(اخو نفله مع حبيبته صــــــــــيته )

[افكار متحركة]

فى سنة من السنين وفى قرية من قرى الناس الطيبين صارت هالقصة
وهى حقيقة ويقين تعالوا نتعرف على أبطالها
اخو نفلة /رجل او يفترض ان يكون رجل فى الأربعينيات من عمرة عندة مزرعة وحوش وقصيرينسدح بة الضحى والعصير
يملك ونيت بس ما عمرة فكر بترميم البيت
هو تراه مكافح بس بالحيل ينافخ
زوجته اذا دلعها قالها ياحرمة واذا زعل ياهية واذا عصب يانثى يقولها
الاسم عندة مو مهم اهم شى الاخلاق والاحترام والعشاء كل ليلة ايدام والباقى يهون والحرمة يحوووووووووووول تنطق ولازم تقول يمون
صيته/وش نقول عن صيتة فيها الحزن والهم والغبن مخفيتة
بس صابرة ولدها على تبى تربيتة
تبكى ليل تبكى نهار ماحد عن حالها قال وش صار
حرام تقول لا وياويلها لو بالغلط قالت لا

الابثلاث 1ـ لاالة الااللة 2ـ لا للمخدرات 3ـ لا للتطبيع

والاخيرة سمعتها عند جارتها برادو ابو لمبة
هى ترى تحب الاخبار بس جارتها قالت لها اخر حلقة البارح من الاخبار
وصدقت صيتة صدقت قلبها طيب صدقت ماتعرف اللوم وطريق الاشرار
مرة اخو نفلة داعبها وبكل خبث اختبرها قالها تبينى اطلقك
قالت اية مسكينة تدرى (لا )جريمة شنيعة

وذات صباح غرد بة الديك وناح دار هذا النقاش قبل اخو نفلة من البيت ينحاش
صيتة/صبحك اللة بالخير يابو عيالى
اخونفلة/اخلصى ياوجة المصائب وش هنا
صيتة/ياوخى خالى اللى بالرياض يطلبك الحل
اخو نفلة /عسى تنحل رقبتة
صيتة/ياوخى اطلبلة الرحمة والمغفرة ازين
اخو نفلة/هو هالحين مالقى يموت الا هالحين مايشوفنا بالمزرعه مشتغلين
صيتة/الموت مهو بيدة هذا قدر ومكتوب ولايشاور وهو ترى مادرى عن شغلك (تجاملة وش تسوى)
اخو نفلة/خلاص ادوختينا الشهر الجاى عندى شغيل بالرياض نروح لهم
(ياهو مالى قايل بس)
صيتة/انت عارف ان العزاء محدد وانا ودى اقوم بالواجب
اخونفلة/يعنى انا اقوم باليل اللة انة يشغلك الشرهة على اللى اخذتك انتى خابرة وش قالى ابوك هالسنين
/صيتة/يأبن الحلال هالكلام راح لة سنين مانسيتة
اخو نفلة /واللة انى تزوجتك مرضاة لابوى (كفو)والا كان الا هالحين منطقة
(طق اللة ضرسك)
صيتة/(اصصصصص وش تقولين ياصيتة خليها على اللة واللة يعوض صبرك خير)
انتهى الحوار الشنيع وكان الخطاء على الجميع
اخو نفلة تسلف سيارة جارهم الجمس ابو اربع غمارات
وركبت معه مدام صيتة قدام
ودار هذا الحوار العاطفى الرومانسى
اخو نفلة/وجعا يمصع الصاحى من عروقك وين ركبتى
صيتة /معك اجل منهو معه اركب (سؤال وجية)
اخو نفلة/انا اخو نفلة (اقول لايكثر)تبين تفضحينا يامرة وش يقولون عنى الرياجيل افا ياذا العلم
صيتة/طيب طيب ياوخى سم ولايهمك انا احسب ان هذى الغمارة اللى
وراء(اية هين)
صك اللطمة اخو نفلة وفتح الدرايش والهواء طائر طائر يلعب بشماغ العقل
ولان السفرة للرياض عند اخو نفلة بمثابة عبور للقارات
مولم العزبة كلها وراء وصيتة مدبرة المركبة ماتقصر(غصب)شاهى وقهوة وان حصل قرص ماهى شينة وتناول قائد المركبة الفضائية طلباتة اول بأول ومع كل فنجال تعال اسمع عبارات الغزل والدلال (يحلفون)
مـــــــــــــــــــــحطــــــــــة وقود 2كلم
وينزل اخو نفلة مع الاكتاف وتعال شوف السريع وشلون صار
تقول سباق هجن على المضمار
وصيتة احووووووووووووووووووول ياصيتة تسمى وتهلل(تسمع عن خروج المركبات عن مسارها واللى صار فى مير الروسية)
صيتة/انت وش بلاك
فنجال قهوة على خشتها يحمل الجواب
يوقف طير شلوى عند دورات المياة بعد جهد جهيد من الدورة بالبقالات
نزل اخو نفلة طبعا السيارة شغالة والدرايش يلعب بها الهواء
والبيبان فتيح (اهم شى القريشات بالتجورى)
عاد هو علة وتاخر ومير تنزل صيتة ياحوووووووووووووووول ياصيتة
(بعد هى ماهى ادمية )
جاء البطل الهمام وبعد كم زمجرة ركب موترة مع صكة باب
ذكروا ان شباب بهاف مون سمعوها واللة اعلم
طبعا مالتفت ولاسلم اصلا هو يعتبر نفسة لحالة والباقين تكملة عدد
ليس الا
مشى 5كلم حس ان فية شى ناقص ابد ماهو مرتاح ايييييييييية
الشماغ ماطلعت مع الدريشة
طلع طرف الشماغ مع ابتسامة مكر ودهاء
بس فية شى مضايقة وحاس انة ناقص حاجة اييييييييييييييييية
نسى خناقة كل ساعة قام يهاوش ويشتم ويسب ويذكر صيتة بجمايلة
وكيف انة ضحى بمستقبلة وتزوجها (امحق)
ولو درى تزوج وحدة مالها احد ماهو مثلك كل يوم ميت واحد
طبعا مايستغرب عدم الرد وانتم عارفين لية
صيتة ياحووووووووووووووووول ياصيتة
طلعت مالقت سبعها قامت تصيح وتنوح وتشر وتقوم وتطيح لين اللة جابلها ناسا بهم خير ومعهم اهلهم علمتهم بالسالفة وركبت معهم ولحقوا السبع المظفر
وتكبيس وبوارى وحدحدة بهاالسريع فلم اكشن عند صلبوخ
وابن الحلال قاعد يستعرض مراجلة ماهو لاحد
طلعت المسيكينة خشتها علشان يعرفها
شاف الخشة هو ومير يقول
اخو نفلة/شوفى يامرة هالخشة ماهى مثل خشتك اللة يعين المسلمين اثرية ماهو بس انا المبلى استغرب مافية حس
التفت براد شاهى ودلة قهوة
مسكــــــــــــــــــــــــــة بريك قوية مع بوارى وصيحة عالية
سمع بها اهل الرياض وعلى المقيمين خارجها مراعاة فارق التوقيت
وقف وهم وقفوا ونزلت صيتة ياحوووووووووووووووووول ياصيتة
طبعا اللى صار بالسريع وبين السيارات بصراحة ماينقال
خلصت السالفة

والمعنى وصل والعذر والسموحة على القصور

[مستغرب]

وانا اخوي ركزة مطير عكرتا

يالحبيب تبي تصحي علينا الصيت اللي هنا ... والله ماعين يفرحون بالماضوع

الله يقطع سوالفك افكار متحركه .... هذا اخوي نفله افكار متحجره


حرام تقول لا وياويلها لو بالغلط قالت لا
الابثلاث 1ـ لاالة الااللة 2ـ لا للمخدرات 3ـ لا للتطبيع


من وين جابتها لا لتطبيع هذي صعبه شوي على صيته بحكم ان بعلها اخوي نفله


هى ترى تحب الاخبار بس جارتها قالت لها اخر حلقة البارح من الاخبار


شكلها اخبار السعودية اللي متابعينها... بس غريبه ذكروا لا لتطبيع


اخو نفلة /عسى تنحل رقبتة
صيتة/ياوخى اطلبلة الرحمة والمغفرة ازين
اخو نفلة/هو هالحين مالقى يموت الا هالحين مايشوفنا بالمزرعه مشتغلين
صيتة/الموت مهو بيدة هذا قدر ومكتوب ولايشاور وهو ترى مادرى عن شغلك (تجاملة وش تسوى)


مجرم اخو نفله ... حتى الموت معاند معه


ودار هذا الحوار العاطفى الرومانسى
اخو نفلة/وجعا يمصع الصاحى من عروقك وين ركبتى
صيتة /معك اجل منهو معه اركب (سؤال وجية)
اخو نفلة/انا اخو نفلة (اقول لايكثر)تبين تفضحينا يامرة وش يقولون عنى الرياجيل افا ياذا العلم
صيتة/طيب طيب ياوخى سم ولايهمك انا احسب ان هذى الغمارة اللى
وراء(اية هين)


امحق عاطفي وين حريمنا يشوفن رقتنا وعطوفتنا ورومنسيتنا .... خطرا علينا حنا نركب وراء


وينزل اخو نفلة مع الاكتاف وتعال شوف السريع وشلون صار
تقول سباق هجن على المضمار


أن كاني ما ني واهم فأنا احد الذين بغوا يصدمون من سبب اخوي نفله


صيتة/انت وش بلاك
فنجال قهوة على خشتها يحمل الجواب


ههههههههههههههههههههههههههههههههههه ... انا حسيت في الفنجال كنه قدامي


مشى 5كلم حس ان فية شى ناقص ابد ماهو مرتاح ايييييييييية
الشماغ ماطلعت مع الدريشة
طلع طرف الشماغ مع ابتسامة مكر ودهاء


تصوير بليغ للموقف


مسكــــــــــــــــــــــــــة بريك قوية مع بوارى وصيحة عالية
سمع بها اهل الرياض وعلى المقيمين خارجها مراعاة فارق التوقيت
وقف وهم وقفوا ونزلت صيتة ياحوووووووووووووووووول ياصيتة


انا سامعها وانا في بريده البريك هدا



نبغى وش صار في السريع ...



الله يعطيك العافيه قصه قمة في الروعه لمحادثة واقع النساء قبل عقود

مع تأكدي ان لا يزال هناك بعضا من أخو نفله بالوجود .

وكذلك وجود أم نفله التي يعاني منها الرجل

[راعي الحميّه]

الله يعطيك العافية صرااااااااحة قصة ولا اروع
تحكي معاناة واقعيه لكثير من اشباه صيته
اللي رجالهم حاطينهم بس للتهزي والاضطهاد الزوجي((بغى يطيح حنكي وانا اقولها))
بس عجبني الموقف يوم طلعت خشتها وقعد يمدحها على باله وحده غيرها
وهذا دليل انه من قشارته ماقد دقق في وجهها.

[افكار متحركة]

عزيزى / مستغرب
والا اقولك اخى العزيز ( بصراحة كلمة عزيزى مرعبة شوى دائما تكتب هكذا عزيزى سدد وعزيزى العميل عليك مبلغ وقدرة وفى الاخير واللة اعلم بسبب العمالة عزيزى العميل لقد تم ايداعك السجن صارت مونوبولى ماهى فاتورة )
حبيب قلبى اعجبنى ردك على الموضوع واستفدت الكثير
الف شكر

[افكار متحركة]

اخى الفاضل/راعي الحميّه

الروعة وجودك معنا واضافتك الجميلة على الموضوع
ولاتخاف على صيتة بس اهم شى تدرى ان الاخبار مو الحلقة الاخيرة ويمالك من اخبار والباقى يهون عندها

الف شكر

[وحي القلم]

اخو نفلة/شوفى يامرة هالخشة ماهى مثل خشتك اللة يعين المسلمين اثرية ماهو بس انا المبلى


انسان واقعي ...!!!!!!!!!!!!!!

اخي العزيز افكار متحركة ..

موضوع جميل ورائع جداً ..

حقيقة اجدت الوصف عن حالة يعاني منها المجتمع ..

تقبل تحياتي

[افكار متحركة]

اخى العزيز / وحى القلم
هى حالة وفى انحسار ولن تصل الى ظاهرة ان شاءاللة
اشكرك على اضافتك الطيبة
والشكر موصول الى كل من اعطى من وقتة القليل لهذة القصة وتفضل بالرد
خصوصا مشرفى الساحة لما فى ذلك من اثر ايجابى خصوصا واننى عضو جديد
مع السلامة