المساعد الشخصي الرقمي

مشاهدة النسخة كاملة : عمل البنات في القطاع الخاص بقالب كوميدي


عبد العزيز
02-10-07, 12:45 AM
عجبني الاسلوب حبيت تشاركوني نسخته لكم لحد يدري ...........


هلا والله وسهلا بكل من يمر من هنا ,,,

ابطال القصه عشان توضح ,,,
بسبوسه << المغلوبه على امرها واللي حفيت تدور وظيفه حكوميه ومحدن عطاها وجه,,,
لينا ,, بنت جيراننا اللبنانيه ولك تابري البي شو مهضومه ,,
توفيء ,, اخو دينا وواسطه عوده وصلتني للوظيفه ,,
نوره وسعاد ومها والعنود ,, سعوديات يشتغلون معنا <<
وطبعا ماله داعي ارد اقول اخواني الحقده وامي وهالعيله اللي مادري وش تبي ومالهم كلمه على بنيتهم المطفوقه
اييييييييييه ,,,, قال شغل قال ,,,,,, ! والله ياذي الشهاده اللي طايرتن بها ما تسوى تعبها اجل اقعد سنه كامله ما تدري الحكومه عني اني تخرجت وبعد التقديم والمراجعات والطلعه والدخله والمضارب والمزاحم يقولون لي ملفتس ضاع وشهادتس الاصليه اوب موثقه من الاداره العامه للكليات ,, ياناس ابي افهم انا وين كنت ادرس وش هالكليه اللي تسلمني شهادة موب موثقه ,,, يالله السلامه ,, كتمت القهر بقلبي ولملمت شتات خيبتي وطلعت ادارة الكليات وقلت علي وعلى اعدائي ولا يردني غير قسم الرجال ,, وادخل طايره عليهم ويوم انه يشوفني الموظف يقول هيه يا اخت ممنوع الحريم ,, وانا امشي واطالع فيه فوق تحت واسفطه تسان يلحقني ويقول انت هيه ممنوع والتفت عليه واقول هاه خير وش تبي ,,!
_ ممنوع الدخول ذا قسم الرجال الحريم من الجهه الثانيه
_ بس انا مو حرمه انا رجال
_ هااه
_ ايه رجال عندك مانع اجل تحطون لنا كم من ماصله تتعلك وترز خشتها وكل دقيقه مطلعه المرايه تحط كحله ولا جينا نسال تطالعنا بنص عين وتقول المعامله عند الرجال اجل ليش فاتحين قسم للحريم عشان يجيبون دلال ويقشمون فصفص
_ يا اخت هدي اعصابتس وروحي لقسم الحريم وبيشوفون مشكلتس
_ مانيب رايحه لحريم ومشكلتي انكم ما تدرون وين ربي حاطكم اجل تخرجوني من كلية الاداب بشهادة مهيب موثقه بدون توقيع ؟؟ ذي شهاده والا خبال ,,؟
ويوم ان صوتي ارتفع والناس التمت علي وكلن قام يحوقل ويسب بهالصرح الفاضي واللي ما عند اهله سالفه غير قرارات ما تدري وش تبي قام يبي يغطي عالفضيحه ويتدارك الموضوع قال
_ خلاص روحي لقسم الحريم واقول لهم يختمونها لتس بسرعه وخلاص ,,
_ لا ,, حريم ما فيه تب تختمونها هنا ,, انا لي اربع شهور اراجع عند الحريم اخرها تقول لي الموظفه وشو له مستعجله اصلا ما هناك وظايف يا اخي انتم ما تستحون ,, شينه وقواة عينه بعد ,,!
الادمي من نكبته قام ياخذ الاوراق ويقول والله لاخلصها لتس بس روحي وتعالي باتسر ولا يصير خاطرتس الا طيب
وبعد شي وشويات طلعت من المبنى ورحت السياره واخوي يضحك ويتمغط من الوناسه ويوم اني اشوفه تسذا مت من الحره وصحت فيه
_ يا مال الوجع ليش مستانس
_ ابد بس يقولون فيه هوشه داخل
_ ورا ما تاكل تبن يا شيخ انا لو ربي معطيني اخوان مصحصحين ما تسان احوس باوراقي عند الرجال
_ بالعكس يالشينه ,, احمدي ربتس اصلا لو انا ماخذها محدن طالع بوجهي بس انتي غير قول وفعل هههههههههههههههههههههههههههههههههههههههههههههههههه ههه
حسيتني وقتها باموت قهر وياهو الحقير من زود الوناسه دق الراديو وقام ينشز ( وياك وياك الدنيا حلوه وياك ) وقعدت منطوله وماكله زفت لين وصلنا البيت وانا نازله وحايسه الا وبنت جيراننا لينا السوريه نازله من السياره وتتمايل هي واخوها توفيق ويتحاتسون بشويش ويضحكون تقول بلابل واخوي يوم يشوفهم تسان يقول
_ ايييييييييييييه والله يا بعض الاخوات انهم نعمه هههههههههههههههههههههههههههههههه
ما عطيته فرصه على طول رديت عليه
_ وبعض الاخوان بعد هههههههههههههههههههههههههههههههههههههههههههههههههه ههههه
ومشينا من يمهم ويوم اشوف عيون اخوي طايرتن يمين اخوها قلت له ورا ما تقضب الدرج انت وهالسوري وخلنا البنات نطلع بالاصنصير وبعد بلا قلة ادب وتلفت ترا ما يركب المغازل علعلى جسمك انحمس كتير كتير واخذ خويه وانقلعو من الدرج وانا والبنيه طلعنا بالاصنصير وسلمت عليها تسان تبتسم لي وتقول
_ كيفك بيسو صار زمان ما حكينا سوا
_ والله مشغوله يا لينا بشهادتي ادور وظيفه حكوميه ومحدن وظفني قسم اني ماكله تبن
_ ولو حبيبتي ما تعزبي حالك شو حكوميه ليه ما تشوفي شغلة خاصه وبتلبأ لك
_ مادري بس احس ما فيه شي يلبق علي
_ يا الله شو معزبه حالك انا باقدر اكلم لك عمو كريم ازا بدك يوظفك في شركه خاصه بدون شهادة ووجعة راس وبمرتب يستاهلك

انا سمعت هالعرض بغيت اطير من الوناسه قلت بدون تردد
_ بدي بدي الله يلعن الكليه ويلعنها ها الشهاده ولا يخلينا من عمو كريم بس وش هالشغله اللي بتوكلني ذهب وانا مرتاحه؟؟
_ ايه بعدين باحكي لك
ما مداني استفسر لان وصلنا الشقه بس ما طلعت من الاصنصير الا وماخذه وعد من لينا انها تكلم عمو كريم ويتوسط لي في أي مكان وافتك من عنا الحكومي ومن عمو غازي اللي يوم دق السدر وظفني مدبرة منزل
وبقيت على هالوعد يومين وبعد يومين جاني تليفون من لينا تقول لي فيه ان عمو كريم وظفني بشركه خاصه تبع شركه خاصه اماراتيه ويالله ذا الخبر صكني صكه وحسيت اني بيجيني جلطه من الفرحه هههه هههههههههه
_ يممممممممممماه خلاص توظفت بشركه خاصه
_ يا ويلي من ذي البنيه عز الله منتب صاحيه
_ الا صاحيه ونص عمو كريم توسط لي عند خويه وباتسر باروح استلم وظيفتي ولكم تابرو البي كلكم يمه هههههههههههههههههههههههههههههه
عاد اخواني يوم درو قامو يتلزقون ويرزون عمرهم عندي وكل دقيقه يطلون على غرفتي ويقولون تامرين بشي يا وخيتي وانا من زود المراده احقرهم واقول محشوم انقلع بس ههههههههههههههههههههههههههههههههههه
وجا اليوم الموعود ورحت استلم وظيفتي ويا زين ذيك الوجيه السنعه كل ابوهم شوام ما غير ست او سبع من ربعنا ومن اول يوم صار عندي مكتب يا زينه وقعدت حطيت رجل على رجل ورزيت وجهي طول اليوم وانا فاضيه ويوم اني دخلت باحلام العظمه وحسيتني شي الا وذيك البنيه حاملة اوراقها ومقربه من مكتبي عاد انا دخلت جو مع وظيفتي ولويت بوزي ثم طالعت فيها فوق تحت وقلت
_خير ,,! الدوام خلص راجعينا بكره
بس للاسف جات بوجهي وهالادميه طالعتني فوق تحت وقالت
_ شكلك جديده عالعمل انا المسؤوله عن قسم النساء ولعلمك هنا الشغل ما فيه راجعنا بكره انت هنا بخدمة المراجعين والا ما لك أي داعي
قمطت العافيه ولعنت فيها اليوم اللي تعلمت فيه هالكلمه وقلت
_ حاضر طول الله عمرك
زلبتني والتفت حق خوياتي الجدد وقالت بعدين بيصير اجتماع لتوزيع الشغل
وقبل ينتهي الدوام بساعه قامو يقولون يالله بيبدا الاجتماع الريس يستنانا
التفت يم خويتي وصحت
_ هاه وشو ريسه يا سعاد بنجتمع مع رجال؟
_ ايه ريسنا بالعمل تراه (سوري),, عادي اهم شي مو سعودي ,,,
_ الله لا يفضحنا نطلع نجلس معه ويكلمنا بعد ,,
ترد وحده من السوريات
_ ايوه خيتو ازا بدك تلبسي عباتك ما فيه مشكليه هون كل واحده حره بلبسها
_ وه ,,! طيب واذا نطت علينا الهيئه
_ شو هيئه ,,! يا اختي هادي شركه خاصه وهدا مدير الشركه ونحنا موزفات هون يعني شي عادي نجتمع ونحكي سوا
_ يختي احنا بنات حموله ما نهذر مع رجاجيل
_ شو حموله ,,! وشو رجاجيل ,,! يعني احنا بنات كلب يا اختي هيك الشغل
_ لا العفو بس ما تعودنا
_ ايه كلكم هيك بالبدايه بعدين تتعودي اصلن استاز جمال شديد وحمش ومش بتاع دلع يعني ما بيحب المسخره والشغل شغل يالله منشان لا نتاخر عليه ,, راح يأسم علينا الشغل ويعلمكون شو بتعمل كل وحده منكون ,,
سالت خوياتي سعاد ومها والعنود ونوره قالو خلاص نروح هالمره نشوف طبيعة الشغل لكن بعد كذا ما نبي نجتمع معهم يجتمع هو وربيعاته السوريات بس خلنا نتمكن من الشغل ثم نسحب عليهم جميع ,,,
اخذنا عبينا وطقينا البراقع ودخلنا المكتب وكل وحده تدز الثانيه قبلها واجتمعنا يم الباب مستحين ندخل ويوم نطل من الزاويه الا وذا الولد قاعد وحوله بنيات سوريات ولبنانيات وطاقينه سوالف وضحك وهو من زود الوناسه ما درى عنا ولا طالع جهتنا وقعدنا نص ساعه واقفين عند الباب لين اخيرا انتبه يوم دزيت نوره وطاحت على خشمها بالارض
_ اسم الله عليك يخزي العين
_ والله مو انا ذي الملعونه دازتني وزحلت
قمنا نطلطل بروسنا وهو يضحك ويقول
_ تفضلو شو ليش واءفين تفضلو فينا نبدا اجتماعنا
دخلنا بعد مدازز وسحبنا اطرف كراسي اخر الغرفه وجلسنا وكل واحده تطالع بالارض من زود الخجل ما قدرنا نرفع روسنا
عاد هو ياس من أشكالنا قام يتكلم عن الشغل
_ احنا طبيعة عملنا هون مهضومه كتير وفيها علاقات عامه يعني كل واحده منكون بدها يكون عندها اربعين عميل واكتر
انا خضتني الكلمه صحت فيه ,,
_ بتجندونا للموساد تخسون
_ تف من تمك ,,! شو موساد انت التانيه ,, هدول عملا عندنا يعني بيصيرو اهم من اهلك تكلميهون تعطيهون ارآامك وتادميلهم خدمات,,
, عاد انا احتريت وطفرت وراح فكري عند اللي بالي بالكم وطبيت بحلقه وانا اقول ,,
_ نعم وشو خدماته,,
_ ولك انت ما بتفهمي ,, يعني خدمات الشركه ,, كل ما تطلع خدمه جديده بدك تكلمي العميل وتعرضي عليه الخدمه بشكل طعم و حلو منشان تكسبي العميل
_ هااه ؟ بس خبري عيالنا قليلين ادب والواحد ينشب فيك نشبه اذا كلمتي بالغلط وشلون اذا باكلمه واسولف معه ,,!
_ ايه هايدي العلاقات العامه لازم تتعلمو كيف تستميلوا العميل ,, تدحكي ,, تحكي ,,, تتغنجي ,,, ولك هيك الشغل بيمشي مزبوط ,, وطبعا فيه حوافز كل ما زادو عملاء الموزفه كل ما زادت الحوافز ,,!
وكل هالامور راح توضح اكتر باجتماعنا الجاي في دبي بعد شهرين ان شاء الله
عاد انا ماستوعبت الجمله الاخيره ,,
_ وشو ؟؟
_ دبي ,, حنسافر لدبي رحلة عمل هيك زغيره تعرفو اكتر طبيعة شغلكون ,,
_ وشلون نسافر دبي ومع مين ,,؟
_ معي ,, ومع طاقم الشركه ,,.! وخلاس عاد ما توجعي راسي بحكي ماله تعمه ,, اللي بدا تشتغل اهلا وسهلا واللي ما بدا تنئلع من هون ,,,, ايه والله حاجه بتخرب العأل ,, بدكون تشتغلو وتاخدو راتب ببلاش ,, لازم تأدمو تنازلات للعميل ولغيره ,,! وشوفي يا ست بزبوزيه حاجي تتعبيني باعتراضات وكلام يحر البدن ازا بدك تشتغلي تفضلي ما بدك الباب يفوت جمل
عاد مع ذي الكلمه حسيت راسي يفر خاصة ان هالبنيات يضحكون وماخذين الامر فري وشكلهم والله اعلم متعودين عالهياته مع هالسوري وربعه ,,, وحتى السعوديات اللي كانو معي سحبو علي وقامو يقربون الكراسي من المدير ويدخلون شوي شوي بجو السوالف والشغل
بس انا نفسي ما تجي على هالامور والعن ما علي كرامتي اللي حسيت ان هالخسيس تطاول عليها بس قلت لا والله ما اطلع فاضيه وخاويه الا علي وعلى اعدائي سحبت الكرسي وقام يضحك على باله اني بالحق خوياتي واداري وجهه اللي تسنه نعال زبيري ولميت اوراقي واخذت شنطتي وقلت ,,
_ اسمع يا حضرة مدري شسمك ترا صحيح ما حدنا عليك الا الشديد القوي بس سواياك ذي تمشيها على ربعك وبناتك وخواتك وبنا ت الشوارع اللي يرضون على نفوسهم ويتجمعون حولك مو على بنات الاصل ,, والشرهه يا كلب مو عليك الا عاللي عطاك الفرصه تدخل البلد وترافس فيها بايدينك ورجلينك ,,,
وطلعت ركض لا يصيبني شي طاير والا احد يلحقني من ورا ويفلعني بشي لا سمح الله ,,, ويوم وصلت برا تسان ادق على اخوي اقول له تعال ودنا ادارة الكليات كوده اشوف وثيقتي يمكن وقعوها واروح اقدم على وظيفه حكومي ,,, لا باركت فيك من قطاع خاص هذا غزو مهوب قطاع