يَـا بوي تـَدري خاطري دوم يطريـك !! ( مَـرثيـّة ) ..

[قرم ثادق]

بسم الله الرحمن الرحيم

أبي ،،

تركتني تلاطم بي أمواج الحيَـاة ،،

فلك منـّي تلك الكلمَـات .. لترى ما حلّ بي ،،


يابوي تدري خاطري دوم يطريـك=ماغاب طيفك والسبب يوم فرقـاك
تدري دموعي سايلـه بـس تبكيـك=و العين تذكر ضحكةٍ فـي محيّـاك
ماكان في بالي يجي يوم و أرثيـك=طالبك تعذرني لأجل قلبـن أغـلاك
يابوي قصرك يسأل يقول : وشفيك=دمعات عينك تهطل اليوم وش جاك!
قلت : اعذرن يا قصر جيتك أعزّيك=باللي رحل عني وعنّك وخـلااااك
اللي رحل ماقول شخصٍ سكن فيك=اللي رحل زيّنـك بايـده و سـوّاك
ماقد سألت " النّور يومَـه يضوّيـك=أظلم شعاعه كنّ ما كـان ضـوّاك"
فوق الثلاث عقود مـرّن و بانيـك=ودّع عيَالـه ثــمّ ودّع زوايــاك
صاح القصر يبكي ويصرخ يناديـك=هوّنت حاله قلت با لبـال ذكـراك
يابوي تذكر يوم أنا كنـت أقهويـك=وأعطيك أنا الفنجال و تمـدّ يمنـاك
تذكر يبه نـار(ن) بجنبـك تدفّيـك=ولآمن لفاك الضيف ناديـت حيّـاك
و لآمن لفاك اللّي يـدوّر سواقيـك=شافك كريمٍ والكرم فـي عطايـاك
رجّال كلمة مـا بهـا أي تشكيـك=بانـت معانيهـا بصافـي نوايـاك
كلّن بكاك اليـوم ومحـد بناسيـك=حتى صغير السن ما ظـن ينسـاك
ماني بناسي يوم أشيلـك وأودّيـك=يَمّ المنـام وترفـع إيـدك لمـولاك
وتقول ياربّـي ابسألـك وأرجيـك=إنّـك تيسـر درب عبـدك بدنيـاك
ربّيتني يـا جعـل ربـي يجازيـك=خيره ويغفر ما مضى من خطايـاك
وادعي لك الرحمَـن إنّـه يهنّيـك=ويسكنك بالفردوس والحور يجزاك
ويجري لك الأنهار من تحت رجليك=و يكرمك ياالغالي و يعـزّ مثـواك
ماكان في بالي يجي يـوم وأرثيـك=هذي حروفي لك ويا بعـد لقيـاك





آبـنـك .. سلمـان ،،

الشاعر سليمان الجفن