ساااعدوني في مشكلة صديقتي

[همسا!!!ت]

أتمنى من المشرفين عدم نقل الموضوع لأنه لايحتمل الأنتظار وهنا اكبر تواجد للأعضاء

السلام عليكم

صديقتي تمر بمشكله كبيره مع زوجها اللي عجزت تلقى الطريق اللي ممكن انه ينفع معاه

طلبت مني أكتب مشكلتها لعل وعسى تقلى الحلول


زوجها انسان مغرم بالسهر لحد الفجر حتى و عنده دوام كل يوم على هالحاله من 3 سنوات

لا يجلس في البيت مطلقاً يعني ياكل ويشرب وينام بعدين يطلع

رافع يدينه من عياله مايعرفهم ولا يلبي أي طلب لهم وإذا نفذ فهو بهواش وزعل

لا يقبل اي نقاش من زوجته ويعتبر عتابها عليه وقاحه وطولة لسان يعني يبغى يطمس شخصيتها

هم متزوجين من 11 سنه والاشياء صارت من 3 سنوات لكن قبلها امورهم ماااشيه وتمام

لو جا احد وأشتكى من عياله فهو يتهمهم لو مغلوط عليهم لااايمكن يدافع عن عياله

مشاويرهم مرفوووضه بس لو دق احد من أهله طار لهم مع ان خواته متزوجين بس يخدمهم وبزياده

لو يجلسون عياله شهر ماطلعوا معاه عااادي عنده

زوجته ماقصرت معه بكل شي من طاعه وأحترام حتى الامور الخاصه قايمه فيها لكن مايشووووف

اي شي منها

مصاريف عياله بالحسره يدفعها ...تروح زوجته للسوق مايحط بيدها إلا 200 ريال لــ 5 أطفال

يبغاها هي اللي تدفع وهو بس يساهم مساهمه بسيطه

أغراض البيت ناااقصه للأخر بأعتبار أن زوجته موظفه يبغاها هي اللي تدفع مع أن هي ماقصرت معاه بس هو يبغى يرفه يدينه من كل شي

الحين صديقتي ملت من زوجها وجربت كل الطرق معاه ماجابت نتيجه بس بقى شي واحد ماجربته وهو أنها تخلي له البيت

أبغى رايكم ومشورتكم وخاصه الرجال لأنهم هم أعرف ببعظهم

هل تترك البيت وهل هالتصرف ينفع مع هالاشكال

وإذا فيه أسلوب ثاني ينفع عطوني

وبس

[جنيفر]

يابنتي هي عندها خمس عيال

اذا ما استحملتهم

مين بيستحملهم اهلها


خليها تجرب تقعد ببيت اهلها مع عيالها راح يملون منهم



فنصيحتي تذكر الله وتدعي له


وتحمد ربها لا في ازواج اردى من حيث ضرب الزوجات واخذ رواتبهم ومشاكل اكبر


اذا كان راعي سهر تحاول تسهر معه


تحاول تغير معاملتها


تغير من نفسها


وفي شئ مهم

تحاول انه تحسس الرجال انه هو سندهم وبدونه حياتهم ولا شئ


لادخل قال هلا بشمعة البيت


ولا طلع حسسته بقيمته


تحاول شوي شوي


لو تشاركه با اهتماماته


تدعي له وتطلب من الله وان شاء الله ماراح يخيبها الله

[هيو2]

أتمنى من المشرفين عدم نقل الموضوع لأنه لايحتمل الأنتظار وهنا اكبر تواجد للأعضاء

لا غلطانة أكبر تواجد على الإطلاق بقسم العلاقات الزوجية، مع أن نصفهم متلطمين :SmileyBunny:

وهذا الموضوع يحلونه بثواني من "الخبرات التراكمية"

[اخو مزنـــــة]

يطلقها
اوهي تطلب الطلاق
والعيال يعتبرون رجيع لبوهم :SmileyBunny:

بالله هالحين وشلون احناتبينا نحل المشكلة وراعية المشكلة ماقصرت بشي بس التقصير من زوجها

خويتك شينة (q104)

يمكن


الا تعالى
11 سنة
ومن 3 سنوات خرب الرجال

الله لايوفق من خسر المسلمين بالاسهم ودمر بيوتهم

[سيمار]

شوفي
اهلنا يوم قالو مايصبر الا بنات الحمايل ما كذبو

الزوجة اللي تبي تعيش تبي تتحمل كل شي الا
الحرام واللي تصبر عليه انا واثقه مليون بالميه ان زوجها اول مايهديه الله ولا ينصلح حاله يبي يرميها زي الزبالة لأنها ما اعانته على نفسه
لذلك (شراب0مخدرات0زنا0قمار0علاقات شاذه) وغير هالاشياء
يمكن كل وحده ادرى بزوجها
خليها تصبر وتدعي وتحاول فيه وتطالب بحقوقها قد ماتقدر والشكوى لله
صبرها عليه اهون من مرمطتها هي وعيالها عند اهلها
وحسبي الله ونعم الوكيل على اللي تسبب بخراب بيتهم وبيوت خلق الله

[سيمار]

تدرين الزوج وش يمثل لي بالنسبة للمرأة
العبايه
فيه عبايات تستر وفيه عبايات ماتستر لكن تظل حجاب عن عيون الناس وحاجز
الزوج ستر لها لو ما غطاها والله يصبرنا ولعل حديث الرسول عليه الصلاة والسلام فيما معناه (من ماتت وزوجها راضٍ عنها دخلت الجنة ) يكون سبب لصبر الكثيرات واحتسابهن للألآم والمتاعب

[بياض الثلج]

خليها تقفل الباب وينام برا
بعدين في حسنة بالموضوع انو مايجي الا الفجر يعني مو مقابلها وهذا أحلى ويش تبي بمقابله

[همسا!!!ت]

أشكر كل من تفاعل مع صديقتي

بانسبه لتركها له هي تقول أنها بتتركه وتترك العيال عنده وتخليه يتمرمط هو وياهم وبكذا ممكن يستحي على دمه ويحس بقيمتها ووش الحياة لو أنفصلوا

وش رايكم تسويها ولا لا

لأنها ودها تقرصه وتخوفه لعل يصحى ضميرة شوي

[ولد ضلمى]

لا غلطانة أكبر تواجد على الإطلاق بقسم العلاقات الزوجية، مع أن نصفهم متلطمين :SmileyBunny:

وهذا الموضوع يحلونه بثواني من "الخبرات التراكمية"

كني شفتك هناك او واحد يشبهك
متلطم ولابس فروه وعلى جيب شاص
88 وبالحوض اكياس شعير(q69)

[هيو2]

كني شفتك هناك او واحد يشبهك
متلطم ولابس فروه وعلى جيب شاص
88 وبالحوض اكياس شعير(q69)
لا والله أروح هناك بدون شماغ حتى:c010:، ولا "أمشط" شعري بعد (q47)

بس وش دراك إن سيارتي جيب فعلا، ومو ياباني بالمناسبة :danc854:

واللي ما عنده فروة هاليومين واعزتي له (q78)

[ذاتَ ثقافة]

.

الصبر أولاً .
التفكير من منطلق الحوار .
إيجاد مُساعدة خارجية من أحد أفراد العائلة " حكيم " لو استصعبت عليها الأمور .
مُحاكته بطريقة " كسر الخاطر " من جانب ابناءه !

.

إذا لم يُفد شيء
فأولُ العملٍ " قرصة "
تتنازل عن كل شيء وتحرمه من كل شيء وتبقى مثله " تُحفة بالبيت "
[ أحس أنه بيحس فيه لو همشته ] !!

ربمَّا هي علمته على الدلال الزايد :)
" خربته " !

.


الله يستر عليها ويسهل أمورها .

.

[حمود الثامن عشر]

11 سنة
ومن 3 سنوات خرب الرجال

الله لايوفق من خسر المسلمين بالاسهم ودمر بيوتهم




ات كود بي

وممكن بعد انها صارت مثل الفاطر تدبل الكبد (q104)

اقول لها..ابحثي عن السبب ومافيه احد يقدر يبحث غيرها..ولتبدأ من نفسها وماتشوف شر :)

[الشيخـــــه شجـــــون]

خليها تروح تشوفلها شله بعد تسهر وتفلها معهم حالها حاله :danc854:

عندنا وعندها الخير ذي الاشكال لايمكن تتغير

الاصحاب عندهم بالدرجه الاولى

انا اول مره اشوف انسان يدفن امه ويخلص اول يوم من العزا ويلم الكراسي ويروح يلعب بلوت

وربي رجال اخر زمن

خليها تمسك فلوسها وتشوف نفسها وتتجاهله ولاتعاتبه ولا تفتح فمها معاه بكلمه
وتخليه يدخل ويخرج ولا كان احد بالبيت تهجره تماما
حتى اما احترم نفسه وتعدل والا تعيش وضعها وكانه مو موجود بحياتها اهم شئ راحتها اهي وعيالها

اما روحة بيت الاهل مع هالاشكال ماتفيد ابدا فتره ويرجع كل شئ لحاله ماله داعي تضحكه عليها
وتشتت عيالها وتعب نفسياتهم
خليها تربيه وهي ببيتها ووسط عيالها وان شاء الله تخرب علاقته مع هالشله ويرجع لبيته ترى الاكثر منهم مايرجعون الا ان زادت مشاكله مع هالشلل وتفرقوا

وخليها تكثر من الصلاه في جوف الليل وتطلب الله ان يهديه ويكرهه بهالشلل اللي خربت كثير من البيوت

[همسا!!!ت]

المشكله ماله شله يسهر معاها للصبح

الكل يروح لبيته بدري

هو يسهر لحاله في استراحته

تتوقعون تطنيشه وأهماله في البيت يجيب نتيجه