منتدى السواليف والضحك

العاب يوتيوب تلفزيون الحوادث والجريمة منتدى قصة وقصيدة منتدى القصص والروايات

 

العاب بنات

يوتيوب

قناة بث مباشر

games

 


قصص » قصص متوسطه » قصة - من حقي ان اعيش - الجزء الاول

 قصة - من حقي ان اعيش - الجزء الاول  أضيف في: 22-12-1429هـ

قصة - من حقي ان اعيش - الجزء الاول للكاتبة بنت الخيال



مبارك :اموووووووووووووووووووووون

امون : آمر

مبارك وهو معصب : شلي هالقرده عني مب مخلتني ارقد

امنه : فديت شموتي انا ،،، وتشل شما عن ابوها وتحبها

مبارك : القرد في عين امه غزال

امون : بذمتك الحين شما الحلوه قرد ؟؟

مبارك : ذلفي عن ويهي خليني ارقد ,,, ولا تنسين تسكرين الباب ،،،

امون : ما تبا غدا ؟

مبارك : لا

طلعت امون وسكرت الباب ،،، وراحت الصاله ويلست ويا بنتها لحد ما رقدت وشلتها وحطتها في سريرها وظهرت وردت الصاله ،،، وبعد ربع ساعه

دخلت عويش الصاله وحصلت امها ،،،

عويش وبصوت عالي : السلام عليكم يا حلو ،،، في شوه تفكرين ،،، ليش ما تجاوبين ،،، قولي بسرعه ،،، خلاص قولي سر ،،، على راحتج ،،، انا بروح ابدل ثيابي وبصلي و برقد ،،، إذا غيرتي رايج انا في حجرتي بس اول شي حجزي عند السكرتيره موعد ،،،

امنه : وعليكم السلام ،،، ما شاء الله على بنتي ،،، بالعه راديو ،،، تسألين وتجاوبين على عمري ،،،

عويش : فديت ماماتي ،،، اباج تضحكين ،،، ما ابا اشوف الحزن في ويهج ،،،

امنه : ومنوه قاص عليج وقالج اني حزينه ،،، حد عنده القمر ويكون حزين

عويش : قصي علي بكلامج المعسول ،،، انا ادريبه اكيد كالعاده قايلج شي ومضايقنج ،،،

امنه : عويش ،،، حبيبتي ترا مهما كان هذا ابوج

عويش : ادري وليتني بعد ما دريت ،،،

امنه : حد يرمس عن ابوه حبيبه هالرمسه اللي مب حلوه

عويش : انزين متى بيحس انج تقدرين تعطينه اكثر من ما هو بعطيج ،،، متى بيقدر انج احسن من بنت عمه اللي افترق عنها بسبة الظروف ليش ما يرضى بالقدر واللي الله كاتبنه ،،،

امنه : انتي منوه يخبرج ويترس راسج بهالرمسه

عويش : انا مب ياهل ،،،هالسنه بتخرج من الثنويه ،،، يعني بكمل ال 18 ،،،

امنه : حبيبتي ابوج نسى الماضي ،،، والدليل انه يحاول يتغير ويرضى بالواقع واللي الله كاتبنه له ،،، ومحاولته تكفي وتبرهن انه الحال مب مريحنه ويحاول يغيره للأحسن ،،،

عويش سكتت ونزلت راسها

امنه : كلامي فيه شي غلط

قامت عويش وحبة راس امها ،،،

عويش : الله يخليج لنا ويخليني لج

امنه وهي تضحك : آآآمين

عويش وبصوت عالي : سببببببببببببببببببببببيجوه وصمخ

امنه : وطي حسج ،،، ابوج وشما راقدين

عويش بصوت واطي : سبيجه يعلج الصمخ هاتيلي غدا بسرعه ،،،

امنه : سمعتج ،،، الحين بتيج تركض ،،،

عويش : ما عرفتلج ،،،اصارخ ما عيبج تكلمت بصوت واطي بعد ما عيبج

امنه : روحي بدلي ثيابج وصلي وانا بخليها تحط غدا

عويش : اوجيه ماما امنه

راحت عويش تبدل ثيابها وصلت الظهر ويات تتغدا

عويش : ويا هالاسوده يوم ازقرج ليش ما تردين ،،،

سرمني : انا ما في سبيجه ،،، انا سرمني ،،، انته يزقر سبيجه انا ما في يرد

عويش : عاشوا ،،، منوه علمج تردين بعد ،،، لا يكون طباخ قوم راشد


امنه : عويش شو هالرمسه ،،،

عويش : ميته يوع ،،، ابا اكل ،،، يقولون الكلام مب زين ،،، يؤدي الى امراض خطيره

امنه : بسم الله منج ومن رمستج

عويش : متى بيوصل علوه ؟

امنه : عويش ،،، اصغر عيالج تقوليله علوه

عويش : هيه كل الدلع له ،،، منوه قدك يا علوه

امنه : عوووووووووووووووويش

عويش : خلاص علي ،،، ولا سيدي علي

امنه : سيدج غصبن عنج ،،، واحترميه ترا اخوج اللي اكبر عنج ،،،

عويش : إلا سنه مب من كبره عني ،،، وبصراحه انا محترمتنه لانه ما ينازعني ولا يضربني و عشان جيه احبه وحترمه ،،، مب شرات رشود اخو روضه ربيعتي ما يمر يوم الا نازعها ولاتضارب وياها يا طالع عنها ،،،

امنه : قولي الحمدالله على هالنعمه ،،، محصله حد يجابلج ويتحملج

عويش ومخليه عمرها مسكينه : هيه والله ،،، وايد عليه يوم متحملني ،،، وفجأه بصوت عالي : شو انا عشان ما يتحملني

امنه : عوذ بالله منج ومن هالحس ،،، راسي عورني بروح ارقد لحد ما يوصل اخوج احسلي ،،،

عويش : انزين شو اخليها تسوي حق قهوه العصر ؟؟

امنه : والله نسيت اقولها تسوي شي على لقهوه

عويش : ادري ،،، والفضل لصوتي الرقيق ،،، احم احم

امنه وهي تضحك على بنتها : الاعتراف بالحق فضيله

عويش : يحليلي مسجينه

امنه : انزين يالمسكينه ،،، خليها تسوي فطاير وخبيصه وانا بطرش الدريول العصر ايب خضره لانه ماشي خضره

عويش : اوجيه ماما امنه

وامنه : والقهوه بالزعفران

عويش : اكيييد ما يبالها رمسه

ودخلت امنه ترقد لحد ما يوصل علي ولدها ،،، وراحت عويش وشلت صينيه الغدا ووصلتها المطبخ ،،، وفي المطبخ ،،،

عويش : سوي فطاير بالجبن والزعتر ،،، وسوي هريس وخبيصه و

قاطعتها سيرمني ،،،

سيرمني : ليش ما يقول من الصبح يريد هريس ،،، هذا هريس يريد وقت واجد ،،، ما يصير الحين سوي

عويش : والله انا اللي اعرفه ان السكني ما يغلبه شي

سيرمني : انا سوي خبيصه وفتاير بس

عويش وهي تضحك عليها : انزين انا يريد هريس ،،، انا ما في اكل هريس انا موت

سيرمني : انزين موت شو سوي انا

عويش : اهبي مشرج ،،، ادريبج تبين الفكه مني ،،،بس حلم ابليس بالجنه ،،،

سيرمني : سوي وايد فطاير ولا شوي

عويش : لا سوي بس حق قهوة العصر محد بيي

سيرمني : اوكي

عويش : منوه علمج تقولين اوكي

سيرمني : علم فـ

قاطعتها عويش : خلاص دريت ،،، حشى بالعه راديوا

وظهرت عنها ،،، وراحت حجرتها ،،، ويت تبا ترقد وشافت الساعه قربت على ثلاث ،،،

عويش : بخلص واجب الرياضيات لحد ما يوصل علوه ،،،

وراحت ويلست على مكتبها وبدت تحل مسأل الرياضيات وتتحرطم

عويش : ياخذ بليسها من معلمه ما تعرف تفهم ،،، ما ادري كيف اشتغلت هاي ،،، الله يعين عليها

الساعه اربع خلصت عويش من واجبها عقب ما ردت وقرت الدرس ميه مره عشان تفهم ،،،

وديمه : نواري تعتقدين عويش قامت ؟؟

نوره : ما ادري ،،، روحي شوفيها ،،،

وديمه : عقب ما اخلص من حفظ الآيه بقوم ،،، اليوم ابله مريم نازعتني لاني ما كنت حافظتنها ،،،

نوره : ما قلتيلها انج مريضه وما قدرتي تحفضينها

وديمه : دخيلج حد يسر يرمس هالنسره ،،، بتقولي انا مالي خص في ظروفج ،،،

نوره : يعني بيدج انتي ما حفظتيها

وديمه : هالرمسه عندج مب عندها ،،، لو شفتيها كيف تنازع زينب يوم قالتلها ان كان عندهم ضيوف ولا قدرت تحفظ

نوره : حشى ،،، نحن ابله بتول تعطينا اسبوع نحفظها من ناخذ الدرس عشان بعدين ما يكون عدنا عذر ،،، والحمدالله ما يعدي الاسبوع الا يكون كل الصف حافظنها

وديمه : هذا عند ابله بتول الطيبه مب ابله مريم اذا خذنا الدرس اليوم لازم باجر اني حافظينها وحتى لو عدنا امتحان ما تراعي همها مادتها وبس ،،،

نوره وهي تضحك : شفتي ابله عفاف يوم طاحت من الدري

وديمه : لا تذكريني ،،، والله مت قهر يوم خبرتني زينب ،،، طافني نص عمري ،،،

نوره : والله صدق طافج ،،، لو تشوفين شكلها يوم طاحت وين البنات يساعدنها ،،، قالت الحمدالله جت سليمه والبنات ميتات ضحك

عويش : هاي شغلتكن ،،، تنمن عن الناس وبعد شوي تظهرن وتقولن درسنا

وديمه : متى قمتي ؟

عويش : اصلن ما رقدت ،،، لا تقوليلي تبيني افهمج رياضيات ،،،

وديمه : دخيلج ،،، يوم السبت علي امتحان

عويش : وليش ما تقوليلي من قبل ،،،

وديمه : بس اليوم حددت الامتحان

عويش : انزين درسي الله تعرفينه ويوم الجمعه بفهمج الباقي

وديمه : صار

عويش : هاه نواري شو اول ثنوي وياج ،،،

نوره : سكتي لا تذكريني ،،، خليها مستوره

عويش : بدت امتحاناتج ؟

نوره : يوم الاحد بنبدا ،،، والله يستر

عويش : شدي حيلج ،،، على قولتهم هذي الحفره مب اول ثنوي

نوره : ما جذبوا والله

عويش : الله يسامح ابله الكيمياء اللي رسبتني

نوره : حرام عليج انا احلى ماده علميه هيه الكيمياء

عويش : امحق حلاه ،،، شو خلااني اعيد اول ثنوي غير هالماده

نوره : والله منج ،،، لو سرتي يوم الاعاده كنتي نجحتي

عويش : المهم اني هالسنه آخر سنه وبفتك

وديمه : حظج والله ،،، انا بعدني فثاني اعداي يعني باقلي اربع سنين من غير هالسنه

عويش : يحليلكن ،،، الله يعينكن على لمخسف اللي يدرسن

نوره : حرام عليج مب كلهن

وديمه : عويش جنه امي ادق باب حجرتج

ظهرت عويش من عند خواتها ،،، وراحت صوب حجرتها

عويش : انا هنيه

امنه : بسم الله من وين ظهرتي ؟؟؟

عويش وهيه تضحك على امها : من وين يعني ،،، كنت عند نواري ودمدومه


امنه : وليش مب راقدات ؟

عويش : انا كنت احل واجب الرياضيات ونواري ودمدومه يالسات يدرسن وينمن على الخلق ،،،

امنه : الحين الساعه اربع ونص وعلي ما وصل ،،،

عويش : لا يكون محجوز كالعاده ؟؟

امنه : يستوي ،،، ليش لا ،،، بروح اتخبر ابوج عنه

وراحت امنه عن بنتها وردت عويش عند خواتها وقالتلهن يقون يصلن وراحت تصلي

وبعد ربع ساعه راحت نوره ووديمه الصاله

نوره ووديمه : السلام عليكم

امنه ومبارك : وعليكم السلام

امنه : خلصتن دراسه ؟؟

نوره : لو ندرس طول اليوم ما بنخلص

وديمه : سكروا عن الدراسه وخلونا ناكل

نوره : علي اخوي وينه ؟

امنه : ما بينزل هالاسبوع ،،،

وديمه : اكيد مسوي شي

امنه : لا ما مسوي شي بس عندهم تدريب

نوره : متى بيي يوم تخرجه ،،، انقهر والله يوم يغيبن البنات عشان يشوفن تخريج خوانهم في التلفزيون

امنه : ليش تنقهرين ،،، ان شاء الله بيتخرج اخوج وبتغيبين ،،،

وديمه : هاي اول سنه له ،،، يعني باقي ثلاث سنين ،،، صح ابوي

مبارك : هاه ابوي ،،، شو تقولين ؟؟

وديمه : علي باقله ثلاث سنين وبيتخرج صح

مبارك : ان شاء الله

نوره : مب سنتين ؟؟

مبارك : هاي كليه زايد اللي سنتين ،،، بس الشرطه اربع سنين

نوره : يعني انا بتخرج وهو بعده

وديمه : على شوه مستعيله ،،، يوم امه وبوه مب مستعيلن

نوره : سكتي انتي وكلي احسلج

وقامت نوره تشغل التلفزيون ،،، اول ما شاف مبارك التفزيون قام وصرخ على نوره

مبارك وهو معصب : بندي التلفزيون

نوره سكرت التلفزيون وهيه منصدمه من ابوها ،،،

مبارك ظهر بسرعه من الصاله وهو معصب ،،، لانه لو يلس بيرتكب جريمه في بنته ،،،

طلعت امنه وراه

امنه : اذكر ربك يا مبارك

مبارك والدمعه خانته ونزلت على خده : اه يا امنه كل ما قلت نسيت يطلع شي ويذكرني ،،،

امنه ومسحت الدمعته : ما ابا اشوفك ضعيف ،،، ابا اشوفك مبارك اللي اعرفه ،،، مبارك اللي كله اصرار وعزيمه انه ينسى الماضي

مبارك : مب بيدي ،،،

امنه : مبارك ،،، ما ابا لعيال يدرون بشي عن الماضي يكفي ان عويش تدري

مبارك وهو منصدم : شو دراها عويش ؟؟؟

امنه : علي خبرها ،،، وقلتله ما يخبر حد ،،،

مبارك : كله من اخوي عبيد اللي خبره

امنه : خبره عبيد ولا غيره بيدري ،،، المهم شو تبا على العشى

مبارك : بتعشى برا

امنه : على راحتك ،،،

مبارك : بروح ويا عبيد ابوظبي ،،،

امنه : شو عندك هناك

مبارك : حرام اظهر برا العين

امنه : الله يحفظك

وراحت عنه

في الصاله


نوره : غريبه ،،، كان برنامج عن المعوقين تعتقدين البرنامج ضايجه

وديمه : ما اعتقد

دخلت امنه الصاله

نوره : اماه ،،، شو فيه ابوي عصب يوم شغلت التلفزيون ،،،معنه كل يوم يتابع المسلسل وياي ؟

امنه : تعبان من الدوام ،،، ويوم شغلتي التلفزيون تضايج من صوته

امنه تكلم بنتها وديمه

امنه : ودومه روحي زقري خوانج وعويش عشان ياكلون شي ،،،

وديمه : ان اشاء الله

ورحت حجرة اخوانها المر وحمدان

وديمه : مرمريه وحمديه قوموا تباكم امي في الصاله

حمدان : والله لديرج بكف عشان تعدلين رمستج

المر وهو يخوز اللحاف من ويه : شو تتريا عطها كفين عني وعنك

وديمه : تنكت ويا شكلك ،،، قوموا صلو وتعالوا

يات وديمه تبا تظهر مسكها حمدان من شعرها

حمدان : ما شي ظهره قبل ما تقولين اسمي عدل

وديمه وهي تعاند : حمديه حمديه حمديه

حمدان وهو اير شعرها وهيه تصارخ

وديمه : يا حمار فج شعري

حمدان : شو اسمي ؟

وديمه : ما بقول

حمدان وهو اير شعرها اكثر

وديمه : اماااااااااااااااااااااااه

المر : يحليلج يالديايه ،،،

وديمه : جب ما يخصك

حمدان : منوه اللي جب

وديمه : ما رمستك

حمدان : الحين تقولين اسمي واسمه عدل

وديمه : جزاتي يالسه ادلعكم

المر : معذرين من تدليعج

حمدان : المر هات المقص ،،، شعرها اشوفه طول يباله قص

وديمه وهي تصارخ : امااااااااااااه

المر : صارخي من اليووم لين باجر محد سامعنج

حمدان : المر قلتلك هات المقص

وديمه : خلاص والله بقول

حمدان : يله اشوف قولي الشيخ حمدان والشيخ المر

وديمه : تخسي

حمدان واير شعرها اكثر وهيه تصارخ

وديمه : الشيخ حمدان والشيخ المر

حمدان : قولي لو سمحتوا الشيخ حمدان والشيخ المر امي تباكم في الصاله لو هالشي ما يعطلكم ،،،

وديمه : والله ما اقول تبون اتون تعالوا ما تبون يعلكم ما يتوا

بطلع شعرها حمداون ودزها برا الحجره

حمدان : بنصلي وبني

المر : سويلنا عصير لحد ما اني

وديمه : والله ما حيدني بشكارتك

ويه حمدان يبا يمسكها من شعرها بس ما لحقها شردت

حمدان وهو يضحك : شردت الديايه

اول ما دخلت وديمه الصاله

وديمه : والله ما ازقرهم مره ثانيه ،،،

امنه : شو فيج ،،، ومنوه مخرب شعرج

وديمه : منوه غير حمديه هالخسف هو والمرمريه

حمدان : احم احم

المر : نحن هنا

وديمه : بروح ادرس ابرك

حمدان : احسن لانه ما يستوي تيلسين ويا الشيوخ

امنه : حمدان بس عاد خف على اختك

وديمه : ويييييييييه نازعوه

حمدان : تشوفينها ،،، لا تقولين بعدين ليش ضربتها

امنه : ودومه روحي درسي

وديمه : من عيوني يالغاليه

امنه : هاه المر شو مسوي في دراستك ؟

حمدان : ما حصلتي تتخبرين غير هذا عن دراسته

المر : اللي يسمعك من زين دراستك

حمدان : فديتني ،،، مب مقصر على الاساتذه بقاصر ،،، وان شاء الله هالسنه بنجح ،،،

المر : الاعتراف بالحق فضيله ،،، بتنجح لانك راشي الاساتذه

حمدان : المهم انجح

المر : ناجح برشوه

حمدان : هاي مب رشوه ،،، هاي هديه يا غبي

المر : عونه هديه ،،، انته اخوك ما تهديه بتهدي الاساتذه

حمدان : جب يله جب مستوي شرات الحريم بالع راديوا

امنه : شرات منوه ؟؟

المر وهو يضحك : صاااااااادوه

حمدان : شرات بعض الحريم اللي يموتن على الرمسه ،،، قلت بعض مب كل

امنه : زين

قام حمدان وحب راس امه ويلس عدالها

امنه : شو تبا

حمدان وهو يضحك : حرام ايلس عدالج

امنه : لا مب حرام ،،، بس خل عنك العياره وقول شو اللي بخاطرك

المر : انا بقولج

حمدان : محد طلب منك ترمس

حمدان يرمس امه : اباج ترمسين ابوي عشان يعطيني تلفوني

امنه : مستحيل ،،، ما بيطيع

حمدان : ليش ،،، كل ربعي عندهم شو ناقصني انا

امنه : بعدك بثالث اعدادي ،،، وعندك دراسه ،،، شو تبا في التلفون ؟

حمدان : شوه شو ابا في التلفون ،،، انا مب ياهل في الاجازه تعطوني التفلون ويوم تبدا السنه تشلونه ولا اشوفه الا في الاجازه ،،،

المر : بربك انته تشوفه في الاجازه ،،، مب انا لا في الاجازه ولا في ايام الدراسه ،،،

حمدان : انته في اول اعدادي بعدك نونوه

المر : محد غيرك نونوه

قامت امنه عنهم

حمدان : اماه انا ارمسج

امنه : وانا قلتلك مستحيل ابوك يطيع وانتبه لدراستك احسن

المر وهو يضحك على حمدان : يحليله النونوه ما بيعطونه تلفون

حمدان وهو معصب : بتسكت ولا اديرك بكف الحين

المر : لا مب الحين باجر ،،، الحين مشغول

قام حمدان وهو معصب وتضارب ويا المر

دخلت وديمه الصاله وشافتهم يتضاربون ،،، وتمت تصارخ تزقر امها

وديمه : اماااااااه ،،، تعالي ترا حمديه ومرمريه يضاربون

اول ما سمعوها تقول حمديه ومرمريه قام حمدان فج المر ومسك وديمه من شعرها وديمه تمت تصارخ

يت امنه على صوت وديمه

امنه : فج شعرها ،،، محد مخرب شعرها غيرك

حمدان : قوليلها اول شي ما تقول حمديه

المر : ولا مرمريه

امنه : فديتها ادلعكم

حمدان والمر : معذرين من تدليعها

امنه : انزين فج شعرها

فج حمدان شعرها ،،،

حمدان : لو تقول مره ثانيه حمديه لقص شعرها

امنه : وديمه روحي حجرتج وانتوا رحوا حجرتك وجابلوا دروسكم

وراحت عنهم امنه وكل واحد راح حجرته

===================

يوم السبت الصبح ،،، الساعه ست ونص ،،، طلعت امنه من حجرتها وراحت توعي عيالها حق المدارس ،،،

امنه : حمدان قوم الساعه ست ونص ،،، المر قوم بتتأخرون عن المدرسه ،،،

حمدان : اليوم شوه ؟

امنه تستهبل على ولدها : الجمعه اليوم

المر : حتى يوم الاجازه ما نرقد ،،، ليش نقوم من الفير ،،، حتى الخدامات مب قايمات

امنه : عن الاستهبال انته وياه ،،، لا تخلوني ازقر ابوكم ايي يوعيكم

فز حمدان : لا افا عليج كله ولا ابوي

امنه تكلم المر : وانته مب ناوي تقوم ؟؟

المر : بقوم الحين ،،، اف متى بتخلص المدرسه ،،، يعني لازم ندرس ،،،

طلعت امنه عنهم وراحت حجرة البنات توعيهن ،،، وحصلت نوره قايمه

امنه : قامن خواتج

نوره : وديمه قامت بس العوش مب طايعه تقوم

عويش : قمت ،،، قمت ،،، بس مب مداومه ،،، بصلي وبرد ارقد

امنه : ليش شو عندج ؟

عويش : كنت يالسه ادرس لحد الساعه اربع والحين نعسانه ومالي خاطر اداوم ،،،

امنه : عويش قصي على غيري مب علي ،،، الحين سهرانه ادرسين ولا تقرين كتب الــ

عويش قاطعة امها : هيه سهرت اقرى ،،،

امنه : انا مب قافله المكتبه ،،، شقايل ظهرتي الكتب؟

عويش : امس شموه ظهرتهن من حجرتج تلعب فيهن وشليتهن عنها

امنه : لو ابوج يشوف شو الكتب اللي تراسه المكتبه منه جان جتلج

عويش : ما بيدري ،،، المكتبه في حجرتي وهو نادر ما يدخل عندي ،،، وما بيدري الا اذا خبرتيه

امنه : الله يستر منج

راحت امنه عن بنتها وراحت عويش تعطي اختها نوره دفتر الرياضيات عشان الابله ما تنازعها وتنقصها على تأخير الواجب ،،، وراحت تصلي وردت الحجره ترقد ،،،

وفي الصاله ،،،

حمدان : وين عويش ؟؟

نوره : ما بداوم

حمدان والمر : لييييييييييييييييش

نوره : كانت سهرانه طول الليل ،،،

حمدان يرمس امه : وليش عيل نحن ما نغيب ،،، والله اني تعبان ورحت ولا ما رحت ما بفهم شي

وديمه : اكيد ما بتفهم ،،، من متى الاولاد يفهمون في الدراسه

حمدان يرمس امه : خليها تسكت لا انتفلها هالكشه

المر : يحليلك دوووم تقول هالرمسه ،،، يله اشوف قوتك

امنه : المر ،،، تراك انته سبب المشاكل ،،،

المر : حشى شو قلت انا ،،، حرام اكلم اخوي

امنه : تكلمه ولا تقويه على اختك ،،،

المر : اروح المدرسه احسن

دخل مبارك وهو شال شما توها قايمه

مبارك : السلام عليكم ،،، شو هالحشره من الصبح

الكل : وعليكم السلام ،،، وقاموا يحبون ابوهم على راسه ،،، وشل حمدان شما عن ابوه

حمدان وهو يمسك شموه من خدودها الحمر

شموه : دب

حمدان : ههههههههههههههه انتي دب

شموه : دب ودلع بلسانها

حمدان وهو يحبها : فديت الدبدوبه

امنه : حمدان خل شما عنك ورح مدرستك لا تتأخر

حمدان : خلينا نشبع من شوفة هالقمر ترا لاحقين على لقرود اللي بنجابلهم طول النهار ،،،

مبارك : يله كل واحد على مدرسته

حمدان : ان شاء الله

وظهر حمدان والمر ونوره ودويمه عشان يرحون المدرسه ،،،

المر يكلم الدريول : شغل مسجل

وديمه : لا تشغل

المر : جب انتي ويا شكلج ،،،

وديمه : من زين شكلك يالاسود

حمدان : وديمه سكتي ،،، على ما اعتقد راكبه ويا دريول مب حد من اهلج عشان ترمسين كيفج ،،،

سكتت وديمه

المر : وييييييييييه سكتوها

حمدان عصب على المر : بتكست انته الثاني ولا لا

سكت المر وشغل حمدان على اذاعه القران

نوره : فديت حمدان

حمدان وهو يبتسم : احم احم

المر : عونه مطوع ،،، الا يبا المدحه

لف حمدان على المر : والله لو ما سكت لتنضرب يالاسود

وديمه : يحليلهم نازعوهم

المر : نزلي يله وصلنا ،،، ولا بتين ويانا الشيخه

وديمه : ما اتنزل

ونزلت وسكرت الباب بقو

المر : يعل ايدج الكسر

الدريول : مر ما في تمام يقول هذا كلام

المر : طاع منوه يرمس

حمدان : جب انته ،،، وانته اسكت وسوق لا اديرك بكف


العصر ،،، الساعه خمس ونص الكل تجمع في الصاله حق القهوه الا عويش ،،،

امنه : ودومه روحي زقري عويش

وديمه : ان شاء الله

راحت وديمه ادق على عويش الحجره

اول ما سمعت عويش ان حد يدق عليها الباب

عويش وبخوف : منوه ؟؟

محد رد عليها وهالشي خلا عويش تخاف اكثر ،،، ركضت وخشت لكتاب داخل الكبت تحت ثيابها ،،، ولبست شيلتها وراحت تفتح الباب ،،، اول ما شافت عويش وديمه ،،، مسكتها من كندورتها ودخلتها ،،،

عويش وهي معصبه : يوم اقول منوه ليش ما تردين؟

وديمه : بسم الله ،،، ما سمعتج عشان ارد

عويش : ياخذ هالشكل ،،، تروعت تحريتج ابوي ،،،

وديمه : ابوي بعده لحد الحين ما رد من الدوام ،،، يمكن يكون عليه زام ،،،

عويش : انزين شو تبين الحين ؟

وديمه : امي تباج في الصاله عشان تتقهوين

عويش : ما ابا

وفجت الباب وطلعت وديمه وسكرت الباب وركضت على الكبت وظهرت لكتاب وردت على مكتبها وكملت قرايتها ،،،

بعد المغرب ،،،

نوره : اماه

امنه : هلا اماه ،،، شو تبين ؟؟

نوره : بطرش الدريول عند قوم عمي عبيد عشان ايب دفتر الفيزيا من عند روضه

امنه : لا طرشينه ،،، انا الحين بصلي وبروح صوبهم ويوم برد بيبه حقج

نوره : بس لا تبطين عندهم ،،، عشان ابا ادرس باجر علي امتحان

امنه : ساعه بالكثير وراده ،،، بس دقيلها وخليها تجهزه لا أنساه ...

نوره : ان شاء الله

وراحت نوره ادق حق بنت عمها روضه ،،، بس لقت وديمه ترمس ربيعتها ،،،

نوره : خلصي ابا التلفون ،،،

وديمه : صبري

نوره : يوم بتخلصين زقريني بروح اشوف التفزيون لحد ما تخلصين ،،، بس لا تبطين

وديمه : انزين روحي

وبعد نص ساعه ،،،

نوره وهي معصبه : سكري التلفون لا اسكر في ويه البنت

وديمه : الحين بسكر ،،،

وديمه ترمس ربيعتها : زينب بودرج الحين ،،، ولا تنسين اللي اتفقنا عليه ،،،

زينب : اوكيك يا ودوم ،،، سلمي على نواري

وديمه : وصل ،،، مع السلامه

زينب : مع السلامه

وسكرت وديمه عن ربيعتها

نوره : على شوه متفقات يالارهابيات ؟

وديمه وهي تضحك : سر

نوره : عن البزا ،،، ورمسي

وديمه : حلفي ما تخبرين امي

نوره : مممممم والله ما اخبر

وديمه : قولي والله العظيم ما اخبر امي ولا المحلها ،،،

نوره : والله العظيم ما اخبر امي ولا المحلها ،،،

وديمه : بشرد من الحصه الاولى وبنروح نيلس انا وزينب ورا صفوفكم لحد ما تخلص الحصه

نوره : وشو عليج الحصه الاولى

وديمه : انجليزي

نوره : من فلاحتج في الانجليزي عشان اتشردين عن الحصه

وديمه : لاني مب فالحه فيه بشرد عن الحصه ،،، الحصه ترقد وبنشرد بنتم نحضر حق الجغرافيا لحد الحصه الثانيه وبنرد

نوره : ومن متى تحضرين انسه وديمه

وديمه : وانتي شو لج

نوره : قولي عشان ابله حصه ،،، حبيبة القلب

وديمه : فديتها ،،، والله حصتها وناسه

نوره : جلبي ويهج ،،، برمس رويض بنت عمي عبيد

وديمه : سلمي عليها ،،،

وراحت وديمه عن نوره ،،، ونوره دقت حق بنت عمها

: مرحبا

نوره : السلام عليكم

: وعليكم السلام والرحمه ،،، لحظه

راح سلطان يزقر روضه ،،،

روضه : هلا ومرحبا ملاييييييييييين ببنت العم

نوره بدون نفس : هلا رويض ،،، شحالج ؟؟

روضه : نشكر الله ،،، شو بكي نواري

نوره : سلطان لحد الحين زعلاان مني ؟

روضه وهي تضحك : خليج منه ،،، هذا دلوع ،،، انا وصلتله اعتذارج شو يبا بعد
نوره : والله يا روضه اني ما سويت هذا الشي الا لمصلحته ،،، ما توقعت ان عمي بيضربه

روضه : يستاهل ،،، ما لقى غير ربيعتج يرمسها ،،، قلن فيه البنات ،،، وبنات الناس مب لعبه عنده

نوره : انا ما همتني شرين ،،، انا همني هو ،،، ما يدري انها تلعب وتتسلى فيه ،،،

روضه : خلاص نوره انسي ،،، سالفه مستويه من شهرين ،،، شو ذكرج


سلطان وهو داخل سمع كلام روضه

سلطان : ليش تردن ترمسن في السالفه ،،، شوه الحبيبه فرحانه بلي سوته ،،،

روضه : سلطان اطلع برا ،،،

سلطان : تعالي ضربيني بعد

روضه : نوره ما كانت تبا توصل السالفه عند ابوي بس امي هيه اللي خبرت

سلطان : وهيه شو دخلها فيني ،،، حد موصنها علي تراقبني

روضه ترمس نوره : برمسج بعدين ،،،

نوره والدموع ماليه ويها : لا خلاص انا بروح ادرس بس امي الحين بتي عندكم وعطيها دفتر الفيزيا اذا خلصتي منه

روضه وحست بنوره : انزين بطرشه بس انتي تمي عند التلفون برد ادقلج ،،،

نوره : ان شاء الله

وسكرت روضه عن نوره

روضه وهيه معصبه : انا ابا افهم انته انسان

سلطان بستهبال : تخبري امي هع هع هع هع

روضه : البنت واعتذرت واللي كان لازم يعتذر هو انته مب هيه وتشكرها انها ما ترضى حد يرمس عليك وعادتنك شرات واحد من اخوانها

سلطان : وليش إن شاء الله اعتذر ،،، منوه اللي انضرب ،،، انا ولا هيه

روضه : تستاهل وزدو

سلطان وهو معصب : لا تخليني امد ايدي عليج

روضه : والله الكلام وياك ضايع ،،، بس الحين اذا في حد غلطان فهو نوره انها دافعت عنك ومتضاربه ويا ربيعتها بسبتك واول تعهد تكتبه بسبتك ،،،

سلطان وهو منصدم : ضرابه ،،، وتعهد ،،، شو تخرطين انتي

روضه بسخريه : والله ،،، يحليلك ما تدري ،،، كسرت خاطري تصدق ،،، اسكت دخيلك لا اصيح

سلطان : روضه فهميني شو سالفه الضرابه والتعهد وشو دخل هذا بسالفتي !!!

قامت روضه تخبرت سلطان بسالفه الضرابه والتعهد ،،، وان شرين اللي كان يرمسها كانت ترمس عنه بكلام مب زين عدال البنات ،،، وتقولهن انه خاطب نوره ويرمس بنات

سلطان : ونوره شو ردت عليها ؟؟

روضه : نوره اول مره ردت عليها وقالتها انه تعتبرك شرات اخوها وانته نفس الشي وان الكلام اللي تقوله جذب ،،، بس شرين قالت ان نوره تقول هالكلام لانها متفشله ،،، واخر شي تضاربت نوره وروضه والسالفه وصلت عند الاخصائيه وستدعتهن وكتبتهن تعهد ،،،

سلطان وهو منصدم بالكلام اللي يسمعه من عند روضه ،،،

سلطان : وليش ما خبرتيني ؟؟

روضه : تحريتك تدري من امي لانها تدري بالسالفه ،،،

سلطان : صدق اني حمار ،،،

روضه : حمار شويه عليك

طلع سلطان عنها ولا رد عليها

راحت روضه تسلم على حرمة عمها مبارك وتعطيها الدفتر وردت ادق لنوره وخبرتها بكل اللي صار وان سلطان ما كان يدري باللي تسويه شرين ،،، ونوره ارتاحت شوي ان سلطان عرف وفهم هيه ليش خبرت امه ،،،

=====================

مرت الايام والشهور ويت اجازة الربيع اجازه ال 15 يوم

حمدان : اماااااااااااااااااه

عويش : شو فيك تصارخ

حمدان وهو مطنشنها : امااااااااااااااااااه

امنه : قصر حسك ،،، توني مرقده شموه

حمدان : انزين قولي حق ابوي يعطيني تلفوني الحين بدت الاجازه

امنه : تلفونك مب عند ابوك ،،، عند اخوك علي

حمدان : شو وداه عند علي

امنه : هو اخر مره شله عنك ولا يابه عند ابوك

حمدان : انزين عطيني مفتاح حجرته

امنه : حجرته مفتوحه ،،، بس تلفونك مب فيه لاني دورته ولا حصلته

حمدان وهو معصب : وهو ليش يشله ،،، شو دخله

عويش : احترم هذا اخوك اكبر منك

حمدان : جب انتي جب ما يخصج

امنه وهي معصبه : حمدان احترم اختك اكبر منك وتلفون ما شي لحد ما ينزل اخوك يوم الاربعاء

حمدان ظهر وهو معصب

عويش : لو عند ابوي ما بيرمس بهالطريقه بس انتي اللي مدلعتنهم وشوفي شو النتيجه ،،،

وظهرت عويش عن امها وخلتها في حال الله العالم فيه ،،،

بعد شوي صاح التلفون ،،،

امنه : السلام عليكم

ام محمد : وعليكم السلام والرحمه ،،، شحالج ام علي ،،، ربج بخير ،،،

امنه : الحمدالله الحال يسرج ما يضرج يام محمد

ام محمد : وشخبار بوعلي وعلي وخوانه واهلكم وعربانكم

امنه : كلهم بخير ،،، انتي شحالج وشحال لعيال

وتمت امنه تكلم ام محمد ويسولفون

ام محمد : بتخبرج زرتي خاطره ؟

امنه : لا والله ما سرت صوبها ،،، شو عندها !!

ام محمد : ولدها مسويله عملية الزايده ومن يومين مظهرينه من المستشفى

امنه : يستاهلون سلامته ،،، لازم والله انروحلهم ،،،

ام محمد : الله يسلمج ويسلملج عيالج ،،، شو رايج نروحلهم عقب المغرب اليوم

امنه : خلاص عقب المغرب خطفي علي

ام محمد : خلاص وبشوف بخيته جان بتروح ويانا لا تهازبنا محد يروم على لسانها

امنه وهي تضحك : صدقتي يأم محمد ،،، محد يروح على لسانها ،،،

ام محمد : خلاص ما بطول عليج ،،، قبل لا اظهر بدقلج

امنه : ان شاء الله ،،، فمان الله

ام محمد : فمان الكريم





بعد اسبوع ،،،

وديمه : اماه ،،، بتخلص الاجازه ونحن ما ظهرنا من البيت ،،،

عويش : هيه والله نبا نظهر

امنه : ليش تقوللي انا ،،، قولن حق ابوكن

نوره : يوم بيي انتي بدي ونحن بنكمل ،،،

امنه : وين تبن تروحن ؟؟

عويس وبسرعه : دبــــــــــــــــي

وديمه : هيه والله دبي ،،، نبا انروح البحر

ودخل ابوهن الصاله ،،،

مبارك : منوه يبا يروح البحر ؟؟

عويش : ابوي ما بقى على المدارس غير اسبوع ،،، ونحن ما ظهرنا مكان

مبارك وهو يضحك على اشكال بناته وهن ميتات على الطلعه لانه طول الاجازه وهن في البيت ،،،

مبارك : الزبده

وديمه : الزبده في الثلاجه

مبارك : خلاص خلوا وديمه تحوطكم ،،،

وديمه وتعفد على ابوها : الزبده نروح دبي ،،، دخيلك ابوووي الله يخليك ،،، وقامت تحب ابوها

مبارك : خلاص ،،، تجهزوا بوديكم يوم الخميس ،،،

عويش : واااااااااااااااو يعني بنظهر

مبارك : قطوه مب ادميه ،،،

والكل قام يضحك ،،،

امنه : الله يدوم الفرح ويخليك لنا ،،،

البنات : آآآآآآآمين

نوره : انزين متى بنظهر ؟؟ ومتى بنرد ؟؟

مبارك : بنظر من الساعه 8 وبنرد 11 ولا 12

عويش + وديمه + نوره : ليييييييييييييييييييش

مبارك وهو يضحك : نحن الا بنروح الجبره نشتري سمان البيت وبنرد ،،، يعني ما بنظهر برا العين ،،،

وديمه : ابووووووووووووووووووووووووي

مبارك : هاه بوي

وديمه : دخيلك ظهرنا

مبارك : دخيلج ما بظهرج ،،،

عويش : ليش ؟

مبارك : لاني يوم الخميس مشغول

نوره : انزين الاربعاء ولا الثلاثاء ولا الاثنين

مبارك : نو ،،، ما شي مجال لنقاش

عويش : ابوي فديتك بس هالمره

ومبارك يبا يلعب بعصابهم لانه في خاطره ميت ضحك عليهن ويدعي ربه انه ما يحرمه من حسهن

مبارك : بفكر

نوره : عاش بوعلي

مبارك : لا خلاص ما بفكر اخافكن تحلمن زياده

وديمه خلاص ما نبا نظهر وقامت ظهرت من الصاله وراحت الحجره ،،،

امنه : حرام عليك يا مبارك ظهرهن ،،، هو الا يوم

قام مبارك وراح الحجره عند وديمه ولحقته عويش ونوره وامنه راحت تشوف شما اذا قامت ،،،

مبارك دخل الحجره ولقى وديمه اتصيح وعاطيه ظهرها لباب ،،، تلوم مبارك لانه زودها ،،، بس هو في خاطره بيظهرهن بس كان يبا يلعب بعصابهم ،،،

راح مبارك وحط ايده على عيون وديمه ،،،

وديمه : نوره مب فايقتلج ،،،

وحاولت تخوز ايد ابوها بس ما قدرت

وديمه وهيه على بالها ان نوره هيه اللي مسكره على عيونها ،،،

وديمه وهيه معصبه : يا حيوانه عيوني راحت

ومبارك مصر ما يخوز ايده ،،، قامت وديمه تتحسس عدالها تبا تمسك شي عشان تضرب فيه نوره اللي تتحسبها انها هيه مسكره على عينها ،،،

حست وديمه ان كتاب عدالها شلته ومسكته بيدينها وردت ايدنها على ورا ويت الضربه على راس مبارك ،،،

مبارك بطل عن عينها وصرخ ،،، وديمه لفت على وراها وهيه منصدمه ما توقعت ان ابوها هو اللي مسكر على عينها ،،،

مبارك : هب هينه ،،، كنت ياي اراضيج وناوي اشلكم دبي يوم الخميس بس الضربه غيرت رايي ،،،

وراح مبارك يبا يظهر ،،، بس ما لحق يظهر لان وديمه وعويش ونوره مسكنه ،،،

وديمه وهيه تحب ابوها على راسه وخده : والله سامحني كنت اتحراك نوره

مبارك مخلي عمره زعلاان ،،،

عويش : ابوي فديتك طلعنا

نوره وبدلع : ابووووووووووي دخيلك

وتمن يحبن ابوهن ،،، ويت امنه وهيه شاله شموه

امنه : هذا كله لبوكن وانا مالي شي

نوره : صبري يوم بيوافق بنخوز عنه

مبارك : عيل ما بوافق

وديمه تضرب نوره : لا ما تقصد

شموه وهيه تروح عند ابوها ،،،

مبارك : خوزو عن القمر ،،،

عويش تشل شموه قبل ما توصل عند ابوها

عويش : تباها وافق ،،، وحده بوحده

مبارك وهو يضحك : عمري كله للقمر ،،، هاتيها

عويش : الله يطول بعمرك ،،، نبا الموافقه

مبارك : فالكن طيب

والبنات وهن مستانسات : ياااااااااااااااي بنظهر

مبارك وهو يحب شموه : فديت شموتي

شما تمت تلعب بويه ابوها وهو مستانس وتمط سفرته وتشرد عنه ،،، قام يحط على النغمات من تلفونه وشموه اول ما تسمعهن اتي تركض صوبه ويمسكها وتم يلعب ويا شموه ،،،

اليوم الثاني ،،،الساعه 11 الصبح ،،، قامت عويش وراحت تصلي ووعت اخوانها ،،، وصلوا وطلعوا كلهم الصاله ،،،

امنه : صح النوم ،،، لو ما قمتوا ،،،

اخو امنه ( خال لعيال ) : خليهم اجازه ،،، شو يقومهم من الصبح ،،،

يوا لعيال وسلموا على خالهم محمد اللي اكبر من علي اخوهم بسنتين ومب معرس ،،،

عويش : فديت خالي اللي يفهمنا ،،،

حمدان : وين الريوق ؟؟؟

امنه : وديمه روحي خلي الخدامه تحط الريوق وتيبه الصاله تتريقون

عويش تصاصر خالها : تعال نروح الحجره

محمد : شو عندج ،،، لا تقولين كتب يداد ،،، ترا لاعت جبدي ،،، بصراحه ما تعرفين تشترين كتب حلوه ،،،

عويش : انزين مب كتب ،،، تعال وبخبرك

محمد : بروح ربع ساعه حجرة عويش اشوف شو اشترت من الكتب وبرد ،،،

امنه : لا تبطي ،،، عشان تتريق ويا لعيال

محمد : ان شاء الله

وتمطه عويش وتوديه حجرتها ،،،

محمد : قولي شو عندج ؟

عويش : بطلبك طلبه قولي تم

محمد : لازم اعرف شو تبين ،،، يمكن ما اقدر اسويه

عويش : بتقدر

محمد : انزين قولي ،،،

عويش وهيه متردده : اباك توديني عند المعوقيين

محمد : شوووووووووووووووه ،،، انتي تخبلتي ،،، تبين ابوج يذبحني ؟

عويش ودموع في عينها عقب ما شافت رفض خالها وخوفه من غضب ابوها ،،،

عويش : دخيلك ،،، والله خاطري اروح اشوف شقايل يعلمونهم وشقايل يلعبون وابا ارمسهم ابا اكون قريبه منهم لو ساعه

محمد : مستحيل يا عويش ،،،

عويش وخلاص ما قدرت تمسك دموعها : دخيل يدوه وغلاتها عندك بس ساعه ما بنطول

محمد : يا عويش انتي ما تعرفين ابوج ،،، ابوج لو درا بيذبحج ،،، لانج بتذكرينه بالماضي اللي يحاول ينساه ،،،

عويش : ما بيدري ،،، حتى امي ما بنخبرها ،،، بنقولها ان بنروح السوق نشتري كتب ،،،

محمد : اخاف ابوج يدري ونكون سبب في انه يتذكر الماضي وهذا الشي بيضر امج وبيتم طول الوقت معصب عليكم

عويش : منوه بيخبره ؟

محمد وهو متردد : ما ادري ،،، امج بتزعل لو درت

وديمه : احم احم

عويش مسحت دموعها : شو تبين الدومي

وديمه : امي تقولكم تعالوا عشان نتريق ،،،

محمد : خذيني ودوم وياج ،،،

عويش تشوف خالها وهي تترجاه بنظرة عيونها ،،،

محمد يكلم وديمه : ودوم سبقينا ونحن بنلحقج

وديمه : لا تتأخرون

محمد : اوكيك يا حلو

محمد : عويش انسي السالفه

عويش : مستحيل ،،، وانا قلت ساعه مب يوم ومحد بيدري

محمد : مصره

عويش وهيه حاسه انه خالها بيوافق : هيه ،،، وتأكد انه محد بيدري ،،، وعمري ما بنسالك هالشي ،،،

محمد : خلاص يوم الاربعاء الصبح بخطف عليج ،،، وانتي خبري امج ان بنروح المكتبه ،،،

عويش وهيه مستانسه : فالك طيب

ظهرت عويش ويا خالها عشان يتريقون ،،،

الكاتب: ! بنت الخيال ! انقر هنا لمراسلة ! بنت الخيال ! أنقر هنا للإنتقال إلى موقع ! بنت الخيال ! إضافة للمفضلة إضافة لمفضلة Google إضافة لمفضلة Delicious إضافة لمفضلة Digg إضافة لمفضلة Facebook
خيارات القصة :  ارسل القصة لصديقك   طباعة القصة   حفظ القصة كملف Word   حفظ القصة كملف PDF



 

مكتبة الصور

مكتبة الصوتيات

مكتبة البطاقات

مكتبة الأخبار

مكتبة الفيديو

مكتبة الفلاشيات

مكتبة الجوال ألعاب الجوال نغمات الحمية والرجيم موسوعة الاعشاب تطوير الذات
ديوان الشعر عالم الجنس عالم المرأة الأذكار شرح البرامج

قنوات فضائية

الأدعية الصحيحة المنتديات مكتبة القصص موسوعة الطبخ

مجلة قصيمي نت

موسوعة الكتب