من ضمن التعويضات ....

وشكرا لك ..بردنا على قلوبنا لو بالكلام بس ...

أخت عبدالعزيز
26-05-09, 12:40 AM
تبي الصراحه انا رافعة قضية تعويض وللحين تمشي وشكلها ما راح توصل الا اذا مت

او نهايتها ترمى في الزباله

والعوض من الله مع الروتين و الانظمة البالية

نجمة المنتدى
26-05-09, 07:04 AM
عذب..وعليكم السلام ورحمة الله وبركاته..
عذب.. وش هالموضوع؟؟
عذب..وراك شايط؟؟
عذب .. اذا طقت الحكومه صدره وقالت آمرو وتدللو يالشعب العزيز سردت لك كل مطالبي بالتعويضات..
أبدأ بالتعليم السخيف.. مرورآ بالصحه الخايسة..وأنتهي بوزارة العمل الحقيره.............

عذب السجــايا
26-05-09, 07:56 AM
قبل شهرين مسددن مخالفة لاني وقفت بوسط الشارع انتظر السيارة تطلع من مكانها ابي البق محلها والعسكري بسيارتهم الجديدة السرية اطلع اطلع وانا مطنشه ويوم لبقت ومير ينتظرني انزل له واجيه والحمدلله ماعمري سويتها معهم ولا راح اسويها يوم مل من الانتظار ومير ينزل ويجي وشفيك واقفن بوسط الشارع قلت انتظر السياره تطلع قال لي بذكاء منقطع النظير كان اخذت لك لفه ورجعت للموقف قلت له قل والله انت تنكت والا مستخف دمك والله لوتعطيني مخالفات الدنيا مارحت وخليت هالموقف لواحدن غيري واطلع له على طول الرخصة والاستمارة قلت خذ ولا تتفلسف علينا هات المخالفة يبي كلمة اعتذار كلمة تودد وش عليهم لاقين لهم ناسن يتوددون لهم ويشحذونهم علشان يتركون لهم المخالفة وابشرك سددتها في اول يوم نزلت فيه نظامي حتى النخاع مع ناس ماتطبق النظام الا على امثالي اللي روسهم فوق مرتفعه ماتنزلها لامورن تافهة مثل هذه والوكاد وصية لا تعطيهم وجه اجلس لين يجيك لو تجلس يوم كامل تنتظره هذا النظام ومثل مايبي يطبق علي النظام خله يطبقه هو



وبالنسبة للنصر احلى مافيه انه غايب عن البطولات لكن عشقه في الدم يسري وماحبينا النصر لبطولاته الا حبينا النصر بسبة رجالاته والجاي احلى يانصر
وش تبي يعطونك مقابل لمنهم قاضوني علشان الميسم تبيهم يطردوني عادي الطرد للرجال اللي رافعتن الراس من يوم خلقها ربي عسى ماينزل لك راس ياملح السجايا


أفتتح يومي بقراة هذا الرد من البدوي فيلسوف
ياللإفتتاحيه

ياخوي انت شكلك قوي ماشاء الله ...الا تعال لاتكون تلعب بلوت بس

تدري يابدوي...شكلي باجمع ردودك كلها واسوي منها سيره ذاتيه لك
وابيعها في حايل وأسميها

C.V

OF

The Bedouin Philosopher

(qq172)

عموما يابدوي ...انا لايمكن اطلب عسكري عشان مخالفه ...طز فيه هو ومخالفته ...
لا ولاحظ العكسر الجدد كيف ....بزارين توهم طالعين من الثانوي...

أما سالفة الاخت الميسم
فأنا ما أتبنى الدفاع عن أحد ...ولكنك يابدوي انت مدرعم ...كانك نازل بشاصك من ذاك الطعس
ياخوي هد السرعه ترى كلنا اخوان واخوات في منتدى واحد

عذب السجــايا
26-05-09, 08:02 AM
شئ يعود لنا ممنوع عائد لهم وبالنهب مسموح


ياخي التعويضات مجالها في المحاكم عندنا مو مسؤلة ومختصين زي الدول الأخرى
عند اصابة عند حادث عند تشويه سمعه في اقتصاص
لذا على حسب المعاملة

كدت أنسى أن أرد عليك (asj)
ياخوي انت ذكرت نقطه مهمه جدا جدا وهي تشويه السمعه
من الي يعوض عنه :whwhwh:

أعرف واحد فصل من الشركة لأنهم سووا فحص مخدرات وقالوا لقينا
في دمك نسبة كحول....وهو واثق من نفسه ...قالوا وقع تعهد انك ماتكررها
قال انا منيب متعاطي ومارح اوقع تعهد وفحصكم خطأ....
وقال لهم اعيدوا الفحص مره ثانيه وتأكدوا قالوا لا ..
تعاندوا لين فصلوه تعسفيا...
وبعد سنتين من مطارد في الدوائر الحكوميه ..كسب القضيه ورجع لوظيفته

طيب من الي يعوضه عن سمعته ؟؟؟
وكم يستاهل تعويض؟؟

عذب السجــايا
26-05-09, 09:48 AM
انا احس بعد يافيلسوف ان التدقيق بالمخالفات يرجع للميزاينه المرجوه ذيك الفترة
يعني كل ما انزنقو كل ماكانوا اكثر تدقيق وامانه
طبعا ما اتكلم عن رجل الامن لانه عبد مامور
اتكلم عن البيق هيدز *_^
والوكاد انك لك فقده يالبدوي



أمس في برنامج 99 قال الضيف الكاتب سعد الدوسري انه شاف مقطع جاه بلوتوث
عسكري يكتب القسايم ...ويشق الورقه الصفرى ...يعني يتبلّى على خلق الله
والله فضيحه
أجل فقدتي البدوي ....صدقتي والله اذا شفتي المنتدى هاجد
فاعرفي انه مهوب موجود (qq170)

عذب
بالنسبة للتعويضات كثيرة وخلني اجيك من اخرها
الحفريات اللي ماسكتنا بكل شارع هالفترة عشان التصريف الله يكرمكم لمتى نعاني منها؟؟
والمشكلة تخلص وتبدا غيرها بمشكلة ثانية وفوق كل هذا اسفلت ينشال واسفلت ينحط وكوكتيل مكبات وبلاوي زرقا
اكره الرياض بالزحمة واحس سوء التنظيم عندنا والسواقه الهمجيه والفوضوية في كل شي تسحبنا لورى
<<موكنها شتت الموضوع هههه

باختصار شديد
والله ان أحد أهم الاسباب الي خلتني اترك الرياض ...الزحمه
والهمجيه في الشوارع ....
ولو عطوني دبل راتب والله ما ارجع الرياض
:whwhwh:

عذب السجــايا
26-05-09, 09:58 AM
وعليكم السلام ورحمة الله وبركاته

المخالفات إجبارية على رجل المرور

والمرور السري اخبث من المرور الجهري :D لأنه يترصد للمخالفين وعدم المخالفين

المهم ان ينهي استلامه وفي جعبته 10 مخالفات على الأقل

ويخبرني احدهم عن عريف سري يقف في الدائري ويرصد مخالفات على سيارات بدون توقيف اهلها وبغير وجه حق ويكتب هروب ويشقق الورقة الصفراء




فضلا لا أمرا راجع ردي على سيمار
ولايفوتك البرنامج يوم الجمعه يعيدونه
(a21)



المهم ابوه هو وإياه شكاوي ويقولون ان العريف السري هذا راعي تفحيط وبزرنجي يدور الحلوين :danc854:



قصدك شاذين جنسيا حسبنا الله عليهم ...الله يهديهم والا يريحنا منهم




ويقولون الأولين ياعذب السجايا


العوض مافيه خير (asj)

العوض فيه الف خير ....اذا كان بيأدب الناس...ياخوي اذا كنت انا ماشي في امان الله
بسيارتي الي دافع عليه عرق جبيني ويجي واحد متهور يصدمني....تبيني اسامحه ؟؟
والا الي يستهترون في ارواح خلق الله ماتبيهم يتأدبون
اعطيك قصه على الطاير
دكتور كان يلعب بلوت ..دقوا عليه المستشفى قالوا تعال في حالة طارئه وخطيره جدا...
طبعا قفل السماعه وكمل اللعب والسهره ثم راح لهم ...ولقى المريض توفي ...(qq136)...
ترى مهوب ذنبه ...ذنب المريض مالقى يمرض الا وقت حماس البلوت ؟؟

عذب السجــايا
26-05-09, 10:06 AM
اوما تعويضااات


كثر منها
اوكي

لو


لو


لو عندنا قانون تعويضات
كان اطالب تعويضات من المستشفيات
الي لاعبه با ارواح الناس
ولي معاهم موقف ماراح انساه
حسبي الله عليهم
بس ماراح اسكت ياعذب
راح اطالبهم لما يتحقق حلمنا
ويكون هالقانون موجود على ارض الواقع (q84)


عوافي عذب

على بالك بس انتي الي لك موقف

ياشيخه ...في مريضه سوت عمليه في بطنها ....وبعد كم يوم التهب بطنها
وانتفخ ...رجعوها "للسباك" آسف قصدي الجراح وفتح بطنها مرة ثانيه
لقى انهم ناسين قطعة شاش ...هذا كبرها :whwhwh:..
ياشيخه شكلهم يتعاملون مع البشر زي السيارات ..
يفتحون بطونهم ويصكونها بسهوله :SmileyBunny:

عذب السجــايا
26-05-09, 10:11 AM
وعليكم السلام ورحمة الله وبركاته
موضوع شيق اسال اللعاب عند الجميع
كلن وده يهبرله هبره ولكنها ستنهبر منا سريعا
ويوخذ معها هبرة من اجسادنا
ترجمه:ههههه
لو عندنا هذا ورفعنا قضية وكسبناها
سترفع علينا قضايا وستكسب
شكرا عذب السجايا مواضيعك مميزة

تسلم ياغالي الغالي
الترجمه
هبره يعني قطعة لحم كبيرة بدون عضم :whwhwh:
يعني "ستيك"

يقول لنا واحد ...مسكتهم دورية تفتيش ...ويجي الجندي ويرمي في سيارتهم
علبة حبوب "أبيض"...ويكلم خويهم بالجهاز يقول مسكنا سياره
ومعم علبه فيها 12 حبه مخدّر ههههههه طيب شلون درى انها 12 حبه

:danc854:

هذا مصداقا لقولك ....هم الي راح يهبر

والمثل يقول
ياراعي الفوايد...راس مالك لايضيع
:whwhwh:

عذب السجــايا
26-05-09, 10:15 AM
انت وحدك ياعذب الي تطلب تعويض من قصيمي

يانصااااااااااب(vv)

وانا وين رحت

اتوقع اكثر النساء بتجمع تعويضات من ازواجهن

لما يلحقهن من اضرار معنويه وغيره



أول وحده راح تتعوض جدتي ...وراح تطالب جدي بمالايقل عن 2 مليار دولار
وخليه يفحط هو ودكانه على بال مايجيبها :danc854:
بعد عشرة خمسين سنه يزوج عليها ....ويحيلها للتقاعد بكل سهوله



ايضا الحالات الي نسمع عنها في المستشفيات كل يوم والتاني

بسبب اهمال ممرضه او دكتور من ابره غلط وعلاج غلط

وتوقيت غلط وووو

هذيايش يعوض عنها

يعوض عنها انهم ممكن يقولون آسف
أو ممكن يجحدون
والا اقول لك الله يستر لايرفعون دعوى على الناس يقولون ليش تمرضون

عذب السجــايا
26-05-09, 10:23 AM
وعليكم السلام ورحمة الله وبركاته ..

من سأطالب بمقاضاتهم ربما غيري لايرى اهميه من طلب تلك المقاضاة ..ولكن أنا أراها مهمه ومهمه جدا

أطالب بمقاضاة من يبصق في الطريق ..والله لاتتصور الأذى الذي يلحق بي عند سماع ذلك الصوت..أعزكم الله ..حتى لو كنت افكر في أمر ما يطير كل ما في رأسي وتنتابني حالة غضب
أتمنى لحظتها من يمسك بذلك الشخص ويتقاضى لنا منه ....وأكثر من يتفنن بها العمال
تصورت الوضع ...وشفته اكثر من مره ويا للأسف (qq60)

كذلك اطالب بمقاضاة من تركب مع السائق وهي لاتعرف الطريق جيدا ..وأثناء توافد السيارات وكأننا في سباق ..تجدها فجأة تأمر السائق أن ينعطف يمينا أو يسارا ..فتكاد أن تحدث بتصرفها حوادث في الطريق وليس حادث واحد ....
كلش الا السيدات مانقاضيهم ....الشوارع والأسواق اصلا ما سويناها الا لهم

بالأمس كدنا أن نذهب ضحية أنسان متخلف يضع أبنه في حضنه وهو يقود السياره بسرعه جنونيه ..هذا أيضا أطالب بمقاضاته وبأقصى العقوبات
شكله متوقع ان محد عنده ولد الا هو .....مايدري ان الخرفان حتى هي عندها
..

المشكله أن أكثر مقاضاتنا ستذهب لمن نواجههم في الطرقات والشوارع ..لأن الناس فعلا تحتاج للتثقيف للأسف ما زلنا في حاجة تطوير وتعديل سلوكي ويبدوا أننا سنظل
والله مايتغيرون يالميسم ...


بالنسبة لرجل المرور كنت أظن انه هو من يحضر للمواطن وليس العكس ..إلى ان رأيت ولم أصدق ..رجل المرور يظل في سيارته والمواطن هو من يحضر له ..فسألت قلت أليس من الواجب ان نرى العكس قالوا بلى ولكن هذه قوانينا ...فوضعتها من ضمن التعويضات
وازيدك من الشعر بيت احنا الوحيدين في العالم الي قانونا عند الدوارت "الأولوية للجزوم"
....

وشكرا لك ..بردنا على قلوبنا لو بالكلام بس ...
الحلم بلاش والا انا غلطان ........!!
ترى يمكن يطلع لنا واحد يقاضينا على حلومنا ذي :SmileyBunny:

عذب السجــايا
26-05-09, 10:25 AM
تبي الصراحه انا رافعة قضية تعويض وللحين تمشي وشكلها ما راح توصل الا اذا مت

او نهايتها ترمى في الزباله

والعوض من الله مع الروتين و الانظمة البالية

عادي عادي
ترى قروض البنك العقاري حتى هي ...ماتوصل الا اذا مات المواطن

عذب السجــايا
26-05-09, 10:27 AM
عذب..وعليكم السلام ورحمة الله وبركاته..
عذب.. وش هالموضوع؟؟
عذب..وراك شايط؟؟
عذب .. اذا طقت الحكومه صدره وقالت آمرو وتدللو يالشعب العزيز سردت لك كل مطالبي بالتعويضات..
أبدأ بالتعليم السخيف.. مرورآ بالصحه الخايسة..وأنتهي بوزارة العمل الحقيره.............

ول ول ول ول ول
وش ذا يانجمة ؟؟؟
انتي تبين تقاضين 3 وزارات
والله ياك بتكسبين فلوووووووس
بس سلّفيني تكفين لاتنسين
:SmileyBunny:

* Jun1n
26-05-09, 01:20 PM
أول وحده راح تتعوض جدتي ...وراح تطالب جدي بمالايقل عن 2 مليار دولار

وخليه يفحط هو ودكانه على بال مايجيبها :danc854:
بعد عشرة خمسين سنه يزوج عليها ....ويحيلها للتقاعد بكل سهوله



يعوض عنها انهم ممكن يقولون آسف
أو ممكن يجحدون

والا اقول لك الله يستر لايرفعون دعوى على الناس يقولون ليش تمرضون


عاد عشرة خمسين سنه

هذا وفي وش تبي جدتك الفسقانه

ماليه عينه خمسين سنه

جدك نادر الوجود تزوجني جدك الثالثه(vv)

عذب السجــايا
26-05-09, 03:48 PM
عاد عشرة خمسين سنه

هذا وفي وش تبي جدتك الفسقانه

ماليه عينه خمسين سنه

جدك نادر الوجود تزوجني جدك الثالثه(vv)

جدي ماعنده رقم شاغر هلحين
لكن بنحاول ندبّر لك
:c010:

نجمة المنتدى
26-05-09, 03:52 PM
لا بعد وهالكهرب الي ذلونا به....
نسدد فواتير ومع ذلك لازم يفصل باليوم كم ساعه..قال ايش :ضغط..
اففففففففففففففف

عذب السجــايا
27-05-09, 10:36 AM
لا بعد وهالكهرب الي ذلونا به....
نسدد فواتير ومع ذلك لازم يفصل باليوم كم ساعه..قال ايش :ضغط..
اففففففففففففففف

حتى الظاهر سريلانكا ماينقطع عندهم الكهرب
(vv)

عذب السجــايا
27-05-09, 10:40 AM
مثال حديث و طازج
وفاة الشيخ الوهيبي رحمه الله .....!!!
اصطدم في شاحنه محملة بالصخور.في الليل وماكان في الشاحنه انوار خلفيه
...طيب هذي مسؤليه من ؟؟
اسره كامله راحت ضحية غلطة سائق شاحنه لايبالي بأرواح البشر
طيب .....المرور وأمن الطرق وينهم عن ذالشاحنه
وهالسواق؟؟؟
والله استهتار بأرواح البشر