اوان القرقاص

مساء الخير واسعد الله اوقاتكم بكل خير وسعادة هالصفحة وزي مانتم شايفين انها بالخط العريض ,لانها مصممة للشيبان يعني اللي من اسناني ,,اللي شيبوا يالله حسن الخاتمه  لجيل رائع تربى على عدنان ولينا وتابع جراندايزر  ,جيل اول ماشافوا السيريلاك حامت كبودهم حسبوه شي ثاني ,جيل الفنايل العلاق وصراويل السنة جيل عاصر امراض العنقز والمشق والكحه بكل صمود وقوة جيل يخدر لاشربوا بيبسي ..الى جيل عظيم, اخر الاسبوع يلعبون اتاري والتلفزيون يسكر 10 وعشر الا ربع الا كل واحد في فراشه,,جيل في العيد يواصلون واذا جت الساعه 8 الصباح الا كل واحد دايخ وقاضب فراشه يصحون الا العيد فاتهم  جيل بناتهم اذا كشخوا  حطوا ظفاير وعيالهم  حلاقة نمرة 3 ولا مرة مرة قصة التواليت الشهيره جيل  يعزون الشتا والبرد علشان شبة الحطب والحنيني والفقع وطلعات البر وهذا موضوعنا لهذا اليوم ناس من ذاك الزمان الرائع ..(اوان القرقاص).

شلة شباب صداقة من كليات متفرقه في جامعة الهنا ياليتني كنت انا ,اقصد جامعة الملك سعود وبمناسة العام المليء بالامطار يالله دمها نعمه واحفظها من الزوال ونظرا لاننا شباب وانتم بكرامه يعني لاسوق مسموح لنا نروح ولا حديقة يرحبون فينا ولا اهالينا ياخذوننا معهم ,,وملينا من استراحات الثمامة ومن الحراس عبدالقدوس الهندي وفرج شحاته الصعيدي فقد قررنا ان نطلع للبر ونخيم ونكشت هناك,,خصوصا اللهم لك الحمد جدول هالسنة الدراسي قلة ادب كل 7 ايام  فيها خمس ايام اجازة ,,وبالفعل اجتمعنا في ملحقنا العامر  (عبدالعزيز ,سلطان,ممدوح ,هاني ) علشان نوزع الادوار ونرسم الخطه وطلعنا بما يلي انا علي رواق الخيمة والمخدات والكنابل سلطان عليه جيب  اللكزس والبوصله وجهاز ماجيلان والهاتف النقال حق الاقمار  الصناعيه  ,ممدوح عليه البساكيت والخبز والجبن والمربى والعسل والكباريت والراديو والحلويات ايه والطحينيه وهاني عليه المجلات والكشاف والورق والفحم وابو فروة والبطاريات وشوزن ام صتمه للحمايه عن خيمتنا العامره..في يوم الانطلاق يوم الثلاثاء وزي مافي الخطه سلطان بيمر علينا كلنا وبنروح معه والبس ذيك التكميله واغطي راسه بقبعه  ومعي شنطتي وكيستين شيبس من الكبار وتوني نازل الا وتقابلني امي في الصاله وتقول لي الله الله وانا امك بعلم جدانك قلت وشو يا اغلى الناس قالت لي فقّع  وقرقاص وعذاليق وبقرا وجنا  ..قلت لها سمي الله يحييك وش ذا قالت لي وانا امك شي يجي مع الامطار والربيع  حلو يهبل ايه ولاتنسى الحميض..قلت ابشري ان لقيت احد يبيعهم في الخط باشتريهم لك قالت لي مالت عليك وعلى ام جابتك (شتمت روحها) انت وربعك جمعوه بيدينكم ياجعلها ماني قايله... قلت انتي تامرين امر..ويمرني  سلطان وننطلق ونتوجه الى الصمان ويسال هاني سؤال بريء ياشباب ظنكم البر  بيكون زحمه وارد عليه وانا كلي ثقة لا ياهاني الزمن تغير وانا اخوك هالحين الناس حدهم حدهم ان مرة مرة راحوا لدوار العويضة بالثمامة لفوا بعيالهم عليه دورتين واجروا دبابات وخلاص وهذا البر ولا المتطورين بعد اردى ينتظرون هالجنادريه يشترون كليجا وتمر وقال لك هذا البر..ويثني الاخ سلطان على مقولتي ويقول وهو صادق الزمن هذا خطير ويقول لنا ممدوح شباب سموا ويناولنا بيبسي وتشيبس وبساكيت ومكسرات (قلبنا السياره معوثه يعني بين قوسين مزبله ) ونشغل الميوزك والطرب الاصيل باسكال مشعلاني وضحك وسواليف وحلات هالجو ان  الواحد مايكتم على نفسه يعني كل شوي طالعه في السياره ريحه وكل يقول موب انا وكل ساعه فاتحين النوافذ في هالبرد علشان الريحه تروح , وبعد ثلاث ساعات وصلنا للصمان  ولكن للاسف مافيها مغز ابره كلها سيارات وعالم وامة لااله الا الله,, ولا هاني يقول لنا اجل البر فاضي ولافيه احد اجل وش هالعالم  وهالزحمات  والتفت على الاخ سلطان واقول له لايكون هنا موقع نادي الفروسيه الجديد ولا بيفتتحون الجنادريه ويرد علي سلطان تصدق اثر ابوي يقول بالله سيروا على نادي الفروسية الجديد شوفوه هو زين ولالا يانجيب خيولنا هناك ولاخليناها في الملز ويتدخل ممدوح ياشباب ماصار الا الخير اكييد بنلقى لو متر في متر فاضيه نطق فيها خيمتنا بس انتم دوروا زين والله بيرزقنا..  ونلقى مساحه فاضيه على طعس ونوقف عندها ونبدى في نصب الخيمه وحنا نغني عليهم عليهم وراهم وراهم وماندري الا رجاجيل جايين يمنا ويقول  ممدوح والله الى الان عادات البدو والفزعات موجوده ويحكي واحد منهم  اقول يالربع  لاتنصبون خيامكم هنا قلنا ليه عسا ماشر الارض فيها شي قال لا بس هالمنطقه محجوزة عاد انا عصبت وياشيني اذا عصبت عاد ماعرف امي من ابوي (لاتقولون سهله ابوك بشنب امك بدون لاني باقول لكم بايخه ) المهم قلت له عسا ماشر وين احنا ياخوي ترى الارض ارض الله وين صارت محجوزة منه  ...احنا جينا قبل واحنا حجزناها رد علينا وقال معصي قلت لكم محجوزة يعني محجوزة وبتشيلون عفشكم  من هنا  قلت له ماعليك زود معصي انت وماحنا شايلين عفشنا وش بتسوي قال ياورع تعوذ من  ابليس لايجيك علما ما شفته قلت علم ايش ثانيا ماني ورع بلا قلة ادب  زين  خلنا محترمين,, قال يعني مانتم رايحين ابدا قلت ابدنين ..قال اخر ماعندكم رديت عليه ايه ممدوح جب الشوزن ام صمته  من السياره شكلي بارتكب جريمة في هالبر ,,رد علي اجل شوزن ام صمته ,زين وانا مناحي بن ابوي... ياورع ..قلت سم قال لي  موب انت  انا اهرج مع ابن اخي (ابناخي) جب الكلاشينكوف من الدتسن قلت له كلاشينكوف صدز ولاتمزح تراني استهبل مامعنا شوزن قال لي ايه كلاشينكوف صدز قال هاني من اللي مع ارنولد شوارزينيجر في الافلام طعطعطع  قال  الرجال مدري انت وش تقول بس انا جايبه من الكويت تهريب قلت له  وش رايك ابناخك يجلس و ممدوح يقضب ارضه قال لي وش ابناخك قلت له يعني الورع قال لي وبتمشون,, قلت له الله الله اصلا وش يجلسنا ياخي المكان محجوز  فماله داعي المشاكل ولا لك راي ثاني قال لي اشوفك عقلت قلت يارجال والله ترى مو خوف من  الكلاشينكوف بس انا حكمت عقلي وبصراحة احس اني بايخ شباب يالله على السياره رد علي لاوالله انتم من ورعان المدينه قال له سلطان رجاءا ماحنا ورعان الورع ابناخك  الله يخليك له لاتغلط علينا المكان وبنخليه لك  فخلاص الموضوع انتهى  ونركب السياره واقول لسلطان بالله شغل لنا شي حزايني علشان اللي صار لنا قام سلطان الله يكرم اصله وشغل لنا كلوديا شمالي  (روء بالك روء بكرة الدنيا ....) ومشينا ندور موقع ثاني.

ممدوح الله يكرم اصله حاول يغير جو الحزن اللي فينا وقام يقول نكت بايخه زي وجهه فيل طلع نمله وانحاش ليه لان اخوها جا وبعوضة عضت ذبانه قالت يووه قرف وماغير  يناولنا من هالبساكيت ...واحنا ندور لقينا مكان صغير محاط من كل جهه بمخيم هو صدق صغينون بس يكفينا  كلنا ..ونوقف سيارتنا وننزل نطق خيمتنا  ونغني عليهم عليهم وراهم وراهم  ..وتونا نحط ركاز الخيمة (الركاز حسب معلومات الخشبه اللي في نص الخيمه ) يباغتني الاخ هاني بسؤال محرج ..قال ياشباب وين الدريل علشان نثبت الاوتاد قال ممدوح وشووو وش دريله  سلطان حب يداري على هاني قال الله ياخذ ابليسك دمك خفيف الله يرجك ياشيخ مو تني من الضحك ... انا طبعا كنت افكر  بالكلاشينكوف الى ذاك الوقت فقلت ياهاني دريلنا ماله الا سلك يشبك في فيش الكهرب ما يشبك في بطارية السياره  قال ممدوح بصوت عالي هييي انت واياه وش دريله ياخي ثبت الاوتاد بحصا وش دريله فشلتونا الله يفشلكم ..وبينما  كنا في معمعة العمل الا ويجي يمنا رجال كبير في السن ومحترم ويقول وانا عمكم ماكن  مخيمكم بيكون صغير ..قلنا له لا الله يسلمك كبير وبيكفينا انشالله قال يعني انتم الحين عددكم اربعه واهلكم اذا جوا على الاقل مانتم صايرين اقل من تسعه قلنا له أي اهلنا الله يسلمك احنا الاربعه بس ...قال انتم الاربعه بس اجل قلنا نعم قال بس وانا عمكم ماتشوفون حولكم دار مادار (دارمادار مو لعبه هذا مصطلح يعني يحاوطكم قصدي حولكم من كل الجهات )مخيمات عوايل ولاما فطنتوا لهالشي ..جيت انا بحكي معه الا ويصرخون الشباب تكفى يالعصبي اسكت ويتقدم ممدوح علشان يتكلم معه ..ياعمي الله يرضا لي عليك اولازي  مانت شايف البر ممتلي مافيه مغز ابره يعني وش بيدينا ثانيا احنا شباب محترمين والله ان محارمكم زي محارمنا ( ايه هين ياممدوح غربلك الله مرقم اللبنانيه  اللي تدرس اختك فرنسي ) ولو شفتوا منا شي اذبحونا وقطعونا ...قال الرجال ..وانا عمك  اللي قلته زين بس ولو ماهي الاصول ولا من الادب انكم تحطون خيامكم هنا ماينفع  وانا عمكم ماينفع ..المحارم مافيها لاتهاون ولا لعب رد عليه ممدوح تراك حرقت دمي بعمكم وعمكم يخوي صكوا على محارمكم حتى الزباله لاتذبها الا الشغاله  ..يعني  وين  نروح تراكم  يالشياب عليتوا قلبنا كل شوي بقولتكم محارمكم  اسمع كلامي ورح لمخيمك وخلنا نكمل شغلنا ولايكثر...قال الشايب كذا وانا عمك قال ممدوح ايه ..قال الشايب انا نصحتكم ياولدي بس ماتسمعون النصيحه ومشى لمخيمهم وما مرت عشر دقايق الا هاني يصرخ شباب شباب شوفوا خيول تتسابق ..قلنا لايكون هالمخفه صدق ان هنا في نادي فروسيه ونطل الا في اشياء تركض صوبنا بس الله العالم ماهي خيول لاااء لااااء... انحااشوا جمعوا اغراضكم كلاب بوليسية من اللي طولها على طولنا ...وبدت الخبصه ونجمع اغراضنا واحنا نصارخ الله يلعن هالشايب ..انا جلست اصارخ الله يذكرك بالخير يالكلاشينكوف المهم وقدرنا الله وركبنا سيارتنا الا والكلاب شرفت علينا واحنا نصارخ وسلطان يشغل السيارة وممدوح يقول نسينا البساط برا قال له هاني وهو يصيح ياخي انت ماتشوف رح اجل جب البساط بس الله يرحمك مقدما ..ويحرك سلطان بالسياره والكلاب ورانا تقل موكب المهم بعد ساعتين بالسياره حسينا ان الكلاب توقفت عن مطاردتنا وكل واحد مننا قلبه في رجله من  الروعه اللي جته وهاني الله يستر علينا وعليها غرق المرتبه الخلفيه من الصياح والدموع  وممدوح وانا نحاول نسكته ونهديه وسلطان ساكت وعلى وجهه علامات الثقه سالناه وين رايح بنا ياسليطين قال ماعليكم بوديكم لبر متاكد ان ما احد يدله قلنا له ارفق على البنزين قال ماعليكم اضمن لكم بيكفي  في السيارة تنكيين ومعي جالونين اضافيين ..وبعد ساعه وانا نمشي وسط الرمال وكلنا متاكدين ان الاخ سلطان ماعنده ماعند جدتنا وصلنا لمكان غريب  كله اخضر في اخضر وعين ماء وسعة صدر..وفاضي مافيه احد..معقوله ياربي سلطان يصير صادق ويدل هالاماكن ....وننزل ونتفقد الا وماحولنا احد ..ياربييه مايصير ارض خضرا كانها بساط اخضر وبحيره كبيره ياربي معقوله..

المهم نصبنا خيمتنا وجلسنا وبدينا بالسواليف وامرنا حاجبنا قصدي ممدوح بان ياتينا بمالذ وطاب من الطعام واذا بممدوح يطلع لنا بعلبتين حجم عائلي من الطحينيه وجبن كرافت سائل والا احنا نقول له ويحك ياغلام اين الخبز والبسكوت ويرد علينا لهمتوه الله لايهينكم واحنا في السياره قلنا وشلون يعني قال هاللون مالكم الا الطحينيه والجبن وشوية مربى ولاننا اصحاب مواقف منذ نعومة اظافرنا رضينا بالامر  الواقع وصرنا ناكل الطحينيه والجبن بنفس مفتوحه وكل واحد مننا يلعب على نفسه يقول حلو زين يهبل ...وفي المغربيه كذا مر علينا راعي بدوي معه شوية غنم بيسقي الغنم من العين ويشوفنا ..ومن الزهق رحنا نتلزق فيه ونسولف معه ساله سلطان عن اسمه قال لنا اسمه ذيب بن ذيبان بن دويخ سالته انا بكل براءه انت راعي على طول يعني عندك شي ثاني تسويه قال تسيف ارعى الغنم بالنهار و ابيع جلودها للحضر واحلب الشياه والخلفات واشرب من حليبها  وابيع بعضه ..في هالوقت  مفشلنا قصدي  هاني قال له يعني عادي تلمس ديودها ما يقولون لك شي ازواجهن ..وهنا رديت على هاني (مشكلتي اني بسرعه انزل لمستوى المتحدث ) قلت يا ذكي لاتفضحنا هو  ما يحلبهم الا اذا قفوا الازواج الرجال مبين عليه ذهين ..الراعي شوي وينهبل قال هييو  انت واياه وش تهرجون وش رجالهم الغنم من متى لهم رجال .. ممدوح تدخل بسرعه وحل الموقف وقال يارجال  يمزحون معك لاتاخذ في بالك..الا تدل مكان نحصل فيه جنا وقرقاص وبقرا للاهل ومكان نفقّع فيه بدل ماعندنا شي نسويه قال هناك تنزحون حذفة عصا ورا التل هناك تحصلون ربيع....المهم غابت الشمس ومن دوخة المشوار والطقاقات اللي صارت في الصبح رحنا ننوم ...عادي شباب وطافحين طحينيه ومربى وجبن .. من يوم صكوا شراع الخيمه بدا تسريب الغازات ومرت حوالي نص ساعه زحير وطقاع وروايح اخبر اول مادخلنا الخيمه كان فييه ذباب بس حتى الذباب ماقدر يقاوم ... من يجلس معنا بيظن اننا نتقاوم في الطقاع بس الواقع اننا كنا نعاني ..الى ان حسيت انا ان في شي اكبر من الغازات في بطني ..وكل ماجيت اقاوم احس اني ما اقدر..فاتحت الشباب قلت ياشباب وش رايكم نوسع اللعب شوي بصراحه اخاف اطلع من الخيمه في هالليل بروحي  ومادريت الا انهم كلهم يصارخون لالالا الله يقرفك برا برا الخيمه وسلطان وهو متلطم يصارخ الله يلعنك ابعد بعيد بعيد مرة مرة واروح وانا في عز الازمة وابعد عن الخيمة حوالي 20 متر واخذ وضعية الجلسة المناسبه (ابوبز ) وبديت ارفه عن نفسي واغني سامريات لابو نورة وخالد عبدالرحمن ولاتقول ان الليالي فرقتنا لطلال مداح ..وشوي شوي اسمع شي يزحف حولي ياربيه هذا هوا يحرك اوراق النباتات ولا وشو .وكل شوي والصوت يزيد ويزيد والتفت الا اشوف بعيني هذولي اللي بياكلهم الدود تمساح صحراوي يناظر فيني وانا اغني السيل ياسدرة الغرمول وكل ماله يقترب وانا ابعد شوي شوي ووضعي صعب لاني قادر اقوم واتحرك لانها بتصير فضيحه وبعدين كل بيصير يناديني بالخايس وتوني في منتصف العمليه الفسيولوجيه الطبيعيه وانا اناظره وهو يناظرني تذكرت نوال يوم تغني اربع سنين نتطالع بالعيون لاهو يدري من اكون ولا انا ادري من يكون...بس بالعيون ...اهوش عليه بيدي والتمساح يفهمها غلط يحسبني اناديه ويجي اقول له كش كش بعييد اسمعه يطلع صوت حسسستسستس.....واناظر بعيني ولا هو  كل شوي يقترب مني وانا ازحف شوي شوي المشكله اتحرك وفي شي لاصق فيني من اليبوسة ماطاع ينزل ويفكني وانا ازحف وجلستي غلط  ولا يهجم علي ومن الروعه قفزت واثر اللي كان لاصق فيني من قوة الدفع يتطاير وينشب في وجة التمساح  وما اشوف الا التمساح يشتنج و يتقلب ويصرخ توبة بس فكوني من الكيماوي وانا اضحك عليه واقول جزاك واقل من جزاك يومك تتعرض للمواطنين العزّل ,وماطالت السالفه كلها عشر دقايق الا زهقت روحه من الريحه ومات,,وانا الا استعيد وضعي وبرستيجي والبس صراويلي وارجع للخيمه منتصرا بشوشا ,,

في الصباح الباكر ..اصبحنا وافطرنا  فطور ابهه مربى وجبن وطحينيه ( يعني قال لك متعشين مندي ) المهم وبعد الفطار استعدينا بنطلع نفقّع بالسيارة ونمرح الليلة ونرجع بكره ,,وركبنا السياره مع سلطان ,,واحنا مسفهلين ونغني ياتاكسي ياطاير طاير هدي السرعه شوي (اغنيه اشتهرت على ايام طفولتنا وطلعت في جلسات) والا نروح لنفس المكان اللي دلنا عليه راعي الغنم ولا نشوف امم تفقّع وعالم وسيارات ساعتها هاني قال يالله وين بنلقى فقع شكلهم شخلوا الارض شخل ويرد عليه ممدوح خلك رجال وماعليك بتلقى رزقك..انا مدري وش فيني متعاطف مع هاني من اول الرحله قلت والله لو نفقّع بايدينا ورجلينا ماراح نحصل الا فقع ولا ثنتين ..عالم زحمات فوق مايتصوره العقل ,,مادرينا الا سلطان يطق صدره ويقول ماعليكم انا بابعد بكم شوي اكيد بنلقى مكان مافيه زحمه .. حاولنا نثني سلطان ولكن لاجدوى وينطلق بنا الاخ حوالي ساعتين بالسياره وكل ماقلنا له ابعدنا ..لانضيع ارجع بنا يرد علينا وخشته مالينه طحينيه  اجل وشوله جايب ماجيلان معي  .. نقول له يابابا بس كفايه  حرام كفايه, ائاعدين ليه ماتئوموا تروحوا ..نيفيا نيفيا (انا مو نصراوي بس سلطان هلالي ) يقول ما عليكم وبعد ساعه ثالثه وصلنا لارض  معظمها بساط اخضر ويوقف بنا  سلطان ويقول هنا بتلقون فقع ماعليكم اضمن لكم ...وفعلا ننزل  خوينا هاني الله يمسيه بالخير داعبنا بسؤال قال بالله كيف اعرف شجر الفقع من غيره..ومادرينا الا ممدوح يقبل عليه ..فقع فقع عمرك شفت الفقع له شجر انت ووجهك..وانا قال لك باشرح لهاني قلت الفقع تلقاه نبته خضرا صغينونة زي الجزر..قال ممدوح  انثبر لا احط هالجزرة في الي انت خابر (قصده في صحن السلطة الف مرة اقول لكم بلاش التفكير السيء ) المهم بدينا نفقع بعد مافهمنا  هاني كيف يميز الفقع اول ربع ساعه مرت بسلام وهدوء وسكينه وشوي سلطان و ممدوح يتجهون شمال  ويدلون ينادوننا هنا الفقع اكبر حبات اكبر تعالوا تعالوا ونروح لهم انا وهاني وفعلا كان الفقع هناك اكبر.. ويدور بيننا نقاش علمي هل الفقع يحوي على مادة اليورانيوم ويهجدنا ممدوح قال فقعوا وماعليكم بس وشوي الا سلطان يصرخ تعالوا تعالوا اكبر فقعه في العالم باطلعها الحين ونروح يمه ونبدا نساعده ونقول هيلاهوب (مو حق البنات هيلاهوب حقت البحاره) ونتعاون ونجرجر واذكر هاني يقول لنا كنها معدنيه هالفقعه واني من المزاحر صفقته على علباه (اسفل الراس من الخلف ) قلت له شد وانت ساكت يالمصدي وتونا مطلعييين هالفقه الا .............بووووووووووووووومببببببببببببببب طلعت الفقعه لغم وانفجر فينا وجيب اللكزس صار فتات وربنا وقانا ماصار لنا شي بس كل واحد صار فحمه من قوة الانفجار اضافة الى شوية رضوض حتى الفقع  اللي طلعناه صار صحن مشويات مشكله  حتى بالماريه (يعني بالاماره ) اذكر خمس جرابيع صاروا مشويات وهم طايرين في السما يقولون لنا غربلكم الله وشوله تحفرون وتخربون علينا.. 10 سنين واحنا والالغام جيران.....الله يخرب عليكم زي ماخربتوا علينا.

وبعد ساعه مشي واحنا محروقين نقابل سياره عسكريه  ونجلس من الفرحة  نلوح بايدينا انقذونا انقذونا هييييي احنا هنا وفعلا تجي السياره العسكريه يمنا

ويقولون لنا ...هيي ياابه شنوا جايبكم هني ..هسه ماتعروفون ان هذي منطقة محظورة وخطره لانها على الجبهه مع   الامبرياليين  (اعداء الريّس ) ...

قلنا لهم وشو وش ايمبريالينييه..الاخوان كويتييين.

يردون علينا ..لاتقولوا كويتيين لا هسه نقتلكم مافي شي اسمه كويت هذي فرع من العرااااق العظيم..هيجي الريّس علمنا الله يخلي الريّس الله يطول عمره..

ردينا عليهم يعني احنا الحين في العراق مو في السعوديه

قالوا لنا انتم هسه في العراق السعوديه وراكم  بحوالي 120 كيلو متر

ويقول احد العسكريين وهو يؤشر على هاني ويسأله كاني اعورفك انت امك ماجده؟من الماجدات

واحنا عاد رغم كل ماصار مانعقل كريناها ضحكة اجل امك ماجده ولاعب علينا طول هالسنين ومفهمنا ان اسم امك رشا ..اخس عليك يابن ماجده

ويرد علينا اعلاهم رتبه عسكري سكتوا منك له هسه أي واحد بيحتشي فرد حتشايه ما اكون ابن عبد رب الزهره ان مانسفن موخه بالسلاح نسف..

رد عليه سلطان وبقية اثار الطحينيه في فمه..انت ابن عبد رب الزهره ماني مصدق انا ابن عبد رب الورده طلعنا قرايب كييفك وشلونك   وطبعا احنا مانتوصا كريناها ضحكه

مادرينا الا الرشاش اللي مع اكبر العسكريين دخله في خشم سلطان وقال له هسه انت تتريق عليّا يا برميل أي قسما بالله لاخلي امك الماجده تبتشي عليك الليله..

قلنا له بصوت جماعي ..الله يسلمك الحين ماجده ام من هذا الكديش (سلطان ) ولا هذا (هاني) ترانا صدق رفقه عشر سنين بس مانعرف اسامي امهات بعض..

رد علينا واحد منهم (اللي كان يسوق السياره) انتو شنوا  حجايتكم انتم من وين اصلا؟؟

وقتها جلسنا نفكر وش نقول لهم..خفنا نفهمهم اننا سعوديين ضايعين يعتقلوننا ويطلعوننا في تلفزيونهم على اننا لاجئين ولا هاربين من ديرتنا  ونصير علك في نشره اخبارهم وجرايدهم وخفنا ننحاش يقنصوننا زي الطيور ..هاني الله يستر عليه دنيا واخره من كثر مايتابع مسلسلات كويتيه عقب التحرير اقترح اننا نعطيهم ساعاتنا وكنادرنا وشعار جيب اللكزس (مساكين حسبوه حلق ذهب) وكانهم ماشافونا بس هم الله يستر عليهم ركبونا معهم وذبونا على بعد 5 كيلو  من الحدود واضطرينا نكمل باقي المسافه مشي ودخلنا مع رعيان غنم للسعوديه واكرمونا البدو الى ان وصلنا حفر الباطن وكلمنا على اهالينا وارسلوا لنا فلوس ورجعنا للرياض وهناك اتفاق واجماع كلي على ان تكون هذي اخر مرة نفكر فيها نطلع للبر مهما كان الثمن ....اصلا احنا مو وجيه بر احنا حدنا حدنا شارع الثلاثين في العليا واذا حبينا نغير جو رحنا شارع انكاس في الروضة قال ايش قال بر

وفي الختام الحمدلله  اللي عقلنا لاهالينا سالمين وغانمين مثل   ماعقل ولد يسرا عليها في اخر مسلسل اوان الورد...ومازال اللغز قائما ماجده تصير ام من سلطان ولاهاني.............بلاك هورس