الليله هذي واضحه ليلة افراق = حاولت اعديها وعيّت تعدي
اظروف ماتنطاق ولا راح تنطاق = صد القدر ماهو بصدك وصدي
تعال خذني بين اياديك مشتاق = قبل انتفارق حط يدك بيدي
بجلس معك ساعه حبايب وعشاق = من بعدها كيفك ولو صرت ضدي
فيني خليط اشواق باشواق باشواق = واصل معك من كثرة الشوق حدي
ودي ألمك واحضنك حضنت عناق = ياشيب عيني كل ماقلت ودي
في خاطري ‍.. وش خاطري ؟ خاطري ضاق = الكون كله ضاق ماهو بقدي
حتى الدموع اللي استحت كبر واخلاق = تساقطت من فوق خدك وخدي
لوحة شعر تبكي على بيض الاوراق = بيّحت فيها من ردى الحظ سدي
ليلة جفا وافراق مامثله افراق = حاولت اعديها وعيّت تعدي