منتدى السواليف والضحك

العاب يوتيوب تلفزيون الحوادث والجريمة منتدى قصة وقصيدة منتدى القصص والروايات

 

العاب بنات

يوتيوب

قناة بث مباشر

games

 


قصص » قصص طريفة » رحله فتيات الى امريكا

 رحله فتيات الى امريكا  أضيف في: 13-5-1427هـ

@ رحله فتيات الى امريكا @

في يوم من أيام الدراسه التعيسه كنت جايه المدرسه وعلى وجهي علامات الملل والطفش،، وقاعده انتظر في الفصل متى بتجي الشله المرحه،وطبعاً كالعاده أنا أول وحده تجي من الشله لأن بيتي قريب.....

وأنا قاعده في الفصل وشوي الا صوت واحد قاعد يغني وطربان حده..وكنه يغني((نحمد الله))

أكيد عرفتوها ما غيرها الأغنيه الوطنيه..وأنا الصراحه ركبني الخوف من رأسي لساسي...

وقمت اسمي واتعوذ من ابليس وقاعده اقرأ قرآن..مدري وش قريت من الخرعه اختبصت الحروف في بعضها،وتوني بنحاش من الباب الا((ليدي والمهستره))طالعين بوجهي وصرخت عليهم وخرعتهم وياي..قلت:الحمد لله أنكم جيتوا،ليش تأخرتوا؟!

قالوا:ليه وش فيك اليوم،حنا كل يوم نتأخر قالت المهستره وهي "تستهزء":السنه على وشك أنها تنتهي ولا تعودتي على تأخيرنا....

قلت:الا اليوم في الفصل شئ غريب وتوني بكمل السالفه الا بقيه الشله داخلين علينا وهم:

((هيوش والمقروده والأموره))جايات في باص واحد كعادتهم..

الزبده علمتهم السالفه وقاموا يضحكون علي..وتقولي هيوش:تعوذي من ابليس يابنت أبوها أكيد هذا تاثير السهر ولا الفيلم الأجنبي اللي شفتيه أمس مأثر فيك..

قلت:لا،،والله أني ما اكذب عليكم...ولما كانوا يتطنزون وكل وحده تقط علي كلمه ... وفجأأأأأأأأأأأأأأأأأأأأأأأأأأأأأأأأأأأأأأأأأأأأأأأأأأة

رجع الصوت مره ثانيه وكان يغني((لرابح صقر))..ويغني"يا دار لا هنتي ولا هان راعيك"..

وهم كل وحده تطالع الثانيه ولفوا علي على بالهم جايبه رادو جدتي وقاعده اسوي فيهم مقلب..وأنا من زود الخرعه متعلقه بزنود((المقروده))لأنها ماشاء الله عليها جثه كله عشان ""تفزعلي"" وأنا عندها مثل النمله....المهم أنا من صدق المقول قلت:شفتوا ياكلاب لندن،صدقتوا الحين..

قالت ليدي:أكيد أنه راديو ولا مسجل....قالت المقروده:الله وناسه يالله خلونا نرقص ونهستر..

قالت الأموره:الله ياذا الراديو اللي يشتغل ويطفي على كيفه..

أما الباقي سكتوا دروا أن فيه بلاء في السالفه...قالت هيوش"الدافوره":هذا مش وقت مزاح خلونا نطلع من الفصل ليحطونها فينا ويقولون جايبين معكم مسجل..وتعهدات ويكلمون أهالينا على شئ ماسويناه...

قالت الأموره:لا،،لا،،يا أغبياء - يعني عاد هي الذكيه- خلونا نتبع الصوت ونشوف وش مصدره..

قالت المهستره:مصدر ولا مفعول به "وهي تضحك"....((الا كل البنات قبوا فيها وكل وحده تهزئها))...أنا انقهرت منها وقلت: صدق أنك فاضيه أحر ما عندنا أبرد ما عندك...قالت المهستره:خلاص ياكلمه ارجعي مكانك..اعوذ بالله يعني ماعاد نضحك...

المهم قعدنا شوي نستوعب الموقف وبعدين تبعنا الصوت الا هو في أخر الفصل من صوب الدولايب..توزعنا كل وحده تدور في دولاب ولا لقينا شي غير- ابريق محلي - كلنا استغربنا الصوت كان طالع منه..

قالت هيوش:اسمعوا يابنات اذا طلعوا بنات الفصل للطابور نأخذ الأبريق ونشوف وش سالفته..

قالت المهستره:أي والله صادقه عشان محد يعلم علينا خبركم بنات فصلنا وكاله آنباء احسن من((CNN))..

قالت ليدي:والله مافيني صبر انتظر خلونا الحين نشوف وش السالفه..قلت:أنا رأيي من رأي هيوش..وأحنا ترى مش ناقصين مشاكل..

المهم قعدنا في الفصل ونفذنا الخطه وكل وحده تشغل نفسها بأي شئ،اللي تحل الواجب واللي ماسكه كتاب يعننها بتذاكر على آخر السنه،واللي ماسكه مرايا وتتكشخ وعلى ذا الحال..

بنات الفصل استغربوا مش من عوايدنا نجلس في الفصل هادين..دايماً أول مانجتمع الصباح ندّوج في أسياب المدرسه ونتلقف على هاذي و ذيك...واللي فيها حره من وحده تبي تكفخها نفزع لها.. أما بنات الفصل يسألون وش عندكم جالسين في الفصل؟؟!! أكيد مسوين شئ وما تبون أحد يمسكم..والا ناوين على شئ ..((أنا وخوياتي اشتغلنا أعذار عالبنات اللي تقول نبي ننجح واللي تقول نبي نسبه واللي تقول زهق بره---------------------------------ألخ))

وأخيراً: دق الجرس بس والله أن بنات الفصل عله ماطلعوا ألا بعد مانشفوا حلوقنا اللي تحل واجب واللي تذاكر واللي تكشخ كنها رايحه عرس..المهم يوم طلعوا بقت وحده"نشبه"تقول تعبانه ماني نازله....تشلخ!!مافيها الا العافيه بس كنها حاسه أن حنا بنسوي شئ وماتبيه يفوتها.. الزبده قعدنا نفكر وسوينا خطه((أنما أيه)) على قولت أخوانا المصريين..

قامت المهستره وطلعت برى الفصل وقعدت شوي وبعدها دخلت علينا..قالت للبنت اليوم المديره بتكرم البنات المتفوقات أكيد أنتي منهم لأنك ماشاء الله عليك متفوقه..المهستره قالت كذا ولا ماقالته الا البنت نقزت من الفرحه كنها ثور هايج تركض للطابور..قلت:الله وأكبر على التعبانه.. قالت المقروده:والله أنا التعبانه مش هي..قالت هيوش: أكيد أنا مع المتفوقات...

والله الأخت واثقه بزياده......

المهم وبعد عناء طويل ضفوا بنات الفصل ولا بقى غيرنا أحد قالت الأموره:يالله نفتح الدولاب ونشوف سالفه الأبريق...وحنا كل وحده تقول أنا مراح امسكه المهم تجمعت الأراء وقالوا أنتي يا((بنت ابوها)) بايعه الدنيا يالله روحي جيبي الأبريق..وأنا مسويه نفسي قويه عليهم وأنا من داخلي ميته من الخوف..قلت: تعالوا معاي لعند الدولاب وأنا بطلعه لكم..قالت المهستره:لا لا...لا يكون خايفه...............قلت :تهبين((مش بنت أبوها اللي تخاف من شئ سخيف))..قالت ليدي:أجل روحي لحالك.....الحين توهقت مدري وش أقول بس عزيت نفسي وكابرت وقلت:عادي أروح لحالي أحسن ماأخذ معاي بنات خوافات...قالت هيوش:لوسمحتي لا تعممين اصلاً أنا مش خايفه(تكابر) وعادي بروح معاك..قالت الأموره: وأنا بعد مش خايفه وبروح معاكم..المهم كلهم قرروا يجون معاي.. المهم رحنا ولما قربنا من الدولاب زاد الصوت وكأنا قاعدين في عرس..تشجعت وفتحت الدولاب وطلعت الأبريق وقعدت أطالعه الصراحه ذكرني بأبريق كان عند جدي ومحتفظ فيه لأنه على قولته يذكره بطفولته"الله يالخيره"..الأبريق كان مليان غبره وبصراحه كان مسوي صجه في الفصل المهم قعدت انفض الأبريق من الغبار...الا دخان كثيريطلع منه.......والبنات يصارخون علي يبوني اوقف النفض...قالت المقروده:حرام عليك هيضتي علي حسسيتي.......وأنا أقول لهم الله يلعنكم هذا مش غبار ذا الدخان طالع من الأبريق يالهنود...كلهم تصنموا يطالعوني وأنا من الخرعه قطيت الأبريق على الأرض وأنخشيت"تخبيت" وراء البنات...والدخان كل ماله يزيد...والفصل فجأه ظلم علينا وزادت الرهبه في قلوبنا كلنا..اللي تكح واللي تعاطس واللي جاها الربو المهم حالتنا حاله..وشوي وسط الظلام والدخان كان فيه عيون تلامص"يعني تلمع" وبدأ الدخان يخف شوي ومع خفت الدخان الا ذاك الرجال الأسود وشواربه تقولون شوارب الوجه اللي على"برينجلز"ولابس له ثوب وغتره والعقال مايل"متكشخ"وشكله قروي مررررررره...وكلنا بصرخه وحده(يماااااااااااااااااااااااااااااااااااااااااااااااااااااااااااااااااااااااااااااااه)..قال:وجع يا قليلات الأدب وش يصارخ بكم...قالت الأموره:من أنت "وهي تتراجف من الخوف"...قال:لا والله"يعني ماتعرفين".......قالت المهستره:لا والله ما نعرف من أنت..قالت ليدي:وش شايفنا عباقره ذا الزمن.....قال:يمكن أنتم ماتعرفون بس ذي تعرف"يأشرعلي" "بنت أبوها"....................قلت:أنا ياكذبك والله أنك عبداً صلوخ"كذوب"....قال:مش أنتي اللي نفضتي الغبارعن الأبريق........قلت:ايه كنت انظفه ولا حرام بعد....قال:خلاص أجل...أنا المارد اللي فيه وأنتي ناديتيني...قالت هيوش:يعني زي المارد اللي مع علاء الدين...قال:ايه ولا مش مالي عيونكم.....قالت هيوش:الا مالي عيوننا ونص بعد...قالت المقروده:وراك مهتمل بنفسك وليش ماتكشخ زين أحسن من كشختك ذي يعني تلبس بنطلون وتيشيرت وتقص فرزاتشي وتسوي حركتات....قال:ليه شايفتني من شباب الراشد المخمه أصلاً تدرون أن هذا الثوب والغتره من عصر الملك عبدالعزيز-الله يرحمه- وارثه أباً عن جد........قالت المهستره:عز الله ماورثت خير....قلت أنا: هيه أنت الحين بتجي الأبله والبنات بعد.. وأنت قاعد وحوليك الوردات....قام يضحك والأبتسامه شاقه وجهه.......قلت:لوسمحت أدخل في أبريقك لا تسوي لنا مشكله مع المدرسه ترى بلاوينا كثرت....قالت ليدي:وش رأيك تفسح معنا بعد أحسن ياالله ضف وجهك.....قال:أفا والله ماهقيتها منكم بس عنادٍ فيكم مراح أروح لين تطلبون لكم طلب وااااااااحد بس..قالت الأموره:وبتنفذه الحين.......قال:وش رأيك بعد،أخلصوا أطلبوا ولا ترى بهون...قلنا:طيب وقعدنا نتشاور وحنا قاعدين نفكر ونتناقش..قام المارد وطلع دلته وفناجيله اللي معفنه وطبعاً أكيد معها الربابه..وقام يشب الحطب..."ومن حسن الحظ جرس الأنذار كان معطل والله لو درت عنه ارامكو كان شبت فوق رأسه"لان حنا ندرس في مدرسه لارامكو وعلى خبركم مدارس ارامكو اللي بالظهران شديده الحرص على الصيانه"...المهم قام يتقهوى ويغني أغاني من زمن جدي مغبره مررررررره مدري من وين مطلعها...المهم وحنا قاعدين نفكر اللي تبي فلوس واللي تبي تزوج واللي تبي تصير مشهوره........قلت أنا:يا بنات وش رأيكم نطلب طلب يبقى ذكرى بينا ترى الفلوس والشهره ماراح يدومون لكم وحتى الزواج بعد أما الذكرى تبقى معنا طول حياتنا كل ماتذكرناها نفرح بها ونستانس أكثر.....قالت هيوش: والله منتي بهينه وش ذي الفلسفه الحلوه،طيب مثل ايش...قالت المقروده:مثل نروح أمريكا.........قلت أنا:وناسه نروح نهستر ونستانس على كيفنا..وحنا قاعدين ناقش الموضوع كان هو مسوي صجه وازعاج بهالربابه..قالت الأموره: ياأخي اسكت شوي خلنا نفكر زين.......تصدقون سكت المارد يحليله والله مطيع.....وبعد شوي قعدت اطالع المارد وهو يتقهوى وقلت للبنات:بنات شوفوا سواد العبد كأنه ليلاً أسود...... قام ولف علي وقال:ولا أنتي قماري.....قاموا البنات يصارخون ويضحكون ويقولون كيف سمع والله مارد ماعليه شرهه.....قالت ليدي"موطيه صوتها":آصلاً شوفوا أذنه كأنها أذن حمار كيف ماتبونه يسمع........وهو قاعد يناظرها"نظره استهزاء" وقال لا يالغزال أنتي.....عصبت ليدي علينا لان قمنا نضحك عليها وبوزت براطمها من التعصيبه..............قال المارد:"الهمام" أخلصوا علي ترى ماني فاضي لكم عندي اشغال كثيره عجلوا علي.........قالت المقروده:والله مارد خطير عنده اشغال بعد قعدنا دقايق وحنا نفكر في قضيه روحتنا لامريكا وكل مانطالعه وهو يحرك شنباته وهو يقول"الهماااااام خلصوني"..............المهم قررنا نروح أمريكا........قال يا الله غمضوا عيونكم وفي خمس دقايق تكونون في أمريكا.............قالت المهستره:لحظه لحظه بروح أجيب عباتي...قلنا:ليييييش....قالت المهستره:والله مايشوفني أبوي الا يطخني بالفرد اللي عنده.......قالت الأموره:بلا غباء حنا بنروح أمريكا مش سوق الحراج يعني لا أبوك ولا أخوك ولا قبيلتكم كلها بتكون هناك......قالت هيوش:بس يا بنات لا تنسون أن الله سبحانه وتعالى يراقبنا في أي مكان نكون فيه.......قلنا: والله أنك صادقه.....المهم كل وحده خذت عباتها واللي خذت معاها قفازاتها بعد،ويوم جينا عند المارد قال:خيييييييييييييير انشاء الله جايبين عباياتكم معكم أنا يا الله أشيلكم ياالسته على ظهري تبون بعد عباياتكم معكم.....قلت أنا: الله،يعني عباياتنا بتثقل عليك عطنا غيرها.....قال: والله هاه شوفوني حلفت أني ما أوديكم الا لين تحذفون عباياتكم قالت ليدي:حذف ربي رأسك يالقروى......قال:شوفي أنتي "يقصد ليدي"ترى بخليك تنثبرين اذا طولتي لسانك علي مره ثانيه سمعتي......ليدي من غير نفس قالت: ايه سمعت.....المهم نزلنا عباياتنا ورجعنا له........قال: يالله غمضوا عيونكم واللي بتفتح عيونها ترى ياويلها مني"يهددنا".........غمضنا عيونا وطولنا وحنا مغمضين .........قلت: يالله ياأخي بسرعه عورتني عيوني........قال: خلي الملاعين اللي وراك يغمضون عيونهم وبعدين أوديكم......يوم لفيت عالبنات الا((ليدي والمقروده والأموره))فاتحين عين ومصكرين الثانيه يبغون يشوفون كيف بنروح لامريكا.....قلت:بنات وجع غمضوا زين علشان يودينا أمريكا والله ماني مصدقه أني بروح لها والا ترى بنروح ونخليكم....قالوا ثلاثتهم:لا لا خلاص بنغمض زين.....وصكرنا كلنا عيوننا وشوي خبط ولزق الا وحنا في أمريكا......ما سمعنا الا صوت المارد يضحك علينا وقال:يله ياأغبياء أفتحوا عيونكم.........الكل فتح عيونه وكان بالفعل حنا في أمريكا بس الصراحه كانت أشكالنا غلط بهالمرايل المعفنه وكل واحد يمر علينا يطالعنا بتعجب(((لعنبوا لايمه)))أكيد يحسبنا من العصر الحجري واللي زاد الطين بله أن المارد القروي صاف جنبنا يعني حنا ياالله ننبلع جاي هو يكمل بعد......أنا والبنات تصنمنا من زود الصدمه وماتوقعنا أن السالفه بتصير صدق.......

وشوي قام المارد يطالعنا وقال:وش بلاكم أول مره تشوفون ديره زي امريكا والله شكلكم بنات فقر أول مره تسافرون......قالت المقروده:شوفوا عاد من يتكلم يعني تبي تقول أنك قد رحت امريكا من قبل.....قال:اصلاً توني قبل أمس متغدي مع بوش دبل يو.......قالت ليدي:الله يا "دبل يو" طيب وش كان غداكم؟! لا تقول مفطح...قمنا عاد حنا نضحك ونتلفت عليه....

قالت الأموره:بصراحه أنا أول مره أشوف مارد،لا بعد مش أي مارد راعي صواريخ ....

قال: والله بكيفكم تصدقون ولا أنقلعوا المهم بعد ثلاث أيام بنلتقي علشان أرجعكم.......قلت:يا أخي خلها أسبوع...قال:ليه تحسبوني فاضي تراني مشغوووووول لقمة راسي....قالت هيوش:ليه معزوم على غداء بعد....

قالت المهستره:لا يكون غدى عند شارون......قعدنا نتطنز عليه وهو ناقد علينا يطالعنا بنص عيييييييين.....

قال:تطنزوا بوريكم يالملاعين هين هين......قالت المهستره:هيه أنت أنا برجع معاك مقدر أنام بره بيتنا.......

قال: أولاً"أنا مش أسمي هيه"ثانياً أنقلعي دبري عمرك أنا ماني مكلفٍ فيك تبين ترجعين أركبي الطياره وأرجعي بيتك......قالت ليدي:يعني أنت عندك أسم ثاني غير المارد.....

قال:ايه،وش تحسبوني مالي أصل..أصلاً أبوي ذابح لي ذبيحتين ومسميني بعد مش زيكم ذبيحه وتخب عليكم بعد....

قلت:طيب وش أسمك....قال:أسمي"قرباع"....هو قال أسمه ولا ماقال فقعت أنا و البنات ضحك عليه نحسبه يمزح ما درينا أنه من جده.....هو أنهبل من أشكالنا وعصب علينا

قامت"المقروده" ترقع السالفه بعد ماحست أنه يتكلم من جد وتقول:والنعم والله هذي الأسامي ولا بلاش....المارد"قرباع"تشقق من الوناسه وهو يقول:ماعليك زود هذي الناس اللي تفهم مش المهبل اللي معك.....

قال:ياالله أنا رايح اللحين....قالت:هيوش:تعال يا"قرباع" وين بتروح وتخلينا حنا ما معانا فلوس علشان نأكل ونشتري لنا ملابس و علشان بعد ندور لنا بيت نسكن فيه....

قال:والله أنت ذكيه فكرت بالفلوس والخبلان اللي وراك من الفرحه ماطرت عليهم الفلوس

والصراحه حتى أنا ما طرت علي أنكم تحتاجون فلوس...قلت أنا:لا تكفى لازم تعطينا فلوس أمريكيه علشان ندبر أنفسنا.....قال:أسمها دولارات...

قلت أنا:ايه،المهم بس تكون فلوس....

والله وعطانا هبرة فلوس......قالت الأموره:أنا أشهد أنك رجال شهم،قام هو يتفتل بشواربه

اللي تقولين كنها حطب - يابسه من الوسخ-....المهم انقلع وضف وجهه.....

قالت المهستره:أول شئ نسويه خلونا نروح نغير ملابسنا....قلنا:يا الله -عاد أحنا مع الخيل يا شقراء-...

عاد((ليدي وهيوش)) هم المترجمين لنا لان حنا بصراحه ما ندبر في العنجليزي ولا شئ.... وقعدنا نتمشى في امريكا ونسرح ونمرح وقمنا ودخلنا ذاك المحل اللي والله شكله كشخه وغيرنا ملابسنا المعفنه بس والله اشكالناغلط مهما لبسنا..... بعدين قامت ((هيوش وليدي))يبربرون عنجليزي مدري انجليزي مع الأمريكان واحنا مثل الأطرش في الزفه ... بصراحه والله أنهم أذكياء بربروا عنجليزي ألين ماعرفوا مكان شقه نمسي فيها........ المهم استاجرنا ذيك الشقه اللي والله مش شينه علشان الفندق يبيله فلوس كثيره وحنا فليساتنا يا الله تكفينا..... وأبو متيح "قرباع"ما عطانا الا شوي ... وفي أول يوم لنا في الشقه وزعنا الشغل بيننا يعني التنظيف على((الأموره وهيوش)).....والطبخ علي((أنا والمقروده)).....أما غسيل الحمامات على((ليدي والمهستره))ياحرام بصراحه يكسرون الخاطر بس ما لنا ذنب هذي القرعه حظ ونصيب...ومن الفرحه علشان حنا في امريكا قعدنا يومين ماطب النوم في عيوننا وش علينا على قولت قرباع:بنات فقر ماشفنا خير....قلت أنا:يا بنات كلها ثلاث أيام ونرجع لديرتنا خلونا نستانس ولا نخلي شارع ما ندج فيه والله ما صدقوا خبر،ونطلع كلنا وحنا نتمشى وشفنا ذاك الكازينو......قالت هيوش:خلونا ندخله ونتفرج....قالت المهستره:ليش شايفته محل ملابس....قالت المقروده:أنا خايفه ومراح أدخل......وقالت الأموره:أنا معك مراح أدخل....قالت ليدي:وش فيكم مكبرين السالفه خلونا ندخل ونشوف وش فيه أن أعجبنا والا طلعنا.....قالت هيوش:يعني نرقص ونغني،،قلت"أنا"بدخل واللي تبي تدخل تجي وراي وش علي على قولتكم "بايعه الدنيا".......والله ولا علينا دخلنا وقعدنا وأحنا مسكرين خشومنا علشان ريحه الوسكي اللي يتسكبونه"جعل يوسكهم السلال"...وكان فيه مغنيه قاعده تغني أغنيه ترفع الضغط وتجيب الهم...الأغنيه هاديه مرررررررررررررره تقولون قاعده ترقد لها بزران....المهم رقدتنا خصوصاً أن حنا لنا يومين مارقدنا وكل ما التفت على وحده من البنات الا هي تتثاوب من النوم عاد أنا ما أبي أنام علشان وراي مشاوير توني ماجيت ربع أمريكا قعدت أقوم البنات وكل وحده تقول:وش تبين..قلت:يا الله قوموا تنشطوا...قالوا:بس هذا اللي تبينه.... قلت:لا أنا بروح ارقص من اللي بترقص معاي....وكل وحده فاتحه فمها اللي وش كبره من كثر التثاوب.....قالت الأموره:أنا برقص معك بس ما فيه أغنيه ترقص لراشد ولا نبيل والا الجسمي....قالت المهستره:أنا ما أعرف أرقص بس صوتي حلو بغني لكم أغنيه ترقص....قالوا((ليدي وهيوش)):وأحنا بعد بنرقص معكم...قالت المقروده:طيب أنا وش أسوي قلت:أنتي ما عليك الا أنك تشيلين ذا البلاء اللي ازعجتنا و تحذفينها بره.....قالت المقروده:يعني أصير مثل"بُدي قارد"لكم،،،قلت:يعني علشان تعرفين أن خوياتك شخصيات هامه....قالت المقروده:تكفون والله محد درى عنكم..... المهم نفذنا اللي في رؤسنا وقعدنا نغني أغاني مقطنه مرررررره"ما حنا بعيدين من قرباع" مثل((يا سلامي عليكم يالسعوديه))واللي ترقص واللي تدق رقبه واللي تلفح بشعرها.....والله مابقى "مودمي"- يعني شخص- في ذا الشارع الا ماجاء....ومن خبالنا ربّحنا راعي الكازينو وقام اتفق معانا علشان نجيه بكره ونغني في الكازينو ويعطينا ذيك الفلوس مقدم"يعني عربون"عاد حنا من الفرحه ما صدقنا وافقنا على طول.......قالت ليدي:ياأغبياء الحين بنشتهر ويوصل الخبر لأهالينا في السعوديه...قالت المقروده:والله أن شافني أخوي أن يذبحني......قالت هيوش:يا أغبياء بكره بيجي المارد وبيأخذنا وبنروح السعوديه يعني لا من شاف ولا من درى.........قالت الأموره:طيب وأذا طلعت صورنا..قالت المهستره:عادي بنقول ناس يشبهونا.........قالت المهستره:أصلاً وش جاب صورنا في المجلات السعوديه واذا افترضنا أنها بتجي ماراح تجي الا في المجلات الأجنبيه وأنتم خابرين أهالينا حَدهم مجله فواصل وأن أكشخوا أشتروا زهره الخليج"من المحيط الى الخليج".....المهم جاء اليوم الثاني وهو أخر يوم لنا في امريكا..رحنا للكازينو ويوم دخلنا الكازينو الا والله ما بقى أحد فيه سر أعربي الا ماجاء وقعدنا نغني مصري على لبناني على سعودي على كويتي حتى العراقي غنيناه لابعد السوداني ما خليناه"البنبو السوداني بنبو"....المهم ما خلينا شئ ماغنيناه والناس رقص ودنيا وما خلصنا الا الفجر وكل وحده بلاعيمها طايحه من الغناء ورحنا لشقتنا وعلى طول حطينا روؤسنا ورقدنا وجاءت الساعه"6 الصباح" الا جرس الشقه يدق ولا وحده من البنات قامت تفتح الباب كلهم دايخين...والجرس نرفزني ما عرفت أنام منه وأقوم من النوم وأنا معصبه"نفسي برأس خشمي"وتوني فاتحه الباب الا ذاك الشي الطويل اللي شل خشمي معه....وأطالعه زين الا هو""""""ميكرفون"""""""كانوا الصحفيين عند الباب يصورون ويتكلمون عاد أنا مافهمت ولا شئ من اللي يقولونه لأنهم يرطنون "يتكلمون"انجليزي....وأقوم أصكر الباب بسرعه وروح وأقيم البنات وأقول ((يا ويلنا ويلاه عز الله أنفضحنا...عز الله تعلقت أرقابنا في المشانق....قوووموا يابنات شوفوا وش صار)))البنات قاموا مختلعين على صياحي كملت لهم السالفه الين ما استوعبوا....وكل وحده خايفه ماتدري وش تسوي...قلت أنا:اسكتوا ولا تطلعون صوت علشان يروحون قعدنا عشر دقايق نتسمع عند الباب ما سمعنا شئ....قالت المقروده:روحي يا بنت أبوها طلي من عند الباب شكلهم راحوا...جيت أمشي بهدوء وأطل من العين السحريه اللي في الباب وشوي ألا صوروا عيني بسررررررعه عاد تخيلوا شكل عيوني مطبقه من النوم وتقوم"المقروده"تبي تصكر الدريشه الا ظلها جاء عالجدار ويصورونه....ويصورون أي أي شئ يتحرك..أنا والبنات تبطحنا علشان مايلقطون أشكالنا اللي زي وجيهنا....المهم ذاك اليوم ماطلعنا من الشقه لأنهم مسنترين عند باب شقتنا وحتى عند بوابه العماره...قالت المهستره:وش نسوي والمارد قرباع للحين ما جاء....قالت الأموره: صدق وش فيه"قرباع"ما جاء يأخذنا...قالت ليدي:أكيد أنه مضيع الدرب....قالت هيوش:والله حنا اللي نضيع الدرب...يا حبيبتي هذا مارد يعني يعرف العالم كله وأكيد أنه ما خلى ديره الا ما زارها...جاء اليوم الثاني واحنا في الشقه محبوسين الا المجله مدخلينها علينا من تحت الباب.....وتقوم ليدي تركض وتجيب المجله وتفتحها تفرج فيها وأقوم واضرب بعيني على زاوية المجله الا عيني اللي صوروها واقعد اصارخ شوفوا عيني يا بنات صوروها...قالت المقروده:حتى ظلي اللي على الجدار صوروه....قالت الأموره:امريكا مش صاحيه حتى الظل اللي على الجدار صوروه...قلت أنا:جعلهم السلال حتى عيني يوم أني اطل من العين السحريه صوروها- ياليتني كنت مكحلتها كان تهون محد بيعرفها-قالت المهستره:يا اختي محد يعرفكم((ذي ظل وأنتي عين)) والله مايعرفونكم...قالت المقروده:والله أنها صادقه...كملنا تفرِجنا للمجله الا المصيبه الكبرى صورنا كلنا وأحنا نرقص ونغني....قالت ليدي:ياسلام هذي فيها قص رقاب وقالت عطيني المجله وقعدت تقرأ العنوان الا مكتوب((فتيات عربيات يغنون في أمريكا))...حنا خفنا وكل وحده تفكر وش راح يسوون فيها أهلها اذا دروا...كلنا كنا على أعصابنا وكل وحده تقول للثانيه أبوك يهون ولا أبوي....المهم ويجينا ذاك الفاكس قلت:بنات غريبه جانا فاكس من اللي يدري أن حنا هنا...قالت المهستره:أكيد أنه من معجبين امريكان تعرفون الامريكيين ما يتخبى عليهم شئ....قمت لعند الفاكس اشوف من اللي مرسل لنا الا والله ذيك الأصابع الي تطلع من الفاكس وشوي الا ذراع أبوي وأنا واقفه من الصدمه الا و يد أبوي تعطيني ذاك الكف والبنات قاعدين يصارخون وبنفس الوقت يضحكون علي وبعدها عرفت أن أبوي ماقدر يجي لامريكا فقام ارسل يده بالفاكس السريع..وأذني من الكف القوي ورمت وانتفخت من الضربه....قالوا لي البنات:ياحظك يابنت أبوها بصراحه حنا نحسدك..قلت أنا:على ايش حاسديني لا يكون عالكف اللي جاني......قالوا:ايه،أنتي الحين افتكيتي وخلصتي ولا تحاتين شئ،الدور والباقي علينا احنا.....وتقوم"هيوش"تبي تصكر الدريشه لانه ذبحها البرد الا ذاك العقال الطاير ويكفخها على رقبتها أثر أبوها مرسل عقاله من السعوديه الى امريكا- نعنبوك عقال والله وسمها في رقبتها وسمه تقولون كأنه وسم البعارين.....قالت الأموره:أكيد أبوي ما درى ولا كان أول من يكفخني....وقلت: أنا وهيوش خلصنا من أهلنا أجل بنروح نجيب لكم أكل ....قالت المقروده:تكفون وأنتم جايين جيبوا معكم حبوب منومه علشان ترقدنا يعني من فرحتنا بامريكا وخوفنا من أهلنا ماخلونا نرقد غير كم ساعه...المهم أنا وهيوش طلعنا من الشقه...

((يا حي الدنيا حياه))ونروح السوبرماركت ونشتري لنا شئ يوكل على قدنا لان الفلوس على وشك تخلص....وفي طريق الرجعه مرينا الصيدليه وتقوم هيوش تتكلم مع راعي الصيدليه وقام يهز رأسه على اساس أنه فهم ويدخل داخل ويجيب ذيك العلبه ويعطيها لهيوش....كملنا الدرب ورحنا للشقه...دخلنا على البنات اللي كانت أشكالهم تكسر الخاطر من التفكير بأهلهم..حطينا الغدى وتغدينا وطلعت لهم الحبوب وقسموها بينهم اللي خذت حبيتين واللي ثلاث أنا وهيوش ماكلينا منها عشان العلبه خلصت والا ماكان قصرنا كان والله كملنا الطقم....قعدنا عالتلفزيون من عقب الغدى ونتابع فليم أجنبي الا الشعب اللي عندي كلهم قاموا يتراكضون والشقه قامت تهتز تقولين زلزال - اللهم يا كافي – وكلهم باتجاه واحد صوب الحمام أنا وهيوش انهبلنا وش بلاء العرب قاموا يتراكضون وأنا على بالي أنهم يتسابقون على شان يهضمون مادريت أن الخافي أعظم....التفتت هيوش علي وقالت:غرريبه وش فيهم أكيد أنه من الحبوب لان كلهم كلوا منها الا أنا وأنتي...وتقوم هيوش تقرأ النشره اللى جات مع الحبوب الا طلعت حبوب سهال -الله يكرمكم-وتخيلوا من الظهر ألين المغرب وكل شوي هواش على الحمام وأنا وهيوش قاعدين في زاويه الشقه متلثمين من الريحه اللي تصرع...وشوي الا الجرس يدق وتقوم هيوش تفتح الباب الا هم الجيران جايين يشتكون من الريحه و الأزعاج ويوم راحوا......قلت أنا لهيوش:عندي فكره وش رأيك نروح للصيدليه ونجيب حبوب توقف الأسهال حراااام أشكالهم تكسر الخاطر...والله ورحنا جبنا ذيك الحبوب اللي من كلتها الوحده هجدت مكانها من زود الراحه ويوم هداء الوضع كل وحده ما لها خلق للثانيه وكلهم يهزؤني ويقولون:أنتي السبب يالملعونه..أنتي اللي جبتيها...قلت أنا:أنقلعوا ذي هيوش هي اللي تكلمت مع راعي الصيدليه تعرفوني ما أدبر في الأنجليزي غير((هاااااااااي...وباااااااااي))......قالت الأموره:حصل خير...قالت المقروده:لا والله ما حصل خير سدينا بياره الشقه وتقولين حصل خير.......قالت ليدي:والله لا أروح"ألعن أبو"راعي الصيدليه أكيد أنه كان متعمد شافكم عربيات قال"خل استهبل عليهم".....قالوا باقي البنات:والله ما نفوت له السالفه لازم نروح ناخذ حقنا منه....المهم رحنا كلنا ودخلنا عليه((ليدي وهيوش))قاعدين يتفاهمون معه وأنا من وراهم أقول:الملعون وش يرطن عليكم.....قالت هيوش:شوفوا الملعون يقول أني أنا اللي طلبت هذي الحبوب....قالت المقروده:وخروا لوسمحتوا وتمسك الرجال من حلقه وتقول"ساعدوني"الا وتقوم الأموره وتفتح فمه والمهستره تكب حبوب مثل اللي كليناها في فمه وأنا اشربه الماء ألين أغمي عليه........قالت هيوش:طقوا يا مهبل ذبحتوا الرجال.....ونهرب كلنا ورجعنا لشقتنا....الا شوي وصوت الأسعاف ونطل من الدريشه الأسعاف شايله وهو منصرع....قلت أنا:يا حراااااااااااام.....قالوا البنات:لا والله لو أنتي اللي صايرلك كذا والله ما تسكتين له.......قلت أنا:لا...حبايبي أنا مش بقره كل ما هب و دب بلعته......المهم مضى باقي اليوم على خييييييييييييييييييييييير...وجاء اليوم الثاني و"قرباع" ما جاء ولا طل علينا....وقلت للبنات:خلونا ننزل للحديقه نتمشى وأنشاء الله نشوف"قرباع"في دربنا ونرجع لديرتنا... وبالفعل نزلنا للحديقه اللي جنب الشقه الا والله ذولاك البنتين واقفات لابسات مرايل مدرسه ياحراام شكلهم متروعات...ونقوم نقرب منهم الا هم من بنات فصلنا....سألناهم وش فيكم وكيف جيتوا؟؟؟!!...علمونا السالفه من طقق لا السلام عليكم ودرينا أن"قرباع"لعب عليهم مثل ما لعب علينا وجابهم لامريكا... ثم راح وخلاهم ونقوم أنا وخوياتي نأخذهم معنا ونضمهم لشلتنا وكل يوم نتنظر الملعون"قرباع" يتذكرنا ونرجع عقبها للديره......


*مع تحيات الكاتبه:

@ بنت أبوووووها القحطاني @

وترقبوا الجديد عن قريب....


الكاتب: بنت أبوها انقر هنا لمراسلة بنت أبوها أنقر هنا للإنتقال إلى موقع بنت أبوها إضافة للمفضلة إضافة لمفضلة Google إضافة لمفضلة Delicious إضافة لمفضلة Digg إضافة لمفضلة Facebook
خيارات القصة :  ارسل القصة لصديقك   طباعة القصة   حفظ القصة كملف Word   حفظ القصة كملف PDF



 

مكتبة الصور

مكتبة الصوتيات

مكتبة البطاقات

مكتبة الأخبار

مكتبة الفيديو

مكتبة الفلاشيات

مكتبة الجوال ألعاب الجوال نغمات الحمية والرجيم موسوعة الاعشاب تطوير الذات
ديوان الشعر عالم الجنس عالم المرأة الأذكار شرح البرامج

قنوات فضائية

الأدعية الصحيحة المنتديات مكتبة القصص موسوعة الطبخ

مجلة قصيمي نت

موسوعة الكتب