ليلة شتاء ساخنه جدا

قال الرسول صلى الله عليه وسلم (لعن الله المتشبهين من الرجال بالنساء والمتشبهات من النساء بالرجال).

تدور احداث هذه القصة مابين عالم الواقع الممزوج  بالخيال او العكس يعني اللي يعجبكم صدقوه.....

..زي العاده كنت اكلمها (ماي جي اف ) على التليفون ومتسدح ومنشكح ولا افلام السما على قولتهم..وبنت الناس ماغير تحرق في اعصابي مرة..تقص لي يوم لبست ثوب اخوها وطاقيه ونزلت للشارع على انها ولد وراحت للسوبرماركت  ...تشتري عصير ..مشيتها وشوي وتقص لي يوم تملي شعرها جلي وتلبس جنز وقبعه  ونظارة شمسيه وتدخل باسكن روبنز  قسم الشباب ..ومحاكيكم ينطبخ على نار  فايحه....الين وصلت حدي وقلت لها ترضين  البس عباة وطرحه وادخل زواج  نسائي  ...ضحكت وقالت اتحداك ..لانك بتضطر  تكشف  و ترقص وساعتها قل لي وش بتسوي ...قلت هيّن ادخل مشغل نسائي  ...ضحكت هالمره  بكهكهه قالت طيب  رح من ماسكك اصلا ماعندك  سالفه تدخل مشغل نسائي ..لو تشوف الحريم  وكل واحده جايه من بيتها محيوسة وشكلها غلط تقل رجاجيل مالهم شنبات...رح تكفى بالله عليك رح....قلت يعني تتحدينيي ان اسوي نفسي بنت هااه تتحديين!!!قالت ايه اتحداك ..قلت لها خلاص  وشلون اثبت لك ...قالت مادري عنك بس اذا صممت وعزمت تسوي نفسك بنت فعلى الاقل رح اماكن زينه وتسوى وماتقدر تدخل لها وانت ولد...سالتها يعني  كيف؟؟؟ قالت اللي على راسه برج يحسس عليه....قلت لها  يعني ايش برج التلفزيون ولا برج الفيصليه...قالت لي عليك نور برج الفيصليه ...رح للفيصليه على انك بنت ....وتجيني حالة العبط الشبه دائمة..بس بس  صعبه ثانيا ابي اغازل في الفيصليه مو اصير بنت قالت لي  لاحوول انت ماطلتها مغازل  على الاقل ادخلها...قلت لها بس صعبه مره...قالت انا اساعدك باللي اقدر بس انت عزّم ....طقيت صدري وقلت تم الوعد ليلة الخميس بس وش الاشياء اللي احتاجها ....,,قالت لي شف يبي لك  عباة وتنورة  وبلوزة وكنادر كعب ووووالملابس الداخليه ..قلت لها بس بس الى الملابس الداخليه ولا هذا اللي ناقص  ...قالت اوكيه بس لاتنسى تشيل شعر يدك وسيقانك تراك  ياحياتي مشعر ماشاء الله عليك...والوعد الخميس بنشوفك هناك وبنعلمك ونوجهك بالموبايل اتفقنا ياحياتي.......قلت لها افا عليك يوم الخميس بتشوفين جرح يمشي على الارض اطخم يجتاز الفيصليه ومن خلفه الشباب......

وبدات رحلة الاستعداد والتجهيز...طمرت لبنده ,ادور مزيل شعر وزي العاده دربيت راسي وش ازينهم ...لين لقيت نوع مكتوب عليه انها جلاوة حلوة وسهلة الاستخدام ودون أي الم..تذكروا بدون أي الم تنزع الشعر...واطمر محل ملابس جاهزة ...دخلت وقلت سلام عليكم مكن القى تنورة وعباة على مقاسي...(البياع وهو على فكرة يمني) ايش ياولد اش تقول على مقاسك ...(انا) لا لاتفهم غلط اقصد لاختي بس اختي مقاساتها نفس مقاسي (البياع) آه قوول كيذا ربنا يهديك فكرتك على العموم اش نوع العباة  اللي   تبيها اختك ..(انا) –هههههه- عباة يعني في كذا نوع من العبايات كلهم نفس الشي ولالا (البياع) لاماهو صحيح ومين قال لك كيذا غشك شوف ياعمنا في عبايه استرتش وعباية مزركشة وعباية بخيوط وعبايه  بصدر وعبايه بسحاب واحدث نوع عبايه مغربيه..(انا) وش العبايه المغربيه ووش السترتش ممكن تشرح الله يسلمك...(البياع) المغربيه ياحبيب لها فتحتين جانبيتين  الى الركبه زي القمصان المغربيه ...وام سحاب  سهله بس بدل الخيوط سحاب...اما السترتش ياربي عليها اش من عباة  فتنه وآش من فتنه خطيرة كلشي يبين للي يلبسها كل التفاصيل اذا قامت البنت تمشي كل شي كوذي و كوذي ماتتصور كيف قدام وورى ....(انا) بس ..بس ياحلاتي  وانا لابس اقصد اختي لابسه  سترتش  عطني العبايه العاديه ...الا بكم العبايات؟؟ (البياع) 250 ريال (انا) وجع وش ميتين وخمسين  انت صاحي راس مالها عبايه ترى اجل الفساتين بكم ...(البياع) من يقول لك اهم شي للبنات الان العبايات لانها هي  اللي تطلع للناس ...(انا ) عطني بس عبايه  ونقاب وطرحه ب150 ريال ولا تكثر (البياع) بس بتكون نوعيه مو كويسه ترى (انا) ايه لبسة مرت واحده قصدي اختي احترقت عبايتها في المطبخ الحين نشتري لها أي شي يمشيها وبعدين هي تشتري اللي تبي ......(البياع) تبغي شي ثاني ..(انا) ايه ياليت توريني التنانير.....(البياع) في كذا نوع من التنانير قصير ,طويل,فتحه جانبيه ,فتحه خلفيه ,,مخمل ,حرير ..ايش تبغى منهم...(انا) اما لو البس تنورة قصيرة وفتحته ورانيه وهالسيقان تلاصف  كان فضيحه..اقول عطني اطول شي وارخص شي...(البياع) آيش هذا الكلام في احد يبخل على اخته ..(انا) اييه  لاتزيد المواجع  مكافئآت وطارت  وبنزين وغلا والقصف العشوائي من  كل جهه ...الشكوى لله.....................,,,المهم واطق لي تنورة  قصيره بفتحه  خلفيه  وشراب اسود من اللي يلمعون... وجا البياع يوريني البلوزات قلت له لا يكفي  اللي دفعته البس أي قميص من قمصان الكليه كان احد بيدقق...

.واروح للبيت وانصا الحمام ومعي الحلاو ..قصدي حلاوة ازالة الشعر  واقرا التعليمات على العبوة....بللي بشرتك اللي تودين ازالة الشعر منها بالماء...اضيفي قليل من المسحوق وانتظري لمده خمس دقائق,,بعد اذن ابداي بنزع المسحوق  وبنعومة ولطف سوف ترين كيف ان الشعر يزال بسهوله وسلاسة...وسويت كل شي ولما قضت الخمس دقايق بديت بازالة المسحوق ,,,آآآآآييييييي  ماايرووح ألم ,ألم ,ألم  آآآآآآييييييي ياربييييه احس عروق دمي بتطلع من مكانها ,,المشكله لا المسحوق يروح ولا الشعر يختفي مغير جلدي  ينشد لين يتقطع....آآآآهههههههه  وش صار وش المشكله آآآآههه واقرا التعليمات  الصفحة  الثانيه ملحوظة..لاينصح باستخدام هذا المسحوق  لمن  هن ذوات الشعر الكثيف او الرجال....عما توكم تقولونه ..المشكله من قرادتي ماجربته في جزء من جسمي من  عجلتي حطيته على يدياتي وسيقاني ولاخليت ولا كتر (أي جزء ) الا لططته(دهنته بالمسحوق)..آآآآههه يااجلدي ....وبعد معركة طاحنه وبالموس جيليت الاصلي صرت اقشر المسحوق الخرطي والشعر ..وطلعت من الحمام وانا  احمر مو من البياض ولا النظافه الله يسلمكم ولايوريكم مكروه في غالي الا من كثر الجروح اللي فيني .....والبس ذاك الشرب الطويل الاسود اللماع ..وافتح علبة الطيب واكبها على نفسي ..علشان اصير ذو رائحه نفاثه...والبس غويشة من غويشات امي ((كاسره خاطري امي تحط مفاتيح غرفتها عندي...حاميها حراميها)..وانا طالع المح جزمة كعب (الظاهر والله اعلم انها للشغاله) واطمر على سيارتي وكنت لابس ثوب وتحته التنورة وقميص على بالي انه بلوزة خلاص والعباية والنقاب والطرحه في كيس معي واتوجه الى الموقع ....دقيت على خويتي وعلمتها  قالت لي انها بتنتظرني عند هارفي نيكلز من جوا..قلت لها تم...وادخل بسيارتي للمواقف وانزل منها واتلفت ولما شفت ان الجو صافي افصخ ثوبي والبس  العبايه  والنقاب في حركة سريعه مباغته.....ومن مواقف الفيصليه انطلقت فتاة كاملة الانوثة بعبايه شبه ضيقه ونقاب وفوقه طرحه (مهول بعمري ) وتنورة قصيره فتحتها من ورى  وشرابي يلصف ...اخ يالقهر نسيت الشنطة ..بعد بنت بدون شنطة ماتجي انشالله تكون فاضيه..وارجع للسيارة واطلع تلبيسة سنادة الراس وامسكها من طرفها كانها شنطة وامشي بها....وهنا حانت لحظة الصفر...وادخل الفيصليه.

صحيح مادخلتها مثل ماكانت تشتهي النفس مكتمل الرجوله ,مدشنا بالكروت ,جوالي على يدي كانه اخوي الصغير بس ولو دخلتها... دخلتها بعد عام كامل من الحرمان والعيون المتلاقطة كل ما مريت من حولها...دخلتها بعد عام من الطرد والتشويت والتلزق ببني (بنات) الناس الي اعرفهم واللي  ماعرفهم علشان يدخلوني ...ولامن قبلت تدخلني ..دخلتها بعد عام  والشووق في داخلي الشوق ..شوقي لها...لولا الحيا لافصخ العباة ولوازمها واركض في الفيصليه  بس من وين ابدا ووين اروح وماتمر دقيقة الا  واسمع جوالي يرن ترن ترن ترن ..وارد (انا) هلا ..(خويتي) هههه هذا انت اللي مهول بعمرك صلح شكلك  طرحتك مايله على جنب كانها شماغ بزر ..ونقابك واسع ضيقه من ورا ترا خشمك طالع ..ثانيا لاتسرع ياحياتي مافي بنت تسرع وسط سوق ماتجي ماتصير ......وهي  تحكي  وانا داله تدرون وش كان ودي وقتها كان ودي   واحد من المسئولين الكبار  (انشالله لو وزير الزراعه) يجي السوق علشان زي العاده الحريم في جهة والرجال   في  جهة ويازيني وانا منحشر  وسطهم في زحمة الحريم وترفييع في  هالعبايات وعاش  ابو (....)عااااش....وانا سارح والبنت تحكي ماحسيت الا بصوت ضب من وراي يقول لي...مساء الخير والاحساس والطيبه ..والتفت الا  الصوت اطلق من الشكل قنفذ قصدي شاب قصير اسيمر مربي سكسوكة وفي خيوط مربط بها راسه (سماعات الموبايل تبعه) واقول له وجع وش تبي بعد انت خلاص وزعوا الزكاة ...يرد علي البارد ابن البارد ..وش دعوى تونا ماحكينا ويمد لي يده وفيها قطعة ورق مقطعه .واصرخ في وجهه  غربلك الله كرت زي الناس ماعندك وش انت باز بعمرك فيه ياخوي رح حديقة الحيوان تلقى جماعتك  مجمعينهم في الكهف...(في تلك الاثناء الطرحه كانت تحرك قدام عيني واقوم من السهوة واطقها على بنت البكار لزوم الطقاق...)ولا الجوال يرن .(انا)  هلا  ..(خويتي)  ياخبل وش انت مسوي في بنت تسوي بطرحتها بنت البكار ناوي تفضح عمرك..(انا )  يؤ  أي  والله صح..وتوني  بادي اعدل طرحتي الا الضب  قصدي الولد هج...غربل  الله ابليسة الحلوين كل واحد يطرد ورا بنت وانا نصيبي هالعله ...المهم استعدت برستيجي وانصا المصعد (الاصنصير) وتوني ضاغط رقم 2 يعني الدور الثاني والباب بيصك الا يزرق شابين حلوين (امووت واعرف من يدخل هالشباب للسوق ولا حتى الفيصليه فيها واسطة ,يلعن ابو الواسطه) المهم واحنا في المصعد  مازال تاثير اني ولد بادي علي ,,جالس مابيني وبينهم شبر  و يرن موبايلي (خويتي) ياخبله قصدي ياخبل في احد في اللفت يوقف جنب شباب ابعد عنهم البنات ثقل يقعدون في اقصا اللفت مو لاصقين في العيال ...وارجع واجلس في الزاويه ويبدا واحد من الشباب يرسم ويقول لي  يسلم لي هالطول (غربله الله من طولي ) يسلم لي هالقد آه ياليت ماعلى الارض الا انا وانت ياللي في بالي (يؤ يؤ هالكلمة اعرفها زين ياليت ماعلى الارض الا انا وانت  اسمع عيال النسيم يقولونها اذا شافوا ليوناردوا دي كابريوا في فيلم تايتنك) المهم بدت عظامي ترتجف بيني وبينكم اول مرة اسمع كلام حلو وخاثر مدري وشلون بس قام قلبي يدق بسرعه ..وشوي  شوي ويقترب  الشاب مني ...ساعتها هزتني النفاضه واقوم من غير  وعي وانصا ازرار المصعد واجلس اطق باقوى ماعندي على رقم 1 ابي انزل في الدور الاول  لاني حسيت ان حكي  هالولد يدوخ مير لافائده كنا عدينا الدور الاول وانا ماغير اطق على رقم واحد باقوى ماعندي وتونا  واصلين الدور الثاني قام الولد الثاني قال شكلها شبكت ويطلع ويتركني مع صديقه وينصك باب المصعد من جديد علينا وينزل للدور الاول وابو الشباب يطلع لي كرت معطر  ريحته ازين من ريحتي ويسلم له يدي بيد ودي ارفض الكرت يعني اني ثقل بس لقافتي ..ويقول لي ياليت نتقابل بروحنا برا السوق في مكان هادي قلت  على سجيتي مو ازين لك ..قال ايش  قلت له  لاولاشي انشالله ياحبيبي ...قال اوكيه انتظرك الليلة الساعه 3 الفجر تكلمين  وش رايك...وينفتح باب المصعد  وارفع عبايتي بيدي واركض ركضي برا  المصعد,,,وشوي وانا اركض والهث كاني خبله ..الا ويرن الجوال ترن ترن ترن والتفت وراي ويوم ماشفته وراي والا واتسند على درابزين الدور الاول (سور البلكونه) وارفع رجلي  اليمنى  مازالت رعونتي كشاب فيني (انا ) هلاا وشو بعد ..(خويتي) يالفضيحه في بنت تتسند على درابزين لا وبعد ترفع رجلها وهي تكلم بالموبايل وش رايك بعد ترفع تنورتك لاوجب معك سبحة ازين (انا) ياحياتي اصبري علي شوي يبي لي شوية اندماج....(خويتي ) على العموم قلت لك.. باي...واكمل مشورتي في الفيصليه ...ويازينها من فيصليه اذا البنات برا مهولين بانفسهم اجل وش اقول على اللي قدامي اللي متلثمة كانها شامة خيسة ولا اللي فاتشه خير شر ,,واللي يقهرونك بنات عبايات السترتش  استغفر الله استغفر الله تذكرت  مسابقة ملكة جمال العالم اذا لبسوهم البكينيي اللي ماعرف وش فايدته وهالصدور  تقول دجاج ساديا لديها ذالك ...وماغير البنات طردي من مانغو الى ناين ويست ومن ميكس الى هارفي نيكلز وورى كل  بنت مسترتشة شاب مكرتن ومجول(معه كرت وجوال) ولا  اعرف من وين  ادخلوا شكلهم داخلين الفيصليه من صلاة الظهر ونايمين في صالة الطعام ...المهم انا وش   علي من الناس ...وتوني مارة قصدي مار من قدام terranova الاواشوف بنتين سبحان من خلق وفرق الاولى حليوة جسمها صغير مقاسات مقبوله عالميا الثانية لولا الحيا كان سالتها عن كلمة السر شكلها ولد  مسوي مثلي جثة وسمرا ..وانا ماشية في حالي الا ويجون البنتين صوبي وتحكي الاولى ياربيه الحلو ثقلان ليه ..انشالله  واجلس ادربي راسي ابي اشوف من هم يكلمون طلعوا يقصدوني ترد الثانيه شكلها الى الان متعلقه بغرام الصبيان ...امحق على بالها لبنانيه ..تضحك الاولى  قولي شي ..على العموم ياحلوة هذا كرتي اذا طاب  خاطرك من الاولاد الخرطي فعطيني خبر ترانا شلة بنات نجتمع في استراحة في المزاحميه مرة واحدة في الويك اند يعني لاتخافين ياحياتي ترانا محترمات..واخذ كرتها..واول مرة في حياتي احس ان معي رقم بنت ولا قادر استفيد منه ...يعني ادق عليها وش اقول لها والله اذا بغيتي ترجعين لطبيعتك عطيني خبر...وامشي في حالي وتوني متعيده منهم الا  3 اولاد يحتكون في ثلاث بنات...

الاولاد: حنوا عاد ترانا 3 على 3 قسمة عدل سبحان رب جمع بيننا على غير ميعاد ...البنات: ياربييه وش يبوون كح كح قديمييين  ...الاولاد::اصلا من شافكم  يغسل يده ثلاجات الفواكه  تحمدوا ربكم ...البنات::طالعوا من يحكي خيام ماينعرف لها راس من ساس وطالعوا الشمغ بالله هذي شمغ ولا خياش....وتوني  مار بينهم ويقوم واحد من الاولاد يقول لي  ياحلوة وش رايك  فيني  تكفين  خذي رقمي ..وانا على نياتي ااخذ الرقم وتوني ماد  يدي حسبت  القاعده في لافيصليه خذي أي رقم ينعطا لك..,, ..ويهبون فيني البنات ::  لايالسياحيه  واي واحد يعطيك رقم تاخذينه صدق  السوق يلم ...قلت لها  وانا على سجيتي يعني ارجع الرقم ...قالت  لي واحده منهم ...ايه ..وفعلا ارجع الكرت ...ويضحكون البنات  وقالوا للاولاد هههههه  سوينا اللي في راسنا...قالوا لي الاولاد افا عليك ياحلوة تسمعين كلامهم اصلا هم غايرين منك لثقتك في نفسك ...قالوا البنات حلوة هههه هذي حلوة لولا خايفين نجرح شعورها قلنا انها ولد لابس عباة (وهنا طاح قلبي في رجلي  قلت بس انكشفت ) والا واحده من البنيات تفك لثامها وبيني وبينكم مو حلوة الا قطعه الا اكه وعلى طاري اللثام كنت افكر اسوي زيها والبس لثام بس مشكلتي في جبهتي عقدتني ومنعتني ..المهم وتفتش البنت وتقول للولد هااه وش رايك ..ساعتها وساعتها فقط حسيت باحساسين متضادين تصادما في وقت واحد وفي منتصف الطريق..الاول البنت دخلت مزاجي ودك من يكرتنها يعني يرقمها ماتنتفوت هالقطعه الاحساس الثاني بما اني تقمصت شخصية بنت فلازم ما اسكت لها الاهانه بس لو افتش قسما باللله ان يتولاني الشباب بنعلهم ..قمت وش سويت وارفع عبايتي وجزءا من تنورتي ويطلع   ذاك الشراب اللي يلمع هكذا الاغرااء ولا فلاا ...بس وللاسف الكثرة تغلب الشجاعه الشباب رقموا البنات الثلاثة واللي قهرني اخرهم سحب الكرت من يدي.....تحطييييم.

المهم بعد ساعتين لف ودوران انا جعت ...ايه جعت وقررت اتعشى في الدور الثالث ودقيت على خويتي تجي تتعشى معي الجبانه بنت الجبانه قالت خلاص اني كبنت امشي حالي وانها هي بتروح  بارتي في استراحه برا الرياض..المهم رحت للمطعم وبغيت افضح نفسي بنفسي جريت كرسي وقام كل من في صالة الطعام يناظر فيني اثري ناسي اني بنت وجار كرسي في قسم الشباب..ولولا ان الهندي نبهني كانت علوم ..وادخل قسم العوائل لاول مرة في حياتي منذ نعومة اظافري..وكان على عكس ماتوقعته كنت احسب الحريم ذربات الا وش اشوف حوسة...في اقصى الزاوية البعيده بنات متتنجييات ...فوقهم سحابه ماغير تشفييط في الدخان الدنيا  هناك عجه..واول صالة العوائل قالب حوش ولازريبه,, بطاطس مرمي على الارض عيال يتطاقون واللي تجهز الرضعه لولدها واللي تغير حفاظة  بنتها(الله يقرفها)  وقمت لقيت طاوله صغير في النص واروح اجلس عليها وتوني باديه اكل قصدي بادي اكل الا وكاني في منطقة قصر  الحكم بالرياض في ايام العيد ..عجة المتتنجيات وطرقعة علوك الحريم اللي وراي ...لين راسي صدع من كثر الازعاج...وتوني اشفط البيبسي في اخر الوجبه الا ..أخ بديت احس بالحسره واني لازم اروح لدورة المياه.. بس  أي واحده  الرجال اللي تعودت عليها ولا النساء بصراحة صعبه اروح لدورة مياة النساء واحراج بس من جانب اخر فضيحه اذا رحت لدورة مياة الرجال ..اخر شي توكلت على  الله ورحت لدورة مياة النساء وتوني افتح الباب على حياء ولا وش اشوف  هيييييييء (شهقة يعني) ولا بنت بيضا فاتحة ازارير قميصها تعدل لااااااء ما اقدر انطقها فيها رقابه ..من الروعه بغيت ارجع وبنت ثانيه تصلح مكياجها ..(الحين وشوله تصلح مكياجها وهي بتجلس متغطيه في السوق) المهم ولقى W/Cفاضي دخلت وسكرت  الباب وهنا طلعت مشكله جديده (الصغار يتعدون المقطع التالي لانه بس للكبار)....يعني خطر

الحين انا كولد وفي مثل هالاماكن الولاديه  عادي اقضي حاجتي وانا واقف اسرع واريح بس بما اني بنت لازم اجلس على التواليت وبيني وبينكم لو اجلس على التواليت  فانا عارف نفسي باملي الدنيا ويمكن يتعدا الى خارج نطاق W/Cولووقفت بانفضح قدام البنات يعني الوضع كان من جد صعب صعب للغايه ..اخرتها جاني الهام ..فصخت العباة وعلقتها على الباب بحيث مايبان أي شي حتى من تحت الباب وقضيت حاجتي بطريقتي يعني على كيفي..وبعدين لبست عبايتي ..وطلعت ..المهم زي مادخلت زي ماطلعت بنات يصلحون  مكياجهم  قلت في نفسي ياولد تميلح شوي واروح انصا مغسله وابلل اصبعي بالماء وازين حواجبي ولا البنات اللي جنبي يفكون خششهم ويتنحون ...ناظرتهم بعين معصبه وقلت لهم خير ...ماشفتوا  فتاة  من رفحاء ..والله  خوش ياجيل الياي والتلكع.

انتهت منطقة الخطر والحظر.......

وتوني طالع من باب دورة المياة الا وينط لي الشين اللي نط لي اول مادخلت الفيصليه ...(هو) ياعيني  على هالجسم والعيون الساحرات   ...انتي ملاك ولا .(انا) انا بالعن والديك اذا مانقلعت عني مفهوم ...( هو) كلكم  كذا يعني لازم ولد ابيض وطويل ومبينه عليه النعمه ..اهم شي المضمون ..(انا ) العن ابو شكلك يالسيكوند ايديشن ما وراك مضمون ولاقدامك  كلك على بعضك  نقص. سالب ...فارق عن وجهي......ويطلع لي ورقة الظاهر  قطعة من علبة سجاير ولا فاتورة ويقول  هذا الرقم ياليت نسمع صوتك........الا وقليل الادب يمسك يدي وقتها  ووقتها فقط قمت اصارخ ...خلاص باشتري لها غيره ...خلاص باشتري لها غيره وكل اللي في السوق يلتفتون  وافصخ جزمة الشغالة اللي سرقتها من تحت الدرج وعلى راسة وظهرة وقام الولد يركض وانا اركض وراه ..ولاني حديث عهد بالتنانير فرفعت تنورتي ورميت  وعظيتها بفمي ورميت عبايتي وقمت اركض وراه والجزمة بيدي الا اخبطه على راسه  وهو يصارخ فكوني منها ونمر واحنا نركض باثنين من رجال الهيئه الاول قال انظر تلك الفتاة المسترجله رد عليه الثاني انها ليست فتاة بل انها فتى ...عليه لعنة الله هلم بنا خلفه ..وينطلقون وراي والشباب مايفوتون فرصة ..طقاق وبنت الا انطلقوا اللي قام يصارخ واللي يلحق  ورانا...ونطلع من الفيصليه انا لما وعيت ان وراي هيئه وشرطة  قلت الف جبان ولا الله يرحمه...واطمر على المواقف واركب سيارتي  واطلع على شارع العليا ووراي سيارتين شرطة وصالون هيئة وموكب سيارات شباب والمشكله من العجله نسيت افصخ النقاب اللي طرفه كان  على الدركسون ...وصار شكلي يشبه الجراد او البعوضة  او سكان الفضاء... وماغير من حارة  الى حارة .......اليين وصلت  لحارة ضيقة نزلت وتركت سيارتي ...وقمت اراكض ..وثاني يوم البيبي سي(BBC) تذيع قوات الامن السعوديه تجهض مضاهرة نسائيه سعوديه لقيادة المراة للسيارت...والسي ان  ان (CNN) رجال الدين السعوديين يتجمهرون اما الفيصليه ..بهدف اغلاقها...والصحف السعوديه.. .الجماهير الكرويه الطائشة الرعنه تتجمهر كعادتها احتفالا بتغيير مدرب المنتخب السعودي.....واناا مازلت مختبىء في مطعم بخاري في طريق العروبه  حيث اروي لكم هذه التجربه المريره......يعني لاتصدقون أي شي من تلك الاخبار البلد لازالت بخير.