حش نسوان!!!

 

موضوعي عن الحش وطبعاً الحش كلنا عارفينه. من منا ما يحش ((تكلم عن نفسك)) بس بغيت أني أوضح بعض الأمور للي ما يعرفون يحشون.

وللحش عدة طرق وكل الطرق تجيدها المرأة وتعرف خباياها أما الرجال ما يجيد منها شيء وحتى لا جا يحش ودك تكفخه بلوح من سوء الترتيب في الحش يعني لا جا يحش ما ودك تسمعه أصلاً ما يعرف كيفية حبك الحشه تحس أنه كذاب عشان كذا أنا باتبع المثل اللي يقول عط الحش حشاشه لو يحش نصه ولا تظنوني أني أقصد بس الحريم في الحش لا وربي حتى البنات ((يا مكحلها)) وأعتقد تعرفون المسميات الثانية للحش؟ الحش يعني القرض ويعني السلق ويعني النميمه والغيبه عند هل الخير الله يحفظهم.

المهم الحش تخصص فيه النسوان بحكم الفراغ والروتين الممل والحش يختلف من بنت لبنت ويقولون إنه أقوى الحش حش الحوامل تحشك وكنها جالسه تشوف برنامج تعليمي يقول سيدتي كيف تجعلين من طفلك حشاش هاوي ويا ويلك لو يجي الحشاشه الطلق وهي جالسه تحش فيك والله ان تطلعك أبو النجا تاجر المخدرات وأمام مسجد الزاوية وقت الفراغ ويا ويلك لو يجتمعون ثلاث حشاشات عليك في الشهر التاسع وربي أن يطلعونك متزوج فيفي عبده عقب ما طلقت سهير زكي ورميت لها العفش بالشارع.

يقول نابليون بونابارت لابغيت تزعزع الثقة في خصمك ابعث له نمامه يقصد حشاشه على مستوى فرنسي تنشر بينهم الأكاذيب((أعرف وحده حشاشة وربي لو مستعين أبها نابليون كان أنشرت له الخبر في الولايات المتحدة كلها خلال يومين مع كندا وباريس وسويسرا والصرار والأحساء هدية فوق البيعه<.

والحشاشة فيها ميزة غريبة لا جات تحش تعدل جلستها الظاهر أن الحش مثل السعله (الكحة) عند المتخصصين فيه يعني لا شفت لك حرمه تعدلت في جلستها خل وجهك قبله. ومن ميزات الحشاشات هو اختيار الموعد المناسب للحش يعني عمرها ماتحش وهي تبي منك شيء بالعكس ماترضى عليك لكن من تخلص حاجتها علقتلك الرمانة ((الرمانة ذي حديده كبيره مربوطه بسلاسل شفتها في فيلم لعادل إمام وهم يعلقونها له يبغون يذبحونه ويغطسونه بها في البحر)) لكن مع هذا الحشاشات فيهم حنيه وطيب سبحان الله تناقض رهيب وأذكر وحده عجوز طيبه حنون تحبني كثير يقال لها الخاله موضي تقول يا ولدي يا فهد بعطيك نصيحه يمك واحفظها تكفى قلت لبيه انصحي قالت عمرك يمك لا تعطي حشاشه قفاك ((ادري ياخالتي ما تشوفيني معطيك وجهي؟)).

وفيه مره من المرات بنت حبت اني أحش معها في بنات جنسها قالت لي رفيع وش رأيك بالجنس اللطيف ((الله يكفينا شره)) قلت تقصدين النساء قالت يعني من غيرنا جنس لطيف؟ ((ابد والله ما عاد ألطف منكم غير تماسيح نهر النيل باسيوط)) قلت لها انا بصراحه ما حب الحريم لأن الحرمه مثل الريال المعفس ما تخلص منه وحتى يوم تخلص منه في الدكان وانت تشتري بيبسي رجع لك وانت تشتري ماعون فول قلابه من مطعم أبو بصيل >حش على الهوا مباشرة(( لا تظنوني يا النسوان اني حشاش لا وربي جالس أجاملكم)).

وطبعاً ما هوب كل الحريم يحشون لا أنا أعرف بنت حلال يوم تجي مجمعه لها كم حرمه حشاشات أول الليل ومسكوا في وحده من خوياتهم حش وقامت عليهم بنت الحلال اللي تكره الحش وقالت لهم لو سمحتوا كل وحده تحترم نفسها ماله داعي نجيب في طاري البنت أنا ماحب الحش اللي بتحش تحش برا بيتي صحيح انها نذله وبنت كلب ولا فيها خير وشايفه نفسها مدري على إيش لكن مابي أحد يحش فيها ((الله يجزاك خير ليت كل الحشاشات زيك كان ماحتجنا لحش الحوامل)) وازيدكم من الحش بيت لا جوا الحريم اللي عندها يغيرون الموضوع قالت تدرون انكم خذت ذنب في حشكم فيها يعني وذمتكم الحقيرة ذي اللي ماتسوا نعالكم تستاهل الواحد ياخذ فيها ذنب؟؟

الله يقطعهم ذكروني بالنسوان لاجوا لأمي الصبح وتجمعن وبدو مسلسل التشهير تقول كنه كل وحده قبل النوم كاتبه على مراية الزينه حقتها بقلم الروج وش بتحش فيه بكره وربي مسكينه أمي تقول ودي أبهم كل يوم يجوني بس المصيبه خايفه أجمعهم على الشر وآخذ ذنبهم نعنبو دارهم أقرب مالهم حبيب يحشونه وبعض الاحيان تحش مع الشاهي وقطعة البخصم يعني حش مزاجي ويا ويلك من ذيك المره اللي تحشك وهي تئزئز لب وربي تقشر في ظهرك كنها تقشر حب شمسي.

 والحشاشة سبحان الله لا جلست جلسة حش ادمان مثل مدمن الانترنت يمرالوقت سريع اللهم هي اعنف أشوي ما تحس بالوقت يعني لو تجمع خمس حشاشات في سياره واحده وتسافر فيهم تركيا عن طريق البر من الدمام اول ما يوصلون تركيا يقولون لك مشاء الله كن حنا رايحين للأحساء مسرع وصلنا ((داري يا عيوني وكني أشوفكم مشتاقين للعودة)) وطبعاً في هالطريق زوجوا وطلقوا وسجنوا وكل واحدة لاخلصت من حشها قالت أستغفر الله كني حشيتها ((لا بسيطة خذي نفس)) وغير كذا الحشاشة طريق الدمام رياض دمام ما يوفي معها ولا يقند راسها لأنه الطريق كله ما يمديها تحش في أول رفيقه.

 وسبحان الله الحشاشة لا طحت عليها وهي توها خالصه حش تشوف آثار الحش في شفايفها >مسود< تقول توها مخلصة بكت زقاير أبوبس ولا حجرين شيشه.

عاد أنا يوم شفت الحالة زادت الايام هذي قلت بقول للحشاشات وش سمعت عن اللي تحش وهي وكيفها اللهم اني بلغت.

يقول أحد علماء التربية وهو الدكتور لاوس روبن أن أكثر الأطفال عرضة للخطر والإصابات والإهمال هو اللي أمه حشاشة الحرمة تجلس تحش وناسيه ولدها في الحوش يحارش ويبارش لين يصيبه مكروه وهي جالسة تكاكي من الضحك والحش والبزر المسكين ابتلي له بأم لو ترضعه كثر ماتحش كان صارت صحته تنافس داود حسين ونبيل شعيل وفهد الحيان.

وفيه دكتور اسمه لوربينتو فلارميتو يقول إن الحش والانفعال في طريقة الحش تسبب الجلطة وتصلب الشرايين((يارب يطلع فيه دكتور صدق بهالاسم ويسألونه ويكشفون كذبك)).

ويقول بعد أحد كبار العلماء الفيزيائيين وهو الدكتور جورج الخامس أن الحشاشة بعد كل حشة يطلع منها ريحه تشبه ريحة الثوم من جسمها يعني اللي بتحش تحش من الساعة 9 صباحاً لين الساعة 4 العصر لأن مدته سبع ساعات (( يعني على كذا اللي متزوجه لو تحش زوجته بعد الساعه تسع بالليل نام في الفندق ذيك الليله )).

 ويقول بعد الدكتور الهامرت لورين يقول إن الحش حالة نفسية عادة ما تصيب أصحابها بالشيخوخة المبكرة ويسبب التجاعيد((على كذا ليلى طاهر عمرها ما حشت وأمينة رزق أكبر حشاشة بالدوادمي)

ويقول الدكتور لورنس هاملت((خذ راحتك أكيد تشوف فيلم منتهي وجالسين يعرضون أسامي المخرجين والمصورين والمساعدين وجالس تظهر من ذا الأسامي)) أن الحشاشة إذا حشت أكثر من ساعة في اليوم يعرض قلبها للدق 120 مرة في الدقيقة (يا أنا أعرف لي حشاشة قضى عليها الزمن يدق عندها أربع آلاف مرة في الدقيقة)   وأنه يشكل خطورة في الأوعية الدموية ممكن يؤدي للوفاة السريعة (( يارب مدير تعليم البنات  يكثر من الحششش ))

طبعاً لا أحد يصدق أمزح أدري أنه قلة قليلة من النسوان اللي تحش ما تتعدى 99% ولا الباقي الله يحفظهم ما غير يئزئزون لب.

الصفحة الرئيسية