هموم الجامعيييين الجزء الثاني

المكافئآت

عيدية لكل طالب جامعي  ,هذا افضل تعليق على القرار الحكيم قرار ولاكل القرارت  ...بصراحه ادخل البهجة والسرور الى قرارة نفس كل طالب جامعي بلا استثناء .ذالكم القرار(قرار سفلئة المكافائات)  وخصوصا في موعد اعلانه في شهر رمضان جعل كثير من الاعين تخشع وتبكي و تبتهل الى الله بالدعاء على من ساهم في اطلاق هذا القرار والى من اوصل الى المسئولين ان الطلاب الجامعيين ينفقون اموالهم الفائضة عن حاجتهم في صالات القمار الاوروبيه ..او في شراء السيارات الفارهه....بالفعل بالاصاله عن طلاب وطالبات  الجامعات السعوديه نتوجه بالشكر الجزيل الى كل من ساهم في اصدار هذا القرار فهو بلاشك سوف يساعدنا على الاقتصاد وعدم الاسراف في ميزانيتنا وكما سوف يساهم  في تخفيف التخمة الزائده في جيوبنا ........فعلا شكر حار  وشكر بعنف وشكر بكل انواع القسوة (الله يمتحنكم ياشيخ)......بعد ان مصوا دمنا في بدعة صندوق الطلاب اللي من انجازاته انشاء مظلات لسيارات اعضاء هيئة التدريس,منح اضافيه للطلاب من الدول الاشقاء من نيجريا وكمبوديا ونيقراقوااا,اقامة حفلات  بالنيابه عن كل منسوبي الجامعه على الفاضيه والمليانه واذا مالقوا مسئول عزموا بعضهم, وارسال حملات للحج والعمره باسعار رمزية للدكاترة الاجانب وطلاب دول المشرق الاقصى الاندويسين والزيمبابويين..الخ...وبعد ما اكتملت تلك المشاريع الجباره وماصار هناك حاجه لصندوق الطلاب  قرروا ان يتنازلوا عن الدجاجه اللتي تبيض ذهباواصدر هذا القرار.ولكل من ما يصدقني والللي يتوقع اني اتتريق (لاسمح الله) فاحب ان اشير الى بعض ايجابيات القرار الحكيم.......

اولا: طالب مثلي ومثل بقية الطلاب عنده ساعات فراغ واجد يعني طالب طب عنده فراغ 3 ساعات  وطالب علوم اداريه 5 ساعات الشغله سهله يجيب معه سطل(دلو) وعلبة صابون  (فيري بس ترى مو دعايه والله) واسفنجه وكم خرقة باليه ويروح يترزق الله ويمسح السيارات(سيارات اعضاء هيئة التدريس والمراجعين والزملاء اللي عندهم استكرات توقفهم عند باب الكليه ) بمتوسط 3 سيارات في الساعه  والسيارة بخمسة ريال يعني 15 ريال في اليوم يعني في خمس ايام  75 ريال في اربع اسابيع 300 ريال في 9 شهور  يعني 2700 ريال ...يعني عقلانيا وحسابيا  مايعادل مكافاة 3 شهور بتوع الاجازة وبالتالي ماراح يتغير على الطالب أي شي اللهم الا انه يتنشط وتطلع له عضلات في يدياته من غسيل السيارات ورزق حلال من عرق جبينه يعني يتعود على انه يحافظ على القرش,ومنها افضل دعاية للسعوده....وحتى الطالبات الخاملات الهاملات اللي مالهم شغله الا الترزز بالجوالات,, هالقرار الحكيم بيخليهم اكثر استيعابا ويتجهون الى اسثمار اوقات فراغهم  فمثلا بحسبة بسيطة طالبة تجلس ساعه في الصباح في الباص  وساعه في الظهر من اخر محاضره لها الى ان تركب الباص حقها وساعه بعد في الباص يعني 3 ساعات بدل ماتنام فيها ولا تقرقر على هالجوال عن الاشياء  الخرطي  فساتين وذهب وفنانين وشعراء ...تصير الصبح تجي معها كيسة خبز صامولي وعلبة مربى وجبن شرائح وزيتون اسود(النكهه حقت السندويشات) وتصير تصلح سندويشات وتبيع لزميلاتها في الباص او في الكليه واذا ماحصل وحدث  اكتفاء ذاتي فكل ماوقف الباص عند اشاره تنزل الطالبه وتبيع ساندويشاتها على  السيارات ...وطالبه اخرى يكون معها ترمس مويه حاره وشاي ليبتون وقارورة نسكافيه وتصلح شاي وقهوة وتبيع في الباص ...وبحسبة بسيطة البنت تطلع مالايقل عن 400 في الشهر ونقول 100 ريال تروح في المشتروات والرشاوي لاخوها اللي بيجيب لها الطلبات يعني 300 ريال في الشهر يعني زي الاولاد...........او طالب او طالبة دوافير في السابق يحرثون 24 ساعه في شهور الدراسة علشان يتمتعون في الاجازة بس مافي الاجازة فلوس يعني وش يسون وش يسون...اسهل منها مافي شي,, يبحبحون مسالة الضمير والمسئوليه يعني يسون بحوث لزملائهم ممن بحبحها الله عليهم وعلى اهاليهم وصايرين بحبوحييين واذا تطلب الامر يغششونهم في الاختبارات وكل ماده وتسعيرتها.....فلاتلوموني اذا ماقلت باعلى صوتي ..... . قرااااااااار  حكيييييييييييم

مانفعت تلك الافكار وفوجىء الطالب بعد عام دراسي قصير بان الاجازة الصيفيه الطويله مررررة قد اتت, فايضا للقرار الحكيم ايجابياته يعني الشباب مثلا يشتغلون في المقاهي اللي على الطرق السريعه ومنها انها يتعلمون يجهزون شيشهم بايديهم ,وبعد اذا ماقررت الحكومة تبحبحها شوي وتفتح كباريهات منها البنات يشتغلون رقاصات   ومنها يعتبر فن راقي ولابه أي شبهه ..ماحصل هالشي او انه عيب او ينافي عاداتنا وتقاليدنا...فهناك ايضا حل مهم وهو بدل مالكل يشتكي من ظاهرة تسول الاطفال الصغار في الشوارع يصبح لدينا مخزون من الجامعيين والجامعيات يقفون عند كل اشارة وكل واحد منهم معه اشعار نتائجهم او اشعار التسجيل ومنها دهنّا في مكبتنا بدل مايتنطط لنا في الشوارع سكن(سكن=جمع جني بس يكون اسود) ماندري من وين مستوردينهم لنا.....من جد من جد قرااار حكيم

لاحظ المسئولين اطال الله في عمرهم وامد في سعادتهم ..ان الطلاب هداهم الله عند بداية العام الدراسي ينشغلون باستلام مكافات الصيف ..اللي نسوا او انشغلوا عنها(ايه هين انشغلوا عنها الا ماحصل لهم) المهم يهملون وينصرفون عن  جداولهم ويضيع اسبوع  واثنين وثلاثة واعضاء هيئة التدريس ايديهم على قلبهم متى تكتمل شعبهم  ويحضر الطلبة –وفقهم الله – فوجد المسئولون بحنكتهم (ترى مو كل المسئولين مايباشرون او بمعنى اصح مايرجعون للبلد الا بعد قرابه نص شهر من بداية الدراسه) فقرروا ان يبلغوا  طلابنا الاعزاء رسالة بسيطة وهي ان يتفرغوا  لجداولهم  وترتيبها.... من جد من جد  قرااااار حكيم.

بموجب القرار الحكيم ارتئا حلوة ارتئا ..المهم ارتئا المسئولون  بما ان الشعب السعودي معروف عنه منذ قديم الزمان بانه يغرق في كمية غير محدودة من الرفاهييه (اللهم دمها نعمه واحفظها من الزوال) فارتئا المسئولون انه بموجب هذا القرار  سوف يشعر الطلاب الجامعيين –خصوصا اللي يسافرون اهلهم في الصيف ويتركونهم – بشيء من نغزات الجوع والتلوي في الصاله اذا اكتشفوا ان الثلاجه فاضيه فحينها وحينها سوف يحس الشباب بمآسي اخوان لهم يعانون من تلك الظروف مثل اخواننا في الكونغو والمتمرديين المدغشقريين في نواكشوط والحركة التعاونيه في اردبياجون ...,واللي ما يقدر يتحمل يروح مع اهله لابها,, عادي ينطق في الشقه لان كل شي عوائل...عاششششت سياحه داخليه....فلاتقولون عني منافق اذا ماقلت انه فعلاا فعلاا قراااااار حكيم.

نقطة ايجابيه اخرى ازودكم بها من تبعيات هذا القرار ....على النظام السابق المتساهل المتهاون المتعاطف مع الطلبة والطالبات ...مما نتج عنه ان عدد كبير ومهول من الطلبة للاسف بنشروا او بمعنى اصح دردبوا  فمثلا طلاب كلية تربيه صار لهم 8 سنوات وطلاب من كلية العلوم تموّا العشر سنين (من جد شباب ماينعطا وجه) وتاركين هالوظايف اللي كثر التراب اللهم لك الحمد تعجعج فاظيه سداح مداح,,  مافيها احد مما اضطر الدوله  اولا والقطاع الخاص ثانيا الى جلب عدد كبييير مهوول  من الوافدين...يعني يا شباب وياشابات مايصيير لابد ان نخدم وطننا الحبيب ونترك عنا الرباده مو نعتمد على المكافائات دايم....والله استحي اني انهي فقره ولا اقول انه قرار حكيم.....قراااار حكييم

ومن ايجابيات القرار ايضا  ومما يثبت للجميع باننا ولله الحمد لدينا مسئولون واعين وعلى قدر (مطبخية) المسئوليه فقد وعوا الى مشكلة بدات تنتشر في الجامعات السعوديه ...وهي تسلط الدكاتره  واعضاء هيئة التدريس  على الطلاب واتهامهم لهم بانهم شباب لايعي المسئوليه ويعتمد على المكفائات ومساعدة الاهل ... (على ايامهم كل واحد من يوم يتخرج مقضبينه صك ارض وفلوس ووظيفة ولو ينجح بمقبول يودونه للخارج بعثه) فقرروا ان يبينوا لاعضاء  هيئة التدريس ان شبابنا وعي واستوعى واصبح واعيا  ومن هذا المنطلق سوف  ولابد من ان يختشي الدكاتره على وشوشهم وخففوا من تسلطهم على الطلاب......وخروا عني ولا احد يمسكني  والله  لا قولها من جد من جد قراااااااار حكييم.

ومن ايجابيات القرار الحكيم ايضا....الحد من الطبقيه التي بدات تنتشر في الجامعه أي والله اتكلم جد يعني مع كل مكافاة وخصوصا مكافئات الصيف الشباب والشابات ..اللي يغير جواله واللي تبدل خواتمها واللي مع كل مكافآه مفصل له ثوب ..فمع هالقرار الحكيم  راح تختفي تلك المعالم السخيفة وبالتالي تزول الطبقيه من الجامعه ويصبح جميع الطلاب  سواسيه فراعي الكريسيدا وراعي الماكسيما  مابينهم فرق وعلى النقيض الاخر راعي الفياجرا اللي كل اسبوع سياره جديده ولون جديد  يصلح مع راعي البي ام دبليو  اللي كل يوم مايندرى وشو يسوي بها مرة كوبيه ومرة كشف ومرة فضيه ومرة سودا ...والطالبات الضعوف اللي ملتزمات بالنظام الرسمي في الملابس يتساوون مع بعض والبنات و اللي يدخلون الجامعه بخدماتهم   واللي كل يوم يافلبينيه يا اندونيسية يا اريتيريه مع بعض يصلحون وبالتالي تختفي الطبقيه اللي انتشرت بسبب الجوالات والخرابيط الثانيه بتختفي....عاد ما اقدر اقول غير والله من جد من جد قرار حكيم.

ومن ايجابيات القرار الحكيم ايضا ا مايترتب عليه من زيادة التلاحم والقرب بين الطلبه والطالبات (يعني الشعب وانتم بكرامه) من جهة والمسئولين من جهة اخرى ...يعني بناءا على هذا القرار سوف يتوجه الطلبه كل بداية عام دراسي الى المسئولين لانهم ماعندهم قروش من اخر يوم في السنة الماضيه  ويطالبونهم بشراء وتوفير الكتب اللازمة عليهم كما انهم سوف يطالبونهم بشراء المذكرات اللازمة لكل مقرر (على فكرة المذكرات غير شرعيه بس لولا الله ثم هي كان مايتخرج من الجامعات الا 10 طلاب والفضل يعود الى الدكاتره العقد )هذا بالنسبه للطلبه والطالبات ولاننسى ان الطالبات ايضا سوف يتجهون الى عميداتهم من اجل صرف  عدد 3 تنانير و3 بلايز حسب التطقيمه قصدي الزي الرسمي الموحد لان الطالبات وش بيبدن عليه قيمة كتب ولا اكل وشرب ولا,ولا,....ومن ايجابيات القرارات ايضا  زيادة التلاحم بين الطلبه فباسمي واسم عدد كبير من الطلبة الجامعيين نطالب باوتوبيس حالنا حال الطالبات خلاص من وين بنجيب فلوس البنزين  وبشرط ايضا يكون اوتوبيسنا  لاصق باوتوبيس الطالبات مو يلصقوننا باوتوبيسات شركة بن لادن ......,واذا قرروا ان يزيدون من التلاحم والترابط يارب يارب,, ويخلون النظام في الجامعات مختلط,, وبالتالي  نقتصد في بنزين توصيل الزوجات والاخوات وكذالك بدل ما الواحد يجلس يطق حنك مع خويته على الموبايل خلاص يشوفها في الجامعه ويهرج معهاويوفرون قيمة الفواتير . ومنها بدل مايطقمون بالغالي ويروحون للاسواق  خلاص يصير كل شي على المكشوف(الله قادر يا كريم يخلطوننا مع بعض ولا عصير لاكوكتيل في ماما نوره  يارب يخلطون الطب اولاد مع التربيه بنات في مبنى واحد قادر على كل شي يارب...) يعني بصراحة ماقصروا في تراحم وتلاحم اكثر من كذااااا...وخرووا عني باصيح من جد من جد من جد قرار حكيم.

من  ايجابيات القرار الحكيم ايضا ,,صرف نظر الشباب والشابات السعوديين الى جهات اخرى ومزاوله  هوايات وانشطة اخرى فمثلا الطالبات سوف يتحولن الى الخياطة ويصير عندنا جيل خيّاطات وكوافيرات سعوديات وايضا طقاقات تخيلوا معي طقاقات جامعيات اذا جا وقت العشا عاد قلبوا انقلش يعني يغنون سلو ورومانس ..وايضا الشباب سوف يتوجهون الى ممارسة الرياضة في عصر الاحتراف ومنتخب دبّلها دبّلها عفوا منتخب الفشيله ...ناس مامعهم شهادة رابع ابتدائي وكل واحد معاشه على 20 الف ريال وسيارته شبح ويترزز بجواله على الجرائد  قال ايش قال الشباب لازم يروحون للجامعه طيب من بيفشلنا بعدين في كاس العالم وكاس آسيا وكأس الخليج.....شايفين كيف يعني الواحد يروح ويجي ويلف  ويدور بس مايقول الا والله من جد من جد قراااااار حكييييl

* ارسل لي صديق من البرازيل عبر البريد الالكتروني يسألني اذا ماكان صحيح ان كل خريج جامعي في  السعوديه  يلقى وظيفه على طول في اقل من اسبوع ولالا؟؟؟ فجاوبته بان هذا الكلام صحيح فلكل خريج جامعي  على طول وظيفة في المرتبه العاشره على الاقل   وفي مدينته وراتب مغري  ومقدم راتب شهرين وامر اركاب درجة اولى الى أي بلد ,لاوكل سنة يسوون سحب جزاهم الله خير على خريج  او اثنين يعيينونهم  بمرتبة وزير (في شي احسن من كذا) ويقال والعلم عند الله ان الدور هالسنة على الوزارة راح تكون لواحد من خريجي  كليات الزراعه في المملكة.....

سالني صديق لي في  جمهوريه السلفادور الاشتراكيه الديمقراطيه....اذا ماكانت المكافأة  اساسا كافيا لاحتياجات الطالب او الطالبه ولا يقل عن حاجتهم؟؟فجاوبت ذالك الصديق بان نص ارصدة البنوك السعوديه هي في الاساس للطلاب الجامعيين يعني الطالب اذا كانت يده سايبه ومبذر وعنده جوال وسيارتين  وياكل كل وجباته في المطاعم ومشترك في الانرنت كل هذا يالله يالله  ينصرف ربع المكافأة او ثلثها ..يعني بصراحة ولا احد يزعل احنا ولله الحمد كطلبة ماراح يتغير علينا  شي اللهم ارصدتنا بتقل شوي

*  سالتني صديقة لي من صامطة في كندا  ..وش اكثر شي تندمت عليه انا شخصيا بعد صدور  هذا القرار؟؟ .....  فجاوبتها : ياعزيزتي اكثر شي تندمت عليه هو الشهور اللي كنت اتابع فيها يزيد مواقي بناتي  (المذيع الرياضي في ام  بي سي) قصدي جمال   الحاج (مذيع النشره الاقتصاديه في ام بي سي) واتابع اسعار البترول  من صنف الى صنف وماغير اشيل شيلات في صالة بيتنا ...آووه يالبترول آووه يالبترول ....وعليهم عليهم ...احرقوهم احرقوهم  واقول في نفسي المكافاة بتصير الف وخمسميه ان ماصارت الفين  واخرتهاا...ما اقول الا حسبي الله  ونعم الوكيل  اجل لي صار برميل البترول 100 دولار وش بيسوون  فينا بيطردوننا من الجامعه على ما اظن....

سالتني صديقة لي وهي سياسيه من فنزويلا من ردة فعل القرار  على الطلبة والطالبات  وهل سوف  يتذمرون؟؟ بصراحة ولا اخفيتس سرا ياصديقتي ان معظم الطلاب فرحوا لهذا القرار نتيجة للايجابيات الوارده اعلاه  واصلا الحمدلله انها بس على كذا ماكان شي اعظم ...(وبيني وبينكم كل ما اجتمعوا المسئولين نحط يدنا على قلوبنا وش بيطلعون بعد ..وماغير ادعي الدعاء اللي علمتني اياه امي ...اللهم حوالينا ولاعلينا...)  ولا احد يصدق بان عدم ربط حزام الامان يعتبر مخالفه في بلد مازال البعض فيها يمشون في الشوارع بدون لوحات.............

في الختام هذه الصفحة وان كانت تختلف عن مثيلاتها فهي تعبر عن راي صريح وواضح في قرار صادر ولاترمز هذه الصفحة الى أي شي آخر ...على العموم اذا مزعلتكم (الكلام للمسئولين) فسكروها  لوحدها واتركوا بقية الموقع ....وفي الاخير هذي حكمتي في الحياة(اللهم اجعلني مجنونا ينقلون الناس عني ولا عاقلا ينفرون الناس مني.....)هذي حكمتي فيما حكمتهم (مدوا رجولكم على قد الحفتكم...) بس نسوا ان الحفتنا كل مالها تكش من كثر مايغسلون لنا الله يشهد صرنا ننام جالسين  ومع كذا سيقاننا تطلع ,,الوطنيه ياسادة ليست مادة تدرس في رابع او خامس ابتدائي الوطنيه احساس بالراحة والامان والمساواة والاستقرار  في الوطن ودمتم  .............. بلاك هورس